Lukas 4:1-44
4 Dxus Espiritu Jesusaꞌs jxpeꞌjyaꞌ jxukate vxyaanijũꞌ, Jesusaꞌ Jordan yuꞌwalaju kasejk, açaꞌ Espirituꞌ peꞌjna uꞌkh nasa uꞌpnimeesu.
2 Kxteeaꞌ kuarenta en kĩh yuhwa ũꞌmée uꞌpçxaꞌ, wẽek. Açaꞌ eçxthẽꞌjaꞌ paꞌkh ewmée vxit wẽeçxa.
3 Saꞌ paꞌjçxa naꞌjĩk:
—Dxus Nçxiꞌk dxihçxaꞌ, naa kwetaꞌs pan myuukaah jĩteꞌ,
4 Jesus pasçxaꞌ:
—Nasaꞌ pan yakhçxáa yuꞌ ĩtxĩ fxiꞌzemeetxna, naasáa jxuka Dxus weꞌweni yakh yuuçxáa ĩtxĩ fxiꞌzetxna jĩna fxiꞌjni ũsaꞌ Dxus libruteꞌ jĩnak pas.
5 Txajũꞌ eçxthẽꞌjaꞌ teeçx thãꞌthe Jesusaꞌs peꞌjna uꞌjçxaꞌ, txãa vxiçu mtee mtee çxhab walatxwa kaavxyaꞌjaꞌjçxa,
6 naꞌjĩk:
—Naa çxhabtxi petx kiwe kĩjkĩhtxwa jxuka idxçxaçxáꞌs ũsuꞌnja. Naꞌ jxuka adx kuseteçxaçxáa dukhnisataꞌ açaꞌ maawa adx wedxnisa yuꞌsaꞌ ũsuçxáꞌnja.
7 Idxwa adx tasxte peejxũkweçxa neeweꞌweneꞌga açaꞌ, jxuka iidx jĩiçxaçxáa yuutxna jĩteꞌ,
8 Jesus pasçxaꞌ:
—Idxna jxpeꞌjsa Dxusçxáꞌs neeweꞌwewaꞌjaꞌ, saꞌ txãaçxáꞌs selpiwaꞌjaꞌ jĩꞌk Dxus librute açaꞌ eçxthẽꞌj adx tasxu meꞌj jĩk.
9 Txãa eꞌsuꞌ, eçxthẽꞌjaꞌ Jesusaꞌs Jerusalenna peꞌjna uꞌjçxa, dxuus yat ẽete kaatekaꞌjçxaꞌ naꞌjĩk:
—Dxus Nçxiꞌk dxihçxaꞌ, kute ayjxu mũph kiwekhẽ.
10 Txãa paꞌgatey Dxus librute weꞌweçxaꞌ: Txajx angelesweꞌsxtxi jxkaajana idxaꞌs nweꞌwekahn.
11 Açaꞌ angelesweꞌsxaꞌ kusete jxpaꞌgatxna, iidx çxida kwette kpãꞌyũukahmén jĩteꞌ,
12 Jesus pasçxaꞌ:
—Dxus libruteꞌ: Idxna jxpeꞌjsa Dxusaꞌs jxkaahwaꞌj jiꞌphmeeg jĩꞌk jĩna pasteꞌ,
13 eçxthẽꞌjaꞌ ãjãmée yãꞌjçxaꞌ, Jesusaꞌs nvxihtçxa uꞌkh saꞌ maz en yuꞌ vxyaameꞌ.
Galilea kiwesu Jesus mjĩiyaꞌ takhni
(Mt 4.12-17; Mr 1.14-15)
14 Txajũꞌ Jesusaꞌ Dxus Espiritu jxpeꞌjni kiꞌ Galileate sxawedna paꞌtheꞌ, txãa kiwesu nasaꞌ jxuka Jesusçxaçxáꞌstxi weꞌweꞌ kĩjkĩhwa yũꞌk jĩna.
15 Txajũꞌ Jesusaꞌ judiuweꞌsx pkhaakhenisu Dxus yuweꞌs kaapiyaꞌtheꞌ, jxukaysa wala weçxana tuutheꞌjeꞌtx.
Jesusaꞌ Nasaretna uꞌjni
(Mt 13.53-58; Mr 6.1-6)
16 Txajũꞌ Jesusaꞌ Nasaretnak uꞌj, txajx walaní çxhabna. Saꞌ kxte paꞌjçxaꞌ, sapatu jxkaase ensuꞌ maꞌwẽneꞌ yũꞌ txãꞌwẽy, judiuweꞌsx pkhaakhenite uꞌkaçxa yujuk Dxus libruꞌs lẽeyyaꞌ.
17 Açaꞌ Dxus yuwe ptaꞌsxsa Isaias libruꞌstxi ũs. Açaꞌ naꞌwẽ fxiꞌjnikhẽk libruꞌs phaade:
18 Dxus Espirituꞌ adx yakh ũsaꞌ,
Txãasak adxaꞌs txhitxh yuwe ewsaꞌs puupletx ptaꞌsxkahn.
Ũuste nxusna uꞌpsatxku kvxiisxaꞌjyaꞌ adxaꞌs kaah,
Yuuwesa preesutx nweꞌwewaꞌjaꞌsku ptaꞌsxyaꞌ kaah,
Saꞌ uysameetxiꞌ kaauyuꞌjna,
Pkxuunisatxiꞌ nweꞌweçxa,
19 Jxukasa weçxana neeyũuwaꞌj anxu ãaniꞌs ptaꞌsxyaꞌk kaah jĩniꞌs lẽeyçxaꞌ,
20 Jesusaꞌ libruꞌs aphçxa, judiuweꞌsx pkhaakhenite puꞌçxsaꞌs dukhnaꞌwa, kaçxku. Açaꞌ jxukaysa judiuweꞌsx pkhaakhenite ũssaꞌ ivxiitumeetx Jesusaꞌs thegna neeyũu ũythãsna.
21 Açaꞌ Jesusaꞌ naꞌjĩnak ptaꞌsx:
—Naꞌwẽ fxiꞌjnisaꞌs wẽsẽꞌjiꞌkwe txãꞌ ãçxhãꞌ kxtey yuuwaꞌj en ãjk jĩk.
22 Txajũꞌ jxukaysa Jesusaꞌs ewçxáatx weꞌwena kuh yajkxna neeyũu, txãꞌwẽ zhiçxkwe ptaꞌsxteꞌ. Saꞌ puutx paapẽyiꞌtx:
—Naa piçthẽꞌjaꞌ ¿Jose nçxiꞌk meenáꞌ? jĩteꞌ,
23 Jesus pasçxaꞌ:
—Isa yuuwa iꞌkweꞌsxaꞌ adxaꞌs naa sũjũꞌneꞌkwe: Yuꞌçeꞌjsa, idxíi myaꞌyuꞌçeꞌj. Saꞌ naꞌjĩyaꞌwaneꞌkwe: Kapernaumte kĩjkĩhwa ew yũuk jĩniꞌs wẽsẽꞌjeꞌthaꞌw txãatxiꞌ txãꞌwẽy myũu ayte iidx kiwetewa jĩyaꞌwaneꞌkwe jĩçxaꞌ,
24 kiꞌ weꞌwek:
—Isath weꞌweꞌ: Dxus yuwe ptaꞌsxsaꞌ peekx kiwesuꞌ weeçxni yuuçxáa fxiꞌzetxna maawa.
25 Dxus yuwe ptaꞌsxsa Elias ensu Israel kiwesuꞌ wala kuh vxiuda ũsuꞌtx, naꞌwẽ tekh anxu y medio nus paꞌjmeeteꞌ, wala wẽjẽ paꞌkh txãa ensu.
26 Nawa Dxusaꞌ Eliasaꞌs kxazkuẽ vxiuda tasxsu jxuka yuꞌ kaahmée, naasáa Sidon çxhab wala pukasu Sareptate teeçx vxiuda tasxte yuuçxáak kaah.
27 Txãꞌwẽy Israel kiwesuꞌ wãꞌjy weete wala ãçãꞌsa ũsuꞌtx, Dxus yuwe ptaꞌsxsa Eliseo ensu. Nawa maa yuhtxwa nuykatxhimée, naasáa Naaman Siria kiweteweꞌsx yuuçxáꞌsku nuykatxhi jĩteꞌ,
28 wẽsẽꞌjçxaꞌ, judiuweꞌsx pkhaakhenite uꞌpsaꞌ wala ũusaçxana,
29 kiiteçxa Jesusaꞌs çxhabuh kutxiꞌjtx. Txãa çxhab Nasaret yuꞌ, thãꞌj vxiçgak ũsuꞌ, açaꞌ txãa penxa vxiçuhtx ukapajkxyaꞌwa yuꞌ.
30 Nawa Jesusaꞌ txãaweꞌsx ksxavxysu uymeyna skhẽwçxa uꞌkh.
Eçx iiyamunisa
(Mr 1.21-28)
31 Txajũꞌ Jesusaꞌ Galileate Kapernaum çxhabte paꞌjçxaꞌ, sapatu jxkaase ensuꞌ Dxus yuweꞌs ptaꞌsxna ũsuꞌk.
32 Açaꞌ nasaꞌ wala kuh yajkxna wẽsẽꞌjeꞌtx, txãꞌwẽ Dxusaꞌs nwẽeseꞌjwaꞌjaꞌs ũukhnus ptaꞌsxpaꞌga.
33 Açaꞌ kxte judiuweꞌsx pkhaakhenite teeçx piçthẽꞌj uꞌpuꞌk, eçx iiyamunisa. Txãꞌ susku naꞌjĩna weꞌwe:
34 —Jesus Nasarethuweꞌsx, kweꞌsxtxiꞌ ¿kĩhga yũu wẽjẽꞌ? Kuçx yuunu. Meeçxaꞌ ¿ivxiituyaꞌwagáꞌ? Idx kimtewa jiith. Idxaꞌ Dxus kaahnisag jĩteꞌ,
35 Jesusaꞌ txãa eçx luuku vxit-saꞌs juunaꞌk naꞌjĩna weꞌwe:
—Sxuunaꞌ myuu, saꞌ naa piçthẽꞌj ũusuh mkaaseh jĩteꞌ, txãa eçxaꞌ txãa piçthẽꞌjaꞌs nasaa ksxavxysu pẽtxçxa txajx ũusuh kasejk kĩh yuhwa kpãꞌvxitmée.
36 Txãꞌwẽ yũuteꞌ, jxukaysa ũukhçxa txãaweꞌsx pweꞌsx naꞌjĩnatx puutx weꞌweꞌ:
—Jesusaꞌ ¿kimki sakiꞌk txãꞌwẽ juunaꞌ jxkaahna weꞌweteçxáa eçx yuhwa nwẽesẽꞌjçxaꞌ kasejeꞌ? jĩꞌtx.
37 Açaꞌ Jesus txãꞌwẽ yũuniꞌs msuuwa jxukatx wala tuutheꞌjeꞌ txãa jaꞌdasu.
Pedro nyu njĩꞌjaꞌs Jesus nuykatxhini
(Mt 8.14-15; Mr 1.29-31)
38 Txajũꞌ Jesusaꞌ judiuweꞌsx pkhaakhenijũ kasehçxaꞌ, Simon yattek paꞌj. Açaꞌ Simon nyu njĩꞌjaꞌ wala kakwesekte ãçãꞌna ũsuꞌk. Txajũꞌ Jesusaꞌs pxthaa weꞌwena ptaꞌsxtxi.
39 Açaꞌ Jesusaꞌ ãçãꞌsa tasxte kũhçxa kakwesek ũçxhakahn weꞌwek. Naapkaçxhaꞌ kakwesekaꞌ ũçxhateꞌ, kiiteçxa selpiiyaꞌ kasejk.
Jxuka çxhiꞌdxiçte maazkuẽesatxwa nuykatxhini
(Mt 8.16-17; Mr 1.32-34)
40 Txajũꞌ sek khẽjẽçteꞌ, nasa kĩjkĩh weeteçxah ãçãꞌsatxwa jxuka Jesus tasxte nuypaꞌjtx. Açaꞌ ãçãꞌsa kakwesu kuseju jxaꞌdxçxaçxáa jxuka nuykatxhik.
41 Txãa ãçãꞌsaweꞌsx maaíi yuꞌ eçx luuku vxit-saꞌs ũuste jiꞌphtewa txãa eçxwa suhs naꞌjĩna kasehtx:
—Idxaꞌ Dxus Nçxiꞌkgu jĩna. Txãaweꞌsxaꞌ Dxus Nçxiꞌktewa jiitx yuꞌ.
Nawa Jesusaꞌ juunaꞌ weꞌweçxa jwee yuꞌ kweꞌweꞌjmeꞌ.
Galileasu Dxus yuweꞌs Jesus ptaꞌsxni
(Mr 1.35-39)
42 Khikhiiçteꞌ, Jesusaꞌ çxhab eka jxuꞌj lajkxsuk kaseh. Nawa nasaꞌ kxteewa pakwena paꞌjtx, vxite ahsu uꞌkhamén neevxisxayaꞌ.
43 Nawa Jesusaꞌ naꞌwẽk ptaꞌsx txãaweꞌsxtxiꞌ:
—Dxus jxkaahwaꞌj yuweꞌs ptaꞌsxwaꞌj jiꞌpthu vxite çxhabsuwa. Txãꞌwẽ yũuyaꞌ íiçxáa kaahnisath jĩk.
44 Txãasak Galilea kiwesu judiuweꞌsx pkhaakhenisu Dxus yuweꞌs ptaꞌsxna pekũh.
