Romanos 14:1-23
14 Kristo kaapiyaꞌjniꞌs açxamée ew jiisa yakhthẽꞌjaꞌs waꞌlmée mpaꞌgawe, txajx jxpubanisu açeweꞌwemée.
2 Miiyajkxwe wakx vxiteyaꞌ naa sũjuꞌtx: Ũꞌnisa yuꞌsaꞌ kĩhnawa jxuka ũꞌwaꞌjaꞌ sũjuꞌtx. Naapkaçxhaꞌ Kristo kaapiyaꞌjniꞌs açxamée ew jiisaꞌ ũꞌwaꞌjaꞌs txhitxhçxa ũꞌwaꞌjaꞌ sũjuꞌtx.
3 Açaꞌ maa sũhmée kĩhnawa jxuka ũꞌsaꞌ txhitxhçxaçxáa ũꞌsaꞌs açeweꞌwewaꞌjmeꞌ. Txãꞌwẽy txhitxhçxaçxáa ũꞌsawa kuçx açeweꞌwewaꞌjmeꞌ kĩhnawa jxuka ũꞌsaꞌs. Maꞌwẽ ũꞌsaçxawa txãaweꞌsxaꞌ Dxus luuçxtaꞌ.
4 Idxaꞌ ¿kimçxaga iidx jxpeꞌjnimeetx açeweꞌweꞌ? Txãꞌ ew maꞌk yuu ewmée maꞌk yuu nawa txãꞌsaꞌ patron jxpeꞌjsa jiina, txãa paꞌgatey jxpeꞌjsaꞌ maꞌwẽ ew fxiꞌzewaꞌjaꞌswa txãa puꞌçxwaꞌjsaꞌ.
5 Vxiteyaꞌ naa sũjuꞌtx: Fxiesta en yuutxiꞌ jxuka kiꞌswaꞌjaꞌ sũjuꞌtx. Naapkaçxhaꞌ vxiteꞌ maa fxiesta yuutxiꞌ kiꞌswaꞌjmeꞌ sũjuꞌtx. Maꞌwẽ yaakxsaçxawa teeçxsa naꞌwẽçxah iꞌkweꞌsx ũuste ew ũusutheniçxáꞌs nwẽeseꞌjna mfxiꞌzewe kuçx açeweꞌwemée.
6 Txãa paꞌgatey fxiesta entxi jxuka kiꞌssawa, Dxusaꞌs weçxanak kiꞌsuꞌ, açaꞌ fxiesta entxi jxukamée kiꞌssawa Dxusaꞌs íiçxáak weçxana fxiꞌzeꞌ. Txãꞌwẽy kĩhnawa jxuka ũꞌsawa Dxusaꞌs weçxanak ũꞌweꞌ, açaꞌ kĩh iiyuutxiꞌ ũꞌsameewa Dxusaꞌs íiçxáak weçxáꞌ. Jxukay Dxusaꞌsçxaçxáatx weçxáꞌ.
7 Txãa paꞌgatey kweꞌsx ĩtxi fxiꞌzeni kweꞌsx uuwaꞌj maꞌk yuu nawa txãꞌ kweꞌsx jĩi meetaꞌ, açaꞌ peekx maꞌwẽwa yũuna fxiꞌzeꞌnja sũhwaꞌj jiꞌphmeethaꞌw.
8 Naꞌwẽ ĩtxi fxiꞌzeꞌthaꞌw txãꞌ Kristo jĩꞌ, saꞌ uumthaꞌw nawa Kristo jxthãasniçxáꞌsthaꞌw kxtey yuꞌ, txãasa ĩtxi fxiꞌzeni maꞌk yuu uu en maꞌk yuu nawa Kristo jĩiçxaçxáataꞌ.
9 Txãꞌwẽ Kristoꞌ ĩtxisaweꞌsx maꞌtx yuu uusaaweꞌsx maꞌtx yuu nawa jxukaysate namu yuuyaꞌíiçxáak uuniijũwa kiꞌ ĩtxi yuu.
10 Namuꞌ Kristoꞌ, açaꞌ idxaꞌ namumeeçxaꞌ ¿kĩjxaꞌga iidx yakhthẽꞌjaꞌs ewmeesaꞌ jĩna açeweꞌweꞌ? Dxus tasxte kuutxaꞌjni yuuwaꞌjsathaꞌw, açaꞌ Dxus yuuçxáa maꞌwẽ yuusaatewa weꞌwewaꞌj jiꞌphaꞌ.
11 Txajíi Dxus tasxte kuutxaꞌjni yuuwaꞌjaꞌs Dxus librute naꞌwẽ fxiꞌjniꞌ:
Adxaꞌ Dxus ĩtxisa isath weꞌweꞌ,
Majũweꞌsxwa jxuka adx tasxteçxaçxáa peejxũkwena paꞌjçxa,
Dxus yuh yuꞌga jĩna weçxaatxna.
12 Txãꞌwẽ yũuçxa teeçxsa naꞌwẽçxah Dxus tasxte paswaꞌj jiꞌphuꞌnjaꞌw maꞌwẽ yũusaaçxawa.
Yakhthẽꞌjaꞌs kaypubaꞌjwaꞌjmeꞌ
13 Txãa paꞌga ãçxhũyãꞌjaꞌ txãꞌwẽ ewmeeg yuꞌ jĩna puutx açeweꞌwena fxiꞌzewaꞌj jiꞌphmeethaꞌw. Txãꞌwẽ yũumée wejxwa ewçxáa yũuna mpuꞌçx, yakhthẽꞌj jxpubakahmén.
14 Adxaꞌ jiith Kristo Jesus yakh fxiꞌzesa yakhaꞌ, kĩh ũꞌyuhwa ewmeesa yuꞌ meeaꞌ. Nawa txãꞌwẽ ewmeena sũhna yaakxsa yakh yuꞌ ewmée yuhna.
15 Nawa iidx yakhthẽꞌj dxiꞌpte jxpaꞌyakxmée kĩhnawa ũꞌpaꞌgaçxáa txãa yakhthẽꞌjaꞌ jxpubawáana açaꞌ idx yuuwesa yuuneꞌga peeygãasamée. Kristo uuçxa nweꞌwenisaweꞌsxtxiꞌ idxaꞌ kaypubaꞌjnu iidx ũꞌnisa yakh.
16 Idx yakh yuꞌ ewsaçxawa, vxitesa yakh yuꞌ ewmeesa wáa yuuna açaꞌ txãꞌwẽ yũuweçxsa yuutxiꞌ wala mpaꞌyajkx.
17 Txãa paꞌgatey Dxus yakh fxiꞌzewaꞌjaꞌ ũꞌnisatx jxpaꞌyakxçxa txãꞌwẽ Dxus yakh yaꞌfxiꞌzeꞌçmeꞌ, naasáa Dxus Espiritu puꞌçxte yuuçxáak Dxus yakh wẽt weçxana jxpubamée fxiꞌzewaꞌjaꞌs yaꞌjiꞌphuꞌ.
18 Txãꞌwẽ vxitetx kaypubaꞌjmée jxpaꞌyakx Kristoꞌs selpiiteꞌ Dxusaꞌ weçxaꞌk açaꞌ nasawa weçxaꞌtx txãꞌwẽ yũuteꞌ.
19 Txãꞌwẽ puutx ew yũuna puiimée fxiꞌzewaꞌjçxáꞌs pakwewaꞌj jiꞌpthaꞌw, Dxus yakh jweeíiçxáa çxhãçxha fxiꞌzewaꞌjaꞌs puutx yaꞌpuꞌçxna.
20 Ũꞌnisaꞌ jxuka ewsataꞌ. Nawa vxitesatx kaypubaꞌjwaꞌjaꞌs ũꞌteçxáa ewmeꞌ. Txãa paꞌga Dxus yakh fxiꞌzesa yakhthẽꞌjweꞌsxtxiꞌ kaypubaꞌjnu iidx ũꞌni yakh.
21 Txãꞌwẽ peekx yakhthẽꞌjaꞌs kaypubaꞌjwaꞌj yuꞌsaꞌ ũꞌnimée wejx ewaꞌ, çxiçx, vxino, kĩhwa kaypubaꞌjwaꞌj yuꞌsaꞌ jxuka.
22 Idx yakh yuꞌ kĩh ũꞌwa jxuka ewsatewa jiiçxaꞌ, iidx ũusteçxáa txãa sũhna mfxiꞌze Dxus dxiꞌpte. Ewmeena sũhwaꞌjaꞌs ũusteçxáa yuhwa yaakxsamée yakh yuꞌ, ew yujaꞌ.
23 Nawa ewmeewáana sũhna kuh jwed yajkxna ũꞌsa yakhaꞌ, ewmée yujaꞌ. Txãa paꞌgatey ewmeewáanakx sũhwaꞌjaꞌs jiꞌphçxa nwẽeseꞌjmeeteꞌ, txãa yuꞌ pkal yujaꞌ.
