Lukas 24:1-53
24 Jxkaase en skhẽwnijũ kuskuskhẽ wala kusíi uꞌyweꞌsxaꞌ Jesus kakwete sxũsxwaꞌj pheuꞌjnisaꞌs atçxa pedaní kwet kafxna uꞌjtx. Vxite uꞌywa txãaweꞌsx yakh jaꞌda piꞌkxna uꞌjtx.
2 Kxtee paꞌjçxaꞌ, kafxte aphnisa kwetaꞌs fxiite kiꞌpni uꞌpte uyçxaꞌ,
3 kafxte uꞌkatx. Nawa Jesus kakwe yuꞌsaꞌ uymeetaꞌ.
4 Saꞌ wala ũukhna maꞌwẽ yũuwaꞌjaꞌs yuuwa jiimeetx ũsuꞌ, naapkaçxhaꞌ eꞌz piçthẽꞌjtx ropa zhiçxkwe zmeenaꞌ çxihmesa athçxa txãaweꞌsx pukate vxyaa.
5 Açaꞌ wala ũukhçxa kiwekhẽtx kĩiçhu, naapkaçxhaꞌ txãa piçthẽꞌjweꞌsxaꞌ naꞌjĩtx:
—Uusaaweꞌsx ksxavxyu ĩtxĩ yuusaꞌs ¿kĩjxaꞌkwe pakwéꞌ?
6 Ayte meeyãꞌjaꞌ. Uuçxawa kiꞌ ĩtxĩ yuuyãꞌkh. Galileate ũsçxaꞌ naꞌjĩnak weꞌwe txãꞌsaꞌ miiyajkxwe:
7 Dxus Nçxiꞌk Nasa Yuusaꞌs ewmeesaweꞌsx kusete dukhni yuuna, açaꞌ txãaweꞌsxaꞌ kluuskhẽ kiꞌpçxa ikhetxna. Açaꞌ uuçxawa tekh enteꞌ kiꞌ ĩtxĩ kiiteena ¿jĩna ptaꞌsxmeenáꞌ?
8 Txãꞌjĩteꞌ Jesus weꞌweniꞌs yajkxtxi.
9 Saꞌ pedaniijũ sxawedna uꞌjçxa maꞌwẽ uyniꞌswa jxuka ptaꞌsxtxi oncesatx, saꞌ Jesus yakh uꞌjusa vxitesatxwa ptaꞌsxtxi.
10 Txãꞌwẽ ptaꞌsxsa yuꞌ Maria Magdalena, Juana, Jakobo njĩꞌj Maria, vxiteꞌ uꞌyweꞌsx jaꞌda uꞌjsa txãaweꞌsxtxi yuꞌ.
11 Nawa Jesus yakh uꞌjusaweꞌsx yuutxiꞌ luuku weꞌweni naꞌwẽçxáaneꞌ pthũuseꞌ txãa uꞌyweꞌsx ptaꞌsxnisa yuꞌ, açaꞌ isaneꞌta weꞌweꞌ sũjũꞌçmeetaꞌ.
12 Txãꞌwẽtewa Pedroꞌ wuwuuçxak thegyaꞌ uꞌj pedaní kafxte, saꞌ dxiiga kuyçxaꞌ, liensuçxáꞌs puçte kiꞌpni uꞌpte uyçxaꞌ: ¿Txãꞌwẽ yujaꞌ yuumanx? sũhna wala kuh yajkxna yatna sxawedku.
Emaus çxhabna uꞌjsatx Jesus vxyaani
(Mr 16.12-13)
13 Txãa entey Jesus yakh uꞌjusa eꞌzsaꞌ Emaus çxhabnatx uꞌjweç yuꞌ. Txãa çxhabaꞌ Jerusalenuh once kilometro ãh jxuꞌkhak ũsuꞌ.
14 Txãa eꞌzsaꞌ jũꞌnakhẽ kĩjkĩh yũuniꞌswa jxuka yajkxnatx puutx weꞌwena uꞌjweç yuꞌ.
15 Txãꞌwẽ dxiꞌthe weꞌwena uꞌjweçpkaçxhaꞌ, Jesusaꞌ vxyaaçxáa yuuçxa txãaweꞌsx yakh jaꞌda uꞌkh.
16 Txãꞌwẽtewa, txãaweꞌsx yuꞌ uyçxawa, kimtewa jiyumeetaꞌ.
17 Txajũꞌ Jesusaꞌ pẽjxku:
—¿Kĩjkwe txakwe puutx weꞌwena uꞌjweꞌ? ¿Kĩh yuupaꞌga txãꞌwẽ nxusna uꞌjweçkwe? jĩteꞌ,
18 Kleofxas yaasesa teeçxsaꞌ naꞌjĩnak pas:
—Jũꞌnakhẽçxáa Jerusalente txãꞌwẽ seenaꞌ nxus nxus yũunisaꞌs majũweꞌsxwa jxukatx jiyu, açaꞌ idxçxáawáꞌga jiyumée neeyũu kxtee ũsçxawa jĩteꞌ,
19 Jesusaꞌ pẽjxku:
—¿Kĩhga yuu? jĩna. Açaꞌ txãaweꞌsxaꞌ ptaꞌsxtxi jxuka:
—Jesus Nasarethũweꞌsxaꞌs seenaꞌ nxusnxus vxitçxa ikhniꞌsthaꞌw jiꞌphu. Txãꞌ Dxus yuwe ptaꞌsxsa kĩjkĩh yũuyaꞌwa ãjãsak yuꞌ, saꞌ Dxus dxiꞌpte vxiteꞌ nasaa ksxavxytewa txãꞌwẽk ewçxáa yũuna fxiꞌzesa yuꞌ.
20 Txãꞌwẽtewa sacerdote npiiçthẽꞌjweꞌsx vxiteꞌ kweꞌsx npiiçthẽꞌjweꞌsx yuꞌ txãꞌsaꞌ ikhwaꞌjçxáa vxitçxa dukhtxi, açaꞌ kluuste fxuççxa ikhtxi.
21 Kweꞌsx yuꞌ Israelweꞌsxtxi nweꞌwewaꞌjsana sũjũꞌthaꞌw, nawa kxtey yuumeꞌ. Txãꞌwẽ nxus yũuni ãçxhaꞌ tekh en yãꞌj yuuçaꞌ.
22 Açaꞌ uꞌyweꞌsx kweꞌsx yakh ih pkhaakhena uꞌjusa maaíi yuꞌ pedaní kafxte thegyaꞌ uꞌjçxa
23 kiꞌ sxawedçxaꞌ, kweꞌsxtxi khãawãsxiꞌtx txãaweꞌsx ptaꞌsxçxaꞌ: Uusáa kakwe yuꞌs uymeeçxawa, angelesweꞌsxçxáatxthaꞌw uy, açaꞌ Jesusaꞌ ĩtxĩ yuuk jĩꞌtx jĩnatx kweꞌsxtxi ptaꞌsx txãa paꞌgathaꞌw ũukh.
24 Açaꞌ kweꞌsx yakh uꞌjusa piçthẽꞌj maaíi yuꞌ pedaní kafxna uꞌjçxa uꞌyweꞌsx maꞌwẽneꞌta ptaꞌsx txãꞌwẽyçxáathaꞌw uy. Nawa Jesus yuꞌsaꞌ uymeethaꞌw jĩnatx ptaꞌsx jĩteꞌ,
25 Jesusaꞌ naꞌwẽk weꞌwe:
—Dxus yuwe ptaꞌsxsaweꞌsx weꞌweniꞌs nakwe txaçxtewa, jiyuyaꞌ ãjãꞌçmée íiçxáaiꞌkwe.
26 Kristoꞌ cielute uꞌkamey, ¿seenaꞌ nxus pxthaa yuuwaꞌjsa yuꞌçmeenáꞌ? jĩçxaꞌ,
27 Dxus librute maꞌwẽ fxiꞌjniꞌswa jxuka ptaꞌsxyaꞌ takhku, txãꞌs maꞌwẽ yũuwaꞌjaꞌswa Moises weꞌwenijũjx takhçxa mtee paꞌjneꞌta Dxus yuwe ptaꞌsxsaweꞌsx fxiꞌjçxa nvxiht kxtee paꞌj.
28 Saꞌ txãaweꞌsx paꞌjwaꞌj çxhabte paꞌtheꞌ, Jesus yuꞌ uꞌjnik uꞌjweç yuꞌ.
29 Açaꞌ txãaweꞌsxaꞌ naꞌjĩnatx neevxisxa:
—Kweꞌsx yakh ayte meꞌka dejxaꞌ. Txãꞌwẽmeꞌ kusuçyãꞌjaꞌ naꞌ çxhiꞌdxina jĩteꞌ, Jesusaꞌ txãaweꞌsx yakh uꞌkak kxtee dejxaꞌ.
30 Saꞌ txãaweꞌsx yakh mesate uꞌpçxaꞌ, Dxusna weçxanaꞌwa panaꞌs peꞌltedeçxa txãaweꞌsxtxi ũsuꞌsku.
31 Txãꞌwẽ yũunijũtx kimtewa jiyu. Naapkaçxhaꞌ Jesus yuꞌ naa dudte txãaweꞌsx yafxju vxyaameꞌ.
32 Açaꞌ txãaweꞌsx pweꞌsx naꞌjĩnatx puutx ptaꞌsxiꞌ:
—Jesusneꞌ yuꞌ açaꞌ isa yuhneꞌ kweꞌsx ũuste seenaꞌ weçxweçxa ũusutheꞌ dxiꞌthe yuhçxa Dxus librute fxiꞌjniꞌs ptaꞌsxiçteꞌ jĩꞌtx.
33 Saꞌ txãa oratey kiitenaꞌwa kiꞌ Jerusalen çxhabna sxawedçxa Jesus yakh uꞌjusa oncesaweꞌsxtxi uyna paꞌjtx vxite nasa yakh pkhaakheçxa uꞌpte.
34 Açaꞌ kxtee pkhaakhena uꞌpsa yuꞌ eꞌzsa Emausu sxawedsatx ptaꞌsxtxi naꞌjĩna:
—Isa, kweꞌsxtxi jxpeꞌjsaꞌ kiꞌ ĩtxĩ yuuyuhga açaꞌ Simonwa uyka jĩteꞌ,
35 Emausu sxawedna paꞌjsawa ptaꞌsxtxi dxiꞌthe maꞌwẽ puutx uyçxa weꞌweniꞌswa jxuka, saꞌ panaꞌs txudedeçpkaçxhaꞌ maꞌwẽ yũuçxa Jesustewa jiyuçxawa jxuka ptaꞌsxtxi.
Jesusaꞌ txãa yakh uꞌjusaweꞌsxtxi neeweꞌweçxa nvxiitni
(Mt 28.16-20; Mr 16.14-18; Jn 20.19-23)
36 Txãaweꞌsxaꞌ kxtee weꞌwena uꞌpíyna, Jesusaꞌ txãaweꞌsx pxãhte vxyaaçxáa yuuçxa naꞌjĩnak weçxa:
—Ũukhmée weçxana meswe jĩteꞌ,
37 txãaweꞌsx yuꞌ: anximusaꞌs neꞌtkaꞌw uy sũhçxa ũukhuçtxi yuꞌ.
38 Açaꞌ Jesus weꞌweçxaꞌ:
—¿Kĩh yuutekwe ũukhúꞌ? Saꞌ ptaꞌsxteꞌ, ¿kĩh yuuçxakwe isa yuhna sũjũꞌçmée?
39 Mthegwe adx kuse petx adx çxida yãꞌjçxa. Vxitemée, adxthu. Açaꞌ adxaꞌs ew jiyuyaꞌ mjxaꞌdxwe. Adxaꞌ anximusmeeçxaꞌ, dxiꞌth jiꞌphsath, saꞌ kakweꞌswa jiꞌphsath. Iꞌkweꞌsx yafxte maꞌwẽtka vxyaꞌ txãa yuꞌsaꞌ jxuka jiꞌpthu.
40 Txãꞌjĩçxaꞌ, kuse petx çxida yãꞌjçxa ktheeguꞌkh.
41 Nawa txãaweꞌsxaꞌ kuh yajkxna weçxaniiteçxáa Jesusna sũhna yaakxwaꞌj yuꞌsaꞌ jiꞌphumeetaꞌ.
Txajũꞌ Jesusaꞌ naꞌjĩk:
—¿Iꞌkweꞌsxaꞌ ũꞌwaꞌj kĩhçxáawa jiꞌphmeekweꞌ? jĩteꞌ,
42 wedx khakhni peꞌla vxiteꞌ çxhiꞌdx mil txãꞌwẽsaꞌstxi ũs.
43 Açaꞌ jxpaꞌgaçxaꞌ txãaweꞌsx dxiꞌptey uyna ũste ũꞌk.
44 Saꞌ naꞌjĩnak weꞌwe:
—Adxna naꞌwẽ yũuk txãꞌsnath adxaꞌ iꞌkweꞌsx yakh nee uꞌjuy ptaꞌsx. Moises ley fxiꞌjni vxiteꞌ Dxus yuwee ptaꞌsxsaweꞌsx librute fxiꞌjni vxiteꞌ Salmos librute fxiꞌjni ũstaꞌ, adxaꞌs maꞌwẽ yũuwaꞌjaꞌswa txãꞌ jxuka kxtey yuuna jĩnath ptaꞌsx.
45 Txajũk Dxus librute fxiꞌjniꞌs isa ew kaajiyuꞌj,
46 saꞌ naꞌjĩk:
—Kristoꞌ uuwaꞌjsaꞌ, nawa tekh enteꞌ kiꞌ ĩtxĩ yuuna uusaaweꞌsx ksxavxyuh.
47 Açaꞌ txãꞌwẽ yũuniꞌs Jerusalenu ptaꞌsxyaꞌ takhçxa maa maa kiwetewa jxuka ptaꞌsxitxna, kxah nasaꞌ pkaltxi nvxihtçxa Dxus tasxte sxawedteꞌ, Kristoꞌ txãaweꞌsxtxi peltunaĩna jĩna fxiꞌjni ũsaꞌ.
48 Açaꞌ iꞌkweꞌsxaꞌ adx maꞌwẽ yũuçxa kiꞌ ĩtxĩ yuuniꞌs uysaaiꞌkwe naꞌ txãꞌsaꞌ ptaꞌsxwaꞌj jiꞌphiꞌkwe.
49 Nawa mwẽesẽꞌjwe: adx Tata iꞌkweꞌsx jĩi kaajxaꞌ neeyũuk txãꞌsaꞌ kajaꞌnja jxpaꞌgakahn. Nawa txãꞌsaꞌ jxpaꞌgamey yuꞌ, ay Jerusalentee meswe jxpaꞌgapkaçx jĩk.
Jesus cielun uꞌjni
(Mr 16.19-20)
50 Txãa eꞌsuꞌ txãa yakh uꞌjusaweꞌsxtxi peꞌjna uꞌkh çxhab eka Betaniate paꞌj. Saꞌ kusetx kiisçxa jxukaysatx bedekĩyku.
51 Txãꞌwẽ yũuçpkaçxhaꞌ, cielun peꞌjna uꞌjnik yuu txãaweꞌsxçxáatx nvxihtçxa.
52 Açaꞌ txãaweꞌsxaꞌ Jesus yuh yuꞌga jĩna weçxana Jerusalen çxhabnay wala wẽtwẽt yajkxna sxawedtxi.
53 Saꞌ puꞌvxitumeetx dxuus yatte Dxusna weçxana nes yuꞌ.
