Lukas 3:1-38
3 Tiberio Cesar Romate jxkaahna uꞌpni kince anxusuꞌ Poncio Pilatoꞌ Judeate neꞌjweꞌsxku yuꞌ açaꞌ Herodesaꞌ Galileate neꞌjweꞌsxku yuꞌ. Naapkaçxhaꞌ txajx nyakh Fxelipeꞌ Iturea vxiteꞌ Trakonitete neꞌjweꞌsxku yuꞌ. Açaꞌ Lisaniasaꞌ Abiliniate neꞌjweꞌsxku yuꞌ.
2 Naapkaçxhaꞌ sacerdote npiiçthẽꞌjweꞌsx yuꞌ Anas vxiteꞌ Kaifxas txãaweꞌsxtxi yuꞌ. Txãn ensuk Dxusaꞌ txajx yuweꞌs nasa uꞌpnimeesu ptaꞌsxyaꞌ uꞌkhan paꞌya Zakarias nçxiꞌk Juanaꞌs.
3 Açaꞌ Juanaꞌ Jordan yuꞌwala utxasu msuu msuuwa jxuka pekũjk nasatx ptaꞌsxna:
—Iꞌkweꞌsx pkaltxi nvxihtçxa Dxus tasxte sxawedçxa yuꞌte mkhẽewe yaꞌbautisãyna, iꞌkweꞌsxtxi Dxus peltunãykahn jĩꞌk.
4 Dxus yuwe ptaꞌsxsa Isaias naꞌjĩna fxiꞌjniꞌ kxtey yuuk:
Nasa uꞌpnimée kiwesu sus weꞌwenik pthũuseꞌ naꞌjĩna:
Dxus paꞌjwaꞌjaꞌs mpheuꞌjwe,
Txãꞌ thẽymée paꞌkhan.
5 Kiwe kafx uꞌpsuwa jxuka yuutawaꞌj yuuna,
Saꞌ thãꞌj wala vxiteꞌ vxiç maꞌk yuu nawa jxuka uukweꞌjni yuutxna.
Dxiꞌj taꞌgusawa kuꞌleꞌjni yuutxna.
Dxiꞌj ewmeesaꞌs pheuꞌjni yuutxna.
6 Açaꞌ nasa jxukaysa uyuutxna nweꞌwewaꞌjsa Dxus kaahnisaꞌs jĩna fxiꞌjniꞌ.
7 Juan tasxte yaꞌbautisãyyaꞌ paꞌjsatxiꞌ naꞌjĩnak weꞌwe:
—Iꞌkweꞌsxaꞌ ul weesweesa jiꞌjiꞌkwe, txãa paꞌga kastigo seenaꞌsa yujaꞌ açaꞌ txajũ iyuwaꞌjaꞌs ¿kimga ptaꞌsx?
8 Txãꞌwẽ kastigo seenaꞌsaju iyuwaꞌjaꞌs jiyuyãꞌjçxaꞌ, ewçxáa yũuna mfxiꞌzewe, kxah maawa uysaꞌ: Naaweꞌsxaꞌ pkaltxi nvxihtçxa Dxus tasxte sxawed yuhta sũjũtxna. Txãꞌjĩteꞌ, kweꞌsxaꞌ Abrahan jiꞌthaꞌw sũhna iiwejçx yajkxna fxiꞌzewaꞌjmeꞌ. Naꞌjĩꞌth naꞌ: Iꞌkweꞌsxçxáamée naa kwet yuhtxwa Abrahan jiꞌj vxit-yaꞌ ãjãna Dxusaꞌ.
9 Txãꞌwẽ ewçxáa yũuna fxiꞌzemeeteꞌ, amaꞌ ih yãꞌj ũsaꞌ fxtũu tasxtxi spẽꞌthyaꞌ. Maa fxtũu tasxwa ew yũnmeena açaꞌ spẽꞌthçxa ipxte kabwaꞌjçxáa yuuna jĩnak yuꞌkxpeh.
10 Txãꞌjĩteꞌ nasaꞌ paapẽjxtxi:
—¿Kĩhçxa yũuna ewçxáa fxiꞌzekxthaꞌw? jĩteꞌ,
11 Juan pasçxaꞌ:
—Eꞌz atxh jiꞌphçxaꞌ, jiꞌphmeesaꞌsaꞌ teeçx ũswaꞌjaꞌ. Açaꞌ ũꞌniwa jxthaakwe jiꞌphçxaꞌ, vxite jiꞌphmeesaꞌs puuçwaꞌjaꞌ jĩk.
12 Txãꞌwẽy gobierno jĩi vxyu pkhakhsaweꞌsxwa yuꞌte yaꞌbautisãyyaꞌ utxaaçxaꞌ, Juanaꞌs naꞌwẽtx paapẽjx:
—Mpeetaꞌsx, kweꞌsxaꞌ ¿maꞌwẽ yũuna fxiꞌzekxthaꞌw? jĩteꞌ,
13 Juan pasçxaꞌ:
—Ley makweneꞌ vxyuꞌs pẽykajaꞌ txãꞌsçxáana mpẽjxwe, ĩsxĩiçxa thaakwe pẽjxmée jĩk.
14 Txajũꞌ soldauweꞌsxwa maaíi yũꞌ txãꞌwẽy pẽjxtxi:
—Kweꞌsxaꞌ ¿maꞌwẽ yũuna fxiꞌzekxthaꞌw? jĩteꞌ, txãaweꞌsxtxiwa ptaꞌsxku Juanaꞌ:
—Maa nasa yuhtxwa juunaꞌ weꞌweçxa txãaweꞌsx jĩitx kusaꞌjnuwe kĩh yuhnawa. Saꞌ kĩh yuhwa yuuwemeetewa ĩsxĩiçxa pãatxhĩꞌkhna fxiꞌzenuwe. Saꞌ iꞌkweꞌsxtxi makwe dewetewa txãa yakhçxáa weçxana mfxiꞌzewe.
15 Txãꞌwẽ weꞌwena ũsteꞌ, nasa wẽsẽꞌjsa yuꞌ wala yajkxna ũsuꞌtx: Meeçxaꞌ ¿naa wáa Kristona? sũhna.
16 Açaꞌ Juanaꞌ jxukaysatx ptaꞌsxku:
—Adxaꞌ bautisãyna naasáa yuꞌteçxáath akheꞌ. Nawa adx eꞌsuh vxite yujaꞌ, txãꞌ Dxus Espiritu ipx naꞌwẽsaꞌs iꞌkweꞌsx ũuste kxuꞌakheꞌjyaꞌ ãjãwaꞌjsaꞌ. Açaꞌ adxaꞌ txajx pelgatxi wesçxáa yuhtxwa khihbxaꞌ ãjãwaꞌjmeesath.
17 Txãꞌ yujxaꞌ skuutxh kweejxaꞌjni plaatuꞌs kusete at yãꞌjçxa ũsaꞌ. Saꞌ kweejxaꞌjçxa skuutxhaꞌs jxaawuuna, nawa tamaꞌsaꞌ ipx bagaçxte yuhwa ũçxhawaꞌjmeesate kabuna jĩk.
18 Txãꞌwẽk wala kuh jwed yuꞌkxpehna Dxus yuweꞌs ptaꞌsxiꞌ Juanaꞌ.
19 Saꞌ neꞌjweꞌsx Herodesaꞌswa yuꞌkxpejk txãꞌwẽ nyakh Fxelipe nyu Herodiasaꞌs kusaꞌjçxa, txãa yakh nyu naꞌwẽ fxiꞌzeçxa vxiteꞌ kĩhwa ewmeeçxáak yũuna ũsuꞌ. Açaꞌ txãa paꞌgak txãꞌwẽ yũuwaꞌjmeꞌ jĩna yuꞌkxpeh Juanaꞌ.
20 Nawa Herodesaꞌ nwẽesẽꞌjepkaçxte jweeíiçxáak thaakwe ewmée yũu, Juanaꞌs karcelte kaakxuuphaꞌjna.
Jesus yaꞌbautisãyni
(Mt 3.13-17; Mr 1.9-11)
21 Txãꞌwẽ yũumeyna Juanaꞌ nasatx yuꞌte bautisãyna ũsteꞌ, Jesuswa paꞌjçxa yuꞌte yaꞌbautisãyku. Saꞌ oraĩçpkaçxhaꞌ, cieluꞌ phaatek.
22 Açaꞌ Dxus Espirituꞌ Jesus kajkwete tub çxihme naꞌwẽsak vxyaana kĩh. Naapkaçxhaꞌ cieluju naꞌwẽ weꞌwenik pthũuse:
—Idxaꞌ adx Nçxiꞌk wala wedxnisag, açaꞌ iidxpaꞌga wala weçxana ũsthu jĩni.
Jesukristo jiꞌj nyafxiiteyweꞌsxtxi ptaꞌsxni
(Mt 1.1-17)
23 Jesusaꞌ treinta anxu jiꞌphçxak Dxus yuweꞌs ptaꞌsxyaꞌ takh. Jesusaꞌ Jose nçxiꞌkaꞌ jĩnisak yuꞌ. Joseaꞌ, Eli nçxiꞌkku yuꞌ.
24 Eliaꞌ, Matat nçxiꞌkku yuꞌ. Matathaꞌ, Levxi nçxiꞌkku yuꞌ. Levxiaꞌ, Melki nçxiꞌkku yuꞌ. Melkiaꞌ, Jana nçxiꞌkku yuꞌ. Janaꞌ, Jose nçxiꞌkku yuꞌ.
25 Joseaꞌ, Matatias nçxiꞌkku yuꞌ. Matatiasaꞌ, Amos nçxiꞌkku yuꞌ. Amosaꞌ, Nahum nçxiꞌkku yuꞌ. Nahumaꞌ, Esli nçxiꞌkku yuꞌ. Esliꞌ, Nagai nçxiꞌkku yuꞌ.
26 Nagaiaꞌ, Maat nçxiꞌkku yuꞌ. Maathaꞌ, Matatias nçxiꞌkku yuꞌ. Matatiasaꞌ, Semei nçxiꞌkku yuꞌ. Semeiꞌ, Jose nçxiꞌkku yuꞌ. Joseaꞌ, Juda nçxiꞌkku yuꞌ.
27 Judaꞌ, Joana nçxiꞌkku yuꞌ. Joanaꞌ, Resa nçxiꞌkku yuꞌ. Resaꞌ, Zorobabel nçxiꞌkku yuꞌ. Zorobabelaꞌ, Salatiel nçxiꞌkku yuꞌ. Salatielaꞌ, Neri nçxiꞌkku yuꞌ.
28 Neriꞌ, Melki nçxiꞌkku yuꞌ. Melkiaꞌ, Adi nçxiꞌkku yuꞌ. Adiꞌ, Kosam nçxiꞌkku yuꞌ. Kosamaꞌ, Elmodam nçxiꞌkku yuꞌ. Elmodamaꞌ, Er nçxiꞌkku yuꞌ.
29 Eraꞌ, Joswe nçxiꞌkku yuꞌ. Josweꞌ, Eliezer nçxiꞌkku yuꞌ. Eliezeraꞌ, Jorim nçxiꞌkku yuꞌ. Jorimaꞌ, Matat nçxiꞌkku yuꞌ.
30 Matathaꞌ, Levxi nçxiꞌkku yuꞌ. Levxiaꞌ, Simeon nçxiꞌkku yuꞌ. Simeonaꞌ, Juda nçxiꞌkku yuꞌ. Judaꞌ, Jose nçxiꞌkku yuꞌ. Joseaꞌ, Jonan nçxiꞌkku yuꞌ, Jonanaꞌ, Eliakim nçxiꞌkku yuꞌ.
31 Eliakimaꞌ, Melea nçxiꞌkku yuꞌ. Meleaꞌ, Mainan nçxiꞌkku yuꞌ. Mainanaꞌ, Matata nçxiꞌkku yuꞌ. Matataꞌ, Natan nçxiꞌkku yuꞌ.
32 Natanaꞌ, Davxid nçxiꞌkku yuꞌ. Davxidaꞌ, Isaí nçxiꞌkku yuꞌ. Isaíaꞌ, Obed nçxiꞌkku yuꞌ. Obedaꞌ, Booz nçxiꞌkku yuꞌ. Boozaꞌ, Salmon nçxiꞌkku yuꞌ. Salmonaꞌ, Naason nçxiꞌkku yuꞌ.
33 Naasonaꞌ, Aminadab nçxiꞌkku yuꞌ. Aminadabaꞌ, Aram nçxiꞌkku yuꞌ. Aramaꞌ, Esrom nçxiꞌkku yuꞌ. Esromaꞌ, Fxares nçxiꞌkku yuꞌ, Fxaresaꞌ, Juda nçxiꞌkku yuꞌ.
34 Judaꞌ, Jakob nçxiꞌkku yuꞌ. Jakobaꞌ, Isaak nçxiꞌkku yuꞌ. Isaakhaꞌ, Abrahan nçxiꞌkku yuꞌ. Abrahanaꞌ, Tare nçxiꞌkku yuꞌ. Tareꞌ, Nakor nçxiꞌkku yuꞌ.
35 Nakoraꞌ, Serug nçxiꞌkku yuꞌ. Serugaꞌ, Ragau nçxiꞌkku yuꞌ. Ragauaꞌ, Peleg nçxiꞌkku yuꞌ. Pelegaꞌ, Heber nçxiꞌkku yuꞌ. Heberaꞌ, Sala nçxiꞌkku yuꞌ.
36 Salaꞌ, Kainan nçxiꞌkku yuꞌ. Kainanaꞌ, Arfxaxad nçxiꞌkku yuꞌ. Arfxaxadaꞌ, Sem nçxiꞌkku yuꞌ. Semaꞌ, Noe nçxiꞌkku yuꞌ. Noeꞌ, Lamek nçxiꞌkku yuꞌ.
37 Lamekhaꞌ, Matusalen nçxiꞌkku yuꞌ. Matusalenaꞌ, Enok nçxiꞌkku yuꞌ. Enokhaꞌ, Jared nçxiꞌkku yuꞌ. Jaredaꞌ, Mahalaleel nçxiꞌkku yuꞌ. Mahalaleelaꞌ, Kainan nçxiꞌkku yuꞌ.
38 Kainanaꞌ, Enos nçxiꞌkku yuꞌ. Enosaꞌ, Set nçxiꞌkku yuꞌ. Sethaꞌ, Adan nçxiꞌkku yuꞌ. Adan yuꞌ, Dxus kuseju yuu pheuꞌjnisak yuꞌ.
