Romanos 5:1-21
5 Txãꞌwẽ Dxusaꞌs ũusuh yuuçxáa jxuka yaakxpaꞌgaçxáa Dxusaꞌ kweꞌsxtxiꞌs yuuwemeesak vxit açaꞌ ãçxhaꞌ Dxus yakh wẽt fxiꞌzewaꞌjaꞌs jiꞌpthaꞌw, kweꞌsxtxi jxpeꞌjsa Jesukristo nweꞌwepaꞌga.
2 Txãꞌwẽ Kristo kweꞌsxtxi nweꞌwepaꞌga yuuçxáathaꞌw Dxus yakh wẽt fxiꞌzewaꞌthe paꞌj, Jesukristoꞌs ũusuh jxuka yaakxpaꞌga. Txãasa ãçxhaꞌ Dxus tasxte paꞌjwaꞌjaꞌs jiꞌpthaꞌw, txãasathaꞌw wala weçxáꞌ.
3 Saꞌ Dxus tasxte paꞌjwaꞌjaꞌsçxáa yajkxçxa weçxamée, naa kiwete nxuswaꞌjaꞌswa weçxaꞌthaꞌw, txãa paꞌgatey nxuswaꞌj en paꞌtheꞌ, jweeíiçxáak Dxusaꞌs çxhãçxha yaakxwaꞌj kasejeꞌ.
4 Açaꞌ Dxusaꞌs çxhãçxha yaakxwaꞌj kasehte, Dxus yakh txuteméek yaꞌfxiꞌzeꞌ. Açaꞌ Dxus yakh txutemée fxiꞌzeçxaꞌ, Dxus luuçxthaꞌw sũhwaꞌjaꞌs yaꞌjiꞌphuꞌk.
5 Açaꞌ Dxus luuçxyãꞌjaꞌ, weh yuhwa yaꞌthameꞌçmeꞌ, txãa paꞌgatey kweꞌsx ũuste Dxus Espirituçxáa jxuka khẽeçxa ũsna Dxus peeygãaniçxáꞌs kaajiyuꞌjna.
6 Kweꞌsxçxáa yuꞌ yaꞌnweꞌwewaꞌjaꞌs ãjameeyãꞌtheꞌ, Kristo naa kiwete kĩiwaꞌj en ãhteꞌ paꞌjçxa kweꞌsx ewmeesa paꞌgate uuk nweꞌweyaꞌ.
7 Kim yuhwa nasa ewmeesatx peeygãhçxa nweꞌweyaꞌ uumeena. Meeçxaꞌ maaíi yuꞌ txãꞌwẽ yuuwáatxna, nawa nasa ewsateçxáa txãꞌwẽ yuutxna.
8 Kweꞌsx yakh yuꞌ txãꞌwẽ ewmeesa paꞌgate uuwaꞌjaꞌ wala thẽyaꞌ, nawa Dxusaꞌ kweꞌsx ewmeesatewa peeygãhçxa txajx Nçxiꞌkaꞌs naa kiwete kaakh, ewmeesa kweꞌsx paꞌgate uukahn.
9 Txãꞌwẽ Kristo kweꞌsx paꞌgate uupaꞌga nweꞌwenisathaꞌw yuu, saꞌ nmeh ente kastigo iiméh seenaꞌsate yuꞌ wejx nweꞌwenisa yuꞌnjaꞌw.
10 Txãa paꞌgatey kweꞌsxaꞌ Dxusaꞌs açesateyuhwa, txãa yakh fxiꞌzewaꞌjaꞌs vxitku Kristoꞌs uuwaꞌj vxitçxa, naꞌ ãçxh yuꞌ Kristo uupaꞌga yuuwemeesathaꞌw naꞌ wejx nweꞌwenisa yuꞌnjaꞌw.
11 Txãꞌwẽ yũupaꞌgathaꞌw Dxusaꞌs wala weçxáꞌ, kweꞌsxtxi nweꞌwesa Jesukristoꞌ Dxus yakh fxiꞌzewaꞌjaꞌs vxitku naa paꞌga.
Adan yakh Kristo yakhaꞌ jaꞌdameetaꞌ
12 Pkalaꞌ naa kiwete teeçx nasate yuuçxáa uꞌkaçxak uuwaꞌjaꞌs vxit, txãa paꞌgatx jxukaysa naa kakwe uuwaꞌjaꞌs jiꞌphu, pkalte wetepaꞌga.
13 Ley kasehmey, pkalaꞌ naa kiwete ũsyãꞌkh yuꞌ. Nawa ley ptaꞌsxçxa: Naa ewmeesaꞌ jĩna ptaꞌsx jaꞌdamée yuꞌ, ewmeesana sũhwaꞌjaꞌs yaꞌjiꞌphuꞌçmeeneꞌ.
14 Ley yuꞌ meetewa, pkal ũsyãꞌthe íitx Moises meetey Adanweꞌsx jxukaysa peekx kakwe uuwaꞌj enaꞌs jiꞌphu, Adan naꞌwẽy yuꞌ mée yũuçxa pkalte wetetewa, uu enaꞌ jaꞌdaçxaçxáak paꞌj. Ew yajkxte yuꞌ, Adanaꞌ naa kiwete kĩiwaꞌjsa ũsuꞌk txãa naꞌwẽsak yuꞌ.
15 Nawa Adan pkal yakh vxiteꞌ kweꞌsx ewte neeyũunisa yakhaꞌ weh yuhwa jaꞌdameetaꞌ. Teeçx piçthẽꞌj pkalte wetepaꞌga yuuçxáa jxukaysatx uuwaꞌjaꞌs jiꞌphu, naapkaçxhaꞌ teeçx piçthẽꞌj Jesukristo paꞌga yuuçxáa jxukaysatx txãa pkaluh ewte neeyũuwaꞌjaꞌs jiꞌphu. Txãꞌ jxukaysatxku nweꞌwe naa paꞌga jxthaakwe wala ewsak yuꞌ.
16 Teeçx piçthẽꞌjsa pkal yuuk txãa pkal yakh Dxus ũsku ewte neeyũuwaꞌjaꞌs txãa yakhaꞌ weh yuhwa jaꞌdameetaꞌ. Txãa paꞌgatey teeçxsa teedxiꞌj pkal yũunisaçxáa maazkuẽe us pkalsatewa ãhsak yuꞌ, naapkaçxhaꞌ Dxus ũsku ewte neeyũuwaꞌjaꞌs txãꞌ maazkuẽe pkal jiꞌphsatewa txãaju yuuwemeesak vxitna paꞌj.
17 Teeçxsa yuuwe yuupaꞌgaçxáa, uuwaꞌjaꞌ nesku yuuna paꞌj. Açaꞌ bagaçxte yuhwa pçumée ĩtxi fxiꞌzewaꞌjaꞌ wejx txãꞌwẽ bagaçxtewa nes yuuna Jesukristopaꞌga.
18 Adan ewmée yũunisaꞌ jxukaysatxku ewmeekhẽ vxitna paꞌj, naapkaçxhaꞌ Jesukristo ew yũunisaꞌ nasa jxukaysatxku yuuwemée ewsa vxit.
19 Txãꞌwẽ teeçx piçthẽꞌj Dxusaꞌs nwẽeseꞌphaꞌgameeçxáa jxukaysatx pkalsa yuu, naapkaçxhaꞌ teeçx piçthẽꞌj Dxusaꞌs nwẽeseꞌphaꞌgaçxáa jxukaysa yuuwemeesatx yuuna paꞌj.
20 Kĩhçxah yũunisa txãꞌwẽ pkaltewa jxuka ãate jiyukahn íiçxáak leyaꞌ kaseh. Açaꞌ pkalaꞌs txãꞌwẽ ew jiyuçpkaçxhaꞌ, Dxus peeygãanisa yuꞌ jwee íiçxáak thaakwe wala vxyaa.
21 Pkalaꞌ uuwaꞌjaꞌsku vxit, naapkaçxhaꞌ Dxus peeygãaniꞌ pçumée ĩtxi fxiꞌzewaꞌjaꞌsku vxit Jesukristo nweꞌwepaꞌga.
