Romanos 6:1-23
6 Dxus peeygãhna peltunãyniꞌ jweeíiçxáa nes yuukahn, ¿pkalte fxiꞌzena nesmthaꞌw yuu? ¿Maa sũjuꞌkweꞌ?
2 Kweꞌsxaꞌ peena yuꞌ pkalte fxiꞌzewaꞌjsameethaꞌw, txãa paꞌgatey pkaluh txuteeçxa peena yuꞌ nwẽeseꞌjwaꞌjsa meeyãꞌthaꞌw, saꞌ ¿kĩjxaꞌçxáa jwee pkalte fxiꞌzena nes yuukxthaꞌw?
3 Meeçxaꞌ jiyuꞌçmeewáꞌkwe, nawa maawa Kristo Jesus yakh fxiꞌzeyaꞌ yuꞌte yaꞌbautisãynijũꞌ, Kristo yakh jaꞌda uusáa naꞌwẽthaꞌw yuꞌ. Yuꞌte yaꞌbautisãyni txãꞌwẽ Kristo yakh jaꞌda uuçxa pedaní naꞌwẽ yũunisaꞌ.
4 Txãa paꞌga kweꞌsxaꞌ uuçxa pedani naꞌwẽsathaꞌw yuu, açaꞌ Kristowa maꞌwẽga Dxus puꞌçxte uuniijũwa kiꞌ ĩtxi yuu açaꞌ kweꞌsxwa txãꞌwẽy yuusaathaꞌw. Txãasa wala ew fxiꞌzewaꞌj jiꞌpthaꞌw.
5 Kweꞌsxaꞌ Kristo yakh jaꞌda uusáa naꞌwẽ yuuçxa, txãa yakh fxiꞌzena ũsthaꞌw, txãa naꞌwẽy ĩtxi yuuçxa.
6 Txãasa jiithaꞌw Kristoꞌ kweꞌsx pkalaꞌs ivxiituyaꞌ kluuste uuk, kweꞌsxaꞌ peena yuꞌ pkalte fxiꞌzekahmen.
7 Açaꞌ pkalaꞌ peena yuꞌ jxkaajxaꞌ ãjawaꞌjsameꞌ, txãꞌwẽ uusáa naꞌwẽ yuusa yãꞌtxhiꞌs.
8 Txãa paꞌgatey kweꞌsxaꞌ Kristo yakh jaꞌda uusáa naꞌwẽ yuuçxa ãçxhaꞌ txãa yakh ĩtxi fxiꞌzena ũsthaꞌw naa paꞌga.
9 Kweꞌsxaꞌ jiithaꞌw Kristoꞌ uuçxawa kiꞌ ĩtxi yuunijũyãꞌjaꞌ, uu enaꞌ peena yuꞌ paꞌjmeena txãꞌsaꞌ.
10 Kristoꞌ pkalaꞌs nmeh ivxiituyaꞌ teedxiꞌj yuuçxáak uu, txajũyãꞌjaꞌ bagaçxte yuhwa peena yuꞌ uuyaꞌmée. Saꞌ ãçxhaꞌ Dxus yakh ĩtxi nes yuuwaꞌjsaꞌ bagaçx entewa.
11 Iꞌkweꞌsxwa txãꞌwẽy uusáa naꞌwẽçxáa mfxiꞌzewe, pkalaꞌs peena yuꞌ nwẽeseꞌjmée naasáa Dxus yakh yuuçxáa mfxiꞌzewe, Jesukristoꞌs piꞌkxçxa.
12 Pkalaꞌ peena yuꞌ jxkaahwaꞌj jiꞌphmeꞌ iꞌkweꞌsx kakwete, nawa nwẽeseꞌjewáꞌkwe açaꞌ txãaíi kiꞌ jxkaajana.
13 Iꞌkweꞌsx kakweꞌs pkalte kselpiꞌjnuwe, wejxwa Dxus kusete mekselpiꞌjwe, txãa paꞌgatey Dxusaꞌsçxáa selpiiyaꞌ sũhçxa kiꞌ ĩtxi yuusáa naꞌwẽsa iꞌkwe naa paꞌga. Açaꞌ iꞌkweꞌsx kakweꞌ Dxus kusete ewsa yuuçxáana selpiina.
14 Iꞌkweꞌsxaꞌ jii iꞌkwe, leyaꞌ nweꞌwewaꞌjsameꞌ, naa paꞌga ãçxhaꞌ Dxus nweꞌwenite ũsiꞌkwe açaꞌ pkalaꞌ peena yuꞌ iꞌkweꞌsx kakwete jxkaahwaꞌj jiꞌphmeꞌ.
Dxusaꞌs yuuçxáa selpiiyaꞌ utxaní
15 Txãꞌwẽ leyaꞌ nweꞌweyaꞌ ãjãmeeyãꞌtheꞌ, ¿kiꞌ pkalteyçxáa fxiꞌzemthaꞌw, Dxus nweꞌwenite ũsçxawa? Weh yuhwa pkalte fxiꞌzewaꞌjmeꞌ.
16 Iꞌkweꞌsxaꞌ ew jii iꞌkwe, selpiina nwẽeseꞌjyaꞌ sũhçxa maawa patron tasxte paꞌjçxaꞌ, txãa yuuçxáꞌs iꞌkwe nwẽeseꞌjna selpiꞌ. Txãꞌwẽyíiçxáꞌ pkalaꞌsçxáa nwẽeseꞌtheꞌ, ewmeete vxituwaꞌjçxáak kasejeꞌ, naapkaçxhaꞌ Dxusaꞌsçxáa nwẽeseꞌtheꞌ, Dxus yakh ew fxiꞌzewaꞌjçxáak kasejeꞌ.
17 Iꞌkweꞌsxaꞌ nyafxiiaꞌ pkalaꞌsçxáa iꞌkwe selpisáa yuꞌ. Nawa ãçxhaꞌ Dxus puꞌçxteꞌ, ũusuh jxuka weçxana iꞌkwe kaapiyaꞌjni ewsaꞌs jxpaꞌga txãꞌs yuuçxáana nwẽeseꞌjna.
18 Txãasa iꞌkwe pkaluh txuteyãꞌjçxaꞌ, ew yũuna Dxusna selpiina fxiꞌzewaꞌthe paꞌj.
19 (Iꞌkweꞌsx ew jiyukahnthu naa kiwega selpinisa yakh kaajaꞌdaꞌjçxa ptaꞌsx.) Nyafxíiwa maꞌwẽkwe iꞌkweꞌsx kakweꞌs ewmeeteçxáa kseelpiꞌjna ũsuꞌ, txãꞌwẽy ãçxhaꞌ Dxus kusete yuuçxáa yaꞌmdukhwe iꞌkweꞌsx kakweꞌs txãa yuuçxáꞌs selpiiyaꞌ.
20 Iꞌkweꞌsxaꞌ nyafxiiaꞌ ew yũuna fxiꞌzewaꞌjaꞌs nwẽeseꞌjmée pkalte yuuçxáa fxiꞌzena ũsçxaꞌ,
21 kxteꞌ ¿kĩjkwe ewsa uy, txãꞌwẽ thaampaꞌteçxáa fxiꞌzena ũsçxaꞌ? Txãꞌwẽ fxiꞌzeteꞌ, naasáa uuwaꞌj yuuçxáak vxyaꞌ.
22 Nawa pkaluh txuteyãꞌjçxaꞌ, Dxusna selpiwaꞌthe iꞌkwe paꞌj, açaꞌ kxte yuuçxaꞌ ewsa vxyaayujuꞌíik. Txãꞌwẽ yũuçxaꞌ, kĩh pkal yuhwa jiꞌphmée fxiꞌzewaꞌjaꞌs yaꞌjypaꞌgaꞌk, saꞌ nmeh enteꞌ bagaçxte yuhwa pçuwaꞌjmée ĩtxi fxiꞌzewaꞌjaꞌswa yaꞌjiꞌphuna.
23 Txãꞌwẽmeꞌ, pkalaꞌ naasáa uuwaꞌjaꞌs yuuçxáak ũsuꞌ. Nawa Dxusaꞌ bagaçxte yuhwa pçumée ĩtxi fxiꞌzewaꞌjaꞌsku peesuꞌ, Kristo Jesus nweꞌwepaꞌga.
