Lukas 20:1-47
20 Teeçx enteꞌ Jesusaꞌ dxuus yatte Dxus yuwe ewte nvxiitwaꞌjsaꞌs ptaꞌsxna ũsteꞌ, sacerdote npiiçthẽꞌj vxiteꞌ Dxus leyaꞌs kaapiyaꞌjsa vxiteꞌ judiu nthẽꞌjsa txãaweꞌsx paꞌjçxaꞌ
2 naꞌjĩnatx pẽjx:
—Idxaꞌ ¿kim jxkaathega dxuus yatte txãꞌwẽ juunaꞌ yũu? Kim jxkaathe txãꞌwẽ yũuçxawa mpeetaꞌsx jĩteꞌ,
3 Jesusaꞌ naꞌwẽk pas:
—Adxwa iꞌkweꞌsxtxiꞌ pẽjx yaꞌwath açaꞌ txãꞌsaꞌ mpaaswe.
4 Juan Bautistaꞌs ¿kimga jxkaah yuꞌte bautisãykahn? ¿Dxus wáꞌ jxkaah meeçxaꞌ naa kiwete piçthẽꞌj jxkaahni wáꞌ yuꞌ? jĩteꞌ,
5 txãaweꞌsx pweꞌsx naꞌjĩnatx puutx weꞌweꞌ:
—¿Maꞌjĩna pasukxthaꞌw? Dxusneꞌ jxkaah jĩwaçwa, txãꞌwẽ Dxus jxkaatheꞌ ¿mjĩyaꞌkwe Juan ptaꞌsxniꞌs jxpaꞌgamée? jĩna.
6 Açaꞌ naa kiwete nasaneꞌta jxkaah jĩteꞌ, kweꞌsxtxi kwet wãatatahçxa ikhetxna, nasaꞌ jxukaysa Juanaꞌs ew jiitaꞌ Dxus yuwe ptaꞌsxsatewa. Txãasa kweꞌsxtxiꞌ txãꞌwẽ yũutxna jĩꞌtx.
7 Txajũꞌ Jesusaꞌs pasçxaꞌ:
—Juanaꞌs kimneꞌ jxkaah bautisãykahn nawa jiimeethaꞌw jĩteꞌ,
8 Jesus pasçxaꞌ:
—Adxwa kim jxkaathe txãꞌwẽ yũuçxawa ptaꞌsxmeꞌnja jĩk.
Mjĩisaweꞌsx patron nçxiꞌkaꞌs ikhni yakh kaajaꞌdaꞌjni
(Mt 21.33-44; Mr 12.1-11)
9 Txajũꞌ Jesusaꞌ naa ejemploꞌsku ptaꞌsx:
—Teeçx piçthẽꞌjaꞌ txajx kiwete jxuka uwa uhçxa mjĩisatx ew neeweꞌweçxa wala txaçx uꞌkh.
10 Saꞌ uwa thẽꞌjeçteꞌ, kiwe namuꞌ teeçx selpisaꞌs kaakh kiweepaꞌga pẽjxyaꞌ. Nawa kiweꞌs mjĩisaweꞌsxaꞌ txãa selpisaꞌs pãpãçxa kĩh yuhwa dukhmée kaahtx.
11 Açaꞌ kiwe namuꞌ vxite selpisaꞌs kiꞌ kaakh. Nawa txãꞌsnawa txãꞌwẽy iiwẽesxuna pãpãçxa kĩh yuhwa dukhmée neeutx.
12 Txajũꞌ kiwe namuꞌ kiꞌ vxite selpisaꞌs kaakh. Nawa kiweꞌs mjĩisaweꞌsxaꞌ txãꞌsnawa kpãꞌvxitçxa dukhmée neeutx.
13 Txãꞌwẽ yũuteꞌ, nmehteꞌ kiwe namuꞌ naꞌjĩk: Ãçxhaꞌ ¿kĩh yũukiꞌth? Meeçxaꞌ adx nçxiꞌk wedxnisaꞌs kajaꞌnja. Açaꞌ txãꞌsaꞌ ũukhçxa txãꞌwẽ yũumeewáatxna jĩçxak kaah.
14 Açaꞌ mjĩisaweꞌsxaꞌ kiwe namu nçxiꞌkaꞌs uyçxaꞌ, txãaweꞌsx pweꞌsx naꞌjĩnatx puutx weꞌwe: Ney uuteꞌ, kiweꞌs naathẽꞌj iiyamuwaꞌjsana. Açaꞌ ikhega, khĩçxa kiweꞌs kweꞌsx iiyamuꞌnjaꞌw jĩçxa
15 eka kutxiꞌjçxa ikhtxi jĩk.
Txajũꞌ Jesusaꞌ txãꞌwẽ ptaꞌsxçxaꞌ pẽjxku:
—Txãꞌwẽ yũuteꞌ, kiwe namuꞌ txãa mjĩisaweꞌsxtxiꞌ ¿kĩh yũukx?
16 Txãꞌwẽ yũupaꞌga kiwe namuꞌ txãa mjĩisaweꞌsxtxiꞌ jxuka ikhçxa kiweꞌs vxitetx ũsuna jĩteꞌ, txãꞌwẽ ptaꞌsxniꞌs wẽsẽꞌjçxa naꞌjĩtx:
—Dxusaꞌ kxtee paꞌj yuꞌ wedxmeena jĩꞌtx.
17 Txãꞌwẽ pasteꞌ, Jesusaꞌ txãaweꞌsx dxiꞌpsu thegçxa naꞌwẽk ptaꞌsx:
—Txãꞌwẽ yuuneꞌjmeeteꞌ, ¿kĩjxaꞌçxáakiꞌk Dxus librute naꞌwẽ weꞌweꞌ?:
Yat txaahsaweꞌsxaꞌ: Naa kwetaꞌ selpimeꞌ jĩçxa wãatãhtx,
Nawa txãa íik yat makwesanawa çxhãçxha neewewaꞌjsa yuuna paꞌj.
18 Açaꞌ maawa txãa kwette iikasaꞌ jxuka çxkateteetxna. Meeçxawa txãa kwet nasaa kajkwekhẽ weteçxaꞌ, jxuka kuꞌçxina jĩna fxiꞌjniꞌ.
Gobiernoꞌs dukhwaꞌjaꞌswa pẽyni
(Mt 21.45-46; 22.15-22; Mr 12.12-17)
19 Txajũꞌ sacerdote npiiçthẽꞌj vxiteꞌ ley kaapiyaꞌjsaweꞌsxaꞌ jiyutx txãa ejemploꞌ txãaweꞌsxtxi weꞌwenitewa. Saꞌ ũusaçxaçxa txãa dudtey Jesusaꞌs tud wẽetx. Nawa Jesus juꞌgusa nasa wala kuh ũsteꞌ, ũukhçxa kĩhwa yũumeetaꞌ.
20 Nawa kĩhteçxáawa ewmeete nvxiht-yaꞌ sũhçxa thegsa kaahtx. Açaꞌ txãaweꞌsxaꞌ Jesusaꞌs ew paapẽysa naꞌwẽ yuh weꞌwena utxaatx, jxkaahsaꞌs ewmée weꞌwetewa jiyuçxaꞌ neꞌjweꞌsxaꞌs pãatxhĩꞌkhyaꞌ sũhçxa.
21 Saꞌ naꞌjĩnatx paapẽjx:
—Kweꞌsxaꞌ idxaꞌs jiithaꞌw. Idxaꞌ isasaçxáꞌsgu ptaꞌsxiꞌ, Dxus tasxte paꞌjwaꞌj dxiꞌjaꞌs kaapiyaꞌjna. Saꞌ nasaa jxkaahna yuꞌkxpehnitx nwẽeseꞌjeꞌçmeeg, txãa paꞌgatey idxaꞌ nasa ewsa naꞌwẽ thegsatx jiyumey juꞌgu yuꞌçmeeg.
22 Ãçxhaꞌ naꞌwẽthaꞌw jiyu wẽjẽꞌ: Jxkaahsa Cesaraꞌs vxyu dukhte ¿ewmanx? meeçxaꞌ dukhmeete ¿ewmanx? jĩteꞌ,
23 ewmée yajkxçxa txãꞌwẽ pẽjxna ũstewa Jesusaꞌ jiyuçxa naꞌjĩk:
—¿Kĩjxaꞌkwe adxaꞌs ewmeete nvxiit wẽjẽꞌ? jĩçxa
24 txãaweꞌsxtxiꞌ teeçx vxyu musx pẽjxku. Saꞌ:
—Naa vxyuꞌ ¿kiim dxiꞌpaꞌs jiꞌphna, saꞌ kiim yaseꞌs fxiꞌjnina? jĩteꞌ, txãaweꞌsx pasçxaꞌ:
—Cesar dxiꞌpaꞌs jiꞌphaꞌ saꞌ txajx yaseꞌs fxiꞌjniꞌ jĩtx.
25 Açaꞌ Jesusaꞌ naꞌwẽk jxkaah:
—Cesar jĩꞌsaꞌ Cesaraꞌs dukhwaꞌjaꞌ. Saꞌ Dxus jĩꞌsaꞌ Dxusna dukhwaꞌjaꞌ jĩk.
26 Txãꞌwẽ nasaa dxiꞌpte isasaçxáana pasteꞌ, Jesusaꞌs ewmée vxit-yaꞌ ãjãmeeçxa, kuh yajkxna sxuunaꞌtx neeyũu.
Uusaaweꞌsx kiꞌ ĩtxi yuuwaꞌjaꞌswa pẽyni
(Mt 22.23-33; Mr 12.18-27)
27 Txajũꞌ saduceoweꞌsx maaíi yuꞌ Jesus tasxte paapẽjxyaꞌ paꞌjtx. Nasaꞌ uuyãꞌjçxaꞌ peena yuꞌ ĩtxĩ yuumeetxna sũhsatx yuꞌ txãa saduceoweꞌsxaꞌ, txãasatx naꞌwẽ pẽjx:
28 —Moisesaꞌ naꞌjĩnak fxiꞌjçxa nvxiht: Maa piçthẽꞌjwa luuçx jiꞌphumey nyuꞌs nvxihtçxa uuteꞌ, uusáa nyakhaꞌ txãa uꞌyaꞌs iiyuuna, açaꞌ txãate luuçxaꞌ uusáa nçxiꞌk naꞌwẽ neeyũuna jĩnak fxiꞌj.
29 Açaꞌ kweꞌsxaꞌ jiithaꞌw siete piçthẽꞌj pxakhtxi uꞌpuꞌ, saꞌ nyakh nthẽꞌjsaꞌ iiyuuçxawa luuçx jiꞌphumey uuk.
30 Açaꞌ nyakh eꞌsteweꞌsxku iiyuu txãa uꞌyaꞌsíiçxáa. Nawa txãawa luuçx jiꞌphumey uuk.
31 Txajũꞌ nyakh tekhteweꞌsxwa txãa uꞌyaꞌs íiçxáak iiyuu. Txãawa luuçx jiꞌphumey uuk. Txãꞌwẽçxaçxáatx sietesay txãa uꞌyçxaçxáꞌs iiyuuna jxãꞌj. Nawa maa yuhwa luuçx jiꞌphumey uutx.
32 Açaꞌ nmehteꞌ txãa uꞌywa uuk.
33 Açaꞌ uusaaweꞌsx kiꞌ ĩtxĩ yuu enteꞌ, txãa uꞌyaꞌ ¿maa yakh isa nyu yuuwaꞌjsakx? jĩteꞌ,
34 Jesus pasçxaꞌ:
—Naa kiwete nasaꞌ ptamuuna txãaweꞌsx luuçxtxiwa kaaptamuꞌjuꞌtx.
35 Nawa vxite kiwete pçumée ĩtxĩ fxiꞌzewaꞌthe paꞌjyaꞌ ãjãsaꞌ kiꞌ ĩtxĩ yuuçxaꞌ txãaweꞌsxaꞌ ptamuwaꞌjsameetaꞌ, saꞌ txãaweꞌsx luuçxtxiwa kaaptamuꞌjna ũswaꞌjsameetaꞌ,
36 txãa paꞌgatey txãaweꞌsxaꞌ Dxus angelesweꞌsx naꞌwẽsa yãꞌthaꞌ, saꞌ Dxus luuçx yãꞌthaꞌ naꞌ ĩtxĩ yuuyãꞌjçxaꞌ peena yuꞌ uuwaꞌjsameetaꞌ.
37 Txãꞌwẽ uusaaweꞌsxaꞌ kiꞌ ĩtxĩ yuuwaꞌjsate íiçxáak Moisesíiwa jiyukahn naꞌwẽ fxiꞌjçxa nvxiht txajx librute. Kxteeaꞌ Dxusaꞌ çhũçh yuꞌkh behna ũsni pxãjũ weꞌweçxaꞌ: Abrahan, Isaak, Jakob txãaweꞌsx Dxusthu jĩk.
38 Dxusaꞌ uusaaweꞌsx Dxusmeꞌ, naasáa ĩtxĩsaweꞌsx Dxusçxáꞌ. Dxus tasxteꞌ maa yuhwa uumée ĩtxĩ ũstaꞌ jĩnak ptaꞌsx.
39 Txajũꞌ Dxus leyaꞌs kaapiyaꞌjsaweꞌsx weꞌweçxaꞌ:
—Wala ew ptaꞌsxgu jĩçxa,
40 peena yuꞌ kĩhwa jwee yuꞌ pẽjxmeetaꞌ.
Dxus tasxu yuusaꞌ ¿kiim nçxiꞌkki? jĩna Jesus pẽyni
(Mt 22.41-46; Mr 12.35-37)
41 Txajũꞌ Jesusaꞌ naꞌwẽk pẽjx:
—¿Maꞌwẽteta Kristoꞌ Davxid nçxiꞌkaꞌ jĩna weꞌweꞌ nasaꞌ?
42 Naapkaçxhaꞌ Salmos librute Davxid weꞌweçxa yuꞌ naꞌjĩꞌk:
Adxna jxpeꞌjsa Kristoꞌs Dxusaꞌ naꞌjĩk:
Adx pukate paçu juꞌgte mkaaçx,
43 Idxna açesatx idxçxaçxáana nwẽeseꞌjwaꞌjaꞌs vxitna jxãꞌphkaçx jĩk.
44 Davxidaꞌ Kristoꞌs weꞌweçxaꞌ: Adxna jxpeꞌjsa jĩk, açaꞌ Kristoꞌ ¿maꞌwẽ yuuçxa Davxid nçxiꞌk yuukx?
Fxariseo vxiteꞌ ley kaapiyaꞌjsaweꞌsxtxi yuuwesa Jesus nvxiitni
(Mt 23.1-36; Mr 12.38-40; Lk 11.37-54)
45 Nasa jxukaysa wẽsẽꞌjna ũssa ksxavxyte Jesusaꞌ txãa yakh uꞌjusaweꞌsxtxi naꞌjĩnak weꞌwe:
46 —Dxus leyaꞌs kaapiyaꞌjsaweꞌsxtxiꞌ mpaꞌyajkxwe. Txãaweꞌsxaꞌ ropa jxuꞌjsa athçxa plaasasu msuuwa weçxa jxthãasnatx pekũjũꞌ. Saꞌ judiuweꞌsx pkhaakhenisuwa kaçxní wejx zhiçxkwe ewsaçxáanatx pakwéꞌ. Maa yat-su sãꞌjĩyaꞌ piꞌkxtewa, txãꞌwẽytxi kaçxwaꞌj ewsaçxáana pakwéꞌ.
47 Saꞌ vxiudaweꞌsx yattxiwa kusaꞌjaꞌtx, kĩjkĩh jiꞌphuniꞌswa jxuka. Nawa ewsataꞌ sũjkahn wala jxuꞌj lisaꞌtx. Txãꞌwẽ yũupaꞌga txãaweꞌsxaꞌ wejx jxthaakwe Dxus kastigãyni yuutxna jĩnak ptaꞌsx.
