Lukas 9:1-62
9 Jesusaꞌ txãa yakh uꞌjusa docesatx kxteeçxah paꞌyaçxaꞌ kĩh weete ãçãꞌsatxwa nuykatxhiyaꞌ ãjãwaꞌjaꞌs ũsku, eçx luuku vxit-satxwa nasa ũusu kutxiꞌkhan.
2 Txãꞌwẽ yuuçxak kaah Dxus jxkaahwaꞌj enaꞌs ptaꞌsxna ãçãꞌsatxwa nuykatxhikahn.
3 Saꞌ naꞌwẽk yuꞌkxpeh:
—Dxiꞌthe kĩh yuhwa jxũmée meꞌjwe khãabu, yaꞌja, vxyu, kaame txãꞌwẽsatx. Kmiisa yuhwa eꞌz yuꞌ jxũçxa uꞌjnuwe.
4 Maa yatte paadejxaꞌ paꞌjyãꞌjçxaꞌ, kxteeçxáa paadehna ũsuneꞌkwe txajũ kiꞌ kasehna uꞌphkaçx.
5 Maa çxhabteyaꞌ iꞌkweꞌsxtxi jxpaꞌgameeteꞌ, iꞌkweꞌsx çxidate kiwe tuhdaꞌs sakweekweçxa kasejeneꞌkwe, kxah Dxus yuweꞌs makwe jxpaꞌgameeçxawa, yuuwesa yuutxna jĩnak yuꞌkxpeh.
6 Txajũꞌ txãaweꞌsxaꞌ kasehçxaꞌ, çxhab leꞌçxsũ mtee mteewa jxuka Dxus yuweꞌs ptaꞌsxna ãçãꞌsatxwa nuykatxhinatx pekũh.
Juan Bautista uuníi
(Mt 14.1-12; Mr 6.14-29)
7 Txajũꞌ neꞌjweꞌsx Herodesaꞌ Jesus kĩjkĩhwa ew yũuniꞌs jiyuçxaꞌ, wala kuh yajkxku, txãꞌwẽ maaíi yuꞌ Juan Bautistaneꞌ uuçxawa kiꞌ ĩtxĩ yuu jĩꞌtx txãa paꞌga.
8 Açaꞌ vxite yuꞌ, Dxus yuweꞌs ptaꞌsxsa Eliasneꞌ kiꞌ vxyaa jĩꞌtx. Naapkaçxhaꞌ vxite weꞌweçxaꞌ: Dxus yuwe ptaꞌsxsaweꞌsx jwee yaçgayweꞌsxneꞌ kiꞌ ĩtxĩ yuu jĩꞌtx.
9 Nawa Herodes yuꞌ naꞌjĩꞌk:
—Adxíith Juan Bautista txhikhaꞌs kaaspẽꞌtheꞌj txãana. Txãameeçxaꞌ jwee yuꞌ ¿kimçxah txakwe kĩjkĩhwa yũuyaꞌ ãjãkx? jĩꞌk.
Txãasak Herodesaꞌ txakwe uy wẽjẽꞌ Jesusaꞌs.
Cinko mil nasatx Jesus sãꞌjĩni
(Mt 14.13-21; Mr 6.30-44; Jn 6.1-14)
10 Jesus kaahnisaweꞌsxaꞌ kiꞌ sxawedna paꞌjçxaꞌ, txãaweꞌsx kĩhçxahneꞌta yũu txãꞌsna ptaꞌsxtxi Jesusaꞌs. Txajũꞌ Jesusaꞌ txãaweꞌsxçxáatx fxiite peꞌjna uꞌkh Beçaida çxhab jaꞌdasu nasa uꞌpnimeesu.
11 Nawa nasaꞌ jiyuçxaꞌ, txãaweꞌsxwa Jesus eꞌstey uꞌjtx. Açaꞌ Jesusaꞌ jxpaꞌgaçxaꞌ, Dxus maꞌwẽ jxkaahwaꞌjaꞌswa ptaꞌsxku saꞌ ãçãꞌsatxwa nuykatxhik.
12 Txajũꞌ kusuçteꞌ, Jesus yakh uꞌjusaweꞌsx docesaꞌ naꞌjĩtx Jesus tasxte utxaaçxa:
—Nasatxiꞌ mkaah, çxhabsu paadee yat-su ũꞌ weyçxa ũꞌkahn. Txãꞌwẽmeꞌ ayteꞌ nasa yat utxameesũ ũsthaꞌw jĩteꞌ,
13 Jesus pasçxaꞌ:
—Iꞌkweꞌsxíiwa mpuuçwe jĩk. Açaꞌ txãaweꞌsx pasçxaꞌ:
—Tahç pan, eꞌz wedxçxáa jiꞌpthaꞌw. Kweꞌsxaꞌ çxhabna weyyaꞌ uꞌjmeete yuꞌ, ãhmeena naazkuẽesatx puuçwaꞌj jĩtx.
14 Nasa yuꞌ, piçthẽꞌjçxáa cinko mil ãhtx yuꞌ. Nawa Jesusaꞌ txãa yakh uꞌjusaweꞌsxtxiꞌ naꞌjĩk:
—Cinkwenta txuhdeçxa fxiifxii txaksu mkaaçxiꞌjwe jĩteꞌ,
15 txãaweꞌsxaꞌ txãꞌwẽy nasatx jxukay kaykaçxhiꞌtx.
16 Txajũꞌ Jesusaꞌ tahç pan eꞌz wedxtxi jxpaꞌganaꞌwa cielute pagayçxa, Dxusna weçxana orãyku. Saꞌ peꞌltedeçxa txãa yakh uꞌjusaweꞌsxtxi ũsku, nasa jxukaysatx ũsuꞌskahn.
17 Txajũꞌ jxukaysa ũꞌçxa txikteꞌ, kijxasaatx doce kanastate utatx pkhakh.
Pedroꞌ jiyuk Jesusaꞌ Dxus tasxu yuusaatewa
(Mt 16.13-19; Mr 8.27-29)
18 Teeçx ente Jesusaꞌ txãa yakh uꞌjusaweꞌsx yakhçxáa fxii txuteena uꞌjçxa Dxusna orãyna uꞌpçxaꞌ, txãaweꞌsxtxi pẽjxku:
—Nasaꞌ adxaꞌsaꞌ ¿kimna jĩꞌta? jĩteꞌ,
19 txãaweꞌsx pasçxaꞌ:
—Maaíꞌ: Juan Bautistana jĩꞌtx. Vxiteꞌ: Eliasna jĩꞌtx. Açaꞌ vxite yuꞌ: Dxus yuwe ptaꞌsxsa txãniiteyweꞌsx uuniiçxawa ĩtxĩ yuusaana jĩꞌtx jĩteꞌ,
20 Jesus pẽjxçxaꞌ:
—Txajũꞌ iꞌkweꞌsxaꞌ adxaꞌsaꞌ ¿kimna sũjũꞌkwe? jĩteꞌ, Pedro pasçxaꞌ:
—Idxaꞌ Kristo, Dxus tasxu yuusag jĩk.
21 Txajũꞌ wala neeweꞌwek Jesusaꞌ Dxus tasxu yuusa Kristoꞌ jĩna maa yuhtxwa ptaꞌsxkahmén.
Jesusaꞌ txajx uuwaꞌjaꞌs ptaꞌsxni
(Mt 16.20-28; Mr 8.30–9.1)
22 Txajũꞌ naꞌwẽk ptaꞌsx:
—Dxus Nçxiꞌk Nasa Yuusáꞌ wala pkxuuni yuuwaꞌjaꞌs jxpaꞌgawaꞌj pejka peejxyujaꞌ, txãa paꞌga judiu nthẽꞌjsaweꞌsx vxiteꞌ sacerdote npiiçthẽꞌjweꞌsx vxiteꞌ Dxus leyaꞌs kaapiyaꞌjsaweꞌsx ahçeçxa ikhetxna. Nawa uuçxawa tekh enteꞌ kiꞌ ĩtxĩ yuuna jĩnak ptaꞌsx.
23 Txajũꞌ jxukaysatx naꞌjĩk:
—Maawa adx yakh yuu wẽeçxaꞌ, peekx kakwe jxthãasniꞌs kĩhnawa jxuka nvxihtçxa yuuçxáa adx yakh yujxaꞌ ãjãneꞌkwe, makwe pxthaa yuuwaꞌj seenaꞌsa een isa maꞌk paꞌjnawa txãꞌsaꞌ ũukhmée.
24 Maa nasawa naa kiwete ĩtxĩ fxiꞌzewaꞌjçxáꞌs yaꞌnweꞌwesaꞌ Dxus yakh fxiꞌzewaꞌj yuꞌsaꞌ ivxiituna. Nawa maa nasawa adx yakh fxiꞌzepaꞌgaçxáa naa kiwete ĩtxĩ fxiꞌzeniꞌs yajkxmée ivxiitusaꞌ, Dxus yakh fxiꞌzewaꞌj yuꞌsaꞌ ivxiitumeena.
25 Nasaꞌ naa kiweteweꞌsxçxáꞌs jxuka knayçxaꞌ, txajx ũus yuꞌs ivxiituteꞌ, ¿kĩhte selpiikx, peekx ũus yuꞌs nweꞌwemeeteꞌ?
26 Maa nasawa adxaꞌs jxpaꞌgayaꞌ waꞌlna adx ptaꞌsxnitxwa waꞌlutxna açaꞌ Dxus Nçxiꞌk Nasa Yuusaawa adx Tata eenaꞌ kweethniite Dxus angelesweꞌsx yakh jxkaajxaꞌ kĩhçxaꞌ, txãꞌwẽ yũusatxiꞌ jxpaꞌgayaꞌ waꞌluna.
27 Isath weꞌweꞌ, ayte ũssa uuméy uyuuneꞌkwe Dxus jxkaajxaꞌ kĩiniꞌs jĩk.
Jesusaꞌ zhiçxkwe yuꞌpthehçxa vxyaani
(Mt 17.1-8; Mr 9.2-8)
28 Txãꞌwẽ weꞌweni teeçx kiꞌsu skhẽwniiteꞌ, Jesusaꞌ thãꞌthe orãyyaꞌ uꞌkh Pedro, Jakobo, Juan txãaweꞌsx yakh.
29 Jesusaꞌ orãyna uꞌpiyna, txajx dxiꞌpaꞌ fxiyku zhiçxkwe yuꞌptheh, açaꞌ txajx athni ropawa txãꞌwẽytxi çxihme kwehnesa yuu.
30 Txajũꞌ txãa yakhaꞌ eꞌz piçthẽꞌjtx puutx weꞌwena vxyaa, teeçxsaꞌ Moises vxiteꞌ Elias txãaweꞌsxtxi yuꞌ.
31 Jxuka zhiçxkwe eenaꞌ kweethni pxãhte Jesus maꞌwẽ nxus pxthaa yuuçxa Jerusalente uuwaꞌjaꞌstxi weꞌweꞌ.
32 Pedroweꞌsxaꞌ wala dee wẽeçxawa, dehmée uꞌpçxaꞌ uytxi, Jesus eenaꞌ kweethni vxite eꞌzsa txãa yakh ũssatx.
33 Txajũꞌ txãa eꞌz piçthẽꞌjweꞌsxaꞌ Jesusaꞌs txuteena uꞌjweçteꞌ, Pedroꞌ naꞌjĩk:
—Ayteꞌ kweꞌsx ũswaꞌj wala ewaꞌ, açaꞌ tekh waꞌ txajaga, teeçxsaꞌ iidx jĩi, vxiteꞌ Moises jĩi, vxiteꞌ Elias jĩi jĩk.
Nawa Pedroꞌ ũus yuu yajkxméy weꞌwesaçxáak yuꞌ.
34 Naapkaçxhaꞌ tãaph kĩhnaꞌwa, jxuka aphku. Açaꞌ wala ũukhtxi tãaph dxiite neeyũuçxa.
35 Txajũꞌ tãaph dxiiju naꞌwẽk weꞌwe:
—Naꞌ adx Nçxiꞌk wala wedxnisaꞌ, açaꞌ txãꞌsaꞌ nwẽesẽꞌjna kxtey myuuwe jĩnik pthũuse.
36 Txãꞌwẽ weꞌwenijũꞌ, Jesusçxáa yãꞌj ũstetx uy. Saꞌ txãaweꞌsxaꞌ sxuunaꞌtx neeyũu, saꞌ txãn ensuꞌ kim yuhtxwa ptaꞌsxmeetaꞌ txãꞌwẽ uyniꞌs.
Teeçx luuçx wẽeçxpaꞌjsaꞌs Jesus nuykatxhini
(Mt 17.14-21; Mr 9.14-29)
37 Saꞌ kuskuus enkhẽꞌ, thãꞌju kĩjaçteꞌ, nasa wala kuh Jesusaꞌs puꞌthegyaꞌ kasehtx.
38 Açaꞌ teeçx piçthẽꞌjaꞌ nasaa ksxavxyte ũssaꞌ sus weꞌweçxaꞌ:
—Adx nçxiꞌk teeçxçxáa jiꞌpthu txãꞌsaꞌ meen theg.
39 Txãꞌsaꞌ eçx luuku vxit-sa uweçxa kaywẽçxpaꞌjaꞌjna kweeyiꞌjna wala pkxuꞌk saꞌ txhwete wẽjẽꞌçmeꞌ. Txãꞌwẽ yũuteꞌ, yuwesu buꞌçxçxáak sẽjẽꞌ.
40 Idx yakh uꞌjusaweꞌsxtxiꞌ pxthaa weꞌweyãꞌth, txãa eçxaꞌs adx nçxiꞌk ũusu kutxiꞌkhan. Nawa txãaweꞌsxaꞌ ãjãmeetaꞌ jĩteꞌ,
41 Jesus pasçxaꞌ:
—Dxusaꞌ puꞌçxhina sũhwaꞌj yuꞌsaꞌ jiꞌphmeesataꞌ naa nasaꞌ. ¿Bagaçxpkaçx iꞌkweꞌsx yakh puꞌçxna ũs yaꞌwatka? ¿Bagaçxpkaçx ãjãmée fxiꞌze yaꞌwakwe? Mneejxũh iidx nçxiꞌkaꞌs jĩteꞌ,
42 txãa piçtakxaꞌ Jesus tasxte utxaana kũjũçpkaçxhaꞌ, txãa eçx luuku vxit-saꞌ kaywẽçxpaꞌjaꞌjçxa pẽtxku. Nawa Jesusaꞌ juunaꞌ weꞌweçxa eçx luuku vxit-saꞌs ũusu kutxiꞌtheꞌ, txãa piçtakxaꞌ ew katxhik açaꞌ Jesusaꞌ neyaꞌs dukhku.
43 Açaꞌ Dxus txakwe wala ew yũuteꞌ, jxukaysa wala kuh yajkxtxi.
Jesusaꞌ txajx uuwaꞌjaꞌs kiꞌ ptaꞌsxni
(Mt 17.22-23; Mr 9.30-32)
Naꞌwẽ yũuniꞌs nasa wala kuh yajkxna ũspkaçxhaꞌ, Jesusaꞌ txãa yakh uꞌjusaweꞌsxtxiꞌ naꞌwẽk weꞌwe:
44 —Naꞌsaꞌ ew wẽsẽꞌjçxa peçxkananuwe: Dxus Nçxiꞌk Nasa Yuusáꞌs nasa ewmeesa kusete dukhni yuuwaꞌjaꞌ jĩtewa,
45 txãa yakh uꞌjusaweꞌsx yuꞌ jiyuyaꞌ ãjãmeetaꞌ, txãaweꞌsx jiyuwaꞌjmeeneꞌ yuꞌ naa paꞌga. Saꞌ txãꞌwẽçxawa pẽjx yuꞌ meetaꞌ ũukhçxa.
Kim wejx jxthaakwe jxtuhthesakx
(Mt 18.1-5; Mr 9.33-37)
46 Txajũꞌ Jesus yakh uꞌjusaweꞌsxaꞌ txãaweꞌsx pweꞌsx puutx paapẽyiꞌtx:
—Ayteꞌ kweꞌsx pweꞌsx ¿maa wejx jxthaakwe walasakxthaꞌw? jĩna.
47 Nawa kĩh yajkxçxa txãꞌwẽ puutx weꞌweçtewa Jesusaꞌ jiyuçxaꞌ, teeçx luuçxkuẽꞌs txajx pukate txahçxaꞌ naꞌjĩk:
48 —Adxaꞌs wedxsaꞌ maawa naa luuçx naꞌwẽsatx ahçemée jxpaꞌgasaꞌ, adxaꞌs jxpaꞌgasa yuutxna. Saꞌ adxaꞌs jxpaꞌgasaꞌ, adxaꞌs jxkaahsanawa jxpaꞌgasa yuutxna. Iꞌkweꞌsx pweꞌsx maa txãꞌwẽ ãhmeekwesa naꞌwẽ yajkxna fxiꞌzena txãa yuuçxáa jxthaakwe walasa yuuna jĩk.
Kweꞌsxtxi açesamée yuꞌ kweꞌsx yakh fxiꞌzesatxna
(Mr 9.38-40)
49 Txajũꞌ Juan weꞌweçxaꞌ:
—Kweꞌsxtxi jxpeꞌjsa mwẽeseꞌj. Teeçx piçthẽꞌj iidx yaseꞌs kxsusçxa eçx luuku vxit-saꞌs nasaa ũusu kutxiꞌjiçte kweꞌsxaꞌ uyçxaꞌ, txãꞌwẽ yũunu jĩnathaꞌw weꞌwe, kweꞌsx yakh uꞌjusameek yuꞌ naa paꞌga jĩteꞌ,
50 Jesus pasçxaꞌ:
—Maawa kweꞌsxtxi açeweꞌwesamée yuꞌ kweꞌsxtxi puꞌçxsa íiçxáatxna, açaꞌ txãaweꞌsxtxiꞌ kuçx txãꞌwẽ yuunuwe jĩk.
Juanweꞌsx cieluju ipx kaakĩjiꞌj wẽeni
51 Txajũꞌ Jesus cielun uꞌjwaꞌj en utxaaçteꞌ, ũukhmée Jerusalen çxhabna uꞌjyaꞌ kasejk.
52 Saꞌ uꞌjweççxaꞌ, yaçte yuwe kaakh, açaꞌ txãaweꞌsxaꞌ Samaria kiwete teeçx çxhabtetx deewaꞌj yat pakweyaꞌ uꞌj.
53 Nawa txãa çxhabteweꞌsxaꞌ Jesus Jerusalenna uꞌjweçte uyçxaꞌ, jxpaꞌga wẽemeetaꞌ.
54 Txajũꞌ txãꞌwẽ yũuteꞌ, Jakobo, Juanweꞌsxaꞌ Jesusaꞌs naꞌjĩtx:
—Kweꞌsxaꞌ cieluju ipx kaakĩjĩꞌjçxa txãa nasatxiꞌ peba jxthãaswaçaꞌ, kweꞌsxaꞌ kxtey yuꞌnjaꞌw Dxus yuwe ptaꞌsxsa Eliaswa maꞌwẽga yũu txãꞌwẽy jĩteꞌ,
55 Jesusaꞌ thegçxaꞌ naꞌjĩnak yuꞌkxpeh:
—Iꞌkweꞌsxaꞌ jiyuꞌçmeeiꞌkwe maꞌwẽ yũuwaꞌjaꞌswa.
56 Dxus Nçxiꞌk Nasa Yuuçxawa, adxaꞌ nasatx pebayaꞌ yuweꞌçmeeth, naasáa nweꞌweçxa ewte nvxiht-yaꞌçxáath kĩh jĩk.
Txajũꞌ vxite çxhabnatx uꞌj.
Jesus yakh fxiꞌze wẽesa
(Mt 8.19-22)
57 Txãaweꞌsx dxiꞌthe uꞌjweçteꞌ, teeçx piçthẽꞌj Jesusaꞌs naꞌjĩk:
—Jxpeꞌjsa, idx yakh yuu wẽeth, idx mtee uꞌjweçtewa jĩteꞌ,
58 Jesus pasçxaꞌ:
—Yuꞌkh niimal yuhwa deewaꞌj kafx jiꞌphtaꞌ, açaꞌ vxiçxakuẽwa yat jiꞌphtaꞌ. Nawa Dxus Nçxiꞌk Nasa Yuusaꞌ mtee yuhwa txajx dxiktheçxáa yujaꞌswa khikhwaꞌj jiꞌphmeꞌ jĩk.
59 Txajũꞌ Jesusaꞌ vxiteꞌs paꞌyak:
—Adx yakh myuh jĩna.
Açaꞌ txãa pasçxaꞌ:
—Jxpeꞌjsa, mũythãs, adx tata khuẽꞌyna pedaayaꞌ uꞌjweçthu jĩteꞌ,
60 Jesus pasçxaꞌ:
—Uusaaweꞌsxaꞌ peekx uusáa pweꞌsx yaꞌpedaatxna. Açaꞌ idxaꞌ Dxus jxkaahwaꞌj enaꞌsçxáa ptaꞌsxyaꞌ meꞌj jĩk.
61 Txajũꞌ vxiteꞌ naꞌjĩk:
—Jxpeꞌjsa, adxaꞌ idx yakh yuu wẽeth, nawa adx yatteweꞌsx khuẽꞌytxi neeweꞌweyaꞌ uꞌjweçthu jĩteꞌ,
62 Jesus pasçxaꞌ:
—Maawa mjĩiaꞌs takhçxaçxáa eꞌsu yuꞌ thegsaꞌ selpimeena Dxus maꞌwẽ jxkaahwaꞌjaꞌswa ptaꞌsxyaꞌ jĩk.
