Romanos 2:1-29
2 Txãꞌwẽ ewmée yũupaꞌga Dxus kastigoꞌs jxpaꞌgawaꞌj jiꞌphtaꞌ jĩna idxaꞌ açeweꞌweçxawa, txãa nasa ewmeesa naꞌwẽ íiçxáag ewmée yũuna fxiꞌzeꞌ makwe Dxusaꞌs jiiçxawa.
2 Peekx jiithaꞌw txãꞌwẽ ewmée yũusatxiꞌs Dxusaꞌ isak kastigaĩꞌ maatxwa jxuka.
3 Açaꞌ idxaꞌ txãꞌwẽ vxitetx açeweꞌwena Dxus kastigoꞌs jxpaꞌgawaꞌj jiꞌphtaꞌ jĩçxawa idxwa txãꞌwẽyçxáa ewmée yũuçxaꞌ, Dxusaꞌ idxaꞌs kastigaĩmeena ¿sũjuꞌgáꞌ?
4 Txãꞌwẽ ewmée yũutewa Dxusaꞌ peeygãhçxa ãçxhíi yuꞌ kastigaĩmée ũsaꞌ. Nawa txãa yuꞌ idx ewmée yũunitx nvxihtçxa txajx tasxte sxawedkahn ũythasna iipeꞌjaꞌ.
5 Txãꞌwẽ ũythasna ũstewa, iidx ewmée yũunitx nvxihtçxa Dxus tasxte sxawedwaꞌj yuꞌsaꞌ yaakiꞌçmeeg. Txãa paꞌga yaꞌkastigãywaꞌjaꞌs jweeíiçxáa nuywalana ũsgu, nmeh ente Dxus kastigãywaꞌj en ãhteweꞌsx.
6 Txãa enteꞌ maꞌwẽ yũusaçxawa, teeçxsa naꞌwẽçxah jxpaꞌgatxna txãaweꞌsx jĩꞌs:
7 bagaçxte yuhwa pçuwaꞌjsameꞌs een isa pakwena ewçxáa yũuna fxiꞌzesaꞌ pçumée ĩtxi fxiꞌzewaꞌjaꞌs jxpaꞌgatxna.
8 Naapkaçxhaꞌ Dxusaꞌs ahçena txajx jxkaahni yuꞌsaꞌ kxtey yuumée ewmeeçxáa yũuna fxiꞌzesaꞌ Dxus kastigo seenaꞌ yuhsaꞌs jxpaꞌgatxna.
9 Maawa ewmeeçxáa yũusa yuutxiꞌs jxuka kastigãywaꞌj en paꞌjana, judiu jiꞌjmée vxite nasatx yuhwa kastigãyçxaꞌ, judiuweꞌsx yuutxiꞌ wejx txãꞌwẽ kastigaĩna.
10 Nawa maawa ew yũuna fxiꞌzesatxiꞌs Dxusaꞌ ũsuna txãa yakh wẽt weçxana fxiꞌzewaꞌjaꞌs, judiuweꞌsxtxi ũsçxaꞌ, judiu jiꞌjmée vxite nasatxwa txãꞌwẽyçxáa ũsuna.
11 Txãa paꞌgatey Dxusaꞌ teeçxsaçxáan jxthaakwe ew jxpeꞌjeꞌçmeꞌ, jxukaytxi txãa naꞌwẽçxaçxáak jxpeꞌjeꞌ.
12 Moises leyaꞌs jiimeesawa ewmée yũuna fxiꞌzesa yuꞌ jxukaysa vxituwaꞌjsa íiçxáataꞌ. Açaꞌ makwe Moises leyaꞌs jiiçxawa ewmée yũuna fxiꞌzesa yuꞌ txãaweꞌsxwa jxukaysa vxituwaꞌjsa íiçxáataꞌ, txãa leyaꞌs nwẽeseꞌjmeeçxa ewmée yũupaꞌga.
13 Txãa paꞌgatey leyaꞌs jiipaꞌgaçxáa ewte yaꞌneeyũꞌçmeꞌ, açaꞌ makwe leyaꞌs jiimeeçxawa ley jxkaahnitx kaavxyaꞌjaꞌjsa yuuçxáa yuuwemée yuuwaꞌjsataꞌ.
14 Açaꞌ judiu jiꞌjmée vxite nasa makwe leyaꞌs jiimeeçxawa ley jxkaahni Dxus kaaũusutheꞌjniꞌs kaavxyaꞌjaꞌjtx ewmeesa yuutxiꞌ nwẽeseꞌjméeh ewsaçxáꞌs kxtey yuuna.
15 Txãꞌwẽ yũuwaꞌjaꞌs Dxusneꞌ kaaũusutheꞌjeꞌ, txãa paꞌgatx ãate kaavxyaꞌjaꞌjna ewçxáa fxiꞌzeꞌ. Txãꞌwẽ yũuwaꞌjaꞌs txãaweꞌsx ũus yaakxniꞌ kaajiyuꞌjuꞌneꞌ kĩh yũuni ewmeesatewa saꞌ kĩh yũuni ewsatewa txãꞌwẽy.
16 Açaꞌ Dxus kaahni Jesukristo kĩhçxaꞌ, nasaa ũusteçxáa yaakxniꞌs jxuka ãate kaajiyuꞌjuna txãꞌwẽ yũuwaꞌjaꞌsthu adxaꞌ ptaꞌsxiꞌ.
Judiuweꞌsx Moises leyaꞌs jiꞌphsa
17 Nawa idxaꞌ naꞌjĩꞌg: judiuth, txãasa Moises leyaꞌs jiꞌpthaꞌw. Txãa paꞌga Dxusaꞌs jiisath jĩçxa iiwejçxgu yaakiꞌ.
18 Dxus jxkaahniꞌs jiisag, Dxus leyaꞌ kaapiyaꞌjaꞌk ewsaçxáꞌs txhitxwaꞌjaꞌs.
19 Yafx jiꞌphmeesatx jxpeꞌjsath jĩꞌg, saꞌ çxhiꞌdxte fxiꞌzesatxwa eenaꞌte kutxiꞌjsath jĩꞌg.
20 Saꞌ ley jiꞌpthaꞌw kxteeaꞌ maꞌwẽ fxiꞌzewaꞌjaꞌswa ptaꞌsxiꞌk ewsaçxáana kxtey yuuwaꞌjaꞌs jĩꞌg.
Txãasag maꞌwẽ fxiꞌzewaꞌjaꞌswa kaajiyuꞌjsath jĩꞌ. Saꞌ pxthaakwesatxwa ptaꞌsxsath, txãꞌwẽ yuuyaꞌ íiçxáa leyaꞌs jiꞌpthaꞌw jĩꞌg.
21 Txãꞌwẽ vxitetx kaapiyaꞌjaççxaꞌ, idx yuꞌ ¿kĩh yũuçxaga piyaꞌçmée? Idxíiwa ptaꞌsxçxaꞌ: Pesweewaꞌjmeꞌ jĩꞌg saꞌ idx yuꞌ ¿kĩjxaꞌga peswéꞌ?
22 Idxíi weꞌweçxawa: Ptamsayãꞌjaꞌ vxitesa yakh pkal yuuwaꞌjmeꞌ jĩꞌg saꞌ ¿kĩh yũuçxaga idx yuꞌ kxtey yuꞌçmée? Idxíiwa Dxus ĩtximeesatxiꞌs açeꞌg saꞌ ¿kĩjxaꞌga Dxus ĩtximeesatx peswéꞌ?
23 Dxus leyaꞌs jiꞌpthaꞌw sũhna iiwejçxgu yaakiꞌ, nawa txãa ley jxkaahniꞌs jxuka nwẽeseꞌjmeeçxaꞌ, Dxusaꞌs açesag.
24 Açaꞌ Dxus libruteꞌ isa yuh weꞌweꞌk naꞌjĩna: judiu jiꞌjmée vxite nasaꞌ Dxusaꞌs açeweꞌweꞌtx, nawa yuuwesa yuꞌ iꞌkweꞌsxiꞌkwe jĩꞌk.
25 Ãçxhaꞌ naꞌwẽ yũunisaꞌs ptaꞌsxyaꞌwath: Moises leyaꞌs nwẽeseꞌjna kaavxyaꞌjaꞌjaꞌççxa yuꞌ, cirkuncidãyniꞌs jxpaꞌgawaꞌj yujaꞌ. Nawa ley jxkaahnitx jxuka kaavxyaꞌjaꞌjaꞌçmeeçxa yaꞌcirkuncidãyteꞌ, cirkuncidãynimeesanpa íiçxáꞌ.
26 Açaꞌ cirkuncidãynimeesaçxawa leyaꞌs jiisa naꞌwẽ ew yũuwaꞌjaꞌs kxtey yuute yuꞌ, cirkuncidãyni naꞌwẽysa íiçxáꞌ.
27 Mpaꞌyajkxwe. Txãꞌwẽmeꞌ cirkuncidãynimeesaçxawa, ley jxkaahnitx kaavxyaꞌjaꞌjsa yuꞌ cirkuncidãynisaweꞌsxtxi ewmeekhẽ nvxiitutxna, makwe leyaꞌs jiꞌphçxawa jxkaahniꞌs jxuka kaavxyaꞌjaꞌjaꞌçmeeçxa yaꞌcirkuncidãyteꞌ.
28 Txãꞌwẽ yuwejuçxáa judiuth jĩsa judiu yaꞌyuꞌçmeꞌ, saꞌ txãꞌwẽy kakweteçxáa cirkuncidãyçxa judiu yaꞌyuꞌçmeꞌ,
29 naasáa ũusuh jxuka Dxusaꞌs yajkxna ew fxiꞌzeteçxáak judiu naꞌwẽ yuh yuuna yaꞌpaꞌjaꞌ. Saꞌ ewmée ũus yaakxniꞌs yuꞌpthehnisaçxáa cirkuncidãyni naꞌwẽ. Açaꞌ txãꞌwẽ ewmée ũus yaakxniꞌs yuꞌpthehsa yuuçxáꞌsku Dxusaꞌ weçxáꞌ.
