Lukas 23:1-56
23 Txãꞌwẽ yũuçxaꞌ Jesusaꞌs Pilato tasxna jxũna uꞌjtx.
2 Kxtee paꞌjçxaꞌ naꞌjĩnatx pãatxhĩꞌkh:
—Naa piçthẽꞌjaꞌ nasatx kaypubaꞌjna ũstethaꞌw uy, saꞌ Romate gobiernoꞌs dukhwaꞌjmeꞌ. Saꞌ Dxus txhitxhçxa kaahnisa adxthu jxkaahwaꞌjsa jĩꞌk jĩteꞌ,
3 Pilatoꞌ pẽjxku:
—Idxaꞌ ¿judiuweꞌsxtxi jxkaahsa dxihgáꞌ? jĩteꞌ, Jesus pasçxaꞌ:
—Txãꞌwẽ íith, isag weꞌweꞌ jĩk.
4 Açaꞌ Pilatoꞌ sacerdote npiiçthẽꞌjweꞌsx nasa jxukaysatx naꞌwẽk weꞌwe:
—Naa piçthẽꞌj yuuwe yuuniꞌs uyuꞌçmeeth jĩtewa,
5 txãaweꞌsx yuꞌ jweeíiçxáatx sus weꞌwena naꞌjĩꞌ:
—Judeate nasa jxukaysatx jxuka kaypubaꞌjna jxãꞌjaçaꞌ txajx weꞌweni yakh, Galileaju takhçxa ãçxhaꞌ aysuwa jxuka pekũjuçaꞌ txãꞌwẽ yũuna jĩꞌtx.
Jesusaꞌs Herodes tasxte kuutxaꞌjni
6 Txãꞌwẽ weꞌwete Pilato wẽsẽꞌjçxaꞌ, nasatx pẽjxku:
—Txãa piçthẽꞌjaꞌ Galileajũweꞌsxwáana jĩna.
7 Açaꞌ:
—Txajũweꞌsxíꞌk jĩna ptaꞌsxteꞌ, Galileate neꞌjweꞌsx Herodes tasxnak kaah, txãn ensuꞌ Herodeswa Jerusalenteyku ũsuꞌ naa paꞌga.
8 Açaꞌ Herodesaꞌ Jesusaꞌs uyçxaꞌ, wala weçxak, txãꞌwẽ Jesusaꞌ kĩhwa yuꞌk jĩniꞌs wẽsẽꞌjçxaꞌ nyafxíik Jesus yakh puutx uy wẽena ũsuꞌ, cieluju kĩhçxáawa kaavxyaꞌjaꞌtheꞌ txãawa uyuꞌnja sũhçxa.
9 Txajũꞌ Jesusaꞌs kĩjkĩhwa wala pẽjxku, nawa pasmeꞌ.
10 Kxteewa sacerdote npiiçthẽꞌjweꞌsx vxiteꞌ Dxus leyaꞌs kaapiyaꞌjsaweꞌsx kũhçxa wala juunaꞌ weꞌwena yuwee ũstxi.
11 Açaꞌ Herodesaꞌ txajx soldauweꞌsx yakh Jesusaꞌs weeçx weꞌwena ahçeçxa jxkaahsa ropa naꞌwẽ zhiçxkwesa kaatheꞌjçxatx npeevxysxijkana ũsuꞌ. Txãꞌwẽ yũuçxak Herodesaꞌ Pilato tasxtey Jesusaꞌs kiꞌ kaah.
12 Pilato yakh Herodes yakhaꞌ nyafxíi yuꞌ iipuiisatx yuꞌ, nawa txãn ente txãꞌwẽ yũuçxaꞌ yuwe ewuutx.
Jesusaꞌs ikhwaꞌj vxitni
(Mt 27.15-26; Mr 15.6-15; Jn 18.39–19.16)
13 Txajũꞌ Pilatoꞌ sacerdote npiiçthẽꞌjweꞌsx vxiteꞌ judiu nthẽꞌjsaweꞌsx çxhabte nasa jxukaysatx kaapkhakheꞌjçxa,
14 naꞌjĩnak weꞌwe:
—Iꞌkweꞌsxaꞌ naa piçthẽꞌjaꞌ nasatx kaypubaꞌjna ũsaꞌ jĩçxa adx tasxte nuypaꞌjiꞌkwe. Açaꞌ adxaꞌ iꞌkweꞌsx wẽsẽꞌjna ũstey jxuka paapẽjxthu. Nawa kĩhte yuhwa ewmée yũuniꞌs yuꞌ uymeeth.
15 Açaꞌ Herodeswa ewmée yũuniꞌs uymeeçxaꞌ, kiꞌkin kaasxweduꞌkh. Iꞌkweꞌsxíiwa jiyuiꞌkwe naa piçthẽꞌjaꞌ yuuwesa kasehmeꞌ. Açaꞌ ¿maꞌwẽ ikhwaꞌj yuukx?
16 Txãa paꞌga ikhmée kaapeçxukweꞌjçxaçxáa kaatxhweeteꞌjeꞌnja jĩteꞌ,
17 23:17-18 nasa jxukaysa naꞌjĩnatx sus weꞌwe:
—Naa piçthẽꞌjaꞌs ikhçxa Barabasçxáꞌs mitxhwete jĩꞌtx. (Pilatoꞌ anxu iisak txãa fxiestate teeçx preesu txhweetéꞌ nasa weçxaakahn naa paꞌgatx txãꞌjĩꞌ.)
18 —
19 Txãa Barabas yuꞌ çxhabte gobiernoꞌs puíi kiisçxa nasatx wala kiikheꞌphaꞌga karceltek txaahni ũsuꞌ.
20 Txajũꞌ Pilatoꞌ Jesusaꞌs txhweete wẽeçxa nasatx kiꞌ pẽjxku.
21 Nawa txãaweꞌsx yuꞌ jweeíiçxáatx sus weꞌwe:
—Kluuste pejka mkaafxuçuꞌj yuh jĩna.
22 Açaꞌ Pilatoꞌ tekh uswa nasatx kiꞌ weꞌwek naꞌjĩna:
—Naa piçthẽꞌjaꞌ ¿kĩhga ewmée yũu? Adxaꞌ makwe paapẽjxçxawa, ewmée yũuniꞌs yuꞌ uymeeth ikhkahn yuuwa. Txãꞌwẽ yuuwesa kasejeçmeꞌ açaꞌ kaapeçxukweꞌjçxaçxáa kaatxhweeteꞌjeꞌnja jĩtewa,
23 txãaweꞌsx yuꞌ jweeíiçxáatx sus ũusçxa weꞌwena kluuste fxuçkaah. Sacerdoteweꞌsx nasa jxukaysa txãꞌwẽ sus weꞌweni yakhçxáa pejka knaytxi txãaweꞌsx pẽyniꞌs.
24 Txajũꞌ Pilatoꞌ txãaweꞌsx pẽyniꞌs kxtey yuuk,
25 saꞌ gobiernoꞌs puíi kiisçxa nasatx kiikheꞌjsa yuꞌsaꞌ karceluh kaakutxiꞌjçxa Jesus yuꞌsaꞌ txãaweꞌsx kusete nvxihtku, kĩh yũu wẽeçxawa kxtey yuukahn.
Jesusaꞌs kluuste fxuçni
(Mt 27.32-44; Mr 15.21-32; Jn 19.17-27)
26 Jesusaꞌs kluuste fxuçyaꞌ jxũna uꞌjweççxaꞌ, teeçx piçthẽꞌj Cirenejũweꞌsx Simon yaasesa çxhabte paꞌjaçte puꞌjykhẽwçxaꞌ, kluusaꞌs txãꞌsna kxaakheꞌjçxatx Jesus eꞌstey peꞌjna uꞌj.
27 Txãꞌwẽ yũuyaꞌ uꞌjweçte, nasa wala kuh uꞌjweç yuꞌtx. Txãa ksxavxyte uꞌyweꞌsxwa txãꞌwẽtx wala kuhsa nxusçxa sus ũꞌnena uꞌjna ũsuꞌ.
28 Açaꞌ Jesusaꞌ txãaweꞌsxtxi yuꞌthegçxaꞌ:
—Jerusalente uꞌyweꞌsx, adxaꞌs nxusçxa ũꞌne naꞌwẽꞌ wejx yuuwa iꞌkweꞌsx fxiꞌzewaꞌjaꞌs yajkxçxa mnxuswe, iꞌkweꞌsx luuçx paꞌgate.
29 Txãꞌwẽmeꞌ naa kiwete nxusu en yujaꞌ. Txãa en paꞌtheꞌ, txãaweꞌsx luuçx pxthaa yuuçte uyçxaꞌ naꞌjĩtxna: Bagaçx yuhwa nasa jiꞌphuçxa kçxuꞌçxuꞌjsamée yakhaꞌ txakwe nxus yuhmeena jĩtxna.
30 Txajũꞌ nasaꞌ nxusna ũukhna vxiç wala upeçxa jxuka ikh jxthãasutxna, saꞌ thãꞌj leꞌçxkwesatxwa txãꞌwẽy yũu jxthãasutxna.
31 Fxtũu tasx buçxaçteçxáa yuhwa naꞌwẽtx yũꞌ naꞌ fxtũu tasx ewsa ukawaꞌj en ãhte yuꞌ wejx txãꞌwẽ yũutxna jĩk.
32 Jesus yakh ikhyaꞌ eꞌz piçthẽꞌj wala yuuwesatx jxũna uꞌjtx.
33 Saꞌ teeçx ahte Uusáa dxikthé dxiꞌthçxáasa jĩnisate paꞌjçxaꞌ, Jesusaꞌs kluuskhẽ kiꞌptxi, txãꞌwẽy eꞌz yuuwesatxwa teeçxsaꞌs paçu, vxiteꞌs jebu.
34 Txãꞌwẽ kluuste fxuçuçteꞌ, Jesusaꞌ naꞌjĩnak weꞌwe:
—Tata, meen peltunaĩ adxaꞌs açesaweꞌsxtxi. Txãaweꞌsxaꞌ jiimeeçxatx txãꞌwẽ yũꞌ jĩk.
Txajũꞌ soldauweꞌsxaꞌ swerte kaahtx, Jesus athni ropaꞌs maa soldau knaytewa jiyuyaꞌ.
35 Naapkaçxhaꞌ nasa kuhsa kxtee thegna ũssa vxiteꞌ judiu npiiçthẽꞌjweꞌsxwa Jesusaꞌs weeçx weꞌwena npeevxysxijkatx naꞌjĩna:
—Vxitetxwa nweꞌweyaꞌ ãjãꞌk naꞌ ãçxhaꞌ peekíi kluusuwa iyuna, Dxus txhitxhçxa kaahnisa dxihçxaꞌ jĩꞌtx.
36 Açaꞌ soldauweꞌsxwa weeçx weꞌwena utxaaçxaꞌ, vxino ewmeesaꞌs yus wẽena
37 naꞌjĩꞌtx:
—Idxaꞌ judiuweꞌsxtxi jxkaahsa dxihçxaꞌ, peekíi kluusu iyuçxa msaꞌj jĩꞌtx.
38 Kluus vxiçteꞌ griego, latin, hebreo yuweju fxiꞌjni naꞌjĩꞌk: Naaíi Judiuweꞌsxtxi Jxkaahsaꞌ jĩꞌk.
39 Txajũꞌ yuuwesa kluuskhẽ aꞌkxni uꞌpsa teeçxsaꞌ naꞌjĩk Jesusaꞌs iiwẽesxuna:
—Idxaꞌ Kristo dxihçxaꞌ, peekíi kluusu iyuçxa kweꞌsxtxiwa meen nweꞌwe jĩteꞌ,
40 vxiteꞌ kaꞌtu pukakhẽ uꞌpsa yuꞌ naꞌjĩnak pas:
—Idxaꞌ yuuwesaçxa txãꞌwẽ seenaꞌ kastigãyni uꞌpçxawa, Dxusaꞌs ũukhuꞌçmeewáꞌga txãꞌwẽ wẽesxuꞌ.
41 Kweꞌsxaꞌ isa yuuwesayuhthaꞌw, txãa paꞌga kastigãyni uꞌpthaꞌw. Nawa naa piçthẽꞌjaꞌ kĩhte yuhwa yuuwesa meek yuꞌ jĩçxaꞌ,
42 Jesusaꞌs naꞌwẽk weꞌwe:
—Iidx jxkaahwaꞌthe paꞌjçxaꞌ, adxaꞌs yaakineꞌga jĩteꞌ,
43 Jesus pasçxaꞌ:
—Isath weꞌweꞌ, Dxus ũsnite ãçxhíi adx yakh ũsuneꞌga jĩk.
Jesus uuníi
(Mt 27.45-56; Mr 15.33-41; Jn 19.28-30)
44 Txajũꞌ ẽepxãh yuuçpkaçxhaꞌ, naa kiwete jxuka çxhiꞌdxku kusuçte las trestepkaçx.
45 Sekaꞌ kweethmeꞌ, naapkaçxhaꞌ dxuus yatte txudenisa liensu pesath aꞌkxnisaꞌ puupxãjkhẽk sute.
46 Naapkaçxhaꞌ Jesusaꞌ naꞌjĩnak sus weꞌwe:
—Tata, iidx kusete adx ũusaꞌs nvxiituçthu jĩnaꞌwa uuk.
47 Txãꞌwẽ yũuteꞌ, soldau kpiitan uyçxaꞌ, naꞌjĩnak Dxusna weçxa:
—Isa, naa piçthẽꞌjaꞌ yuuwemeesa yuh yuꞌga jĩk.
48 Açaꞌ nasa jxukay kxtee ũssawa txãꞌwẽ yũute uyçxaꞌ, ¿txãꞌwẽ yujaꞌ yuumanx? sũhnatx nxusna ũukhna uꞌj.
49 Açaꞌ Jesusaꞌs jiisaweꞌsx vxiteꞌ Galileajũjx Jesus yakh yuusa uꞌyweꞌsxaꞌ jxuꞌjuçxáatx thegna ũsuꞌ txãꞌwẽ yũuçte.
Jesusaꞌs pedaní
(Mt 27.57-61; Mr 15.42-47; Jn 19.38-42)
50 Kxteꞌ teeçx piçthẽꞌj José yaasesa ũsuꞌk. Txãa yuꞌ Judea kiwete Arimatea çxhabteweꞌsx judiu npiiçthẽꞌj walasateweꞌsxku yuꞌ.
51 Txãa Joseꞌ isa bagaçx Dxus jxkaajxaꞌ takhekx sũhna ũythassak yuꞌ. Txãꞌwẽçxaíik vxite judiu npiiçthẽꞌjweꞌsx Jesusaꞌs ikhyaꞌ puutx weꞌweçteꞌ, txãa yuꞌ waꞌl.
52 Txajũꞌ txãa Joseꞌ Pilato tasxte uꞌjçxa Jesus kakweꞌs pẽjxku.
53 Saꞌ kluusuh spajkxçxa liensute yapçxa kwet penxa uꞌse phaadeni kim yuhwa pedanimeegak khikh.
54 Txãꞌwẽ sapatu jxkaasewaꞌj en jxuka ãjãçku yuꞌ.
55 Açaꞌ uꞌyweꞌsx Galileajũjx Jesus yakh piꞌkxna yuusaꞌ txãaweꞌsxwa uꞌjçxa kwet kafx pedaniꞌs uytxi Jesus kakweꞌs mkaa khikheçtewa.
56 Saꞌ yatna sxawedna uꞌjçxa, Jesus kakwete sxũsxwaꞌj jxuka pheuꞌjçxatx sapatu jxkaase ente kiꞌsna fxiꞌze, Dxus jxkaahniꞌs kxtey nwẽesẽꞌj na.
