Lukas 6:1-49
6 Teeçx sapatu jxkaase enteꞌ, Jesusaꞌ skuutxh ehsu uꞌjweçteꞌ, txãa yakh uꞌjusaweꞌsxaꞌ skuutxhtxi ũhdena nxinxtxi sũupiꞌjçxa ũꞌtx.
2 Açaꞌ fxariseoweꞌsx maaíi yuꞌ pẽjxtxi:
—Iꞌkweꞌsxaꞌ ¿mjĩipaꞌgakwe mjĩi en meetewa txãꞌwẽ yũꞌ? jĩteꞌ,
3 Jesusaꞌ naꞌwẽk pas:
—Iꞌkweꞌsxaꞌ Dxus librute iilẽeymeewáꞌkweꞌ Davxidaꞌ ¿kĩhga yũu? txãa yakh piꞌkxna uꞌjusaweꞌsx yakh teeçx enteꞌ wẽeçxaꞌ,
4 dxuus yatte uꞌkaçxa kxtee pantxi ũꞌk, saꞌ txãa yakh uꞌjusaweꞌsxtxiwa ũsuꞌsku. Txãa panaꞌ naasáa sacerdoteweꞌsxçxáa ũꞌwaꞌthe jiiçxawa txãꞌwẽk yũu.
5 Açaꞌ Dxus Nçxiꞌk Nasa Yuusaawa makwe sapatu jxkaase entewa jxkaahwaꞌj jiꞌphaꞌ jĩk.
Teeçx piçthẽꞌj paçu kuse udxnisa
(Mt 12.9-14; Mr 3.1-6)
6 Vxite sapatu jxkaase ensuꞌ, Jesusaꞌ judiuweꞌsx pkhaakhenite uꞌkaçxa, Dxus yuweꞌs ptaꞌsxyaꞌ takhku. Açaꞌ kxteꞌ teeçx piçthẽꞌj paçu kuse udxnisak uꞌp yuꞌ.
7 Açaꞌ Dxus leyaꞌs kaapiyaꞌjsaweꞌsx vxiteꞌ fxariseoweꞌsxaꞌ Jesusaꞌs peetheguꞌnatx ũsuꞌ txãꞌwẽ sapatu jxkaase entewa nuykatxhiteꞌ pãatxhĩꞌkhyaꞌ sũhçxa.
8 Nawa Jesusaꞌ peetheguꞌsaweꞌsx txãꞌwẽ ũus yaakxniꞌs jiyuçxaꞌ, naꞌjĩk txãa piçthẽꞌj kuse udxnisaꞌs:
—Kiiteçxa, nasaa pxãhte myuju jĩteꞌ, txãa piçthẽꞌjaꞌ nasaa pxãhtek yuju.
9 Açaꞌ Jesusaꞌ nasa kxte ũssatx naꞌjĩk:
—Iꞌkweꞌsx ¿maꞌjĩkiꞌkwe? Sapatu jxkaase entewa, puꞌçxte ¿ewmanx? meeçxaꞌ ¿puꞌçxwaꞌjmeemanx? Nasaꞌs nweꞌwete ¿ewmanx? meeçxaꞌ nweꞌwemeete ¿ewmanx? jĩçxaꞌ,
10 Jesusaꞌ nasatx thegçxaꞌ, txãa ãçãꞌsaꞌs naꞌwẽk jxkaah:
—Kuseꞌs mkuꞌleꞌj jĩçpkaçxhaꞌ txãꞌwẽy yũuteꞌ, txajx kuseꞌ ewuuk.
11 Nawa vxitesa yuꞌ wala ũusaçxatx, saꞌ puutx paapẽyiꞌtx: Jesusaꞌs ¿maꞌwẽ yũuçxa ewmeete nvxiitukxthaꞌw? jĩna.
Docesatx Dxus yuweꞌs ptaꞌsxyaꞌ kaahni
(Mt 10.1-4; Mr 3.13-19)
12 Txãn ensuy Jesusaꞌ Dxusna pẽjxyaꞌ uꞌkh thãꞌthe saꞌ teeçx kus utak Dxusna pẽjxna peꞌte.
13 Saꞌ khikhyna sẽhteꞌ, txãꞌsna piꞌkxna uꞌjusa kuhsatx paꞌyaçxaꞌ, doce nasa txhitxhku txajx jxkaahwaꞌj.
14 Txãaweꞌsxaꞌ naaçxahtx yuꞌ: Simon, txãꞌsaꞌ Pedro yasek kiꞌp. Vxiteꞌ nyakh Adres, txajũꞌ Jakobo, Juan, Fxelipe, Bartolomé,
15 Mateo, Tomas, Alfxeo nçxiꞌk Jakobo, Simon kananista nasa,
16 Jakobo nyakh Judas, vxiteꞌ Judas Iskariote, Jesusaꞌs açesaweꞌsx kusete dukhwaꞌjsa.
Nasa seenaꞌ wala kuhsatx Jesus kaapiyaꞌjni
(Mt 4.23-25)
17 Jesusaꞌ txãa yakh uꞌjusaweꞌsx yakh thãꞌj vxiçu jxsaꞌjna kĩhçxaꞌ, teeçx ahte txaktek yuju nasa wala kuhsaweꞌsx yakh. Txãa nasaꞌ Judea kiwesuweꞌsx, Jerusalen çxhabuweꞌsx, vxiteꞌ ĩkh wala pukasu Tiro Sidon çxhabsuweꞌsxtxi Jesus ptaꞌsxniꞌs wẽsẽꞌjyaꞌ paꞌj, açaꞌ vxiteꞌ ãçãꞌsa Jesus nuykatxhikahntxi paꞌj.
18 Saꞌ eçx luuku vxit-satx ũuste jiꞌphsawa Jesus kutxiꞌtheꞌ, katxhiçxatx neeyũꞌ.
19 Açaꞌ nasa jxukaysa kxte ũssaꞌ Jesusaꞌs jxaꞌdxyaꞌ wala paꞌpçxuꞌtx, txãꞌwẽ jxaꞌdxçxaçxáa maawa katxhiçtetx uyuꞌ, txãasatx txãꞌwẽy yũu wẽjẽꞌ.
Weçxana fxiꞌzewaꞌjsa vxiteꞌ nxuste paꞌjwaꞌjsa
(Mt 5.1-12)
20 Txajũꞌ Jesusaꞌ txãa yakh uꞌjusaweꞌsxtxi thegçxaꞌ, naꞌjĩk:
—Iꞌkweꞌsxaꞌ kĩhwa jiꞌphmeeçxawa kuh yajkxmée weçxana mfxiꞌzewe, txãa paꞌgatey Dxus jxkaahna ũsniꞌ iꞌkweꞌsx jĩꞌ naa paꞌga.
21 Iꞌkweꞌsxaꞌ ãçxhíi yuꞌ wẽena ũsçxawa weçxana meswe, txãa paꞌgatey wala sãꞌjĩni yuuneꞌkwe.
Iꞌkweꞌsxaꞌ ãçxhíi yuꞌ nxusna ũsçxawa weçxana meswe, txãa paꞌgatey sxijkana fxiꞌzewaꞌjaꞌs jxpaꞌgawaꞌjsaiꞌkwe.
22 Iꞌkweꞌsxaꞌ Dxus Nçxiꞌk Nasa Yuusaꞌs nwẽesẽꞌphaꞌga ewmeesathas iꞌkweꞌsx yasetx açeweꞌwena txãaweꞌsx tasxu kutxiꞌjna txãꞌwẽ yũuçtewa, weçxana mfxiꞌzewe.
23 Txãniitey Dxus yuwe ptaꞌsxsaweꞌsxtxiwa txãꞌwẽtx pkxuu naꞌ ãçxwa txãꞌwẽyçxáa yuutxna. Nawa nxusmée weçxana mfxiꞌzewe, txãa paꞌgatey cielute peesniꞌs jxpaꞌgawaꞌj jiꞌphiꞌkwe.
24 Nawa jiꞌphsaweꞌsx ãçxhíi weçxana fxiꞌzeni pçunijũꞌ, wala yuh nxuste paꞌjaneꞌkwe.
25 Iꞌkweꞌsxaꞌ ãçxhíꞌ wẽt txikna ũsiꞌkwe, nawa eꞌsu pxthaa yuh wẽjẽneꞌkwe. Iꞌkweꞌsxaꞌ ãçxhíꞌ sxijkana ũsiꞌkwe, nawa eꞌsu nxusna ũꞌneneꞌkwe.
26 Iꞌkweꞌsx yuꞌ, ãçxhíi yuꞌ maa maa nasawa ewçxáa tuutheꞌjni fxiꞌzeçxawa, eꞌsu nxuste neeyũuneꞌkwe. Nyafxiiteywa Dxus yuweꞌs ptaꞌsxsathaꞌw jĩna ĩsxĩina uꞌjusatxiꞌ txãꞌwẽtx ewsataꞌ jĩna tuutheꞌjeꞌ.
Açesatx peeygãawaꞌjaꞌ
(Mt 5.38-48; 7.12)
27 Nawa ayte wẽsẽꞌjna ũssa iꞌkweꞌsxtxiꞌ naꞌwẽth jxkaajaꞌ: Puíi jxpakwesatxiꞌ mpeeygãhwe. Açesatxiꞌ ew yũuna mfxiꞌzewe.
28 Ewmée nuyweꞌwesatxiꞌs kaꞌtuꞌ ewçxáa mweꞌwewe. Wẽesxusatxiꞌ txãaweꞌsx paꞌgate Dxusaꞌs mneeweꞌwewe.
29 Idxaꞌs pukakwetga pehtxateꞌ, kaꞌtuweꞌsxaꞌswa petxakahn mes. Maaíꞌ atxhaꞌs kusaꞌjaçyãꞌtheꞌ, puiimée kmiisa yuhnawa mes.
30 Peꞌwsaꞌs mes, saꞌ iidx jĩꞌs kusaꞌjçxaꞌ, dukhmeetewa pãatxhĩꞌkhna pẽynu.
31 Maa nasawa iꞌkweꞌsxtxi ewçxáa yũuna fxiꞌze jxthãasçxaꞌ, iꞌkweꞌsxwa txãꞌwẽy maa nasatxwa ewçxáa yũuna mfxiꞌzewe.
32 Iꞌkweꞌsxtxi peeygãasaçxáatx kaꞌtuwa peeygãhçxaꞌ, ew yũusathaꞌw ¿jĩyaꞌ ãjãmaꞌkwe? Makwe nasa ewmeesaçxawa txãꞌwẽ peeygãasaçxáatx peeygãjxaꞌ yuꞌ ãjãꞌtx açaꞌ.
33 Iꞌkweꞌsxtxi ew yũusaçxáatx kaꞌtuwa ew yũuçxaꞌ, iꞌkweꞌsxaꞌ ew yũusathaꞌw ¿jĩyaꞌ ãjãmaꞌkwe? Makwe pkalsaçxawa txãꞌwẽ ew yũusaçxáatx ew yũuyaꞌ yuꞌ ãjãꞌtx.
34 Saꞌ iꞌkweꞌsxtxi kiꞌ kaasxweduꞌjyaꞌ ãjãwaꞌjsaçxáꞌs pkiꞌjçxaꞌ, iꞌkweꞌsxaꞌ puꞌçxsathaꞌw ¿jĩyaꞌ ãjãmaꞌkwe? Makwe nasa ewmeesaçxawa, txãꞌwẽ kaasxweduꞌjyaꞌ ãjãwaꞌjsaçxáatx pkiꞌjyaꞌ yuꞌ ãjãꞌtx.
35 Wejxwa iꞌkweꞌsxaꞌ puíi jxpakwesaatx peeygãhna fxiꞌze jiꞌphiꞌkwe, saꞌ pkiꞌjçxawa jxthaakwe kaasxweduꞌjuna sũhmée mfxiꞌzewe. Txãꞌwẽ ew yũusaatxiꞌ Dxusaꞌ wala deweena, açaꞌ iꞌkweꞌsxaꞌ cielute Dxus luuçx yuuneꞌkwe, txãa paꞌgatey Dxus cieluteweꞌsxaꞌ txãꞌsna yaakxsamée makwe ewmeesatewa kaꞌtuꞌ ewçxáa yũuna ũsaꞌ.
36 Iꞌkweꞌsxaꞌ peeygãasa myuuwe, iꞌkweꞌsx Tatawa maꞌwẽ peeygãasana txãꞌwẽy.
Jiimeeçxaꞌ nuyweꞌwewaꞌjmeꞌ
(Mt 7.1-5)
37 Maꞌwẽsatewa jiimeeçxaꞌ, ewmeesataꞌ jĩna weꞌwewaꞌjmeꞌ, txãꞌwẽ yũupaꞌga iꞌkweꞌsxwa Dxus dxiꞌpte ewmeesa yuuyaꞌmée. Vxitetx nuyweꞌwewaꞌjmeꞌ, kaꞌtuwa nuyweꞌwekahmén. Ãhmée yũusaatx peltunãywaꞌjaꞌ, Dxuswa iꞌkweꞌsxtxi peltunãykahn.
38 Vxitetx peeswaꞌjaꞌ, kaꞌtuwa iꞌkweꞌsxtxi Dxusaꞌ peeskahn. Makwe isaçxa vxitetx peesteꞌ, kaꞌtuwa iꞌkweꞌsxtxi Dxusaꞌ txãa isanitey ew uta puꞌkisuꞌsna zuunaꞌ ãsxçxa peesnisaꞌs jxpaꞌganeꞌkwe.
39 Teeçx ejemplo kaajaꞌdaꞌjçxaꞌ naꞌwẽk ptaꞌsx:
—¿Yafx jiꞌphmeesaꞌ vxitewa txãꞌwẽysaꞌs dxiꞌthe peꞌjna uꞌjyaꞌ ãjãmaꞌk? ¿Eꞌzíi kafxkhẽ khẽemeemaꞌtx?
40 Piyasáꞌ kaapiyaꞌjsate jxthaakwesameꞌ. Nawa maawa jxuka piyan jxãꞌjçxa yuuçxáa, kaapiyaꞌjsa naꞌwẽy yuuna.
41 ¿Maꞌwẽçxa iidx yakhthẽꞌj yafxte kxtãꞌ leꞌçxkuẽesa khẽeçxa ũstewa, uyyaꞌ ãjãkiꞌg? iidx yafxte yuꞌ fxtũ peꞌla yuu walasa khẽeçxa ũsteꞌ.
42 ¿Maꞌwẽçxa iidx yakhthẽꞌjaꞌs pẽyikiꞌg: Iidx yafxte kxtãꞌaꞌs kutxiꞌjiꞌnja jĩna? iidx yafxte yuꞌ, fxtũ peꞌla walasa khẽeçxa uꞌptewa txãa yuꞌsaꞌ uymeeçxaꞌ. Ãakhẽçxáa ew weꞌwena uꞌjusathẽꞌj, iidx yafxte fxtũ peꞌla walasa khuẽꞌyna mkuutxiꞌj, saꞌ txãꞌwẽ yũuçxaçxáa iidx yakhthẽꞌj yafxte kxtãꞌ leꞌçxkuẽsaꞌs kutxiꞌjyaꞌ ãjãneꞌga.
Nasa maꞌwẽ yũuçtewa mpaꞌyajkxwe jiyuyaꞌ
(Mt 7.17-20; 12.34-35)
43 Fxtũu tasx ewsaꞌ, ewsaíiçxáak yũnuꞌ, nawa fxtũu tasx ewmeesaꞌ, ewmeesa íiçxáak yũnuꞌ.
44 Fxtũu tasx maꞌwẽsatewa yũntek isa ew yaꞌjiyuꞌ. Brewaꞌs khãas tasxte yaꞌudeꞌçmeꞌ, saꞌ uwaꞌs çhũçh tasxte yaꞌudeꞌçmeꞌ.
45 Nasa ewsaꞌ ewçxáatx weꞌweꞌ, ewsaꞌs ũuste jiꞌphna txãa paꞌga. Nawa nasa ewmeesaꞌ, kazxçxáatx weꞌweꞌ, txãa paꞌgatey ũuste yuu, kazxsa uꞌpna açaꞌ weꞌwenisaꞌ ũusuhneꞌ kasejeꞌ naa paꞌga.
Dxusaꞌs nwẽeseꞌjsa vxiteꞌ Dxusaꞌs nwẽeseꞌjsamée
(Mt 7.24-27)
46 Iꞌkweꞌsxaꞌ adxaꞌs Jxpeꞌjsa jĩꞌiꞌkwe saꞌ ¿kĩh yuuçxakwe adx jxkaahniꞌs kxtey yuꞌçmée?
47 Maa nasawa adx tasxte utxaaçxaꞌ, adx weꞌweniꞌs nwẽesẽꞌjçxa jxkaahniꞌs kxtey yũusaꞌ txãꞌ naꞌwẽsaꞌ:
48 Teeçx piçthẽꞌjaꞌ yuꞌwala pukate kwet walate kaaçxidaꞌjçxa yat txajk. Txajũꞌ yuꞌ walaaçxaꞌ, kxsũ afxihbna skhẽwçxawa yataꞌs kẽesẽꞌjmeꞌ, kwette kaaçxidaꞌjçxa txaahnipaꞌga.
49 Nawa maa nasawa adx weꞌweniꞌs wẽsẽꞌjçxawa, adx jxkaahniꞌs kxtey yuumeena txãꞌ teeçx piçthẽꞌjaꞌ yuꞌwala pukate yataꞌs kwetmuse kajkweteçxáa txaahni naꞌwẽsaꞌ. Yuꞌ walaaçxaꞌ, tũçxhaçxa txãa yataꞌs pẽtxçxa jxuka suwku.
