Lukas 2:1-52
2 Txãn ensuꞌ Romate jxkaahsa Augusto Cesaraꞌ txajx jxkaahni kiwesu nyafxçxah nasatx jxuka eçte ãsxkahn jxkaakh,
2 Siriate uꞌpsa neꞌjweꞌsx Cirenio yaasesaꞌs.
3 Açaꞌ jxukaysatx uꞌjwaꞌj jiꞌphuꞌ txãaweꞌsx upxni çxhabte, eçte ãsxkahn.
4 Txãa paꞌgak Joseꞌ Nasaret çxhab Galilea kiweju kasehna uꞌj Judea kiwen Belen çxhab Davxid upxnite, Joseꞌ Davxid jiꞌkh yuꞌ naa paꞌga.
5 Belenna uꞌjweççxaꞌ, txajx nyu yuuwaꞌjsa Maria yakhku uꞌj. Nawa Mariaꞌ nasak jiꞌph yuꞌ.
6 Açaꞌ Belente ũsíyna, Mariaꞌs ãçãꞌwaꞌj en ãhteꞌ,
7 kxtee jiꞌphuk nyafx nçxiꞌkkuẽꞌs. Saꞌ paadeewaꞌj yat ãhmeeteꞌ, klaa sãꞌjĩni yattek luuçxkuẽꞌs yapçxa khikh.
Dxus angel piisxáa-thegsaweꞌsxtxi weꞌweni
8 Belen utxasu kuswa dehméetx piisxáa-thegsa uꞌp yuꞌ.
9 Naapkaçxhaꞌ Dxus angel teeçx vxyaak txãaweꞌsx uꞌpnisu jxuka eenaꞌ kweethna. Açaꞌ txãaweꞌsxaꞌ wala ũukhtxi.
10 Nawa Dxus angelaꞌ naꞌwẽk weꞌwe:
—Ũukhnuwe, yuwe ewsa jxũna yuhth, txãꞌsaꞌ maawa jxuka wala weçxaatxna.
11 Ãçxhaꞌ Davxid çxhabte teeçx upxku iꞌkweꞌsxtxi nweꞌwewaꞌjsa txãꞌ Dxus kaahni Kristoꞌ.
12 Açaꞌ thegyaꞌ uꞌjçxaꞌ, uyuuneꞌkwe luuçxkuẽꞌs yapçxa klaa sãꞌjĩni yatga khikhni ũste jĩçpkaçxhaꞌ,
13 txãa dudtey txãa angel yakh wala kuh angel cielujũweꞌsx vxyaatx, Dxusna weçxana:
14 ¡Dxus ẽe walateweꞌsxaꞌ seenaꞌ yuh ew yuuk!
Naa kiwete nasa wẽtwẽt fxiꞌzewaꞌjaꞌs ũsku peeygãhçxa jĩꞌtx.
15 Txajũꞌ angelesweꞌsxaꞌ cielun kiꞌ sxawedna uꞌjweçpkaçxhaꞌ, piisxáa-thegsaweꞌsxaꞌ puutx weꞌwetx:
—Belenna uꞌjwega Dxus ptaꞌsxniꞌs thegyaꞌ kĩh yũutewa uyuꞌnjaꞌw jĩna.
16 Txajũꞌ wala dud uꞌjtx Belenna, saꞌ Mariaweꞌsxtxiꞌ uytxi txãꞌwẽ luuçxkuẽꞌs klaa sãꞌjĩni yatga khikhçxa uꞌpte.
17 Saꞌ luuçxaꞌs uyçxaꞌ, Dxus angel maꞌwẽ weꞌweniꞌswa jxuka ptaꞌsxtxi Mariaweꞌsxtxi.
18 Txajũꞌ vxitetxwa txãꞌwẽçxaçxáa ptaꞌsxteꞌ, wala kuh weꞌwena neeyũutx.
19 Nawa Maria yuꞌ, txãꞌwẽ yũuniꞌs jxuka peçxkanamée ũusteçxáak yajkxna fxiꞌzeꞌ.
20 Txajũꞌ piisxáa-thegsaweꞌsxaꞌ Dxus angel maꞌwẽ ptaꞌsxtewa txãꞌ kxtey yuutewa uyçxaꞌ, Dxusaꞌs wala weçxana sxawedna uꞌjtx.
Jesus leꞌçxkuẽyna Dxus yatna jxũna uꞌjni
21 Upxnijũ teeçx kiꞌsuteꞌ luuçxkuẽꞌs cirkuncidãyyaꞌ uꞌjçxa txãa entey JESUS yasetx, Maria nasa jiꞌphumeyna Dxus angel maꞌwẽneꞌ yaseꞌs ptaꞌsx txãꞌwẽytxi yase.
22 Moises leyaꞌ nasate ãçãꞌsatx maꞌwẽneꞌ kiꞌskajaꞌ açaꞌ Mariaꞌ txãa entxi kxtey yuuçxaꞌ, Jose yakh luuçxkuẽꞌs Jerusalen çxhabna jxũna uꞌjtx, dxuus yatte Dxusna weçxana neeweꞌweyaꞌ.
23 Dxus leyte weꞌweçxaꞌ: Nyafxte piçkuẽ yũuteꞌ, Dxus jĩi nvxiitwaꞌjaꞌ jĩꞌk txãa paꞌgatx Dxusna neeweꞌweyaꞌ uꞌj.
24 Vxite ahte Dxus leyte weꞌweçxaꞌ: eꞌz tub çxihme meeçxawa tub luuçx jxũna uꞌjçxa dxuus yatte ikhwaꞌjaꞌ jĩꞌk açaꞌ txãꞌwẽy yũuyaꞌ uꞌjtx.
25 Txãn ensuꞌ Jerusalen çxhabteꞌ teeçx piçthẽꞌj Simeon yaasesak uꞌpuꞌ. Txãa piçthẽꞌjaꞌ Dxusna yuuçxáak neeweꞌwena fxiꞌzesa yuꞌ, ¿bagaçx Israelweꞌsxtxi nweꞌwewaꞌjsa paꞌjakx? sũhna ũythãsna. Açaꞌ Dxus Espirituꞌ Simeonaꞌs kaajiyuꞌkh
26 Nweꞌwewaꞌjsa Dxus kaahni Kristoꞌs uumey uywaꞌjaꞌs.
27 Saꞌ Dxus Espirituꞌ Simeonaꞌs kaayakiꞌkh dxuus yatna uꞌjwaꞌjaꞌs, açaꞌ uꞌjçxaꞌ uyku txãꞌwẽ Jesus njĩꞌjweꞌsxaꞌ Dxus ley jxkaahniꞌs kxtey yuuyaꞌ Jesusaꞌs nuypaꞌjaçte.
28 Açaꞌ Simeonaꞌ txãa luuçxkuẽꞌs yakhçxa naꞌjĩnak Dxusna weçxa:
29 Idxaꞌ adx yakh puutx weꞌweniꞌs kxtey yuug naꞌ ãçxhãꞌ adx uuwaꞌjaꞌs ũsuneꞌga weçxana uukahn.
30 Nweꞌwesaꞌs nasa jxukaysa dxiꞌpte kaag.
31 Açaꞌ txãꞌsaꞌ adx yafxju yuu uythu.
32 Txãaíi Israel nasa meetxwa eenaꞌ kweethwaꞌjsaꞌ naꞌ Israelweꞌsx yuutxiꞌ jweeíiçxáa weçxweçxa kaayakiꞌjwaꞌjsaꞌ jĩꞌk.
33 Simeonaꞌ txãa luuçxkuẽꞌs txãꞌwẽ weꞌweteꞌ, Jose ptamweꞌsxaꞌ kuhtx yajkxna neeyũu.
34 Açaꞌ Simeonaꞌ bedekĩyçxaꞌ, Jesus njĩꞌj Mariaꞌs ptaꞌsxku:
—Mwẽesẽꞌçx, naa luuçxkuẽꞌ Israelweꞌsxtxi wala kçxhãaçxhaꞌjwaꞌjsaꞌ nawa txãꞌsna jiyusamée yuꞌ wala jxpubawaꞌjsataꞌ. Mpaꞌyajkxwe wakx txãꞌsaꞌ wala açetxna.
35 Açaꞌ maaçxah txãꞌwẽ açewaꞌjsatxna açaꞌ maaçxah txãꞌwẽ jxpaꞌgawaꞌjsatewa txãꞌwẽ yũunisa içxa ũusuy weꞌthu yãjãni naꞌwẽ yuuna jĩk.
36 Kxteeaꞌ Fxanwel niisa, Aser jiꞌkh ũsuꞌ wala thẽꞌkhuẽsa Ana yaasesa. Txãꞌ Dxusna selpisaak yuꞌ saꞌ wala knaꞌsatey iimiꞌk nawa siete anxuteꞌ nmiꞌaꞌ uuk.
37 Ãçxhaꞌ nmiꞌ uuni oçxenta y kuatro anxuꞌ, nawa dxuus yatte puꞌvxitumée een isak Dxusna selpiina, orãyna nes yuꞌ.
38 Saꞌ Anaꞌ utxaana kũhçxa, Dxusna weçxaçxaꞌ ptaꞌsxku Israelweꞌsxtxi nweꞌwewaꞌjsaꞌs ũythãsna ũssaweꞌsxtxiꞌs: Naa luuçx txãꞌwẽ yũuwaꞌjsaꞌ jĩna.
Nasaretna sxawedni
39 Txajũꞌ Dxus jxkaahni leyaꞌs kxtey yuuçxaꞌ, Galilea kiwesu txãaweꞌsx çxhab Nasaretnay Maria Joseweꞌsxaꞌ sxawedtxi.
40 Açaꞌ luuçxkuẽꞌ walaana uꞌkh Dxus yuweꞌs jweeíiçxáa piyana, txãꞌsaꞌ Dxusíi puꞌçxhiꞌneꞌ naa paꞌga.
Jesus doce anxu jiꞌphçxa Jerusalenna uꞌjni
41 Jesus njĩꞌjweꞌsxaꞌ anxu iisatx Jerusalen çxhabna Paskua fxiestan uꞌjweꞌ.
42 Saꞌ Jesus doce anxu jiꞌphpkaçxhaꞌ, Jerusalen çxhabna fxiestate kiꞌ uꞌjtx, maꞌwẽneꞌta anxu iisa uꞌjweꞌ txãꞌwẽy.
43 Açaꞌ fxiesta pçuuteꞌ, Maria Jose yakh sxawedna uꞌjtx. Saꞌ txãaweꞌsx jiyunimeete Jesusaꞌ Jerusalentee neeyũuk.
44 Nawa njĩꞌjweꞌsx yuꞌ, Jesusaꞌ nasa wala ksxavxyte yuhna sũhnaçxáatx teen uta dxiꞌthe uꞌj.
45 Txajũꞌ nweꞌsx ksxavxysu jxuka pakweçxawa uymeeçxaꞌ, Jerusalen çxhabnay pakweyaꞌ sxawedtxi.
46 Saꞌ tekh ensuꞌ dxuus yatte ley kaapiyaꞌjsaweꞌsx ksxavxyte wẽsẽꞌjna paapẽjxna uꞌptetx uy.
47 Txãꞌwẽ luuçxkuẽçxáaçxawa txakwe wala leyaꞌs jiiçxa ew pasteꞌ, jxukaysa kxtee wẽsẽꞌjna ũssaꞌ wala kuh yaakiꞌtx.
48 Txajũꞌ njĩꞌjweꞌsx uyçxaꞌ, kuhtx yajkx saꞌ njĩꞌjaꞌ naꞌjĩk:
—Idxaꞌ ¿kĩjxaꞌga ptaꞌsxmée txãꞌwẽ neeyũu? Kweꞌsxaꞌ wala nxusna pakwethaꞌw jĩteꞌ,
49 Jesus pasçxaꞌ:
—Adxaꞌ Adx Tata jxthãasniçxáꞌs selpiina uꞌpthu açaꞌ ¿kĩjxaꞌkwe adxaꞌs pakwéꞌ? jĩteꞌ,
50 txajx pasniꞌsaꞌ jiyuyaꞌ ãjãmeetaꞌ.
51 Txajũꞌ Jesusaꞌ neyweꞌsx yakh Nasaretnay sxawedna uꞌjçxa txãaweꞌsxtxi nwẽesẽꞌjnak fxiꞌze. Açaꞌ txajx njĩꞌjaꞌ maꞌwẽ weꞌweniꞌswa jiyumeeçxawa txajx ũuste peçxkana yuꞌ meek yajkxna fxiꞌzeꞌ.
52 Txajũꞌ Jesusaꞌ walaana uꞌkh Dxus yuweꞌs jweeíiçxáa piyana, saꞌ Dxus dxiꞌpte ew yũuçxak fxiꞌze, nasaa dxiꞌptewa txãꞌwẽy.
