Romanos 10:1-21
10 Yakhthẽꞌjweꞌsxtxi isath weꞌweꞌ: Israelweꞌsx ewte neeyũuwaçaꞌ sũhçxath ũusuh jxuka Dxus yakh puutx weꞌweꞌ.
2 Adxaꞌ jiith Israelweꞌsxaꞌ wala yuh Dxusaꞌs pakwena paꞌpçxuna fxiꞌzeꞌtx, nawa maꞌwẽ Dxusaꞌs pakwewaꞌjaꞌswa ew yuꞌ jiimeetaꞌ.
3 Txãꞌwẽ ew yuꞌ jiimeeçxaíitx yuuwemée ewsa yuuyaꞌ sũhçxa txãaweꞌsxtxi maꞌwẽneꞌ ew theguꞌ txãꞌsçxáanatx kxtey yuu wẽjeꞌ, Dxusna maꞌwẽ pakwewaꞌjaꞌswa Dxusíi ptaꞌsxna nvxihtku txãa yuꞌsaꞌ kxtey yuumée.
4 Txãꞌwẽ Moises ley jxkaahwaꞌj en skhẽwnijũꞌ Kristo jxkaahwaꞌjsaꞌ, yuuwemée ewsa vxit-yaꞌ ãjawaꞌjsa txãꞌsna jxpaꞌgasa yuutxiꞌs. Nawa txãꞌsna pakwemée leyaꞌsçxáa kxtey yuu wẽeteꞌ, yuuwemeesa yaꞌyuꞌçmeꞌ.
5 Txajíik ley jxkaahniꞌs nwẽeseꞌjçxa yuuwemée ewsa yuꞌnja sũhna yaakxsatxiꞌs Moisesaꞌ naꞌjĩna fxiꞌj: Maawa ley jxkaahniꞌs jxuka kxtey yuusaꞌ een isa ew fxiꞌzewaꞌjçxáꞌs jiꞌphutxna jĩꞌk.
6 Nawa yuuwemée ewsa yuuna paꞌjyaꞌ yuꞌ, Kristoꞌs ũusuh jxuka yaakxwaꞌjaꞌs Dxus librute naꞌwẽk ptaꞌsxiꞌ: Kristoꞌ kĩjxãꞌkh açaꞌ cielun peꞌjyaꞌ uꞌjwaꞌjaꞌs yaakxwaꞌjmeꞌ.
7 Saꞌ txãꞌwẽy Kristoꞌ ĩtxi yuuyãꞌkh açaꞌ pedaniikhẽwa peꞌjyaꞌ uꞌjwaꞌjaꞌs yaakxwaꞌjmeꞌ.
8 Txãꞌwẽ thẽysaꞌs yaakxkahmeníi, Dxus yuwe ewsaꞌ iidx yuwete ih ũsaꞌ, thẽymée ũuste khẽeyaꞌ jĩꞌk. Dxus yuwe iidx yuwete ih ũsaꞌ jĩꞌk txãꞌsna thẽymée jxpaꞌgawaꞌjaꞌsthaꞌw ptaꞌsxiꞌ.
9 Açaꞌ naꞌwẽçxáa myũu: Dxus Nçxiꞌk Jesukristo uutewa Dxusíi kiꞌ ĩtxi vxitku sũhwaꞌjaꞌs jiꞌphuçxa Kristo yuuçxáꞌs nwẽeseꞌjyaꞌ jxpaꞌgawaꞌjaꞌ. Txãꞌwẽ yuuçxaꞌ ewte neeyũuneꞌga.
10 Txãꞌwẽ ewte neeyũuyaꞌ, Jesukristoꞌs ũusuh jxuka yajkxçxa jxpaꞌgawaꞌjaꞌ, saꞌ ãatewa tuutheꞌjwaꞌjaꞌ.
11 Kristoꞌs ũuste jxpaꞌgasatxiꞌs Dxus librute naꞌwẽk weꞌweꞌ: Txãꞌsaꞌ ũuste jxpaꞌgasaꞌ maa yuhwa nxuste neeyũumeetxna jĩꞌk.
12 Saꞌ judiu jiꞌj vxiteꞌ judiu jiꞌjmeesawa txãa naꞌwẽçxaçxáa yuuwemée ewte neeyũuwaꞌjsataꞌ, txãa paꞌgatey Jesukristoꞌ jxukaysatx nweꞌwewaꞌjsaꞌ. Açaꞌ txãꞌsna neeweꞌwesa yuutxiꞌsaꞌ maatxwa jxukaysatx puꞌçxwaꞌjsaꞌ.
13 Txajíik Dxus librute naꞌwẽ weꞌweꞌ: Maawa jxukaysa ũusuh yuuçxáa jxuka yajkxna Dxusaꞌs neeweꞌwesaꞌ, yuuwemée ewte neeyũutxna jĩꞌk.
14 Nawa ¿maꞌwẽ neeweꞌweyaꞌ ãjatxki, txãꞌsaꞌ ũuste jiꞌphmeeçxaꞌ? Saꞌ ¿maꞌwẽ ũuste jxpaꞌgayaꞌ ãjatxki, txãꞌ nweꞌwesaꞌ jĩna ptaꞌsxniꞌs iiwẽseꞌjmeeçxaꞌ? Saꞌ ¿maꞌwẽ wẽseꞌjyaꞌ ãjatxki, kimwa txãa yuweꞌs ptaꞌsxmeeteꞌ?
15 Saꞌ ¿maꞌwẽ txãa yuweꞌs ptaꞌsxyaꞌ ãjatxki, kimwa kaahmeeteꞌ? Txãa yuweꞌs ptaꞌsxsatx weꞌweçxaꞌ, Dxus librute naꞌjĩꞌk: Yuwe ewsaꞌs ptaꞌsxna paꞌjniꞌ wala yuh ewsaꞌ, txãa paꞌgatey weçxana fxiꞌzewaꞌjaꞌstxi ptaꞌsxiꞌ jĩꞌk.
16 Txãꞌwẽtewa, jxukay yuꞌ jxpaꞌgaꞌçmeetaꞌ ewte neeyũuwaꞌjaꞌs ptaꞌsxtewa. Txajíik Isaiaswa naꞌwẽ weꞌwe: Kweꞌsx ptaꞌsxni Dxus yuweꞌs ¿kimçxáꞌ nwẽeseꞌjçxa kxtey yuutaꞌ? jĩꞌk.
17 Txãꞌwẽ Dxus yuwe ptaꞌsxniꞌs ew jiyunijũk ũusuh jxuka jxpaꞌgawaꞌj kasejeꞌ, açaꞌ txãa ptaꞌsxnisa yuꞌ Kristoꞌsku weꞌweꞌ.
18 Txãꞌwẽ ptaꞌsxtewa meeçxaꞌ ¿wẽseꞌjmeewáꞌntakx? Pejka wẽseꞌjyuh neꞌta, txajíik Dxus librutewa naꞌjĩna weꞌweꞌ:
Txãaweꞌsx ptaꞌsxniꞌs jxuka yaꞌwẽseꞌkh.
Naa kiwete mtee mteewa jxuka paꞌkh jĩꞌk.
19 Makwe txãꞌwẽ yuutewa, Israelweꞌsx yuꞌ ¿jiyumeewáꞌntakx? Txãaweꞌsxaꞌ jiyuyuhneꞌta, nawa jxpaꞌgameetaꞌ. Txãaweꞌsxwa jiyumée yuꞌ neeyũumeeneꞌta. Txajíik Moisesaꞌ Dxus weꞌweniꞌs naꞌwẽ ptaꞌsxiꞌ:
Adxaꞌ vxite nasatx ew yũuçxa iꞌkweꞌsxtxi kuh kaayakiꞌjiꞌnja,
Açaꞌ ũusçxawaꞌjaꞌs uyuuneꞌkwe, nasa Dxusaꞌs jiimeesa ũstaꞌ txãaweꞌsxtxi adx luuçx vxitpaꞌga jĩꞌk.
20 Isaiaswa Dxus weꞌweniꞌs naꞌwẽk ãate ptaꞌsxiꞌ:
Adxaꞌs pakwena paꞌpçxumeeçxawa, uytxi.
Açaꞌ adxaꞌ ãate vxyaath paapẽjxna adxna pakwemeetewa jĩꞌk.
21 Nawa Israelweꞌsxtxi weꞌweçxaꞌ naꞌjĩꞌk Dxus librute:
Adxaꞌ paꞌyana nesthu yuꞌ nasa waꞌlsatx jĩꞌk.
