Lukas 22:1-71
22 Pan lewadura jiꞌphmée ũꞌni Paskua fxiesta ãjãçku yuꞌ.
2 Açaꞌ sacerdote npiiçthẽꞌjweꞌsx vxiteꞌ ley kaapiyaꞌjsaweꞌsxaꞌ: Jesusaꞌs ¿maꞌwẽ yũuçxa ikhekxthaꞌw? jĩnatx txãaweꞌsx pweꞌsx puutx weꞌwena ũsuꞌ. Nawa nasa wala kuh Jesus juꞌgusa ũsteꞌ, ũukhuꞌtx.
3 Naapkaçxhaꞌ eçxthẽꞌjaꞌ Judas Iskariote ũuste uꞌkak. Txãa Judas yuꞌ, Jesus yakh uꞌjusa docesateweꞌsxíiçxáak yuꞌ.
4 Txajũꞌ txãa Judasaꞌ puutx weꞌweyaꞌ uꞌkh sacerdote npiiçthẽꞌjweꞌsx vxiteꞌ dxuus yatte thegsaweꞌsxtxi, Jesusaꞌs txãaweꞌsx kusete dukhyaꞌ.
5 Açaꞌ txãꞌwẽ puutx weꞌweteꞌ, txãaweꞌsxaꞌ vxyu dukhyaꞌ neeyũutx Judasaꞌs.
6 Txajũꞌ Judasaꞌ nasa uynimeete paaçte dukhwaꞌjaꞌs pakwek.
Jesusaꞌ docesaweꞌsx yakh nmeh ũꞌni
(Mt 26.17-29; Mr 14.12-25; Jn 13.21-30; 1 Ko 11.23-26)
7 Txajũꞌ pan lewadura jiꞌphmée ũꞌni fxiesta en ãjk. Txãa enteꞌ piisxáa luuçxtxi ikheꞌ Paskuateweꞌsx.
8 Açaꞌ txãa enteꞌ Jesusaꞌ naꞌjĩnak jxkaah Pedro Juanweꞌsxtxi:
—Meꞌjwe Paskua fxiestate ũꞌwaꞌjaꞌs pheuꞌjyaꞌ jĩteꞌ,
9 txãaweꞌsxaꞌ pẽjxtxi:
—¿Mteega pheuꞌj jxthãasuꞌ? jĩteꞌ,
10 Jesus pasçxaꞌ:
—Çxhabna uꞌjçxa kxtee paꞌjaççxaꞌ, teeçx piçthẽꞌj uyuuneꞌkwe yuꞌ mitxhaꞌs yakhçxa uꞌjweçte. Saꞌ eꞌste uꞌjweneꞌkwe yatte uꞌkapkaçx.
11 Saꞌ kxtee paꞌjçxaꞌ, yat namuꞌs naꞌjĩneꞌkwe: Kweꞌsxtxi jxpeꞌjsaꞌ pẽjxyaꞌk kaah: Paskua fxiestate txãa yakh uꞌjusaweꞌsx yakh ũꞌwaꞌj ¿mtee piesa pheuꞌjni ũsna? jĩkajaꞌk jĩneꞌkwe.
12 Açaꞌ yat namuꞌ ẽe yatte piesa walasa pheuꞌjniyãꞌjsaꞌs ptaꞌsxina. Kxtee ũꞌwaꞌjaꞌs pheuꞌjuneꞌkwe jĩnak jxkaah.
13 Açaꞌ Pedroweꞌsxaꞌ uꞌjçxaꞌ, Jesus maꞌjĩniꞌswa jxuka kxtey uyçxa Paskua fxiestate ũꞌwaꞌjaꞌs pheuꞌjtx.
14 Txajũꞌ ũꞌwaꞌj ora ãhteꞌ, Jesusaꞌ txãa yakh uꞌjusaweꞌsx yakh kaçxku mesate ũꞌyaꞌ.
15 Saꞌ naꞌwẽk weꞌwe:
—¡Mazkuẽ uswa wala yuh yaakiꞌth, adxaꞌs uu en paꞌjmeyna, naa Paskua fxiestate iꞌkweꞌsx yakh nmeh ũꞌwaꞌjaꞌs!
16 Naꞌjĩꞌth naꞌ: ãçxhaꞌ ayte peena yuꞌ naa Paskua fxiestateweꞌsxaꞌs ũꞌmeꞌnja, Dxus kiꞌ jxkaajxaꞌ paꞌjwaꞌj en ãhpkaçx.
17 Txajũꞌ wasoꞌs uweçxa Dxusna weçxana orãyçxaꞌ, naꞌjĩk:
—Jxpaꞌgaçxa jxukaysa mtudxwe naa wasoteweꞌsxaꞌs.
18 Naꞌjĩꞌth naꞌ: ãçxhaꞌ ayte peena yuꞌ uwa yuꞌaꞌs tudxmeꞌnja, kiꞌ Dxus jxkaajxaꞌ paꞌjwaꞌj en ãhpkaçx.
19 Txajũꞌ panaꞌswa Dxusna weçxana orãyçxaꞌ, peꞌltedeçxa txãaweꞌsxtxi ũsuꞌsku naꞌjĩna:
—Iꞌkweꞌsx paꞌgate adx kakweꞌ dukhwaꞌj yuuyaꞌwaꞌ, açaꞌ naa panaꞌ adx kakwe naꞌwẽsaꞌ. Iꞌkweꞌsx paꞌgate adx pxthaa yuuçxa uuniꞌs yajkxna txãꞌwẽ myũuwe bagaçxtewa.
20 Ũꞌna jxãꞌjçxaꞌ, wasoꞌs jxpaꞌgaçxa naꞌwẽk weꞌwe:
—Adx eeaꞌs pkawçxa yuuçxáak Dxusaꞌ iꞌkweꞌsxtxi nweꞌwewaꞌjaꞌs uꞌse pheuꞌjçxa nvxiht. Açaꞌ naa wasoteweꞌsxaꞌ adx ee naꞌwẽsaꞌ.
21 Açaꞌ ãçxhaꞌ adx yakh ũꞌna uꞌpaꞌ ay mesate txãa piçthẽꞌjaꞌ adxaꞌs açesaweꞌsx kusete dukhyaꞌwaꞌ.
22 Dxus Nçxiꞌk Nasa Yuusáꞌ ãçxhaꞌ pejka uuyaꞌwayujaꞌ. Adx uuwaꞌjaꞌs maꞌwẽneꞌ Dxus nvxiht txãꞌ kxtey yuuyaꞌwaꞌ. Nawa adxaꞌs açesaweꞌsx kusete dukhsaꞌ ¡seenaꞌ yuh nxuste khẽjena! jĩteꞌ,
23 Jesus yakh uꞌjusa pweꞌsx puutx yaꞌpaapẽyiꞌtx naꞌjĩna: Kweꞌsx ksxavxyteweꞌsx ¿kim txãꞌwẽ dukhyaꞌwakx? jĩꞌtx.
Maa wejx jxthaakwe walasa yuuwaꞌjaꞌs pẽyni
24 Txajũꞌ txãaweꞌsx pweꞌsx naꞌwẽ yũuwaꞌjaꞌstxi puutx yaꞌpaapẽyiꞌ:
—Ayte kweꞌsx ksxavxyteweꞌsx ¿maa wejx jxthaakwe walasakx? jĩteꞌ,
25 Jesus pasçxaꞌ:
—Naa kiwete jxkaahsaweꞌsxaꞌ wala juunaꞌçxáa yuuna jxkaajaꞌtx. Txãꞌwẽtewa txãaweꞌsx yuutxiꞌs wala ewsataꞌ jĩꞌtx nasa yuꞌ.
26 Nawa iꞌkweꞌsxaꞌ txãꞌwẽ yũuna jxkaahwaꞌjsameeiꞌkwe, wejxwa iꞌkweꞌsxaꞌ maaíi yuꞌ jxthaakwe walasa ũsçxawa, nuuçxsa naꞌwẽ yuuwaꞌj jiꞌphiꞌkwe. Açaꞌ maawa jxkaahwaꞌjaꞌs jiꞌphsaꞌ, selpisáa naꞌwẽçxáa yuuwaꞌj jiꞌphiꞌkwe.
27 ¿Maa wejx jxthaakwe walasakx? ¿Puuçte mesate ũꞌyaꞌ kaçxsá wejx jxthaakwe walasamanx, meeçxaꞌ puuçsa wáa wejx jxthaakwe walasana? Isa ew yajkxteꞌ, mesate ũꞌyaꞌ kaçxsá jxthaakwe walasana. Nawa adxaꞌ iꞌkweꞌsxtxi selpisáa naꞌwẽçxáa ũsthu.
28 Adxaꞌ bagaçxtewa nxuste thẽyte fxiꞌzeçtewa iꞌkweꞌsxwa adx yakh jaꞌda pxthaa yuuna nesiꞌkwe yuꞌ nvxihtmée.
29 Txãa paꞌga adxaꞌ iꞌkweꞌsxtxi ũsuꞌnja jxkaahwaꞌjaꞌs, adxaꞌswa maꞌwẽga adx Tata jxkaahwaꞌjaꞌs ũs txãꞌwẽy,
30 kxah adx jxkaahna ũsnite paꞌjçxaꞌ, adx yakh ih mesate ũꞌweneꞌkwe, saꞌ Israelweꞌsx jiꞌj docesatx jxkaahsa yuuneꞌkwe.
Pedro ĩsxiiwaꞌjaꞌs Jesus ptaꞌsxni
(Mt 26.31-35; Mr 14.27-31; Jn 13.36-38)
31 Txajũꞌ Jesusaꞌ Simonaꞌs naꞌwẽk ptaꞌsx:
—Simon, idxaꞌ wala yuh mpaꞌyajkx. Txãꞌwẽmeꞌ eçxthẽꞌjaꞌ iꞌkweꞌsxtxi pẽjxku skuutxh kweejxaꞌjsa naꞌwẽ yuuyaꞌ.
32 Nawa adxaꞌ iidx paꞌgate Dxusaꞌs neeweꞌweth, Dxusçxáana yajkxna fxiꞌzekahn. Açaꞌ idxaꞌ Dxus tasxte kiꞌ sxawedçxaꞌ, yakhthẽꞌjweꞌsxtxi kçxhãaçxhaꞌjaneꞌga Dxus yakh txutemée fxiꞌzewaꞌjaꞌs jĩteꞌ,
33 Simon pasçxaꞌ:
—Adxaꞌ karcelna maꞌk yuu meeçxaꞌ uuwaꞌj maꞌk yuu nawa adxaꞌ kĩhte yuhwa txutemeꞌnja jĩteꞌ,
34 Jesus kiꞌ weꞌweçxa naꞌjĩk:
—Pedro, idxaꞌs naꞌjĩꞌth naꞌ: ãçxhíi atalx weꞌwemeyna, idxaꞌ tekh us ĩsxĩijaçyãꞌj yuuneꞌga adxaꞌs jiimeeth jĩna.
Jxpaꞌyakx ũs kaahni
35 Txãꞌwẽ ptaꞌsxçxaꞌ Jesusaꞌ naꞌwẽk pẽjx:
—Adxaꞌ teeçx enteꞌ iꞌkweꞌsxtxiꞌ Dxus yuwe ptaꞌsxyaꞌ kaahçxaꞌ kĩh yuhwa jiꞌphmeeth kaah, yaꞌja, vxyu, pelgatxi txãꞌwẽsatx. Açaꞌ iꞌkweꞌsxtxiꞌ dxiꞌthe ¿kĩhçxáꞌ peejiigáꞌ? jĩteꞌ, txãaweꞌsx pasçxaꞌ:
—Kweꞌsxtxiꞌ kĩh yuhwa peejimeꞌ jĩtx.
36 Açaꞌ Jesus weꞌweçxaꞌ naꞌjĩk:
—Ãçxhaꞌ yaꞌja maꞌk yuu, vxyu maꞌk yuu, kçxilx maꞌk yuu nawa jiꞌphsaꞌ jxũçxa meꞌjwe. Açaꞌ kçxilx jiꞌphmeesaꞌ atxhaꞌs txweyçxa kçxilx mweywe.
37 Txãꞌwẽmeꞌ Dxus librute weꞌweçxaꞌ: Ewmeesathas yuuwesa yakhku kiꞌpni yuu jĩk naa paꞌga ãçxhaꞌ adxaꞌs jxuka txãꞌwẽy yuuyaꞌwataꞌ jĩteꞌ,
38 txãaweꞌsx weꞌweçxaꞌ:
—Ayte eꞌz kçxilx yuꞌ ũstaꞌ jĩteꞌ, Jesus pasçxaꞌ:
—Txãꞌwẽçxaꞌ. Txãaçxáa ewtxna jĩk.
Jesusaꞌ Geçemanite Dxus yakh puutx weꞌweni
(Mt 26.36-46; Mr 14.32-42)
39 Txajũꞌ Jesusaꞌ ũꞌna jxãꞌjçxaꞌ, txajũ kasehçxaꞌ, Oliwos vxiçna kiꞌ uꞌkh. Açaꞌ txãa yakh uꞌjusaweꞌsxwa eꞌstey uꞌjtx.
40 Kxtee paꞌjçxa naꞌjĩk:
—Dxus yakh puutx weꞌwena meꞌpwe, ewmeete weteyaꞌmée jĩçxaꞌ,
41 txãaweꞌsx tasxu jxuꞌjmeekuẽ txuteena uꞌjçxa peejxũkweçxa naꞌjĩnak Dxus yakh puutx weꞌwe:
42 —Tata, idxaꞌs ewuweçxteꞌ, seenaꞌ nxuste uuwaꞌju meen nweꞌwe. Nawa adx jxthãasniꞌs kxtey yuumeeçxawa, iidx jxthãasniçxáꞌs kxtey meen yũu jĩteꞌ,
43 Dxus angel cielujũweꞌsx kvxiisxaꞌjna kçxhãaçxhaꞌjyaꞌ kĩjk.
44 Txãꞌwẽmeꞌ wala yuh pxthaa nxusna Dxus yakh puutx weꞌwena uꞌpuꞌk naa paꞌga pẽꞌç yuhwa ee naꞌwẽsak wala pkaw.
45 Saꞌ Dxus yakh puutx weꞌwena jxãꞌjçxaꞌ kiiteçxa uꞌkh Pedroweꞌsxtxi thegyaꞌ. Nawa txãaweꞌsxaꞌ deenitx yuꞌ, wala nxusçxa.
46 Açaꞌ kũhçxa naꞌwẽk weꞌwe:
—¿Kĩjxaꞌkwe dejéꞌ? Kiiteçxa Dxus yakh puutx weꞌwena meꞌpwe, ewmeete weteyaꞌmée jĩk.
Jesusaꞌs preesuꞌjni
(Mt 26.47-56; Mr 14.43-50; Jn 18.2-11)
47 Jesusaꞌ kxtee weꞌwena nee ũsiyna, nasa wala kũhtx. Açaꞌ Jesus yakh uꞌjusa Judas yuꞌ txãa nasa yaçte kũhçxa, Jesus tasxte utxaak pukakwette weçxayaꞌ.
48 Açaꞌ Jesusaꞌ naꞌjĩk:
—¿Judas, idxaꞌ Dxus Nçxiꞌk Nasa Yuusaꞌs weçxani yakh wáa kuuweꞌjyaꞌwaneꞌga? jĩteꞌ,
49 Jesus yakh uꞌjusaweꞌsxaꞌ Jesusaꞌs pẽjxtxi:
—¿Txãa nasatxiꞌs kçxilx yakh puiimthaꞌw? jĩtx.
50 Txajũꞌ Jesus yakh uꞌjusa teeçxsa yuꞌ sacerdote npiiçthẽꞌjaꞌs selpisáa thũꞌwẽꞌs spẽꞌthku paçuweꞌsxna.
51 Açaꞌ Jesusaꞌ weꞌwek:
—Kxtee paꞌj yuꞌ yũunu jĩçxaꞌ, txãa thũꞌwẽ spẽꞌthnite jxaꞌdxçxaꞌ, kiꞌ kaywẽtuꞌkh.
52 Saꞌ sacerdote npiiçthẽꞌj vxiteꞌ dxuus yatte thegsaweꞌsx vxiteꞌ judiu nthẽꞌjsaweꞌsx preesu jxũna uꞌjyaꞌ paꞌjsatx weꞌwek:
—Adxaꞌ ¿pesweethas iꞌkweꞌsxaꞌ kçxilx petx fxtũ atçxawáꞌkwe adxaꞌs preesu jxũna uꞌjyaꞌ yuwéꞌ?
53 Adxaꞌ iꞌkweꞌsx yakh een isath dxuus yatte ũsuꞌ, nawa txagaçxhíi yuꞌ tudxaꞌ utxaameeçxaꞌ, jxuka çxhiꞌdxni naa orate yuꞌ pejka preesuꞌjyaꞌ paꞌjiꞌkwe jĩk.
Jesusaꞌs jiimeeth jĩna Pedro weꞌweni
(Mt 26.57-58, 69-75; Mr 14.53-54, 66-72; Jn 18.12-18, 25-27)
54 Txajũꞌ Jesusaꞌs tudçxa jxũna uꞌjtx sacerdote npiiçthẽꞌj yatna. Açaꞌ Pedroꞌ Jesus eꞌste jxuꞌj neeyũuçxak uꞌjna ũsuꞌ.
55 Kxtee paꞌjçxaꞌ patxute ipx yuthçxatx bajçxyaꞌ kaçx. Açaꞌ Pedrowa txãaweꞌsx yakh ih bajçxyaꞌ kaçxku.
56 Açaꞌ teeçx uꞌy selpisáꞌ Pedro txãꞌwẽ ipx pukate bajçxna uꞌpteꞌ, dxiꞌpte ew thegçxa naꞌjĩk:
—Naa piçthẽꞌjwa Jesus yakh uꞌjusaꞌ jĩteꞌ,
57 Pedroꞌ ĩsxĩik:
—Adxaꞌ jiimeeth txãa piçthẽꞌj kxsusuꞌiꞌkwe txãꞌsaꞌ jĩk.
58 Txajũꞌ txãa eꞌsuꞌ vxitewa uyçxa naꞌjĩk:
—Idxwa txãaweꞌsx yakh uꞌjusag jĩteꞌ, Pedro pasçxaꞌ:
—Isa, adxaꞌ txãaweꞌsx yakh uꞌjusameeth jĩk.
59 Txãa skhẽwni teeçx orateꞌ vxitek naꞌjĩna weꞌwe:
—Ĩsxĩimeete, naa piçthẽꞌjaꞌs uythu Jesus yakh uꞌjute. Txãa yakh uꞌjusaçxaíi, Galileajuweꞌsxaꞌ jĩteꞌ,
60 Pedro pasçxaꞌ:
—Kĩhneꞌga weꞌweꞌ naꞌswa jiyuçmeeth. Txãꞌjĩna weꞌwena nee ũsiyna, atalx weꞌwek.
61 Açaꞌ Jesusaꞌ tuphiçxa Pedro dxiꞌpte thegteꞌ, Pedroꞌ yajkxku Jesus weꞌweçxaꞌ: Ãçxh atalx weꞌwemeyna, tekh us ĩsxĩijaçyãꞌj yuuneꞌga jĩniꞌs.
62 Txajũꞌ Pedroꞌ eka kasehçxa seenaꞌ wala nxusna ũꞌnek.
Jesusaꞌs npeevxysxikani
(Mt 26.67-68; Mr 14.65)
63 Txajũꞌ Jesus ũphweꞌsxte yupna ũssa yuꞌ weeçx weꞌwenatx pãpãꞌ.
64 Saꞌ yafxtxi tudçxatx dxiꞌpte ukaꞌkaꞌ naꞌjĩna:
—Aan jiyuneꞌga kim ukaꞌkaçtewa.
65 Txãꞌjĩnatx wala kuh jwed weꞌwena wẽesxuꞌ.
Judiu nthẽꞌjsaweꞌsx tasxte Jesusaꞌs kuutxaꞌjni
(Mt 26.59-66; Mr 14.55-64; Jn 18.19-24)
66 Saꞌ khikhyna sẽjẽçteꞌ, judiu nthẽꞌjsa sacerdoteweꞌsx, Dxus leyaꞌs kaapiyaꞌjsa txãaweꞌsx pkhaakheçxatx Jesusaꞌs kxtee kuutxaꞌjçxa pẽjx:
67 —Mpeetaꞌsx, idxaꞌ ¿Kristo dxihgáꞌ? jĩteꞌ, Jesus pasçxaꞌ:
—Txãꞌwẽíith jĩtewa, isaneꞌ weꞌweꞌ sũhmeeneꞌkwe.
68 Saꞌ iꞌkweꞌsxtxi adx paapẽjxwaçwa, pasyaꞌwameeiꞌkwe. Saꞌ adxaꞌs txhweteyaꞌwameeiꞌkwe.
69 Nawa ãçxhũyãꞌjaꞌ Dxus Nçxiꞌk Nasa Yuusáꞌ Dxus ĩtxĩsa pukate kaçxyaꞌ uꞌjwena jĩk.
70 Açaꞌ jxukaysa naꞌwẽtx pẽjx:
—Naꞌjĩꞌg naꞌ, idxaꞌ Dxus Nçxiꞌkthu jĩneꞌga jĩteꞌ, Jesus pasçxaꞌ:
—Txãꞌwẽíith. Iꞌkweꞌsxaꞌ isa iꞌkwe weꞌweꞌ jĩk.
71 Açaꞌ txãaweꞌsx weꞌweçxaꞌ:
—¿Kĩjxaꞌ jwee vxite testigo peejiikxthaꞌw? Kweꞌsx thũꞌwẽju yuuthaꞌw txajx weꞌweniꞌs wẽsẽꞌj jĩꞌtx.
