Romanos 1:1-32
1 Adxaꞌ Jesukristoꞌs selpisáa Pablo yaaseth. Açaꞌ adxaꞌs Dxusku txhitxçxa nvxiht, Kristo yuwe ewte nvxiitwaꞌjsaꞌs ptaꞌsxkahn.
2 Dxusaꞌ txãa yuwe ewte nvxiitwaꞌjsaꞌs ptaꞌsxni yuuna jĩna kfxiꞌjaꞌkh nyafxíi entey Dxusna selpisaaweꞌsxtxi.
3 Açaꞌ txãa Dxus yuwe ewte nvxiitwaꞌjsaꞌ kweꞌsxtxi jxpeꞌjsa Jesukristo Dxus Nçxiꞌkaꞌsku weꞌweꞌ. Açaꞌ Jesukristoꞌ naa kiwete yuꞌ jxkaahsa Davxid jiꞌthek upx kakwe yuꞌ.
4 Nawa kĩhtewa jxuka ãjawaꞌjsa Dxus Nçxiꞌktewa Dxus Espirituꞌ kweꞌsxtxi kaajiyuꞌkh Jesukristoꞌs uuniijũ ĩtxi vxitçxa.
5 Saꞌ adxaꞌs peeygãhçxa Jesukristo nweꞌweteꞌ, Dxus txhitxnisath yuu, Jesukristoꞌs selpiwaꞌjsa, kxah naa kiwete maa nasawa Jesukristoꞌs jiyuçxa jxpaꞌgatxna txãꞌsna nwẽeseꞌjyaꞌ.
6 Açaꞌ iꞌkweꞌsxwa Jesukristoꞌs jiyuçxa neꞌkwe jxpaꞌga, Dxusaꞌ petx iꞌkweꞌsxneꞌ txhitxh Jesukristo tasxte paꞌjwaꞌjsa txãa paꞌga nwẽeseꞌjna ũsiꞌkwe.
7 Ãçxhaꞌ Roma çxhabteweꞌsx iꞌkweꞌsx jxukaysa jĩi naa kartaꞌs fxiꞌjçxa kajaçthu, iꞌkweꞌsxaꞌ Dxus peeygãhçxa txhitxnisaiꞌkwe txãa yakh fxiꞌzesa. Iꞌkweꞌsxtxiꞌ Dxusaꞌ puꞌçxhina vxiteꞌ kweꞌsxtxi jxpeꞌjsa Jesukristo, txãa paꞌga Dxus yakhçxáa mfxiꞌzewe.
Roma çxhabna Pablo uꞌj wẽeni
8 Jesukristo iꞌkweꞌsxtxi puꞌçxpaꞌga Dxus yakh iꞌkweꞌsx ew fxiꞌzeniꞌs mteewa jxukatx ew weꞌweꞌ, txãa paꞌga adxaꞌ Dxusaꞌsthu weçxáꞌ.
9 Saꞌ naꞌwẽ Dxusaꞌs nakwe wala selpiꞌth txajx Nçxiꞌk kaapiyaꞌjniꞌs ũusuh jxuka yajkxna txãa Dxusaꞌ jiiaꞌ adxaꞌ iꞌkweꞌsx paꞌgate bagaçxtewa txãa yakh puutx weꞌwena nes yuusaatewa.
10 Txãasath iꞌkweꞌsx tasxna yuhwaçaꞌ sũhçxa Dxus yakh puutx weꞌwena nes yuꞌ.
11 Saꞌ kxtee paꞌjçxaꞌ Dxus yakh fxiꞌzewaꞌjaꞌs iꞌkweꞌsxtxi puꞌçxhiꞌnja sũjuꞌth, jweeíiçxáa çxhãçxha fxiꞌzekahn.
12 Saꞌ puutx kxteeçxah yaꞌpuꞌçxna Dxus yakh çxhãçxha fxiꞌzewaꞌjaꞌs jiꞌphuꞌnjaꞌw, txãa paꞌgatey iꞌkweꞌsxwa Dxusaꞌs yaakxsa iꞌkwe adx naꞌwẽy.
13 Yakhthẽꞌjweꞌsxtxi ptaꞌsxiꞌth: iꞌkweꞌsx yakh puutx uyyaꞌ yuweꞌnja sũhna maz uswa yajkxçxawa, ãçxpkaçx yujxaꞌ yuꞌ tudunimeeth. Iꞌkweꞌsx ksxavxysu Dxus luuçx yuuwaꞌjsa ũstxna txãatx Dxus jĩi knayyaꞌ yuweꞌnja sũjuꞌth, maꞌwẽtka vxite kiwesuwa Dxus jĩi knay txãꞌwẽy.
14 Adxaꞌ maa nasatxwa jxuka Kristo yuweꞌs ptaꞌsxwaꞌj jiꞌpthu, çxhabteweꞌsx maꞌtx yuu, fxiy weꞌwesa maꞌtx yuu, naa kiwete wala jiisa maꞌtx yuu meeçxaꞌ jiimeesa maꞌtx yuu nawa maꞌwẽsatxwa jxuka ptaꞌsxwaꞌj jiꞌpthu.
15 Txãasa adxaꞌ Kristo yuwe ewte nvxiitwaꞌjsaꞌs ptaꞌsxyaꞌ yuweꞌnja sũhnaçxáa ũsthu Roma çxhabte iꞌkweꞌsxtxiwa.
Kristoꞌ maatxwa jxuka nweꞌwewaꞌjsaꞌ
16 Adxaꞌ Kristo yuwe ewte nvxiitwaꞌjsaꞌs ptaꞌsxyaꞌ weh yuhwa thaameꞌçmeeth, txãa paꞌgatey Kristoꞌ Dxus kaahnisaꞌ maatxwa nweꞌweyaꞌ ãjawaꞌjsa txãꞌsna ũuste jxpaꞌgasa yuutxiꞌ, judiu maꞌtx yuu judiumeesa maꞌtx yuu nawa maa nasatxwa jxuka nweꞌwewaꞌjsaꞌ.
17 Açaꞌ nweꞌwenisa yuuyaꞌ, Kristoꞌs ũusuh jxuka yajkxçxa jxpaꞌgate yuuçxáak Dxus dxiꞌpte yuuwemée ewsa yuuna yaꞌpaꞌjaꞌ. Txãꞌwẽ yuuwaꞌjaꞌs Dxus librute vxite ajkhẽwa naꞌjĩnak ptaꞌsxiꞌ: Dxusaꞌs ũusuh jxuka yajkxte yuuçxáa Dxus yakh fxiꞌzewaꞌjaꞌs yaꞌjiꞌphuna jĩꞌk.
Naa kiwete nasaꞌ yuuwesataꞌ
18 Dxus kastigo seenaꞌsa cieluju yujaꞌ nasa ewmeesa jxukaysaweꞌsx jĩi, txãaweꞌsxaꞌ ewmeete yuuçxáa fxiꞌzena isasa yuꞌsaꞌ yupna ũstaꞌ naa paꞌga.
19 1:19-20 Txãa enteꞌ Dxus maꞌwẽsatewa jiimeethaꞌw yuꞌ jĩyaꞌ ãjameetxna, txãa paꞌgatey Dxus maꞌwẽsatewa kaajiyuꞌjsa ũstaꞌ Dxus pheuꞌjçxa nvxiitnisa txãatx kaajiyuꞌjuꞌ. Txãa paꞌgak naa kiweꞌs pheuꞌjçxa nvxiitnijũꞌ ew yaꞌjiyuꞌ Dxusaꞌ kĩhtewa jxuka ãjawaꞌjsa bagaçxtewa nes yuuwaꞌjsatewa. Açaꞌ txãa maꞌwẽsaçxawa kaajiyuꞌjnku txãꞌwẽ pheuꞌjçxa nvxiht.
20 —
21 Txãꞌwẽ Dxusaꞌ ũsyuhna sũhwaꞌj yuꞌsaꞌ jiꞌphuçxawa, isate yuꞌ Dxusaꞌs weçxana nwẽeseꞌjmée, naa kiwete kĩh yuhwa seelpimeesaçxáꞌstxi pakwena jxãꞌj. Açaꞌ txãꞌwẽ yũupaꞌga txãaweꞌsx ũusaꞌ naa kiwete ewmeesa yuuçxáꞌsku yaakxwaꞌjsa neeyũu.
22 Txãaweꞌsx yuꞌ jiithaꞌw jĩꞌtx, nawa jiimeesatx yuuna paꞌj.
23 Txãꞌwẽ Dxus bagaçxte yuhwa pçuwaꞌjsamée kĩhtewa jxuka ãjawaꞌjsaꞌ txãꞌsna neeweꞌwepkaçxte, naa kiwete pçuwaꞌjsa nasa naꞌwẽ piisaçxatx neeweꞌwena ũsuꞌ. Saꞌ txãꞌwẽçxáa yũumée, fxuusá, yuꞌkh eçx txãꞌwẽsa naꞌwẽ vxitçxatx neeweꞌwena ũsuꞌ.
24 Txãꞌwẽ yũupaꞌga Dxusaꞌ txãaweꞌsxtxiꞌ puꞌçxmée nvxihtku, peekx ewmée kazx yaakxniçxáꞌs kxtey yuuna fxiꞌzekahn, kxahtx kĩhwa thaampaꞌsaçxáꞌs puutx yaꞌewmée yũuna fxiꞌzeꞌ teeçxsa naꞌwẽçxah.
25 Txãaweꞌsxaꞌ isa Dxus ĩtxisa yuꞌsaꞌ jxpaꞌgayaꞌ waꞌlçxa, Dxusmeeçxáꞌstxi jxpaꞌga. Txãasatx wejxwa Dxus kĩhnawa jxuka pheuꞌjçxa nvxiit-saꞌsíi neeweꞌwepkaçxte, naa kiwete Dxus pheuꞌjçxa nvxiitnisaçxáꞌstxi neeweꞌwena fxiꞌzeꞌ. Txãꞌwẽ Dxus bagaçxtewa pçuwaꞌjmeesaꞌs neeweꞌwewaç, wejx thaakwe ewsaꞌ, nawa txãꞌwẽ yũumeetaꞌ.
26 Txãa paꞌga Dxusaꞌ puꞌçxmée nvxihtku, txãaweꞌsx ewmée kazx yaakxniçxáꞌs kxtey yuuna fxiꞌzekahn. Açaꞌ uꞌy pweꞌsxtxi pkal yuuna fxiꞌzeꞌ, txãaweꞌsx kakweꞌsíiçxáa suwwaꞌjsana pakwena.
27 Txãꞌwẽy piçthẽꞌjweꞌsxwa nyu yakh zhiçxkwe fxiꞌzeni yuꞌsaꞌ nvxihtçxa, puutx piçthẽꞌj pweꞌsxtxi pkal thaampaꞌsaçxáꞌs kxtey yuuna fxiꞌzeꞌ, peekx kakwe kazx yaakxniçxáꞌs nwẽeseꞌjna. Txãꞌwẽ yũuçxa peekx kakwejũjxçxáa yaꞌkastigãywaꞌjaꞌs uyuꞌtx.
28 Txãꞌwẽ Dxusaꞌs nwẽeseꞌjyaꞌ waꞌlyãꞌtheꞌ, Dxusaꞌ puꞌçxmée nvxihtku, txãaweꞌsx kazx yaakxniçxáꞌs nwẽeseꞌjçxa peekx maꞌwẽwa ewmée yũuna fxiꞌzekahn.
29 Txãa paꞌgatx ewmeesa yuuçxáa yuuna paꞌj: pthãawesa, pkal yuunisa, ewsaꞌs jiiçxawa ewmeeçxáa yũusáa, Dxus yuꞌs yajkxmée jiꞌphu wẽeniçxáꞌs yaakxsa, kĩhwa ewmeeçxáa yũusáa, vxitetx açeyaakxsa, nasa ikhsa, puii kiissa, ĩsxiisa, ewsa yuꞌsaꞌ weeçxsa, ĩsxiiçxa kaapuiꞌjsa, txãꞌwẽçxáa yũusaataꞌ.
30 Vxitetx ewmée nuyweꞌwesa, Dxusna açesa, puutx yaꞌwẽesxusá, peekíiçxáa iiwejçx yaakxsa, vxitee dxiꞌpte iiwejçx weꞌwesa, ewmée yũuwaꞌj uꞌsesa pakwena fxiꞌzesa, neyweꞌsxtxi nwẽeseꞌjsamée,
31 ewsaꞌs jiyuyaꞌ waꞌlsa, puutx weꞌweniꞌs kxtey yuusamée, kim yuhnawa peeygãasamée, bagaçxte yuhwa yuwe ewuusamée, kim yuhnawa puꞌçxsamée.
32 Txãaweꞌsxaꞌ wala ew jiitaꞌ txãꞌwẽ ewmée yũupaꞌga Dxus kastigote uuwaꞌjaꞌs. Txãꞌwẽ ew jiiçxawa, ewmeesa yuuçxáanatx kxtey yuuna fxiꞌzeꞌ. Saꞌ ũus yuhwa jiꞌphmeesa yãꞌthaꞌ, txãasatx vxitesa ewmée yũuçte uyçxaꞌ, wejxwa kçxhãaçxhaꞌjna fxiꞌzeꞌ.
