Romanos 3:1-31
3 Txãꞌwẽteꞌ, judiuçxáa ¿kĩh wejx thaakwe ewsa jiꞌphtxna? Saꞌ yaꞌcirkuncidãyniꞌ ¿kĩhtega selpiꞌ?
2 Txãaweꞌsxaꞌ ewsa yuꞌsaꞌ wala jiꞌphtaꞌ. Txãasaíi kĩhtewa thaakwe ewsa Dxus yuweꞌs jiꞌphtaꞌ txãaweꞌsxtxi neeweꞌweçxa nvxiitnisaꞌs.
3 Txãꞌwẽ Dxus yuwe thaakwe ewsaꞌs jiꞌphçxawa judiuweꞌsx maaíi yuꞌ Dxus yakh fxiꞌzewaꞌjaꞌs kxtey yuumeeteꞌ, ¿kĩh yuukx? ¿Txãꞌwẽ kxtey yuumeeteçxáa ¿Dxuswa kĩhtewa jxuka puꞌçxyaꞌ puutx weꞌweniꞌs puꞌçxmée yuumaꞌk?
4 Txãꞌwẽ yuumeena. Makwe naa kiwete nasaꞌ Dxus yakh fxiꞌzewaꞌjaꞌs kxtey yuumeetewa, Dxus yuꞌ txajx puꞌçxyaꞌ puutx weꞌweniꞌs kxtey yuuna. Dxus txãꞌwẽ kxtey yũuwaꞌjaꞌs weꞌweçxaꞌ, Dxus librute naꞌjĩꞌk:
Txãa ente kxtey yuuniꞌs uyçxaꞌ,
Ĩsxiimée isa yuh weꞌwesa yuꞌga jĩtxna jĩꞌk.
5 Kweꞌsx ewmée yũunisaꞌ selpiꞌk txãꞌwẽ ewmée yũute íiçxáak Dxusaꞌ txajx peeygãaniꞌs jweeíiçxáa ãate kaavxyaꞌjaꞌjaꞌ. Txãa paꞌga ewmée yũunisaꞌ seelpisaꞌ, Dxus peeygãaniꞌs kaavxyaꞌjaꞌjsa jĩꞌtx maaíi yuꞌ. Txãꞌwẽteꞌ, kweꞌsx ewmée yũuniꞌs ¿maꞌjĩtkaꞌw? Kweꞌsx ewmée yũunisaꞌ seelpisateꞌ, Dxusaꞌ ewmée yũusatxiꞌs kastigãyçxaꞌ, ¿Dxuswa ewmée yũusaçxa maꞌk txãꞌwẽ yũu?
6 Weh yuhwa ewmée yũusameꞌ. Dxusaꞌ ¿maꞌwẽ naa kiwete nasa yuuwesatx kastigãyyaꞌ ãjakx, txãaíiwa ewmée yũusaaçxáꞌ?
7 Txãꞌwẽ adx ewmée yũunisa Dxusaꞌs kxtey kxuꞌjuꞌjna selpiiçteꞌ, ¿adxaꞌs kĩjxaꞌçxáa ewmeeg yũu jĩna weꞌweçxa kastigaĩkx?
8 Txãꞌwẽ yaakxsaꞌ: Ewmeesaçxáꞌs wejx paꞌpçxute ewna, ewsa vxyaana nes yuukahn jĩꞌtx. Txãa yuꞌ adxaꞌs açesatx txãꞌjĩꞌ: Pabloꞌ txãꞌwẽk kaapiyaꞌjaꞌ jĩna. Txãꞌwẽ weꞌwesaꞌ Dxus kastigo yuuçxáꞌs jxpaꞌgawaꞌjsataꞌ.
Jxukay yuuwesathaꞌw
9 Naꞌwẽꞌ açaꞌ ¿judiuweꞌsxçxáa kĩh yũuçxa vxite nasate jxthaakwe ewsa yuukxthaꞌw? Weh yuhwa thaakwe ewsameethaꞌw. Txãꞌwẽ judiuweꞌsxçxáa thaakwe ewsathaꞌw sũhweꞌsxte kaajiyuꞌjuçthu: judiu maꞌk yuu vxite nasa maꞌk yuu nawa jxukaysa ewmée pkalsaçxaçxáathaꞌw.
10 Txajíik Dxus librutewa naꞌwẽ weꞌweꞌ:
Teeçxçxáa yuhwa ewsa yuꞌ meetaꞌ.
11 Kim yuhwa Dxusaꞌs jiyuçxa pakweyaꞌ yaakxsameetaꞌ.
12 Jxukaysa jxpubaçxa vxituni ũstaꞌ.
Txãasa ew yũuwaꞌj yuꞌsaꞌ teeçxçxáa yuhwa yaakiꞌçmeetaꞌ mteeweꞌsxçxáa yuhwa
13 Txãaweꞌsx weꞌweniꞌ uusáa pedani kafxaꞌs phadeni naꞌwẽ kazxsataꞌ.
Saꞌ txãaweꞌsx thuneꞌ ul weeswée weneno naꞌwẽ ikhsaꞌ, ĩsxiina kaypubaꞌjçxa.
14 Seenaꞌ kazx ewmée weꞌweni yuuçxáꞌs jiꞌphtaꞌ.
15 Txãaweꞌsx çxidaꞌ nasa ikhyaꞌ uꞌjwaꞌjaꞌs yuuçxáatx selpiꞌ.
16 Vxitetx nxuste kaafxiꞌzeꞌjwaꞌjaꞌs yuuçxáatx yajkxna fxiꞌzeꞌ.
17 Ewte kaafxiꞌzeꞌjwaꞌj yuꞌsaꞌ yaakiꞌçmeetaꞌ.
18 Dxusaꞌ uyna ũsna sũhna ũukhwaꞌjaꞌs yuꞌ jiꞌphmeetaꞌ jĩꞌk.
19 Dxus librute naꞌwẽ ewmeesataꞌ jĩna weꞌweꞌk txãa yuꞌ Dxus leyaꞌs jiisaweꞌsxtxi weꞌweçxak txãꞌjĩꞌ. Açaꞌ txãaweꞌsxaꞌ Dxus yakh pdxiꞌpuwaꞌj en ãhteꞌ, yuuwemeesathaꞌw jĩna pasyaꞌ ãjameetxna kim yuhwa.
20 Txãa paꞌgatey leyaꞌsçxáa yajkxteꞌ, maa yuhwa yuuwemée ewsa yaꞌyuꞌçmeꞌ, leyaꞌ naasáa kĩh txãꞌwẽ ewmeetewa txãꞌsna ptaꞌsxsaçxáꞌ naa paꞌga.
Yuuwemeesa yuuyaꞌ Kristoꞌs jxpaꞌgawaꞌjaꞌ
21 Açaꞌ ley jxkaahniꞌs nvxihtçxa yuuwemée ewsa yuuna paꞌjwaꞌjaꞌs ãçxhaꞌ Dxusíi kaajiyuꞌkh, txãꞌwẽ yũuwaꞌjaꞌs Dxus leyte txãniiteyku ptaꞌsxna fxiꞌjni ũsuꞌ Dxusna selpisaaweꞌsx fxiꞌjni.
22 Txãꞌwẽ yuuwemée ewsa yuuna paꞌjyaꞌ, naasáa Jesukristo yuuçxáꞌs ũusuh jxuka yaakxwaꞌjaꞌ, nasa maꞌwẽsawa jxuka.
23 Txãꞌwẽmeꞌ maa yuhwa ewsamée, jxukay pkalsaçxaçxáa yuuna paꞌjçxa Dxus tasxte paꞌjwaꞌjaꞌs jiꞌphmée ũstaꞌ.
24 Txãa paꞌgak Dxusaꞌ peeygãhçxa txajx tasxte yuuwemée ewsa yuuna paꞌkhan, Kristo Jesusaꞌs uuwaꞌj vxit kweꞌsx yuuwesatx nweꞌwekahn.
25 Açaꞌ Kristo txãꞌwẽ kluuste uuniijũk Dxusaꞌs yaakxsa txãniiteyweꞌsx pkal peltunãynimée ũsuꞌneꞌta txãa pkaltxi Dxusaꞌ peltunãy, açaꞌ txajũtx yuuwemeesa jĩni yuu.
26 Saꞌ naa ensuweꞌsx pkaltxiwa txãꞌwẽyçxáak Dxusaꞌ txagaçxhíi Kristo kluuste uuniijũjx peltunãyçxa nvxiht, yuuwemeesa yuukahn maawa Kristoꞌs jxpaꞌgawaꞌjsa yuutxiꞌ.
27 Açaꞌ ¿kĩh yuupaꞌga kweꞌsxçxáa ewsathaꞌw sũhna weeçx yaakikxthaꞌw? Txãꞌwẽ yaakxwaꞌjaꞌ pçuk. ¿Kĩh yuupaꞌgaga iiwejçx yaakxwaꞌjaꞌ pçu? Jesusaꞌs ũusuh jxuka yajkxçxa jxpaꞌganisa yakhaꞌ, iiwejçx yaakxwaꞌj kasejeꞌçmeꞌ, txãa paꞌgak iiwejçx yaakxwaꞌjaꞌ pçu. Txãꞌwẽmeꞌ nyafxíi yuꞌ ley jxkaahnitx kxteythu yuꞌ sũhteꞌ, iiwejçx yaakxwaꞌjçxáak kasejeꞌ.
28 Txãa paꞌga jiithaꞌw ley jxkaahniꞌs nvxihtçxa, naasáa Kristo yuuçxáꞌs ũusuh jxuka yajkxçxa jxpaꞌgateçxáa, yuuwemée ewsa yuuna yaꞌpaꞌjaꞌk nasa maꞌwẽsawa jxuka.
29 Dxusaꞌ judiuweꞌsxçxáatx puꞌçxçxaꞌ, judiu jiꞌjmée vxite nasa yuutxiꞌ puꞌçxwaꞌjsamée wáana açneꞌkwe iꞌkweꞌsxçxáa iiwejçx yaakiꞌ. Txãꞌwẽ yuumée judiu jiꞌjmée vxite nasatxwa puꞌçxwaꞌjsaíiçxáꞌ.
30 Teeçx Dxusçxáa jxukaysaweꞌsxtxi puꞌçxwaꞌjsaꞌ, cirkuncidãynisaçxawa Jesusna ũusuh jxuka yajkxna jxpaꞌgateçxáa yuuwemeesa yaꞌyuuna. Saꞌ txãꞌwẽy cirkuncidãynimeesaçxawa Jesusna ũusuh jxuka yajkxna jxpaꞌgateçxáa yuuwemée ewsa yaꞌyuuna.
31 Txãꞌwẽ Jesusna ũuste jxpaꞌgawaꞌjçxáꞌs ptaꞌsxçxaꞌ, ley yuꞌ puꞌçxwaꞌjsameꞌ jĩçxa txãꞌjĩꞌçmeethaꞌw, wejxwa ley jxkaahniꞌs kxtey yuuwaꞌjaꞌsthaꞌw ptaꞌsxiꞌ.
