Romanos 13:1-14
13 Naa kiwete jxkaahsaweꞌsx maꞌwẽsatxwa jxuka nwẽeseꞌjna mfxiꞌzewe. Txãaweꞌsxaꞌ jxuka Dxus nvxiitnisaçxaçxáataꞌ. Maa yuhwa Dxus nvxiitnimeesa yuꞌ meetaꞌ.
2 Açaꞌ maawa jxkaahsaweꞌsxtxi açesaꞌ Dxus nvxiitnisatx açesa yuuna. Txãꞌwẽ açesaꞌ yuuwesa kastigãywaꞌj yuuna.
3 Jxkaahsa ũstaꞌ txãaweꞌsxaꞌ ew yũuna fxiꞌzesatxiꞌ kastigãywaꞌjsameetaꞌ. Txãaweꞌsxaꞌ ewmée yũuna fxiꞌzesaçxáatx kastigãywaꞌjsataꞌ. Açaꞌ jxkaahsaweꞌsxtxi ũukhmée fxiꞌze wẽeçxaꞌ, txãaweꞌsx yuꞌkxpehnitx jxuka nwẽeseꞌjna mfxiꞌzewe. Txãꞌwẽ yũusatxiꞌ nweꞌwewaꞌjsataꞌ.
4 Txãa paꞌgatey jxkaahsaweꞌsxaꞌ Dxus nvxiitnisataꞌ, idxna puꞌçxwaꞌjsa. Nawa idxaꞌ ewmée yũuna fxiꞌzeçxaꞌ, ũukhwaꞌj jiꞌphuneꞌga, txãa paꞌgatey jxkaahsaweꞌsxaꞌ peekxçxáa ũsmeetaꞌ, txãaweꞌsxaꞌ Dxus nvxiitnisataꞌ. Txãa paꞌga ley maꞌwẽ jxkaatheꞌ, kxtey yuutxna ewmée yũusaꞌs kastigãyna.
5 Txãa paꞌga jxkaahsaweꞌsxtxi nwẽeseꞌjwaꞌjaꞌ, nawa kastigoꞌs ũukhçxaçxáa nwẽeseꞌjmée, wejxwa Dxus jxkaahniꞌs kxtey yuuçthu sũhna nwẽeseꞌjwaꞌjaꞌ.
6 Txãaweꞌsxaꞌ Dxus nvxiitnisayãꞌjçxaꞌ, txãaweꞌsx thegwaꞌj yuꞌsaꞌ kĩhnawa jxukatx kxtey yuuna fxiꞌzeꞌ. Txãa paꞌga txãaweꞌsxtxi dukhwaꞌj vxyuꞌs ũswaꞌj jiꞌphiꞌkwe.
7 Kĩhçxah yuuwaꞌj jiꞌphçxawa, txãꞌsaꞌ kxtey yuuwaꞌjaꞌ: vxyuu gobierno jĩꞌs yuulçxaꞌ, txãꞌsnawa dukhwaꞌjaꞌ. Saꞌ maaçxahtx nwẽeseꞌjwaꞌj jiꞌphçxawa, txãaweꞌsxtxiꞌ nwẽeseꞌjwaꞌjaꞌ waꞌlmée.
8 Kĩh yũuwaꞌjaꞌswa jxuka kxtey yuuwaꞌjaꞌ, kĩh yuul yuhwa jiꞌphmée fxiꞌzeyaꞌ, naasáa puutx yaꞌpeeygãawaꞌjaꞌs yuuçxáa bagaçxtewa jiꞌphuna nes yuuwaꞌjaꞌ. Txãꞌwẽ puutx yaꞌpeeygãasaꞌ Dxus jxkaahni leyaꞌs kxtey yuusaaçxa txãꞌwẽ yuuna.
9 Dxus leyaꞌ naꞌwẽk jxkaajaꞌ: Ptamsayãꞌjaꞌ vxite yakh kazx pkal yuuwaꞌjmeꞌ. Nasa ikhwaꞌjmeꞌ. Pesweewaꞌjmeꞌ. Vxitetx ĩsxiina nuyweꞌwewaꞌjmeꞌ. Vxitee jĩitx kusaꞌj wẽena fxiꞌzewaꞌjmeꞌ jĩꞌk. Açaꞌ txãa jxkaahnitxiꞌ jxuka kxtey nwẽeseꞌjyaꞌ naꞌwẽ yũuwaꞌjaꞌ: Vxitetxwa mpeeygãh, idx maꞌwẽga yaꞌpeeygãjaꞌ txãꞌwẽy jĩꞌk.
10 Txãꞌwẽ puutx yaꞌpeeygãawaꞌjaꞌs jiꞌphçxaꞌ, ewmée yũuwaꞌj yuꞌsaꞌ yaꞌyajkxmeena. Naꞌjĩꞌth naꞌ: Peeygãanisaꞌs jiꞌphte yuuçxáak Dxus jxkaahni leyaꞌs kĩhte yuhwa peejxmée jxuka kxtey yaꞌyuꞌ.
11 Txãꞌwẽ peeygãawaꞌjaꞌs jxpaꞌyakxmeeneꞌkwe açaꞌ ãçxhaꞌ jweeíiçxáa utxaana uꞌjweçaꞌ kweꞌsxtxi jxukate nweꞌwewaꞌj enaꞌ, txãa paꞌga jxpaꞌyakx meswe.
12 Txãꞌwẽ yũuwaꞌj enaꞌ paꞌjyaꞌ jxthẽeyuumeena, txãa paꞌga çxhiꞌdxte fxiꞌzeniꞌs nvxihtçxa, eenaꞌte fxiꞌzewaꞌjaꞌs jxpaꞌyakxwaꞌj jiꞌpthaꞌw.
13 Naꞌwẽ yũumée: ewmée yũuwaꞌjçxáꞌs yajkxna, kazx pkal yuuna, puutx yahçena puutx puiina, beka yat-su tũuna susna txãꞌwẽ yũumée, ewçxáa yũuna zhiçxkwe fxiꞌzewaꞌj jiꞌpthaꞌw.
14 Naasáa Jesukristo maꞌwẽ jxkaatheꞌ, txãꞌs yuuçxáa jxuka nwẽeseꞌjwaꞌj jiꞌpthaꞌw, peekx ũus yaakxni ewmeesa yuꞌs nwẽeseꞌjmée.
