Romanos 15:1-33
15 Dxus yakh çxhãçxhayãꞌj fxiꞌzesaꞌ peekxçxáa wẽt fxiꞌzewaꞌjaꞌs pakwemée, puꞌçxwaꞌj jiꞌpthaꞌw Dxus yakh fxiꞌzewaꞌjaꞌs açxamée ew jiisatx.
2 Kweꞌsxaꞌ teeçxsa naꞌwẽçxah vxite nasatx puꞌçxna wẽt kaafxiꞌzeꞌjwaꞌj jiꞌpthaꞌw ewçxáa yũuna, txãaweꞌsxaꞌ Dxus yakh jweeíiçxáa çxhãçxha fxiꞌzeyaꞌ ãjakahn.
3 Txãa paꞌgatey Kristo txakwe jxtuhthesa yuhçxawa, peekxçxáa wẽt fxiꞌzewaꞌj yuꞌsaꞌ pakwemée, wejxwa vxitetx wẽesxuniꞌs txãak jxpaꞌga. Txãꞌsna weꞌweçxak Dxus librute naꞌjĩꞌ: Idxna wẽesxuniꞌs adxthu jxpaꞌga jĩꞌk.
4 Dxus librute fxiꞌjni ũstaꞌ txãꞌ kweꞌsxtxi kçxhãaçxhaꞌjwaꞌjsataꞌ, nxuswaꞌj en maꞌwẽsa paꞌthewa nxusmée çxhãçxha yajkxna fxiꞌzeyaꞌ piyakahn.
5 Nxuswaꞌj en paꞌthewa çxhãçxha fxiꞌzewaꞌjaꞌs Dxusku ũsuꞌ naꞌ txãaíi puꞌçxhina puutx ewçxáa yũuna Kristo Jesus naꞌwẽy fxiꞌzekahn,
6 kxah kxteeçxah jxukaysa kweꞌsxtxi jxpeꞌjsa Jesukristo Tata yuuçxáꞌs tuutheꞌjeneꞌkwe.
Judiu jiꞌjmée vxite nasatx Dxus yuweꞌs ptaꞌsxni
7 Kristowa maꞌwẽga iꞌkweꞌsxtxi jxpaꞌga txãꞌwẽy iꞌkweꞌsxwa waꞌlmée mpaꞌgawe maa yakhthẽꞌjtxwa, Dxus weçxakahn.
8 Miiyajkxwe: Dxusaꞌ kweꞌsx yaçgaweꞌsx yakh puutx weꞌwek Kristo kĩiwaꞌjaꞌs, açaꞌ txãa puutx weꞌweni kxtey yuukahnku Kristoꞌ kĩh judiuweꞌsxtxi selpiiyaꞌ.
9 Saꞌ judiu jiꞌjmée vxite nasawa Dxusaꞌs jxpaꞌgaçxa weçxana tuutheꞌkhanku Kristoꞌ kĩh. Txãꞌsna weꞌweçxak Dxus librute naꞌjĩꞌ:
Txãꞌwẽ ew yũupaꞌga txãaweꞌsx ksxavxyte idxaꞌs weçxana memna tuutheꞌjeꞌnja jĩꞌk.
10 Saꞌ vxite ajkhẽwa naꞌwẽk weꞌweꞌ:
Judiu jiꞌjmée vxite nasaçxawa judiuweꞌsx yakh jaꞌdaçxah wẽtwẽt miiyajkxwe jĩꞌk.
11 Saꞌ vxite ajkhẽwa ptaꞌsxiꞌ íiçxáak:
Judiu jiꞌjmée vxite nasa jxukaysaweꞌsx Dxusaꞌs weçxana mtuutheꞌjwe,
Dxusaꞌ seenaꞌ yuh walasaꞌ jĩna nasa jxukaytxi ptaꞌsxna.
12 Txajíiçxáak Isaiaswa naꞌjĩna fxiꞌj:
Jesé jiꞌj teeçx kasejena, judiu jiꞌjmée vxite nasatx jxuka yamuyaꞌ.
Açaꞌ txãaweꞌsxaꞌ nweꞌwenisa yuutxna jĩꞌk.
13 Kweꞌsxtxi nweꞌwesa Dxusaꞌ iꞌkweꞌsx ũuste wẽtwẽt weçxana fxiꞌzewaꞌjaꞌs ũsuna txãꞌsna jxpaꞌgasatxiꞌs, kxah Dxus Espiritu puꞌçxteꞌ, Dxus nweꞌwenisathaꞌw yuu sũhna weçxana fxiꞌzeneꞌkwe.
14 Adx yakhthẽꞌjweꞌsx, adxaꞌ ew jiith iꞌkweꞌsxaꞌ ew yũuwaꞌj yuuçxáꞌs neꞌkwe ũuste jiꞌph fxiꞌzeꞌ, maꞌwẽ yũuwaꞌjaꞌswa sxiigmée. Txãasa neꞌkwe teeçxsa naꞌwẽçxah puutx ew yaꞌyuꞌkxpehna fxiꞌzeꞌ sũjuꞌth.
15 Iꞌkweꞌsxaꞌ txãꞌwẽyãꞌj sxiigmée fxiꞌzesa neꞌkwe, nawa adxwa fxii yuꞌkxpehna fxiꞌjaçthu Dxus yakh wejx ew fxiꞌzewaꞌjaꞌs kaajiyuꞌjna.
16 Txãꞌwẽ yũuwaꞌjaꞌs Dxusku adxaꞌs neeweꞌweçxa nvxiht, judiu jiꞌjmée vxite nasatx Jesukristo kaapiyaꞌjniꞌs ptaꞌsxkahn. Txãa Jesukristo kaapiyaꞌjnisaíi Dxus yuwe ewte nvxiitwaꞌjsaꞌ txãꞌsnath adxaꞌ ptaꞌsxiꞌ, judiu jiꞌjmée vxite nasaçxawa Dxus Espiritu puꞌçxteꞌ, Dxusaꞌs jiyuçxa ewte neeyũukahn.
17 Txãasath adx ũuste wẽtwẽt yaakiꞌ, Jesukristo kaapiyaꞌjniꞌs ptaꞌsxna Dxusaꞌs selpiꞌth sũhna.
18 Nawa txãꞌwẽ yũuwaꞌjaꞌs Kristok adxaꞌs puꞌçx judiu jiꞌjmée vxite nasaçxawa Dxusaꞌs nwẽeseꞌkhan, txãaweꞌsx ew jiyukahn yuwejuwa ptaꞌsxna, kim yuhwa ãjanimeesatx ãatewa kaavxyaꞌjaꞌjnik yuu Dxus Espiritu puꞌçxte.
19 Txãꞌwẽ yũunath Kristo yuwe ewte nvxiitwaꞌjsaꞌs mtee mteewa ptaꞌsxna jxãꞌj, Jerusalente takhçxa Ilíriko kiwete paꞌphkaçx.
20 Txãꞌwẽ vxite ptaꞌsxnisu yuꞌ pekũjxaꞌmeeth yajkx, wejxwa bagaçxteçxáa yuhwa Kristo yaseꞌs kxsusnimeesuth txajx yuwe ewsaꞌs ptaꞌsxyaꞌ yajkx, Dxus librute naꞌjĩꞌk txãa kxtey yuukahn:
21 Txãaweꞌsxaꞌ bagaçxteçxáa yuhwa Dxus yuweꞌs ptaꞌsxni meesaçxawa, wẽseꞌjetxna,
Saꞌ jiyutxna, bagaçxteçxáa yuhwa jiimeesaçxawa jĩꞌk.
Pablo Roma çxhabna uꞌjyaꞌ yaakxni
22 Txãꞌwẽ Dxus yuweꞌs kaapiyaꞌjna uꞌjuçxath iꞌkweꞌsx tasxna yujxaꞌ yuꞌ tuduꞌçmée, maz uswa yujxaꞌ yajkxçxawa.
23 15:23-24 Nawa ãçxhaꞌ naa jaꞌdasu pekũhna jxãꞌth naꞌ Espanxa kiwen uꞌjweççxaꞌ, iꞌkweꞌsx tasxsuwa iipaꞌj uykhẽuꞌnja txãꞌwẽ yũuwaꞌjaꞌs nyafxiith yaakxni jiꞌphuꞌ. Açaꞌ iꞌkweꞌsx yakh pkhaakhena ũsçxa Espanxa kiwen uꞌjweçteꞌ, puꞌçxhineꞌkwe sũjuꞌth.
24 —
25 Nawa ãçxhíi yuꞌ Jerusalenna uꞌjweçthu kxtee yakhthẽꞌjweꞌsxtxi kĩhçxáawa puꞌçxwaꞌj jxũna.
26 Jerusalente yakhthẽꞌjweꞌsx kĩhwa jiꞌphmeesa ũstaꞌ txãaweꞌsxtxi puꞌçxyaꞌ jĩçxa vxyuu pkhakhtxi Macedonia vxiteꞌ Akaya kiwesuweꞌsx txãꞌsna jxũna uꞌjweçthu.
27 Txãꞌwẽ puꞌçxte ewna sũhwaꞌjaꞌs jiꞌphutx, txãa paꞌgatey isa ew yajkxte yuꞌ Macedoniasuweꞌsxaꞌ yuultxi yuꞌ, txãꞌwẽ judiu jiꞌjweꞌsxaꞌ Dxus yuwe ewsaꞌs jxtxuhdetx judiu jiꞌjmée vxite nasatxwa. Txãa paꞌgatx Dxus yuwe ewsaꞌs kweꞌsxtxi ptaꞌsxpaꞌga kaꞌtuwa kaasxweduꞌjwaꞌj jiꞌpthaꞌw jĩçxa txãaweꞌsx jiꞌphunisa yakh puꞌçxyaꞌ yajkx.
28 Açaꞌ txãꞌwẽ Jerusalente paꞌjçxaꞌ pkhakhni vxyuꞌs txãaweꞌsxtxi dukhçxaꞌ, Espanxa kiwen uꞌjyaꞌwath, txãasa iꞌkweꞌsx tasxsuwa dudte neꞌkaꞌnja.
29 Adx iꞌkweꞌsx tasxte paꞌtheꞌ, iꞌkweꞌsxaꞌ jweeíiçxáa Kristo yakh çxhãçxha fxiꞌzeneꞌkwe sũjuꞌth.
30 Yakhthẽꞌjweꞌsx, iꞌkweꞌsxtxith neeweꞌweꞌ: peeygãawaꞌjaꞌs Dxus Espiritu ũste jiꞌphiꞌkwe, txãasa adxaꞌs peeygãhçxa Jesukristoꞌs piꞌkxçxa adx paꞌgate Dxus yakh puutx weꞌwekahn.
31 Judea kiwete açesa ũstaꞌ txãaweꞌsx adxna kĩhwa ewmée yũukahmén Dxusaꞌs mpiꞌkxwe, saꞌ Jerusalente yakhthẽꞌjweꞌsxtxi puꞌçxwaꞌj jxũna uꞌjweçthu txãꞌsnawa weçxana jxpaꞌgakahn,
32 kxah Dxus puꞌçxteꞌ, ewçxáa kiꞌ sxawedçxa iꞌkweꞌsx yakh weçxana ũswaꞌjaꞌs jiꞌphuꞌnja.
33 Dxusaꞌ iꞌkweꞌsx jxukaysa yakh piꞌkxna nes yuuna, ewçxáa kaafxiꞌzeꞌjna.
