Lukas 8:1-56
8 Txãa eꞌsuꞌ Jesusaꞌ maazkuẽe çxhabsuwa pekũjk Dxus jxkaahwaꞌj enaꞌs ptaꞌsxna txãa yakh uꞌjusaweꞌsx docesa yakh, çxhab leꞌçxkuẽsu walasuwa txãꞌwẽy.
2 Vxiteꞌ uꞌyweꞌsxwa piꞌkxna uꞌjuꞌtx naꞌwẽ eçxtxi kutxiꞌjna kĩh weete ãçãꞌsatxwa nuykatxhik txãꞌwẽ yuuniisa, açaꞌ txãa ksxavxyte teeçxsaꞌ Maria Magdalena yaasesa txajx ũusuh siete eçxtxi kutxiꞌkh txãak yuꞌ.
3 Vxiteꞌ Herodesaꞌs puꞌçxsa Çxusa nyu Juanak yaasesa yuꞌ, vxiteꞌ Susanak yaasesa yuꞌ. Kuh uꞌysatx Jesusaꞌs puꞌçxna uꞌjusa yuꞌ txãaweꞌsx jiꞌphuni kĩjkwe yakhçxáawa.
Skuutxh uuhsaꞌs kaajaꞌdaꞌjni
(Mt 13.1-9; Mr 4.1-9)
4 Txajũꞌ çxhabuweꞌsx wala nasa kasehtx, Jesusaꞌs thegyaꞌ. Açaꞌ nasa txaazkuẽe pkhaakheteꞌ, Jesusaꞌ ejemplo yakhku ptaꞌsx naꞌjĩna:
5 —Skuutxh uuhsaꞌ uujxaꞌ kasejk. Açaꞌ msuuíi yuꞌ maz nxinx dxiꞌjsu ãasu neeyũuteꞌ, nasa waakhiꞌkhiꞌjiçte, vxiçxakwewa fxiwçxa ũꞌtx.
6 Açaꞌ msuuíi yuꞌ, kwet-sutx ũsxi. Nawa buçxaçxawa kiwe ew jiꞌphmeeteꞌ, tuphaameeçxa jxuka uhdxtxi.
7 Msuuíi yuꞌ, çhũçh ksxavxysutx ũsxi. Açaꞌ çhũçhwa jaꞌda buçxaçxaꞌ skuutxhaꞌs aphçxa ivxiitutx.
8 Saꞌ vxite ahsuꞌ kiwe ewsatek ũsxi. Txãa yuꞌ walaaçxa teeçx tasxçxáa cien nxinxtxi jiꞌphu.
Txajũꞌ Jesusaꞌ suhsku naꞌjĩna weꞌwe:
—Jiyuwaꞌjsa ũsçxaꞌ, jiyuneꞌkwe jĩk.
9 Txajũꞌ txãa yakh uꞌjusaweꞌsxaꞌ Jesusaꞌs pẽjxtxi txãa ejemploꞌs maꞌjĩnitewa jiyuyaꞌ.
10 Açaꞌ Jesus pasçxaꞌ naꞌjĩk:
—Dxus jxkaahni ensu maꞌwẽ yũuwaꞌjaꞌswa kim yuhwa jiyunimeesaꞌs iꞌkweꞌsx yuutxiꞌs ãate kaajiyuꞌjuꞌnja. Nawa vxite yuutxiꞌ ejemplo yakhçxáath ptaꞌsxiꞌ, kxah makwe uyçxawa, uysamée naꞌwẽçxáa neeyũutxna. Saꞌ ptaꞌsxniꞌs wẽsẽꞌjçxawa, jiyumée neeyũutxna.
11 Naa ejemploꞌ naꞌwẽsaꞌ: Skuutxh fxiwaꞌ Dxus yuwe jĩniꞌ.
12 Açaꞌ maz nxinx dxiꞌjsu ũsxisáꞌ, nasa Dxus yuweꞌs wẽsẽꞌthewa eçxthẽꞌjaꞌ kutxiꞌjina wẽsẽꞌjçxa yuꞌakhniꞌs jĩniꞌ. Txãꞌwẽ Dxus yuweꞌs ũusuh kutxiꞌtheꞌ, txãaweꞌsx ũusaꞌ vxituna.
13 Açaꞌ maz nxinx kwet-su ũsxisáꞌ, nasa Dxus yuweꞌs jxpaꞌgaçxa maz en yuꞌ weçxana wẽsẽꞌjna fxiꞌzetxna. Nawa ũuste ew yuꞌakhmeeçxaꞌ, thẽysa nxusu en paꞌtheçxáa, Dxus tasxu kiꞌ txuteetxna jĩniꞌ.
14 Açaꞌ maz nxinx çhũçh ksxavxysu ũsxisáꞌ, nasa wẽsẽꞌjçxawa, naa kiweteweꞌsx jiꞌphu wẽeniçxáꞌs yajkxna paꞌpçxuna ewmeesuçxáa weçxweçxa fxiꞌzesa jĩniꞌ. Saꞌ Dxus yuweꞌs peçxkanatxna, açaꞌ kxul íiçxáa yuuna.
15 Nawa nasa ũus ewsa Dxus yuweꞌs jxpaꞌyakx wẽsẽꞌjçxa nwẽesẽꞌjna Dxus yakhçxáa uꞌjuçxaꞌ, kĩhsuwa ewçxáa yũuna fxiꞌzena, txãꞌ maz nxinx yuꞌ kiwe ewsate ũsxisáa naꞌwẽtaꞌ.
Ãate jiyuwaꞌj yuꞌ neeyũuwaꞌjsamée
(Mr 4.21-25)
16 Lamparaꞌs atũu dxiite aphçxa txajxaꞌ txãꞌwẽ yaꞌpkiꞌtaçmeꞌ. Wejxwa ẽetek yaꞌtxajaꞌ eenaꞌ kweethkahn, kxah maawa uꞌkasaꞌ eenaꞌte uꞌkakahn.
17 Makwe paaçte sũthnisaçxawa, kĩh yuhwa ãate vxyaamée yuꞌ neeyũuwaꞌjmeꞌ. Saꞌ makwe ũusteçxáa yaakxnisaꞌswa, kim yuhwa ãate jiyunimée yuꞌ neeyũuwaꞌjmeꞌ.
18 Txãꞌwẽyãꞌtheꞌ, ew mwẽesẽꞌjwe. Maawa waꞌlmée wẽsẽꞌtheꞌ, jxthaakwe kaajiyuꞌjuna Dxusaꞌ. Nawa wẽsẽꞌjyaꞌ waꞌlsaꞌs, kaajiyuꞌjnimée yuuna. Jxuka kusaꞌjni yuuna.
Jesus njĩꞌj vxiteꞌ txajx nyakhweꞌsx
(Mt 12.46-50; Mr 3.31-35)
19 Txajũꞌ Jesus ũsnite paꞌjtx njĩꞌj vxiteꞌ nyakhweꞌsx. Nawa nasa wala ũsteꞌ, Jesus tasxte utxaayaꞌ ãjãmeetaꞌ.
20 Açaꞌ kxtee ũssa teeçxsaꞌ Jesusaꞌs ptaꞌsxku naꞌjĩna:
—Iidx mama, iidx nyakhweꞌsx, iidx npeꞌsxweꞌsx idxaꞌs thegyaꞌ paꞌjçxa ekate ũstaꞌ, saꞌ idxaꞌs peejxtaꞌ jĩteꞌ,
21 Jesus pasçxaꞌ:
—Dxus yuweꞌs wẽsẽꞌjçxaꞌ kxtey yuutxna txãꞌwẽ yuusaaçxáa, adx mama, adx nyakh, adx npeꞌsxweꞌsx naꞌwẽsataꞌ jĩk.
Marte wejxa walaꞌs Jesus kxuujuꞌjni
(Mt 8.23-27; Mr 4.35-41)
22 Teeçx enteꞌ Jesusaꞌ txãa yakh uꞌjusaweꞌsx yakh barkote khẽeçxaꞌ:
—Vxite ahn ĩkh kuten uꞌjwega jĩçxaꞌ uꞌjtx.
23 Nawa ĩkh pxãjũy uꞌjweçpkaçxhaꞌ Jesusaꞌ dejk. Naapkaçxhaꞌ wejxaa wala seenaꞌ kiiteçxa, yuꞌaꞌs barkote yuutaçku yuꞌ. Açaꞌ barkoꞌ ĩkh dxiikhẽ khẽeyaꞌwak yuꞌ.
24 Txajũꞌ Jesusaꞌs fxĩtxtxi naꞌjĩna:
—Kweꞌsxtxi jxpeꞌjsa mkiite, ĩkh dxiikhẽ khẽjẽçthaꞌw jĩteꞌ, Jesus kiiteçxaꞌ wejxaa wala petx ĩkh yãꞌjçxa yujukaatheꞌ, jxuka yujuk, açaꞌ kĩh yuhwamée ewçxáak neeyũu.
25 Txajũꞌ txãa yakh uꞌjusaweꞌsxtxiꞌ naꞌjĩk:
—¿Mjĩiçxakwe Dxusaꞌ puꞌçxhina sũhna yajkxmée? jĩteꞌ, txãa yakh uꞌjusaweꞌsxaꞌ ũukhçxa txãaweꞌsx pweꞌsxçxáatx naꞌjĩna puutx weꞌweꞌ:
—Naa piçthẽꞌjaꞌ ¿kimki açkiꞌtx wejxaa wala ĩkh txãꞌwẽsa yuhwa nwẽeseꞌjeꞌ? jĩꞌtx.
Gadara kiweteweꞌsx eçx iiyamunisa
(Mt 8.28-34; Mr 5.1-20)
26 Txajũꞌ pejka Gadara kiwete pesahtx Galilea ĩkh kuteju.
27 Açaꞌ Jesusaꞌ txãa kiwete paꞌjaçteꞌ, kxteꞌ teeçx çxhabuweꞌsx piçthẽꞌj kasejk Jesus yakh puutx uyyaꞌ. Txãa piçthẽꞌjaꞌ wala txaçxyãꞌj eçx luuku vxitni uꞌjuꞌk. Saꞌ ropa athmée yattewa uꞌpsameek yuꞌ, naasáa uusáa pedaní kwet kafxsuçxáak uꞌpsa yuꞌ.
28 Saꞌ Jesusaꞌs uyçxaꞌ, tasxte peejxũkweçxaꞌ, naꞌjĩnak suhs weꞌwe:
—Jesus, Dxus ĩtxisa Nçxiꞌk, adxaꞌsaꞌ ¿kĩhga yũu wẽjẽꞌ? Adxaꞌs nxuste ũswaꞌthe akhkahmén pxthaath weꞌweꞌ jĩk.
29 Jesusaꞌ txãa eçx luuku vxit-saꞌs ũusu kaseh kajaçku yuꞌ, txãa paꞌgak txãꞌwẽ weꞌweꞌ. Txãa eçxaꞌ ũuste khẽeçxa nasaꞌs luuku vxitpaꞌgatx, kadenaju kuse petx çxida yãꞌjçxa tud wẽe. Nawa kĩh yuhnawa wejiꞌmeek çxuktedeꞌ. Txãꞌwẽ yuuçxak txãa eçx luuku vxit-saꞌ nasa uꞌpnimeesu jxũna uꞌjweꞌ txãa piçthẽꞌjaꞌs.
30 Txajũꞌ Jesusaꞌ txãa eçxaꞌs pẽjxku:
—¿Kĩh yaasega? jĩteꞌ:
—Legion yaaseth jĩnak pas.
Txãa piçthẽꞌj ũuste wala kuh eçx khẽeçxa ũsuꞌtx, txãasak legion yaaseth jĩna pas.
31 Saꞌ txãa eçx luuku vxit-saꞌ Jesusaꞌs pxthaa weꞌwetx kafx wala seenaꞌ ũukhũukhsakhẽ akhkahmén.
32 Saꞌ kxsũ thãꞌjsũ kuçxi wala ũsuꞌtx aphna, açaꞌ txãa kuçxi ũussu khẽeyaꞌ uꞌjwaꞌjaꞌstxi Jesusaꞌs pẽjx pxthaa weꞌwena. Açaꞌ Jesusaꞌ kuçxi ũussu khẽeyaꞌ uꞌkhaakh.
33 Txajũꞌ txãa eçx luuku vxit-sa txãa piçthẽꞌj ũusu kasehçxa, kuçxi ũussu khẽeteꞌ, txãa kuçxiꞌ penxakhẽ peluçxa, ĩkh walakhẽ khẽeçxa jxuka uutx.
34 Açaꞌ kuçxi thegsaꞌ txãꞌwẽ yũute uyçxaꞌ, ũukhçxa ptaꞌsxyaꞌ wala dud uꞌjtx çxhabna vxiteꞌ çxhab peekuꞌjsuwa jxuka.
35 Açaꞌ kĩh yũutewa uyyaꞌ nasaꞌ thegyaꞌ paꞌjtx. Saꞌ Jesus ũsnite kũhçxaꞌ, uytxi eçx luuku vxit-saꞌ txãa piçthẽꞌj ũusu jxuka kasehteꞌ, Jesus tasxte wẽt yãꞌj ropa athçxa kaçxçxa uꞌpte. Saꞌ wala ũukhtxi.
36 Açaꞌ txãa piçthẽꞌj eçx luuku vxitnisaꞌ maꞌwẽ yũuçxa katxhitewa uysaꞌ kxtee thegyaꞌ paꞌjsatx ptaꞌsxtxi.
37 Txãa paꞌgaçxáa Gadara kiwesuweꞌsx jxukaysa ũukhçxa Jesusaꞌs txãa kiweju kasehna uꞌkhaahtx. Txãꞌjĩyãꞌtheꞌ, Jesusaꞌ barkote khẽeçxa kiꞌ sxawedku.
38 Açaꞌ txãa piçthẽꞌj luuku vxitnijũ katxhisaꞌ Jesusaꞌs pxthaa weꞌwek peꞌjçxa uꞌkhan. Nawa Jesusaꞌ txajx yatnak uꞌkhaah naꞌjĩna:
39 —Iidx yatna sxawedna meꞌj, saꞌ mtuutheꞌj idxaꞌs Dxus naꞌwẽ ew yũuniꞌs jĩteꞌ, txãa piçthẽꞌj uꞌjçxaꞌ, çxhabsu jxuka ptaꞌsxku Jesus maꞌwẽ ew yũuniꞌswa jxuka.
Jairo niisa vxiteꞌ Jesus atxhte jxaꞌdxsa
(Mt 9.18-26; Mr 5.21-43)
40 Txajũꞌ Jesusaꞌ Galilea kiwetey kiꞌ sxawedna pesatheꞌ, nasa ũythãsna ũssaꞌ wala weçxana jxpaꞌgatx.
41 Kxteꞌ teeçx piçthẽꞌj judiuweꞌsx pkhaakhenite npiiçthẽꞌjsa Jairo yaasesak paꞌj. Saꞌ txãa piçthẽꞌjaꞌ Jesus tasxte peejxũkweçxaꞌ, pxthaa weꞌwek txajx yatna yuukahn.
42 Kxtee yuꞌ txajx niisa teeçxçxáasa doce anxu jiꞌphsa ãçãꞌçxa uuwaꞌtheçxáa yãꞌkh ũs yuꞌ naa paꞌga. Açaꞌ Jesusaꞌ uꞌjweçteꞌ, txãa yakh uꞌjsa nasa wala kuh dxiꞌthe utaçxáatx uꞌjna ũsuꞌ.
43 Txãa nasa kuh ksxavxyte teeçx uꞌy doce anxu yãꞌj kakwe yuꞌ vxyaate ãçãꞌsak kaseh. Saꞌ txãa uꞌyaꞌ txajx vxyuꞌs jxuka pebak yuꞌçeꞌjsatx dewena, nanwa maa yuhwa nuykatxhiyaꞌ ãjãmeetaꞌ.
44 Açaꞌ txãa uꞌyaꞌ Jesus eꞌste utxaaçxa, atxh vxiçkhẽ kpaajxaꞌdxku, naapkaçxhaꞌ txãa dudtey kakwe yuꞌaꞌ yujuk.
45 Txajũꞌ Jesusaꞌ paapẽjxku:
—¿Kimga adxaꞌs jxaꞌdx? jĩna.
Açaꞌ jxukaysa: Maa yuhwa jxaꞌdxmeethaꞌw jĩteꞌ, Pedro vxiteꞌ txãa yakh uꞌjusaꞌ naꞌjĩtx:
—Nasaa ksxavxyte zuunaꞌçxáa uꞌjna ũsgu sayujaꞌ ¿maꞌwẽga kimga jxaꞌdx jĩna pẽyíꞌ? jĩteꞌ,
46 Jesus pasçxaꞌ:
—Teeçxsa adxaꞌs jxaꞌdxyujk, txãꞌwẽ adxaꞌs jxaꞌdxpaꞌgaçxáa ãçãꞌçxawa katxhiçxak neeyũu adx puꞌçxte jĩk.
47 Açaꞌ txãa uꞌy maꞌwẽ yũuniꞌswa Jesusaꞌ jiyuteꞌ, txajx tasxte ũukhna yayana kũhçxa peejxũkwek. Saꞌ nasaa dxiꞌpte jxuka ptaꞌsxku ãçãꞌçxa Jesus atxhte jxaꞌdxçxaꞌ txãa dudtey katxhiçxa neeyũuniꞌs.
48 Txajũꞌ Jesus weꞌweçxaꞌ:
—Katxhiꞌnja sũhçxaneꞌkwe adx tasxte txãꞌwẽ yũuyaꞌ yuwéꞌ txãa paꞌga ãçxhaꞌ katxhiꞌkwe neeyũu naꞌ weçxana meꞌjwe jĩk.
49 Kxtee nee Jesus weꞌwena ũsíyna, judiuweꞌsx pkhaakhenite npiiçthẽꞌjsa Jairo yatu yuusa teeçx paꞌjçxaꞌ, Jairoꞌs ptaꞌsxku:
—Iidx niisaꞌ uuyãꞌkh, açaꞌ Jesusaꞌs kuçx peꞌjna yuunu jĩteꞌ,
50 Jesus wẽsẽꞌjçxaꞌ:
—Nxusnu, adxçxáꞌs myajkx aççxáa iidx niisaꞌ katxhina jĩk.
51 Txajũꞌ Jairo yatte paꞌjçxaꞌ, vxite yuutxiꞌ kaꞌgaꞌjmée, naasáa Pedro, Jakobo, Juan, vxiteꞌ knaꞌsa neyweꞌsxtxiçxáak kaꞌgaꞌj.
52 Kxteꞌ nxus weꞌwena ũꞌnenatx ũsuꞌ. Nawa Jesus weꞌweçxaꞌ:
—Ũꞌnenuwe, txãa knaꞌsaꞌ uunimeꞌ, naasáa deeniçxáꞌ jĩteꞌ,
53 kxtee ũssaꞌ npeevxysxijkatx, uuníi ũste txãꞌjĩpaꞌga.
54 Txajũꞌ Jesusaꞌ uuniisaꞌs kuseju puꞌkisnaꞌ suhsku weꞌwe:
—Knaꞌsa, mkiiteçx jĩna.
55 Naapkaçxhaꞌ, dudtey ĩtxĩ yuuçxa kiitek, açaꞌ Jesusaꞌ puuçkaakh.
56 Açaꞌ neyweꞌsxaꞌ wala kuh yajkxna weçxana thegtxi. Nawa Jesusaꞌ maa yuhtxwa ptaꞌsxkaahmeꞌ txãꞌwẽ uuniitewa ĩtxĩ vxitniꞌs.
