Lukas 7:1-50
7 Txajũꞌ Jesusaꞌ nasatx Dxus yuweꞌs ptaꞌsxna jxãꞌjçxaꞌ, Kapernaum çxhabna uꞌkh.
2 Txãa çxhabteꞌ teeçx kpiitan ũsuꞌk romanoweꞌsx. Saꞌ txãa kpiitanaꞌ teeçx selpisáa jiꞌphuꞌk wala peeygãanisa. Nawa wala ãçãꞌçxa uuyaꞌwayãꞌkh yuꞌ.
3 Txajũꞌ kpiitanaꞌ Jesusaꞌ maꞌwẽsatxwa nuykatxhiꞌk jĩniꞌs wẽsẽꞌjçxaꞌ, judiuweꞌsx pkhaakhenite npiiçthẽꞌjsatx jxkaakh Jesusaꞌs pxthaa weꞌweyaꞌ, txãꞌsna selpisaꞌs nuykatxhiyaꞌ yuukahn.
4 Açaꞌ txãaweꞌsxaꞌ Jesusaꞌs utxaaçxaꞌ, naꞌjĩnatx pxthaa piꞌkxna weꞌwe:
—Txãa kpiitanaꞌsaꞌ idx puꞌçxwaçaꞌ ewna sũjũꞌthaꞌw.
5 Txãꞌ kweꞌsxtxi peeygãhçxa pkhaakhewaꞌj yat yuhwa ktxaajaꞌkh naa paꞌga jĩteꞌ,
6 Jesusaꞌ txãaweꞌsx peꞌjni uꞌkh. Nawa yat utxa paꞌjaçteçxáa, kpiitanaꞌ txajx namikutx kaakha Jesusaꞌs naꞌjĩkahn:
—Adxaꞌ wala ãhmeekwesath açaꞌ wejx yuuwa adx yatte uꞌkayaꞌ yuhmée tee yuu.
7 Adxaꞌ txãꞌwẽ ãhmeekwesaçxa íiçxáath idxaꞌs adx yuu pakweyaꞌ yujxaꞌ thaame. Açaꞌ wejx yuuwa txãjũçxáa yuwejuçxáa mweꞌwe aççxáa adxaꞌs selpisaꞌ katxhina.
8 Adxwa jwee npiiçthẽꞌjsa jxkaahniꞌs nwẽesẽꞌjna ũsthu, nawa jweeju adx jxkaahnisa soldau jiꞌpthu. Saꞌ txãaweꞌsxtxiꞌ teeçxsaꞌs meꞌj jĩteꞌ, adx jxkaahniꞌs kxtey yuꞌk. Saꞌ vxiteꞌs paꞌyateꞌ, txãawa kxtey nwẽesẽꞌjeꞌk. Saꞌ adxaꞌs selpisaꞌs kĩh jxkaathewa, kxtey yuꞌk jĩnak yuwekaah.
9 Txajũꞌ naꞌwẽ kpiitan yuwe kaahniꞌs Jesus wẽsẽꞌjçxaꞌ, kuh yajkxnak neeyũu. Saꞌ eꞌste yuusatx thegçxaꞌ naꞌjĩk:
—Isath weꞌweꞌ, Israelweꞌsx mteeweꞌsx yuhwa txãꞌwẽ adx weꞌweteçxáa katxhina sũhsa yuꞌ iiuymeeth naa kpiitan naꞌwẽsa yuꞌ jĩk.
10 Txajũꞌ jxkaahnisaweꞌsxaꞌ yatnay sxawedçxaꞌ, kpiitan jxpeꞌjnisaꞌ katxhyãꞌj uꞌptetx uy.
Vxiuda nçxiꞌkaꞌs Jesus ĩtxi vxitni
11 Txãa eꞌsuꞌ, Jesusaꞌ teeçx çxhab Nain yaasesatek paꞌjyaꞌ uꞌj, txãa yakh uꞌjusaweꞌsx vxite nasa kuhsa yakh.
12 Saꞌ çxhabte uꞌkaçteꞌ, teeçx uusáꞌs pedaayaꞌ nasa wala kuh uꞌjweçtek uy. Txãa uusáꞌ vxiuda nçxiꞌk txãaçxáasak yuꞌ.
13 Açaꞌ Jesus uyçxaꞌ, txãa vxiudaꞌs peeygãhçxa kvxiisxaꞌjna:
—Ũꞌnenuçx jĩnak weꞌwe.
14 Saꞌ Jesusaꞌ utxaaçxa, taulaꞌs jxaꞌdxku. Açaꞌ yakhçxa uꞌjsaꞌ, nee yujutx. Naapkaçxhaꞌ Jesusaꞌ uusáꞌs naꞌjĩk:
—Piçtakx, mkiite jĩꞌth idxaꞌs jĩteꞌ,
15 uusáꞌ kaçxçxa weꞌwek. Açaꞌ Jesusaꞌ njĩꞌjaꞌs dukhku.
16 Naꞌwẽ yũuniꞌs nasa uyçxaꞌ, jxukaysa wala ũukhçxawa, txãꞌwẽytxi Dxusaꞌs wala weçxana naꞌjĩꞌ:
—Dxus jxkaahni wala yuhsa kweꞌsx ksxavxyte vxyaak jĩꞌtx. Saꞌ kiꞌ weꞌweçxaꞌ:
—Dxusaꞌ txajx nasatx puꞌçxyaꞌ kĩjk jĩꞌtx.
17 Txajũꞌ Jesus txãꞌwẽ yũuniꞌs nasa jxuka jiyutx Nain çxhab peekuꞌjsuweꞌsx vxiteꞌ Judea kiwesuweꞌsxwa jxuka.
Jesus tasxna kaahnisaweꞌsx
(Mt 11.2-19)
18 Jesus txãꞌwẽ yũuniꞌs Juan Bautistaꞌ jxuka jiyuk Juan yakh uꞌjusaweꞌsx ptaꞌsxteꞌ. Saꞌ txãa yakh uꞌjusa eꞌzsatx paꞌyaçxaꞌ,
19 Jesus tasxna kaakh paapẽjxyaꞌ:
—Idxaꞌ ¿isa Kristo naa kiwete kĩiwaꞌjsa ũsuꞌk txãa dxihgáꞌ, meeçxaꞌ vxite ũythasuwáꞌnjaꞌw? jĩnak pẽykaah.
20 Açaꞌ eꞌz jxkaahnisaꞌ Jesus tasxte paꞌjçxaꞌ txãꞌwẽy pẽjxtxi:
—Juan Bautistaꞌ kweꞌsxtxiꞌ kaakh idxaꞌs paapẽjxyaꞌ: ¿Kristo naa kiwete kĩiwaꞌjsa ũsuꞌk txãa dxihgáꞌ, meeçxaꞌ vxite ũythasuwáꞌnjaꞌw? jĩnatx pẽjx.
21 Saꞌ txãꞌwẽ paapẽysaweꞌsx paꞌjaçteꞌ, Jesusaꞌ nasa wala kĩjkĩh wee kazxsate ãçãꞌsatxwa nuykatxhik, eçx luuku vxit-satx ũuste jiꞌphsa vxiteꞌ uyyaꞌ ãjãsamée maazkuẽesatxwa jxuka nuykatxhik.
22 Saꞌ Jesusaꞌ paapẽysaweꞌsxtxiꞌ naꞌwẽk pas:
—Iꞌkweꞌsx maꞌwẽneꞌkwe wẽsẽꞌjna uy txãꞌwẽy ptaꞌsxineꞌkwe Juanaꞌs naꞌjĩna: Uyyaꞌ ãjãsameewa uyuꞌtx. Açaꞌ legsawa katxhiçxa legmeetx neeyũꞌ. Wãꞌjy wee kazx jiꞌphsawa katxhinitx neeyũꞌ. Açaꞌ wẽsẽꞌjyaꞌ ãjãsameewa wẽsẽꞌjyaꞌ ãjãꞌtx. Uuniisawa kiꞌ ĩtxĩ yuꞌtx. Saꞌ naa kiwete pxthaakuẽsa yuutxiꞌ Dxus tasxte paꞌjwaꞌjaꞌs ptaꞌsxnik yuu.
23 Açaꞌ adxaꞌs kuh yajkxna jxpubasameꞌ, weçxana fxiꞌzesa yuuna jĩnak ptaꞌsxkaah.
24 Juan yuwe kaahnisaweꞌsx uꞌtheꞌ, Jesusaꞌ Juan maꞌwẽsatewa ptaꞌsxku naꞌjĩna:
—Nasa uꞌpnimée kiwesuꞌ iꞌkweꞌsxaꞌ ¿kĩjaꞌskwe thegyaꞌ uꞌj? ¿Khĩih tasx wejxate ẽsẽꞌsesaꞌs wáꞌkwe thegyaꞌ uꞌj?
25 ¿Khĩmeeçxaꞌ teeçx piçthẽꞌj ropa zhiçxkwesa athçxa uꞌpna sũhçxa wáꞌkwe thegyaꞌ uꞌj? Iꞌkweꞌsxaꞌ jii iꞌkwe txãꞌwẽ ropa zhiçxkwesa athçxa wẽt weçxana fxiꞌzesaꞌ jxkaahni yat-suçxáatx uꞌpuꞌ.
26 ¿Kim yuunakwe thegyaꞌ uꞌj? ¿Dxus yuwe ptaꞌsxsaꞌs wáꞌkwe thegyaꞌ uꞌj? Isa txãꞌwẽ dxih yuuçxaꞌ Dxus yuwe ptaꞌsxsate teeçx jxthaakwe walasaꞌs neꞌkwe uy.
27 Juanaꞌs weꞌweçxak Dxus librute naꞌwẽ ptaꞌsxiꞌ:
Adx yuwee ptaꞌsxsaꞌs iidx yaçte kajaçthu,
Iidx paꞌjwaꞌjaꞌs pheuꞌkhan jĩna fxiꞌjniꞌ.
28 Naꞌjĩꞌth naꞌ: naa kiwete Dxus yuwe ptaꞌsxsate maa maatewa jxthaakwesaꞌ Juan Bautistak yuꞌ. Txãꞌwẽtewa, maawa makwe ãhmeekwesaçxawa Dxus jxkaahnite uꞌkasa yuꞌ, Juante jxthaakwesa yuutxna jĩteꞌ,
29 Juan bautisãynisa nasa jxukaysa vxiteꞌ gobierno jĩi vxyu pkhakhsa txãaweꞌsx wẽsẽꞌjçxaꞌ, Dxusaꞌ maa yakhwa jxuka ewsana sũhnatx neeyũu.
30 Nawa fxariseoweꞌsx vxiteꞌ ley kaapiyaꞌjsaweꞌsx Juan bautisãynimeesa yuꞌ, txãaweꞌsxtxi Dxus ew yũu wẽeni yuꞌsaꞌ jxpaꞌgamée ahçetx.
31 Açaꞌ Jesusaꞌ naꞌjĩk:
—Naa ensu nasatxiꞌ ¿kiim yakh kaajaꞌdaꞌjakiꞌth? ¿Kiim naꞌwẽta yuꞌ?
32 Luuçx leꞌçxkuẽ naꞌwẽtx yuꞌ. Txãaweꞌsxçxáatx plaasasu pweesaꞌjyaꞌ kaçxçxa, vxite luuçxtxi sus paꞌyana naꞌjĩꞌ: Zhiçxkwethaꞌw tujkana kuvxíꞌ nawa kuꞌjuꞌçmeeiꞌkwe. Saꞌ nxus nxusthaꞌw memuꞌ, nawa ũꞌneꞌçmeeiꞌkwe jĩꞌtx. Txãꞌwẽsataꞌ naa enteweꞌsxaꞌ.
33 Iꞌkweꞌsxaꞌ Juan Bautistaꞌs eçx luuku vxit-saꞌs jiꞌphna txãasak pan ũꞌmée vxinowa tudxiꞌçmée jĩꞌiꞌkwe, txãꞌwẽ kĩhwa ũꞌmée tudxpaꞌgameeçxáa.
34 Nawa Dxus Nçxiꞌk Nasa Yuusáa kĩhçxaꞌ, ũꞌweꞌth, tudxiꞌth, aç yuꞌ: Naa thẽꞌjaꞌ wala pũꞌweꞌ, wala tudxsaꞌ. Gobierno jĩi vxyu pkhakhsaweꞌsx vxiteꞌ pkalsaweꞌsx yakh namikuꞌ jĩꞌiꞌkwe.
35 Iꞌkweꞌsxaꞌ jiimeeçxaiꞌkwe txãꞌjĩꞌ. Nawa maawa jiyuwaꞌjsa yuutxiꞌ Dxusaꞌ kaajiyuꞌjuna adx maꞌwẽsatewa jĩk.
Simon yatte Jesus paꞌjni
36 Teeçx fxariseoꞌ Jesusaꞌs piꞌkxku sãꞌjĩyaꞌ, açaꞌ Jesusaꞌ txãa fxariseo yatna uꞌjçxaꞌ, mesate kaçxku ũꞌyaꞌ.
37 Naapkaçxhaꞌ teeçx uꞌy iiméh kazx ewmée yũuna uꞌjusa txãa çxhabtey uꞌpsa jiyuk Jesusaꞌ fxariseo yatte ũꞌyaꞌ uꞌjniꞌs. Saꞌ teeçx fxrasko aceite wẽt putasana atçxa fxariseo yatte paꞌkh.
38 Saꞌ ũꞌnena utxaana kũhçxaꞌ, yafx yuꞌju Jesus çxidatx pkhiꞌkxku. Khĩçxak txajx dxkhasju adxiꞌjçxa weçxáꞌ. Saꞌ aceite wẽt putasaꞌs Jesus çxidakhẽ awku.
39 Txãꞌwẽ yũuniꞌs fxariseo Jesusaꞌs piꞌkxsathẽꞌj uyçxaꞌ, naꞌwẽk yajkx: Naa piçthẽꞌj isa Dxus yuweꞌs ptaꞌsxsa dxihwaçaꞌ, jiyuna naa uꞌyaꞌ pkalsa ewmeesaçxa txãꞌwẽ çxidatx pkhiꞌkxna aceite awna uꞌptewa sũjũꞌk.
40 Açaꞌ Jesusaꞌ naꞌjĩk:
—Simon, idxaꞌs naꞌwẽ weꞌwewaꞌj jiꞌpthu jĩteꞌ, fxariseo pasçxaꞌ:
—Mweꞌwe jĩteꞌ,
41 Jesusaꞌ naꞌjĩk:
—Teeçx piçthẽꞌjaꞌs eꞌz nasatx yuul yuꞌ vxyu pkiꞌjçxa. Teeçxsaꞌ kinientos pesok yuul yuꞌ. Açaꞌ vxiteꞌ cinkwenta pesok yuul yuꞌ.
42 Açaꞌ eꞌzíi txãaweꞌsx yuultxi dukhyaꞌ ãjãmeeteꞌ, vxyuu pkiꞌjsaꞌ txãaweꞌsxtxiꞌ peltunãyku. Açaꞌ ¿maa sũjũkiꞌg txãa yuulusa eꞌzsatx maakiꞌk wejx thaakwe weçxa pkiꞌjsaꞌs? jĩteꞌ,
43 Simon pasçxaꞌ:
—Wala yuulusaneꞌ wejx thaakwe weçxa jĩteꞌ, Jesusaꞌ:
—Isa yuh weꞌweꞌg, jĩk.
44 Txajũꞌ Jesusaꞌ txãa uꞌyaꞌs thegçxaꞌ Simonaꞌs naꞌjĩk:
—Adxaꞌ iidx yatte paꞌthewa, yuꞌ ũsmeeg adx çxidatx pkhiꞌkwaꞌj. Nawa naa uꞌyaꞌs mtheg, txajx yafx yuꞌjuk pkhiꞌkhiꞌ saꞌ txajx dxkhasjuk adxiꞌj.
45 Adxaꞌs weçxameeg. Nawa naa uꞌyaꞌ ayte uꞌkaíin nvxiitnimeꞌ adx çxidatx weçxana.
46 Adx jxkwetkhẽ aceite awmeeg. Nawa naa uꞌyaꞌ aceite wẽt putasaak aw adx çxidakhẽ.
47 Naꞌjĩꞌth naꞌ, pkal iiméh wala kazxsatewa peltunãyni neeyũusaꞌ txãꞌwẽyku wala wedxna utxáꞌ peltunãysaꞌs. Nawa walamée peltunãynisaꞌ jwee yuꞌ weçxana utxaꞌçmeꞌ.
48 Txajũꞌ txãa uꞌyaꞌs weꞌweçxaꞌ:
—Iꞌkweꞌ peltunãyni yãꞌjiꞌkwe jĩk.
49 Açaꞌ piꞌkxnasa Jesus yakh ũꞌna uꞌpsaꞌ txãaweꞌsx pweꞌsx naꞌwẽtx puutx weꞌweꞌ:
—Naa piçthẽꞌjaꞌ ¿kiimki sakiꞌk pkalsa yuhtxwa peltunaĩꞌ? jĩꞌtx.
50 Açaꞌ Jesusaꞌ naꞌwẽk weꞌwe txãa uꞌyaꞌs:
—Adx peltunaĩna sũhçxaneꞌkwe adx tasxte utxáa naa paꞌga ewte yãꞌjiꞌkwe neeyũu naꞌ ãçxhaꞌ wẽt weçx weçxa meꞌjwe jĩk.
