Lukas 5:1-39
5 Teeçx enteꞌ Jesusaꞌ Genesaret ĩkh pukate ũsteꞌ, nasaꞌ kxtee zuunaꞌçxáatx utana paꞌj Dxus yuweꞌs wẽsẽꞌj wẽeçxa.
2 Txajũꞌ Jesusaꞌ eꞌz barko ĩkh pukasu namu jiꞌphmée ũstek uy, namu wedx-uwesaaweꞌsx yuꞌ kasehçxa, wedx ukhetx thethnatx ũs yuꞌ.
3 Açaꞌ Jesusaꞌ teeçx barko Simon jĩite khẽeçxaꞌ, yuꞌte wejkuẽ uꞌjçxak, kxtee kaçxçxa, Dxus yuweꞌs ptaꞌsx nasatx.
4 Saꞌ Dxus yuweꞌs ptaꞌsxna jxãꞌjçxaꞌ, Simonaꞌs naꞌjĩk:
—Barkoꞌs ĩkh wala pxãhte paꞌj jxũna uꞌjçxa txkhẽe ukheꞌs makh wedx uweyaꞌ jĩteꞌ,
5 Simon pasçxaꞌ:
—Kweꞌsxaꞌ teeçx kus utathaꞌw mjĩina peꞌte, nawa teeçx wedxçxáa yuhwa uwemeethaꞌw. Nawa iidx jxkaahniꞌs kxtey yuꞌnja jĩçxaꞌ,
6 kxtey yuuteꞌ, wedx wala kuh khẽetx, açaꞌ ukheꞌ suteeçku yuꞌ.
7 Txajũꞌ vxite barkote ũssatx puꞌçxyaꞌ yuukahn kuseju paꞌyatx. Açaꞌ txãaweꞌsxwa kũhçxaꞌ, kasxisx puꞌçxçxa txãaweꞌsx jĩitewa ãsxtxi. Nawa eꞌz barkotey utaçxa dujuaateꞌ, ĩkh dxiikhẽ khẽeyaꞌwatx yuꞌ.
8 Txãꞌwẽ yuuteꞌ, Simon Pedroꞌ Jesus tasxte peejxũkweçxa naꞌjĩk:
—Adxaꞌ pkalsath açaꞌ adx tasxu mtxutée jĩk.
9 Kxaazkuẽe wedx khẽeteꞌ, Simon Pedroꞌ wala ũukhçxak txãꞌjĩꞌ, açaꞌ nasa kxtee ũssawa txãꞌwẽytxi ũukh.
10 Zebedeo nçxiꞌkweꞌsx Jakobo Juan txãaweꞌsxaꞌ Simon yakh wedx uwe puꞌçxna uꞌjusatx yuꞌ saꞌ txãaweꞌsxwa txãꞌwẽytxi wala ũukh. Nawa Jesusaꞌ Simonaꞌs naꞌjĩk:
—Ũukhnu, ãçxhũyãꞌjaꞌ peena yuꞌ wedx uwen uꞌjumée nasatx Dxus jĩi pkhakhsa yuuneꞌga jĩteꞌ,
11 barkotx ĩkh pukatee jxuka nvxihtnaꞌwa Jesus yakh uꞌjtx.
Teeçx piçthẽꞌj wãꞌjy weete ãçãꞌsaꞌs Jesus nuykatxhini
(Mt 8.1-4; Mr 1.40-45)
12 Jesusaꞌ teeçx çxhabte ũsteꞌ, teeçx piçthẽꞌj wãꞌjy wee seenaꞌ kazx jiꞌphsak paꞌj. Saꞌ Jesusaꞌs uynaꞌwa, kĩiçhuçxa peejxũkwek naꞌjĩna:
—Adxaꞌs nuykatxhiwáꞌga ahçemeeçxaꞌ jĩteꞌ,
13 Jesusaꞌ kuseju jxaꞌdxnaꞌwa, naꞌjĩk:
—Ahçemeꞌnja, naa paꞌga katxhiçxa mneeyũu jĩçpkaçxhaꞌ, txãa wãꞌjy weeju katxhiçxak neeyũu.
14 Açaꞌ Jesusaꞌ naꞌwẽk jxkaah:
—Maa yuhtxwa ptaꞌsxmeeneꞌga, naasáa sacerdoteçxáꞌs iidx kakweꞌs txwesyaꞌ meꞌj. Saꞌ txãa weeju katxhipaꞌga Dxusna peesuneꞌga Moises maꞌwẽga jxkaah txãꞌwẽy, kxah nasa jxukaysa jiyutxna idx ew katxhiçxa neeyũutewa jĩnak jxkaah.
15 Tuutheꞌkhameetewa, nasaꞌ jweeíiçxáatx Jesus ew yũuniꞌs tuutheꞌjeꞌ. Açaꞌ wẽsẽꞌjyaꞌ wala pkhaakheꞌtx, ãçãꞌsatxwa kĩh weejuwa nuykatxhikahn.
16 Nawa Jesusaꞌ nasa uꞌpnimeesu uꞌjçxak, Dxus yakh puutx weꞌweꞌ.
Ẽsẽyaꞌ ãjasameꞌs Jesus nuykatxhini
(Mt 9.1-8; Mr 2.1-12)
17 Jesusaꞌ teeçx çxhabte Dxus yuweꞌs ptaꞌsxna ũsteꞌ, kxteeaꞌ fxariseoweꞌsx vxiteꞌ Dxus leyaꞌs kaapiyaꞌjsaweꞌsxwa Galileaju Judeaju vxiteꞌ Jerusalenu txajũweꞌsx paꞌjçxatx kxsũ kaçxçxa uꞌpuꞌ. Açaꞌ Dxus puꞌçxni yakhaꞌ Jesusaꞌ ãçãꞌsatxwa nuykatxhiꞌk.
18 Txajũꞌ ẽsẽyaꞌ ãjãsameeaꞌs yakhçxa nuypaꞌjtx. Saꞌ Jesus tasxte paꞌj nuykũh wẽetx.
19 Nawa nasa wala ũsteꞌ, uꞌkayaꞌ ãjãmeeçxa yat ẽete tejkaçxatx txkhẽ nuykĩh ãçãꞌsaꞌs Jesus ũsnikhẽ.
20 Txajũꞌ ãçãꞌsaꞌs yakhsaweꞌsxaꞌ Jesusaꞌ nuykatxhiyujuna sũhniꞌs jiyuçxaꞌ, ãçãꞌsaꞌs naꞌjĩk:
—Iidx pkalaꞌ peltunãyni yãꞌjtx neeyũu jĩteꞌ,
21 Dxus leyaꞌs kaapiyaꞌjsaweꞌsx vxiteꞌ fxariseoweꞌsxaꞌ ũuste naꞌwẽtx yajkxna uꞌpuꞌ: Naa piçthẽꞌjaꞌ ¿kiimna saga Dxusaꞌs iiweeçx weꞌwéꞌ? Dxus yuuçxáa pkaltxi peltunãyyaꞌ ãjawaꞌjsaꞌ, açaꞌ jweeju yuꞌ ¿kimçxáꞌ peltunãyyaꞌ ãjãmaꞌk? sũjũꞌtx.
22 Açaꞌ Jesusaꞌ txãaweꞌsx ũuste yaakxniꞌs jiyuçxaꞌ naꞌjĩk:
23 —¿Kĩh yũutekwe txãꞌwẽ yaakíꞌ? ¿Maa thẽymeesakx? Iidx pkalaꞌ peltunãyni yãꞌjtx neeyũu ¿jĩniáꞌ? Meeçxaꞌ: Kiiteçxa meꞌj ¿jĩniáꞌ?
24 Txãꞌwẽ thẽysatewa Dxus Nçxiꞌk Nasa Yuusáꞌ naa kiwete pkaltxi peltunãyyaꞌ ãjãwaꞌjsaꞌ naa paꞌga kaajiyuꞌjyaꞌwath ãçxhaꞌ jĩçxaꞌ, txajũꞌ txãa ẽsẽyaꞌ ãjãsameeaꞌs weꞌwek:
—Idxaꞌsthu weꞌweꞌ: Kiiteçxa iidx deeniꞌs tuꞌsçxa yatna meꞌj jĩteꞌ,
25 dudtey txãa ãçãꞌsaꞌ kiitenaꞌ txajx deeniꞌs tuꞌsçxa yatna uꞌkh, Dxusna weçxana tuutheꞌjna.
26 Jxukaysa kxtee ũssaꞌ wala kuh yajkxna weꞌwena, Dxusçxáanatx weçxana tuutheꞌjeꞌ saꞌ txãꞌwẽ ũukhnawa naꞌjĩꞌtx:
—Bagaçx yuhwa txãꞌwẽ yũunisa yuꞌsaꞌ iiuymeethaꞌw jĩꞌtx.
Mateoꞌs Jesus paꞌyani
(Mt 9.9-13; Mr 2.13-17)
27 Txãa skhẽwaꞌ, Jesusaꞌ kasehçxaꞌ, gobierno jĩi vxyu pkhakhsa Levxi yaasesaꞌs vxyu pkhakhnite kaçxçxa uꞌpte uyçxaꞌ:
—Adx yakh myuh jĩteꞌ,
28 Levxiaꞌ kiitenaꞌwa kĩhnawa jxuka nvxihtçxa Jesus yakh uꞌkh.
29 Txãa eꞌsuꞌ, Levxiaꞌ txajx yatte fxiesta wala ewsa vxitku Jesusaꞌs piꞌkxçxaꞌ. Açaꞌ kxteꞌ gobierno jĩi vxyu pkhakhsaweꞌsx wala kuhsa vxiteꞌ nasa maꞌwẽsawa Jesus yakh ih mesate kaçxtxi.
30 Açaꞌ fxariseoweꞌsx vxiteꞌ ley kaapiyaꞌjsaweꞌsxaꞌ Jesus yakh uꞌjusaweꞌsxtxiꞌ naꞌwẽtx açeweꞌwe:
—Iꞌkweꞌsxaꞌ ¿maꞌwẽtekwe txãꞌwẽ gobierno jĩi vxyu pkhakhsaweꞌsx yakh vxiteꞌ pkalsaweꞌsx yakh ũꞌwéꞌ? jĩteꞌ,
31 Jesus pasçxaꞌ:
—Yuꞌçeꞌjsaꞌs jxpeejxmeetaꞌ aka jiꞌphmée wẽt ũssaꞌ, naasáa ãçãꞌsa yuuçxáa yuꞌçeꞌjsaꞌs jxpeejxtaꞌ.
32 Adxaꞌ nasa ewsatx pakweyaꞌ kĩhmeeth, naasáa pkalsatx pakweyaꞌçxáath kĩh, kxah ewmée yũuna fxiꞌzeniꞌs nvxihtçxa Dxus tasxte sxaweduutxna jĩk.
Yũunaniꞌs Jesusaꞌs pẽyni
(Mt 9.14-17; Mr 2.18-22)
33 Txajũꞌ txãaweꞌsxaꞌ Jesusaꞌs naꞌwẽtx paapẽjx:
—¿Maꞌwẽçxata Juan yakh uꞌjusa vxiteꞌ fxariseoweꞌsx yakh uꞌjusa txãaweꞌsxaꞌ tahtatey yũunaana Dxus yakh puutx weꞌwena fxiꞌzeꞌ? Naapkaçxhaꞌ idx yakh uꞌjusaweꞌsx yuꞌ yũunameetx fxiꞌzeꞌ jĩteꞌ,
34 Jesus pasçxaꞌ:
—Iꞌkweꞌsxaꞌ ¿ptamu en fxiestateꞌ, piꞌkxnisatxiꞌ kaayũunaꞌjyaꞌ ãjãmaꞌkwe, novxio txãaweꞌsx yakh nee ũsiiteꞌ?
35 Nawa novxioꞌ txãaweꞌsx tasxu txuteewaꞌj en paꞌjana, txajũ isa yũunaatxna jĩçxaꞌ,
36 naa ejemploꞌs kaajaꞌdaꞌjnak ptaꞌsx:
—Ropa ĩisx suteniite, tela uꞌsesa yakh yaꞌpãꞌkheꞌçmeꞌ. Txãꞌwẽmeꞌ tela uꞌsesaꞌ jweeíiçxáak sudeꞌ ĩisxsaꞌs.
37 Saꞌ txãꞌwẽy beka uꞌse aahnisaꞌs slun ĩisxsate yaꞌawuꞌçmeꞌ. Txãꞌwẽmeꞌ beka uꞌsesaꞌ slun ĩisxsaꞌs sudeꞌk, açaꞌ beka yakh slun yakh eꞌzíi vxituꞌtx.
38 Txãa paꞌga beka uꞌsesaꞌs slun uꞌsesate awwaꞌjaꞌ. Txãꞌwẽ yuꞌ, maa yuhwa vxitumeetxna.
39 Açaꞌ maawa beka jxaawniisaꞌs tudxsaꞌ, beka uꞌsesaꞌs yuꞌ tudxyaꞌ waꞌluꞌk, jxaawniisaçxáa jxthaakwe ewaꞌ jĩçxa.
