Romanos 4:1-25
4 Kweꞌsx yaçgaweꞌsx Abrahanaꞌs ũus miiyajkxwe wakx: Txãꞌ ¿kĩhga yũu yuuwemeesa yuuna paꞌjyaꞌ?
2 Abrahanaꞌ kĩhçxáawa yũuçxa txãꞌwẽ yuuwemée ewsa yuuna paꞌjwaçaꞌ, txãꞌwẽ yũuçxath ewsa yuuna paꞌj sũhna iiwejçx yaakxwaꞌjaꞌs jiꞌphuwaꞌj neꞌ yuꞌ. Nawa kĩhwa yũumeeçxak ewsa yuuna paꞌj, naa paꞌga iiwejçx yaakxwaꞌj jiꞌphmeek yuꞌ.
3 Txajíik Dxus librute ptaꞌsxçxaꞌ: Abrahanaꞌ ũusuh yuuçxáak Dxusaꞌ kxtey yuuna sũhna yajkx. Txãꞌwẽ yaakxpaꞌgaçxáa ewsa yuuk jĩꞌk.
4 Peekx jii iꞌkwe: Kĩhçxáawa mjĩipaꞌga dukhnisaꞌ peesnisameꞌ; txãꞌ mjĩipaꞌga dukhnisaꞌ, yuulaꞌs dewenisaꞌ.
5 Nawa kĩh yuhwa yũumeeçxawa, naasáa pkalsatx nweꞌwesa Dxusaꞌs yuuçxáa ũusuh jxuka yajkxteçxáa, Dxusaꞌ txãꞌsaꞌ yuuwemeesak vxituꞌ.
6 Txajíik kĩh yuhwa yũumeeçxawa yuuwemeesa yuuçxa weçxana fxiꞌzewaꞌjaꞌs Davxidaꞌ weꞌwe naꞌjĩna:
7 Yuuwemeesag jĩna Dxusaꞌ weꞌweteꞌ,
Yuuwemée neeyũusaaweꞌsxaꞌ weçxanatx fxiꞌzeꞌ.
8 Maanawa txãaweꞌsx pkaltxi khũkhteꞌ, weçxana fxiꞌzetxna jĩꞌk.
9 Naꞌwẽ weçxana fxiꞌzewaꞌjaꞌs ptaꞌsxiꞌk txãꞌ ¿cirkuncidãynisaweꞌsx jĩiçxáa wáana, meeçxaꞌ cirkuncidãynimeesaweꞌsx jĩi yãꞌjçxa wáanakx? ¿Maa sũjuꞌkwe? Ew jiyuyaꞌ Abrahanaꞌs miiyajkxwe. Txãꞌ ũusuh yuuçxáa Dxusaꞌs yaakxpaꞌga yuuçxáak yuuwemée yuuna paꞌj jĩꞌk.
10 Açaꞌ Abrahanaꞌ ¿bagaçxga txãꞌwẽ ewsa yuuna paꞌj? ¿Cirkuncidãynijũꞌ, meeçxaꞌ cirkuncidãynimey wáꞌ yuuwemée ewsa yuuna paꞌj? Ew jiithaꞌw cirkuncidãyni yuumeyku yuuwemée ewsa yuuna paꞌj. Txãa eꞌsuk Abrahanaꞌ cirkuncidãyni yuu.
11 Nawa txãa cirkuncision yuꞌ naasáa Dxusaꞌs ũusuh jxuka yaakxpaꞌga yuuçxáa yuuwemeesak yuu jĩna kakwete snxal kiꞌpnisaçxáꞌ. Txãa paꞌgak Abrahanaꞌ tata naꞌwẽ kasejeꞌ, makwe cirkuncidãynimeesaçxawa Dxusaꞌs ũusuh jxuka yaakxsaweꞌsx maawa jxukaysatx. Açaꞌ maawa Abrahan naꞌwẽy cirkuncidãynimeesaçxawa ũusuh jxuka yaakxsa yuutxiꞌs Dxusaꞌ txãꞌwẽyçxáa yuuwemeesa vxituna.
12 Abrahanaꞌ cirkuncidãynisaweꞌsxtewa isa tata naꞌwẽsa yujaꞌ, txãaweꞌsx yuu Abrahan naꞌwẽy Dxusaꞌs ũusuh jxuka yaakxwaꞌjaꞌs jiꞌphute yuꞌ.
Ũusuhçxáa Dxusaꞌs yaakxpaꞌga Dxus puutx weꞌweniꞌ kxtey yuuni
13 Aytewa Abrahanaꞌ naꞌwẽçxáak yuu txãꞌsna miiyajkxwe: Abrahan vxiteꞌ txajx jiꞌjweꞌsx jĩi Dxusaꞌ puutx weꞌwek naa kiweꞌs jxuka txãaweꞌsxçxaçxáa yamuwaꞌjaꞌs. Nawa Abrahanaꞌ leyaꞌs yaakxpaꞌgaçxáa txãꞌwẽ Dxusaꞌ yamuwaꞌjaꞌs puutx weꞌwemeꞌ, naasáa Abrahanaꞌ ũusuh yuuçxáak Dxusaꞌs jxuka yajkx, txãa paꞌga yuuçxáak ewgu yuu jĩçxa naa kiwete yamuwaꞌjaꞌs vxit.
14 Txãꞌwẽ leyaꞌs nwẽeseꞌjsaçxáa naa kiweꞌs yamuwaꞌjsawaçaꞌ, ũusuhçxáa Dxusaꞌs yaakxsaꞌ yamuwaꞌjsamée neꞌta yuꞌ, açaꞌ kiwe ũsuꞌnja jĩna Dxus puutx weꞌwenisaꞌ kxulneꞌ yuuwaꞌj yuꞌ.
15 Ley ũsteꞌ, txãꞌsna kxtey yuumeeçxaꞌ, yuuwesak yaꞌyuꞌ. Nawa ley meeteꞌ, ¿maꞌwẽ leyaꞌs kxtey yuuyaꞌ yaꞌãjakx?
16 Txãꞌwẽ leymée paꞌgaíiçxáak Abrahanaꞌ ũusuh yuuçxáa Dxusaꞌs jxuka yajkx, açaꞌ txãꞌwẽ yaakxpaꞌgak Dxusaꞌ naa kiwete jxuka yamuwaꞌjaꞌs puutx weꞌwe Abrahan jiꞌjweꞌsxtxi. Txãa puutx weꞌwenisaꞌ leyaꞌs jiꞌphsaweꞌsx jĩiçxáa meeaꞌ, Abrahanwa maꞌwẽga Dxusaꞌs ũusuh yuuçxáa jxuka yajkx txãꞌwẽy yũusaweꞌsx jĩi yãꞌjçxa. Txãa paꞌga Abrahanaꞌ kweꞌsx jxukaysate tataꞌ.
17 Txajíik Dxus librutewa naꞌjĩꞌ: Nasa maazkuẽesatewa jxukaysate tata yuuwaꞌjsa idxaꞌs nvxiituçthu jĩk Dxusaꞌ. Dxus yakhaꞌ kĩh yuhwa thẽymeꞌ. Txãꞌ uusaatxwa kiꞌ ĩtxi vxituꞌk, saꞌ kĩh yuhwa vxyaawaꞌjmeetewa, kaavxyaꞌjaꞌjaꞌk.
18 Dxus Abrahan yakh puutx weꞌwenisaꞌ weh yuhwa kxtey yuuwaꞌjsamée naꞌwẽçxáak yuꞌ. Nawa Abrahanaꞌ txãa sũhmée Dxus weꞌweniꞌ kxtey yuuna sũhnaçxáak ũuste yuꞌakh. Açaꞌ Dxus weꞌweçxaꞌ: Iidx jiꞌjaꞌ iiméh seenaꞌ kuh yuutxna jĩna weꞌweniꞌ kxtey yuuyujk. Txãa paꞌgak nasa maazkuẽesatewa jxukaysate tata yuu.
19 Abrahanaꞌ uuwaꞌjaꞌsçxáa yãꞌkh ũythasna ũsuꞌ, cien anxu jiꞌphuçyãꞌkh yuꞌ naa paꞌga. Açaꞌ Saraꞌ bagaçxte yuhwa luuçx jiꞌphuwaꞌjsameek yuꞌ, txãꞌwẽçxáamée thẽꞌkhweyãꞌkh yuꞌ. Makwe txãꞌwẽtewa, Dxusaꞌ puꞌçxhina sũhwaꞌj yuuçxáꞌsku jiꞌphuꞌ Abrahanaꞌ.
20 Txãasak Dxus weꞌweniꞌs jxpubana kuh jwed yajkxmée Dxusaꞌ kxtey yuuna sũhna yuuçxáa yajkxna Dxusaꞌs weçxa.
21 Txãa paꞌgatey Dxusaꞌ txajx weꞌweni yuꞌsaꞌ jxuka kxtey yuuwaꞌjsaꞌ sũhna yuuçxáak fxiꞌze.
22 Txãꞌwẽ Dxus weꞌweniꞌs maꞌwẽçxáa yuhwa jxpubamée kxtey yuuna sũhwaꞌj yuuçxáꞌs ũuste yaakxpaꞌgak Dxusaꞌ Abrahanaꞌs yuuwemeesa vxit.
23 Nawa Abrahançxáak yuuwemée ewsa yuu jĩna fxiꞌjni yuumeꞌ.
24 Kweꞌsxtxiwa jaꞌda weꞌweçxak txãꞌjĩꞌ, txãa paꞌgatey kweꞌsxwa Jesusaꞌs ĩtxi vxit-sa Dxusaꞌs ũusuh jxuka yaakxpaꞌgaçxáa yuuwemeesathaꞌw.
25 Kweꞌsxtxi yuuwemeesa vxit-yaꞌíiçxáak Dxusaꞌ Jesukristoꞌs pkalsaweꞌsx paꞌgate uuwaꞌj vxitçxa kiꞌ ĩtxi vxit.
