Lukas 21:1-38
21 Wala jiꞌphsaweꞌsx dxuus yatte ofxreda wala ãsxiçtek uy Jesusaꞌ.
2 Txãꞌwẽy teeçx vxiuda puuplesawa kũhçxaꞌ, eꞌz vxyuu musxkuẽ akheçte uyçxaꞌ
3 naꞌjĩk:
—Isath weꞌweꞌ, naa vxiuda puupleꞌ maatewa jxthaakwek wala akh.
4 Vxite yuꞌ akhçxawa, neeyũusáa peejxmeesaçxáan yãꞌjtx akheꞌ. Nawa naa uꞌyaꞌ kĩh yuhwa jiꞌphmeesaçxawa txajx ũꞌ weywaꞌjaꞌs jxukak akh jĩk.
Dxuus yat pçuwaꞌjaꞌs Jesus ptaꞌsxni
(Mt 24.1-2; Mr 13.1-2)
5 Txajũꞌ kxtee ũssa maaíi yuꞌ dxuus yataꞌs thegçxatx weꞌwena ũsuꞌ: Ofxreda peesni yakh wala yuh zhiçxkwe pheuꞌjna txaahniꞌ jĩteꞌ, Jesusaꞌ naꞌjĩk:
6 —Ãçxhíi yuꞌ txãꞌwẽ yuh zhiçxkwe thegna ũsaꞌ, nawa kĩh yuhwa nvxihtmée jxuka suwní yuuwaꞌj en paꞌjana. Açaꞌ teeçx kwetçxáa yuhwa kẽesẽꞌjnimée yuꞌ neeyũumeetxna naa yatteweꞌsx jĩk.
Naa kiwe pçuwaꞌj en ãjaçte seenaꞌsa vxyaawaꞌj
(Mt 24.3-28; Mr 13.3-23)
7 Txãꞌjĩteꞌ:
—¿Bagaçx txãꞌwẽ yuukx? meeçxawa txãꞌwẽ yũuwaꞌj en ãjãçteꞌ ¿kĩhçxa yuukx? jĩna pẽjxteꞌ,
8 naꞌwẽk ptaꞌsx:
—Iꞌkweꞌsxtxi kaypubaꞌjweꞌsxte mpaꞌyajkxwe. Txãꞌwẽmeꞌ wala kasejetxna Dxus kaahnisathaꞌw jĩna naꞌjĩna: Adxaꞌ Kristoth, açaꞌ ãçxhaꞌ nmeh en ãjk jĩtxna. Nawa txãaweꞌsxtxiꞌ nwẽesẽꞌjnuwe.
9 Iꞌkweꞌsxaꞌ wẽsẽꞌjeneꞌkwe gweçxa seenaꞌsa yujaꞌ jĩni, nawa txãꞌ nyafxteweꞌsxçxáataꞌ açaꞌ ũukhmeeneꞌkwe. Nmeh en yuꞌ ãhméy txãꞌwẽ yuuna.
10 Txajũꞌ maꞌwẽ yũuwaꞌjaꞌswa jxuka ptaꞌsxku naꞌjĩna:
—Txãn en ãjãçteꞌ, gobiernoꞌ vxite kiwete gobierno yakh puiitxna. Naapkaçxhaꞌ puutx jxuꞌj kiweju pweꞌsxwa puiitxna.
11 Saꞌ msuu msuuwa seenaꞌ ehd uꞌjwena. Wẽjẽwa txãꞌwẽ wala paꞌjana. Naapkaçxhaꞌ kakwete wee seenaꞌsawa paꞌjana. Saꞌ cieluju kĩjkĩhwa seenaꞌsaçxáa vxyaatxna.
12 Nawa txãꞌwẽ seenaꞌ yũuwaꞌj en paꞌjmeyna, iꞌkweꞌsxtxi ahçeçxa preesuꞌjyaꞌ pakweetxna. Saꞌ judiuweꞌsx pkhaakhenisuwa jxũna uꞌjwetxna: Nasa ewmeesaꞌ jĩna. Txãꞌwẽ yũuna karceltewa txajatxna, iꞌkweꞌsxaꞌ adxna nwẽesẽꞌphaꞌgaçxáa jxkaahsaweꞌsx tasxsu vxiteꞌ neꞌjweꞌsx tasxsuwa kuutxaꞌjni yuuneꞌkwe.
13 Txãꞌwẽ yũuteꞌ, Dxus yuweꞌs txãaweꞌsxtxiwa ptaꞌsxwaꞌj en jiꞌphuneꞌkwe.
14 Iꞌkweꞌsxaꞌ txãaweꞌsxtxiꞌ ¿maꞌwẽ pasukxthaꞌw? sũhna kuh yajkxmeeneꞌkwe,
15 txãa paꞌgatey adxaꞌ iꞌkweꞌsxtxi açesaweꞌsxtxi maꞌwẽ paswaꞌjaꞌswa kaaũusutheꞌjeꞌnja. Açaꞌ txãaweꞌsxaꞌ: Ĩsxĩijaꞌg jĩyaꞌ ãjãmeetxna maa yuhwa.
16 Saꞌ iꞌkweꞌsx nweꞌsxíi yuhwa açeni yuuneꞌkwe, tataweꞌsx, yakhthẽꞌjweꞌsx, namikuweꞌsx preesuꞌjutxna. Açaꞌ maaíi yuꞌ ikhni yuuneꞌkwe.
17 Iꞌkweꞌsxaꞌ adxna nwẽesẽꞌphaꞌga naa kiwete jxukaysa açeni yuuneꞌkwe.
18 Nawa iꞌkweꞌsx dxkhasçxáa yuhwa vxitumeetxna teeçxçxáa yuhwa.
19 Iꞌkweꞌsxaꞌ uu entepkaçx Dxus yakh txutemée fxiꞌzeçxaꞌ, Dxus tasxte ĩtxĩ fxiꞌzewaꞌjaꞌs jiꞌphuneꞌkwe.
20 Jerusalen çxhabaꞌs soldauçxaçxáa jxuka ktadxiiçxa ũste uyçxaꞌ, ãçxhaꞌ naa çxhabaꞌ jxuka pçuwaꞌjsana sũhna jii ũsuneꞌkwe.
21 Naapkaçxhaꞌ Judeasuweꞌsxaꞌ ũphna uꞌjwetxna yuꞌkhsu, açaꞌ Jerusalen çxhabteweꞌsxwa txãa çxhabu ũphna kasejetxna, vxiteꞌ çxhab ekajuyãꞌj ũssaꞌ çxhabte uꞌkameetxna.
22 Txãꞌwẽmeꞌ txãn ensuꞌ kastigo seenaꞌsa yuuna Dxus librute maꞌwẽga ptaꞌsxiꞌ txãꞌ jxuka kxtey yuuna.
23 Açaꞌ txãn ensuꞌ nasa jiꞌphsa meeçxawa luuçx ãpãkuẽ jiꞌphsaꞌ wala yuh pxthaa yuutxna, txãꞌwẽ txãa nasatx kastigo seenaꞌsa paꞌtheꞌ, naa kiwete wala yuh nxuswaꞌj yuuna.
24 Maaíitxiꞌs gweçxate ikhetxna, saꞌ vxite yuutxiꞌs preesuꞌjçxa jxuꞌj kiwen jxũna uꞌjwetxna. Naapkaçxhaꞌ Jerusalen çxhabaꞌs vxite nasa uꞌkaçxa jxuka suwçxa kxtee makwe txaçxwa ũsutxna.
Dxus Nçxiꞌk Nasa Yuusáa seenaꞌ zhiçxkwe vxyaana
(Mt 24.29-35, 42-44; Mr 13.24-37)
25 Txãꞌwẽ yũunijũꞌ sek aꞌte estrelxa txãasu seenaꞌçxáa vxyaatxna. Açaꞌ naa kiwete nasa mtee mteeweꞌsxwa jxuka jxpubana iiméh wala ũukhutxna txãꞌwẽ ĩkh wala seenaꞌ yuuna susniꞌs wẽsẽꞌjçxa.
26 Txãꞌwẽ seenaꞌ yuuçteꞌ, naa kiwete nasaꞌ ũukhçxa ũus yuꞌswa ivxiitutxna, naapkaçxhaꞌ ẽe walate kĩjkĩh ũssawa jxuka seenaꞌ kẽesẽꞌjni yuutxna.
27 Txajũꞌ Dxus Nçxiꞌk Nasa Yuusaꞌs uyuutxna, tãaph pxãhte sek naꞌwẽ seenaꞌ zhiçxkwe khikhyna kĩjaçte.
28 Txãꞌwẽ seenaꞌ yuuyaꞌ takheçteꞌ, iꞌkweꞌsxaꞌ ũukhmée weçxana ũythasna meswe, jwee yuꞌ jxthẽeyuumée nweꞌweni yuuneꞌkwe jĩk.
29 Txãa eꞌsuꞌ vxite ejemplo ptaꞌsxku:
—Mthegwe higwera fxtũu tasx meeçxawa vxite fxtũu tasxtxi.
30 Saꞌ txãa fxtũu tasx yeeçuçte uyçxaꞌ, yũnyaꞌwatewa jiyuꞌiꞌkwe.
31 Txãꞌwẽy adx ptaꞌsxni kxtey yuuçte uyçxaꞌ, Dxus naa kiwete kĩiwaꞌj en utxaaçna sũhna jii meswe.
32 Isath weꞌweꞌ: naa ensu nasa uumeyna, txãꞌwẽ kxtey yuuna.
33 Cielu naa kiwe jxuka skhẽuutxna, nawa adx weꞌweniꞌ jxuka kxtey yuumey yuꞌ, skhẽwmeetxna.
34 Wala jxpaꞌyakx meswe, ewmée yũuna tũuna kĩjkĩhwa naa kiweteweꞌsxçxáꞌs yajkxna fxiꞌzenuwe. Txãꞌwẽmeꞌ Dxus yuꞌs yajkxmée ũsiyna, Dxus kĩiwaꞌj en ãhçxáa yuuna.
35 Niimalwa jiimeeçxaꞌ maꞌwẽga yajkxte khẽjeꞌ, txãꞌwẽyçxáa Dxus kĩiwaꞌj enaꞌ kpaakina naa kiwete nasa mtee mteeweꞌsxtxiwa jxukaysatx.
36 Iꞌkweꞌsxwa wala jxpaꞌyakx meswe, naꞌwẽ seenaꞌ yuuyaꞌwaꞌ txajũ iyuyaꞌ. Dxus yakh puutx weꞌwena nes myuuwe bagaçxtewa, saꞌ txãꞌwẽ yũuçxaꞌ Dxus Nçxiꞌk Nasa Yuusáa tasxte utxaayaꞌ ãjãneꞌkwe jĩk.
37 Jesusaꞌ en yuꞌ dxuus yattek kaapiyaꞌjaꞌ, nawa kus yuꞌ Oliwos vxiçnak uꞌjweꞌ.
38 Açaꞌ nasaꞌ een isa kuusíitx dxuus yatte paꞌjaꞌ Jesus kaapiyaꞌjniꞌs wẽsẽꞌjya ꞌ.
