Romanos 11:1-36
11 Txãꞌwẽ paꞌyatewa pasmeeyãꞌtheꞌ, Dxusaꞌ txajx txhitxhnisa Israelweꞌsxtxiꞌ ¿ahçemaꞌk? sũjuꞌth. Nawa weh yuhwa txãꞌwẽ yuumeꞌ. Txãꞌwẽ ahçemeeçxaíik adxaꞌ Israel nasa, Abrahan jiꞌj, Benjamin nçxiꞌkteweꞌsxthu nawa nweꞌwe.
2 Dxusaꞌ Israelweꞌsxtxi nyafxiitey txhitxhçxa, ãçxpkaçx ahçemée iipeꞌjaꞌ. Iꞌkweꞌsxaꞌ jiineꞌkwe Dxus yuwe ptaꞌsxsa Elias Dxus yakh puutx weꞌweniꞌs.
3 Kxteꞌ naꞌjĩꞌk: Iidx yuwee ptaꞌsxsatxiꞌs ikhtxi saꞌ iidx altalnawa jxuka ivxiitutx, naasáa adx yuuçxáath neeyũu. Nawa adxnawa ikh wẽjeꞌíiçxáatx jĩteꞌ,
4 Dxus pasçxaꞌ: Dxus ĩtximeesa Baal tasxte peejxũkwesamée siete mil nasa txhitxhçxa jiꞌpthu adx jĩi, açaꞌ adxçxáath neeyũu sũhwaꞌj jiꞌphmeeg jĩk.
5 Naa ensuwa txãꞌwẽyçxáa Israelweꞌsx maaíi yuꞌ Dxus txhitxhnisa ũstaꞌ txajx peeygãanisa.
6 Dxusaꞌ peeygãhçxa txhitxhku. Nawa ew yũuna fxiꞌzepaꞌga txãꞌwẽ txhitxhmeꞌ, naasáa peeygãhçxa yuuçxáak ewmeesatewa txhitxh. Açaꞌ ew yũuna fxiꞌzepaꞌgaçxáa Dxusaꞌ txhitxhwaçaꞌ, Dxusaꞌ peeygãhçxak txhitxh jĩyaꞌ ãjameꞌnjaꞌw.
7 Israelweꞌsxaꞌ ewte neeyũuwaꞌjaꞌs pakweçxawa txazíi yuꞌ uymeetaꞌ, vxite yuꞌ Dxus weꞌweniꞌs nwẽeseꞌjmeetaꞌ naa paꞌga. Naasáa Dxus txhitxhnisa maaíiçxáatx ewte neeyũuwaꞌjaꞌs uy.
8 Açaꞌ txãꞌwẽ nwẽeseꞌjwaꞌjmeeaꞌs weꞌweçxak Dxus librute naꞌjĩꞌ:
Dxusaꞌ txãaweꞌsxtxiꞌ jiyuwaꞌjmeesak vxit.
Açaꞌ yafx jiꞌphçxawa uysamée naꞌwẽçxáataꞌ, saꞌ thũꞌwẽ jiꞌphçxawa wẽseꞌjsamée naꞌwẽçxáatx neeyũu.
Ãçxpkaçx txãꞌwẽçxaçxáataꞌ jĩꞌk.
9 Txajíik jxkaahsa Davxidwa naꞌwẽ weꞌwe:
Txãaweꞌsx weçxana fxiꞌzeniꞌ ewméeçxáa kasehwaçaꞌ ewna,
kastigãyni yuukahn.
10 Txãaweꞌsx yafxaꞌ peekx suweetxna, uyyaꞌ ãjakahmén.
Txãaweꞌsxaꞌ bagaçxte yuhwa ew fxiꞌzeyaꞌ ãjameewaçaꞌ ewna jĩk.
Judiu jiꞌjmeesawa Dxus peeygãanisa
11 Judiuweꞌsxaꞌ jxpubaçxa weteyãꞌjçxaꞌ, ¿peena yuꞌ Dxus tasxte sxawedwaꞌjsameetxmanx? Weh yuhwa txãꞌwẽ yuuwaꞌjsameetaꞌ. Txãꞌwẽ judiuweꞌsx waꞌlpaꞌga, judiu jiꞌjmée vxite nasatxku ewte neeyũuwaꞌjaꞌs ptaꞌsxni yuu, açaꞌ vxite nasa Dxus yakh fxiꞌzeçte uyçxaꞌ, judiuweꞌsxwa kiꞌ sxawedxaꞌ yaakxkahn.
12 Judiuweꞌsxaꞌ ewte neeyũuwaꞌjaꞌs jxpaꞌgayaꞌ waꞌlpaꞌga, naa kiwete judiu jiꞌjmée vxite nasa jxukaysatxku selpí, txãasa judiuweꞌsx jxukaysa Dxus tasxte kiꞌ sxawednijũꞌ wejx wala selpiina.
13 Ãçxhaꞌ judiu jiꞌjmée vxite nasa jĩnisa iꞌkweꞌsxtxi weꞌweyaꞌwath, txãa paꞌgatey adxaꞌ judiu jiꞌjmée vxite nasatx Dxus yuweꞌs ptaꞌsxyaꞌ kaahnisath, txãasa kxtey yuuyaꞌwath.
14 Txãꞌwẽ yũuteꞌ, iꞌkweꞌsx ewte fxiꞌzeniꞌs adx jiꞌj maaíi yuꞌ uyçxaꞌ, iꞌkweꞌsx naꞌwẽy ewte fxiꞌzewaꞌjaꞌs pakweyaꞌ yaakiwáatxna sũjuꞌth.
15 Judiuweꞌsx eꞌskhẽ nvxiitni yuupaꞌga judiu jiꞌjmée vxite nasatx Dxus yakh weçxana fxiꞌzewaꞌjaꞌs jiꞌphu. Txãasa judiuweꞌsxaꞌ Dxus tasxte kiꞌ sxawedna paꞌjçxaꞌ, uuniijũ kiꞌ ĩtxi yuusáa naꞌwẽsa yuutxna.
16 Ũꞌtasx kĩhwa nyafxteweꞌsxaꞌs Dxus jĩi peesteꞌ, neeyũusáawa jxukak Dxus bedekĩyni yuꞌ. Fxtũu tasxaꞌ Dxus jĩiteꞌ, kuꞌtawa jxuka Dxus jĩiçxaçxáataꞌ.
17 Judiuweꞌsx maaíi yuꞌ uuhnisa oliwo fxtũu kuꞌtaꞌs spẽꞌthni naꞌwẽtx yuu. Açaꞌ txãa spẽꞌthnite yuꞌ uuhnimeesa oliwo kuꞌtaꞌs pũpxçxa kayweçeꞌjnisa naꞌwẽ iꞌkwe yuu, iꞌkweꞌsx judiu jiꞌjmée vxite nasaçxawa. Txãasa iꞌkwe txãa fxtũu tasx naꞌwẽy ewsa yuuna paꞌj, oliwo fxtũu tasx ĩtxisate kayweçeꞌjni yuupaꞌga.
18 Nawa txãa kuꞌta spẽꞌthnisate jxthaakwe ewsath sũhna yuꞌ yaakxnu. Mpaꞌyajkx, txãꞌwẽmeꞌ kuꞌta pũpxnisa txãꞌwẽ fxtũu tasx ĩtxi yuuwaꞌjaꞌs ũsuꞌçmeꞌ; fxtũu tasx kiwete iiwehçesak kuꞌta pũpxnisaꞌs ĩtxi yuuwaꞌjaꞌs ũsuꞌ.
19 Txãꞌwẽtewa, naa sũjuwáꞌga: Txãa fxtũu kuꞌta spẽꞌthnite kayweçeꞌjyaꞌ adxaꞌs peejxneꞌta yuꞌ, txãasaneꞌta kuꞌta dxih yuꞌsaꞌ spẽꞌth sũjuneꞌga.
20 Nawa idxaꞌs kxtee kayweçeꞌjyaꞌ sũhçxa spẽꞌthni yuumeetaꞌ. Txãaweꞌsxaꞌ Kristoꞌs jxpaꞌgayaꞌ waꞌltxi txãa paꞌga yuuçxáatx spẽꞌthni yuu. Naapkaçxhaꞌ idxaꞌ Kristoꞌs waꞌlmeeg jxpaꞌga, txãa paꞌga yuuçxáag txãaweꞌsx ũsnite yuꞌ idx paꞌjyaꞌ ãja. Txãa paꞌga iiwejçx yajkxmée, wala jxpaꞌyakx mfxiꞌze.
21 Txãꞌwẽmeꞌ, Dxusaꞌ judiu txajx txhitxhnisa yuhtxwa thẽyméek kutxiꞌj naꞌ idxaꞌs yuꞌ wejx txãꞌwẽ thẽymée kutxiꞌjina jxpaꞌyakxmeeteꞌ.
22 Ũus miiyajkx: Dxusaꞌ wala yuh peeygãasaꞌ. Nawa juunaꞌyaꞌwa txãꞌwẽyçxáꞌ. Nwẽeseꞌjsamée yakh yuꞌ, wala yuh juunaꞌsaꞌ. Nawa idx yakh yuꞌ wala yuh peeygãasaꞌ. Txãꞌwẽyãꞌtheꞌ, txajx peeygãanijũ txutemée mfxiꞌze. Txãꞌwẽ yuumeeçxaꞌ, idxwa kutxiꞌjnisa yuuneꞌga.
23 Nawa judiuweꞌsxaꞌ Dxusaꞌs kiꞌ pakweçxa yuꞌ, Dxus tasxtey thẽymée kiꞌ paꞌjyaꞌ ãjatxna, txãa paꞌgatey Dxusaꞌ thẽymée jxpaꞌgawaꞌjsaꞌ.
24 Txãꞌwẽ idxaꞌ judiu jiꞌjmée vxite nasag yuꞌ naꞌs yuhwa thẽyméek ewsate yuutxa. Naapkaçxhaꞌ judiuweꞌsx yuꞌ Dxus txhitxhnisatx yuꞌ, açaꞌ txãaweꞌsxtxiꞌ wejx thẽymée kiꞌ jxpaꞌgana.
Israelweꞌsx Dxus tasxte jxuka sxawedni
25 Yakhthẽꞌjweꞌsx, Dxus maꞌwẽ yũuyaꞌwaçxawa txãa yuuçxáak jii yuꞌ txãꞌsna mjiyuwe ãçxhaꞌ iiwejçx yajkxna fxiꞌzeyaꞌmée: Judiuweꞌsx maaíi yuꞌ txãꞌwẽ yuh Dxusaꞌs nwẽeseꞌjmeeçxa txuteetx. Nawa judiu jiꞌjmée vxite nasa maazkuẽesa Dxus tasxte paꞌjwaꞌjsa ũstxna txãa jxuka ãhpkaçxçxáatx judiuweꞌsxaꞌ Dxus tasxu txutee.
26 Saꞌ vxite nasa jxuka Dxus tasxte paꞌjna jxãꞌjaçpkaçxhaꞌ, judiuweꞌsxaꞌ kiꞌ jxukay nweꞌwenisa yuutxna. Txãꞌwẽ yũuwaꞌjaꞌs Dxus librute naꞌwẽk ptaꞌsxiꞌ:
Nweꞌwesaꞌ Jerusalen çxhabu paꞌjçxaꞌ,
Jakobweꞌsx ewmée yũuniꞌs txudena.
27 Txãꞌwẽ ewmée yũuniꞌs txuhdeyaꞌth puutx weꞌwe txãaweꞌsx yakh jĩꞌk.
28 Txãꞌwẽ iꞌkweꞌsx ewte neeyũuwaꞌjaꞌs jiꞌphukahnçxáatx judiuweꞌsxaꞌ Dxusaꞌs açesa yuu. Nawa Dxusaꞌ txãaweꞌsx yuutxiꞌ açeꞌçmeꞌ, txãa paꞌgatey judiuweꞌsxaꞌ nyafxiitey Dxus txhitxhnisatx yuꞌ naa paꞌga.
29 Txãa paꞌgatey Dxusaꞌ ũsyãꞌjçxaꞌ, kusaꞌjaꞌçmeꞌ, saꞌ paꞌyayãꞌjçxaꞌ, waꞌluꞌçmeꞌ.
30 Nyafxiiaꞌ iꞌkweꞌsxaꞌ Dxusaꞌs jiimeeçxa nwẽeseꞌjsamée iꞌkwe yuꞌ. Nawa ãçxhaꞌ judiuweꞌsx nwẽeseꞌjeçmeete yuꞌ, iꞌkweꞌsxaꞌ Dxus peeygãanisa iꞌkwe yuu.
31 Nyafxíiaꞌ iꞌkweꞌsxwa maꞌwẽkwe nwẽeseꞌjsamée yuꞌ, txãꞌwẽy judiuweꞌsxwa ãçxhaꞌ nwẽeseꞌjmée ũstaꞌ. Nawa iꞌkweꞌsxwa maꞌwẽkwe Dxus peeygãaniꞌs jxpaꞌga, txãꞌwẽy jxpaꞌgayaꞌ íiçxáa txãꞌwẽ nwẽeseꞌjmée ũstaꞌ.
32 Txãꞌwẽ teeçxsaçxáa thaakwe ewsath saꞌ thaakwe peeygãanisath sũjkahmenku eꞌzíitx jaꞌdaçxah nwẽeseꞌjwaꞌjmeete vxit txãa naꞌwẽçxaçxáa peeygãjxaꞌ.
33 Dxusaꞌ maꞌwẽ yũuwaꞌjaꞌswa seenaꞌ yuh zhiçxkwe ew pheuꞌjçxa jiꞌphuneꞌ txãꞌsna yajkxteꞌ, leꞌçxkweçxáa yuhwa yaꞌjiyuꞌçmeꞌ, saꞌ ptaꞌsxyaꞌwa yaꞌãjaꞌçmeꞌ.
34 Dxus ũus yaakxniꞌs ¿kimçxáꞌ jiyusa ũstxmanx? ¿Kimçxáꞌ Dxusaꞌs kaapiyaꞌjsa ũstxmanx?
35 Kĩjkĩhwa jxuka Dxus jĩiçxaçxáataꞌ txajx nvxiitnisa, açaꞌ ¿kimçxáꞌ adx jĩꞌsthu Dxusaꞌs pees jĩwaꞌjsa ũstxmanx?
36 Txãasa Dxusaꞌ seenaꞌ yuh wala ewsaꞌ bagaçxtewa nes yuuwaꞌjsa. Txãꞌsaꞌ seenaꞌ yuh wala weçxawaꞌj jiꞌpthaꞌw.
