Romanos 16:1-27
16 Kweꞌsx npeꞌsx Fxebe paꞌtheꞌ, txãꞌsaꞌ waꞌlmée jxpaꞌgakahn neeweꞌweçthu iꞌkweꞌsxtxi, txãꞌ Cenkrea çxhabte pkhaakhesatx selpiisaꞌ.
2 Txãa paꞌgatey Dxusaꞌs jiiyãꞌjsaꞌ maꞌwẽ yũuwaꞌjaꞌswa jii iꞌkwe naꞌ txãꞌwẽçxáa yũuna mpaꞌgawe, Kristoꞌs selpiisaꞌ naa paꞌga kweꞌsx npeꞌsxna sũhna. Saꞌ txãa kĩh peejiniꞌswa mpuꞌçxwe, txãa paꞌgatey txãꞌ maatxwa wala puꞌçxsaꞌ txãasaíik adxnawa puꞌçx.
3 Priscila vxiteꞌ Akila txãaweꞌsxtxi yuwe mweeçxawe, Kristo Jesusna adx selpiiçteꞌ, txãaweꞌsxaꞌ kxtee adx yakh mjĩi puꞌçxsatx yuꞌ.
4 Txãasaíitx txãaweꞌsxaꞌ uꞌdxih adxna nweꞌwena. Txãꞌwẽ ew yũupaꞌgath adxaꞌ txãaweꞌsxtxiꞌ wala weçxáꞌ. Nawa adxçxáa txãꞌwẽ weçxaꞌçméeth, judiu jiꞌjmée vxite nasawa weçxaꞌtx Dxusaꞌs jiisaweꞌsx.
5 Priscila vxiteꞌ Akila txãaweꞌsx yatte pkhaakhesa yakhthẽꞌjweꞌsxtxiwa yuwe mweeçxawe. Saꞌ adx namiku Epenetoꞌswa mweeçxawe. Txãak nyafxçxah Akaya kiwete Kristoꞌs ũuste jxpaꞌgasa yuꞌ.
6 Mariaꞌswa yuwe mweeçxawe, txãꞌ nakwe wala mjĩik iꞌkweꞌsx ksxavxyte.
7 Adx jiꞌj Adróniko vxiteꞌ Junias txãaweꞌsxtxiwa yuwe mweeçxawe. Txãaweꞌsxaꞌ adx yakh karcelte ũssataꞌ, saꞌ Dxus yuweꞌs ptaꞌsxyaꞌ kaahnisaweꞌsxtxi yuꞌ, thaakwe jiyunisa. Saꞌ txãaweꞌsxaꞌ Kristoꞌs jiisayãꞌjtx yuꞌ Kristoꞌs adx jiyumeyna.
8 Kristoꞌs jiisa adx namiku Ampliasnawa yuwe mweeçxawe.
9 Kweꞌsx naꞌwẽy Kristo Jesusaꞌs selpiina fxiꞌzesa Urbanoꞌswa yuwe mweeçxawe, vxiteꞌ adx namiku Estakisnawa txãꞌwẽy.
10 Apelesnawa yuwe mweeçxawe, txãꞌsaꞌ makwe nxuswaꞌj en paꞌthewa, Kristo yakh txutemeek fxiꞌzesa yuꞌ. Saꞌ Aristobuloweꞌsxtxiwa txãꞌwẽy yuwe mweeçxawe.
11 Adx jiꞌj Herodianaꞌswa yuwe mweeçxawe, vxiteꞌ Narciso jiꞌjweꞌsx Kristoꞌs jiisatx yuwe mweeçxawe.
12 Trifxena vxiteꞌ Trifxosaweꞌsxtxi yuwe mweeçxawe, txãaweꞌsxaꞌ Kristoꞌs selpisaatx yuꞌ. Saꞌ kweꞌsx npeꞌsx Persidanawa yuwe mweeçxawe, txãawa wala mjĩisa yuꞌk Kristoꞌs selpiina.
13 Rufxusnawa yuwe mweeçxawe, txãꞌ wala jiyunisa yuꞌk Kristoꞌs nwẽeseꞌjsaꞌ jĩni, saꞌ txajx njĩꞌjaꞌswa yuwe mweeçxawe, txãꞌ adxna jxpeꞌjsa mama naꞌwẽsak yuꞌ.
14 Vxiteꞌ naaweꞌsxtxi yuwe mweeçxawe: Asinkrito, Fxlegonte, Hermas, Patrobas, Hermes, vxiteꞌ yakhthẽꞌjweꞌsx txãaweꞌsx yakh ũssayãꞌjçxa.
15 Vxiteꞌ naatx yuwe mweeçxawe: Fxilólogo, Julia, Olimpas, Nereo vxiteꞌ txajx npeꞌsxna. Saꞌ txãaweꞌsx yakh ũssa Kristoꞌs jiisa yuutxiꞌ jxuka mweeçxawe.
16 Teeçxsa naꞌwẽçxah ũuste wala wẽt yajkxna puutx yuwe mweeçxawe. Saꞌ Kristoꞌs nwẽeseꞌjsa mteewa pkhaakhesa yuꞌ jxukaysatx yuwe weçxaakajaꞌ.
17 Yakhthẽꞌjweꞌsxtxi neeweꞌweꞌth, iꞌkweꞌsxaꞌ wala mpaꞌyajkxwe naꞌwẽ ew fxiꞌzewaꞌjaꞌs piya iꞌkwe txãajũ kaypubaꞌjna kaapuiꞌjna fxiꞌzesatx. Txãꞌwẽ yũusaweꞌsx yakhaꞌ mtxuteewe.
18 Txãꞌwẽmeꞌ, txãaweꞌsxaꞌ Jesukristoꞌs selpiisameetaꞌ. Txãaweꞌsx ewmée yaakxniçxáꞌstxi kxtey yuuna fxiꞌzeꞌ, saꞌ nasa açxamée ew jiisa yuutxiꞌsaꞌ kaypubaꞌjaꞌtx wala zhiçxkweçxáa weꞌweçxa.
19 Kristo kaapiyaꞌjniꞌs iꞌkweꞌsx ũusuh jxuka nwẽeseꞌjniꞌs jxukaysa jiitaꞌ, txãa paꞌgath adxaꞌ weçxáꞌ. Saꞌ ewmeesa yuꞌs nwẽeseꞌjmée wejxwa ewsaçxáꞌs nwẽeseꞌjna ũskahnthu neeweꞌweꞌ.
20 Açaꞌ kĩhtewa jxuka ew kaafxiꞌzeꞌjsa Dxusaꞌ iꞌkweꞌsxtxi puꞌçxhina eçxthẽꞌj knaykahmén. Açaꞌ iꞌkweꞌsxaꞌ Jesukristo yakhçxáa mfxiꞌzewe.
21 Adx yakh mjĩi puꞌçxsa Timoteowa yuwe weçxaakajaꞌk, vxiteꞌ Lucio, Jasón, Sosípater adx jiꞌjweꞌsx.
22 Naa kartaꞌs fxiꞌphuꞌçxsa Tercio adxwa yuwe weçxaakajaꞌth Dxus yakh fxiꞌzesatx.
23 Saꞌ Dxus luuçx pkhaakhewaꞌj yat pkiꞌjsa Gayowa yuwe weçxaakajaꞌk, adxaꞌs paadee yat pkiꞌjsa. Vxiteꞌ Erastowa yuwe weçxaakajaꞌk, gobierno vxyuꞌs jxaawsa. Txãꞌwẽy kweꞌsx yakhthẽꞌj Kuarto yaasesawa weçxaakajaꞌk.
24 Kweꞌsxtxi jxpeꞌjsa Jesukristo puꞌçxhina iꞌkweꞌsx jxukaysatx bagaçxtewa.
Dxusaꞌs yuuçxáa weçxani
25 Ãçxhaꞌ Dxus kusete nvxiituçthu txãꞌ iꞌkweꞌsxtxi jweeíiçxáa çxhãçxha kaafxiꞌzeꞌjena, Jesukristo kaapiyaꞌjniꞌs maꞌwẽtka ptaꞌsx txãꞌsaꞌ kxtey yuuna. Kweꞌsx ewte neeyũuwaꞌjaꞌs naa kiwemeeteyku Dxusaꞌ pheuꞌjçxa jiꞌphuꞌ,
26 nawa txãꞌsaꞌ jũꞌnasuçxáak kaajiyuꞌjni yuu, Dxus yuwe ptaꞌsxsaweꞌsxtxi kaafxiꞌjaꞌjçxa. Txãꞌsna ãçxhaꞌ maa kiwetewa jxuka ptaꞌsxni yuuçaꞌ, maawa Kristoꞌs ũuste jxpaꞌgaçxa nwẽeseꞌkhan. Txãa paꞌga Dxusaꞌs wala weçxaawaꞌj jiꞌpthaꞌw.
27 Dxus yuuçxáa maꞌwẽ yũuwaꞌjaꞌswa jxuka jiisaꞌ. Txãa paꞌga txãꞌs yuuçxáa bagaçxtewa weçxana nes yuuwaꞌjaꞌ, kweꞌsxtxi nweꞌwesa Jesukristo ew yũupaꞌga.
