Romanos 7:1-25
7 Yakhthẽꞌjweꞌsx maawa leyaꞌs jiisaꞌ peekx jii iꞌkwe leyaꞌ naa kiwete nasa nee ĩtxiyteçxáa jxkaajxaꞌ ãjawaꞌjsaꞌ.
2 Ptamuuçxa fxiꞌzeni leyaꞌs miiyajkxwe wakx: Uꞌy iimiꞌsaꞌ txajx nmiꞌ uu jaꞌdamée yuꞌ vxite yakh iimiꞌyaꞌ ãjãwaꞌjsameꞌ. Txãꞌwẽ txajx nmiꞌ uumey vxite piçthẽꞌj yakh utxaaçxa fxiꞌzeçxaꞌ, pkal yuusak yuꞌ jĩꞌk.
3 Nawa nmiꞌ uuniijũyãꞌjaꞌ, peena yuꞌ txãꞌwẽ jxkaahna nes yuuyaꞌ ãjaꞌçmeꞌ, açaꞌ txajx nmiꞌ uuniijũꞌ vxite piçthẽꞌj yakh iimiꞌyaꞌ ãjawaꞌjaꞌsku jxkaajaꞌ.
4 Iꞌkweꞌsxwa txãꞌwẽy Kristo tasxte utxaasáꞌ uusáa naꞌwẽsaiꞌkwe, açaꞌ leyaꞌ uusaꞌs jxkaajxaꞌ ãjawaꞌjsameꞌ. Açaꞌ ãçxhaꞌ iꞌkweꞌsxaꞌ Kristo uuçxa kiꞌ ĩtxi yuuk txajx nasaiꞌkwe, Dxus yuuçxáana selpiina fxiꞌzewaꞌjsa.
5 Txãꞌwẽ Kristo tasxte utxamey, kweꞌsx ewmée yũuyaꞌ yaakxnitx ley ptaꞌsxçxaꞌ: Ewmeꞌ jĩꞌk txãatxiçxáak wejx thaakwe yaakx wẽe yuu. Açaꞌ txãꞌwẽ yaakxpaꞌga Dxus kastigote uuwaꞌjçxáak yuu.
6 Nawa ãçxhaꞌ leyaꞌ kweꞌsxtxi thegwaꞌj jiꞌphmeꞌ. Txãa paꞌga ãçxhaꞌ Dxus Espiritu jxkaahniçxáꞌs nwẽeseꞌjwaꞌj jiꞌpthaꞌw, leyaꞌs yajkxmée.
Adx ũuste pkal ũssa
7 Txãꞌwẽteꞌ, leyaꞌ ewmeesana ¿sũjuꞌkweꞌ? Weh yuhwa txãꞌwẽmeꞌ. Txãa leyaꞌ naasáa kĩh txãꞌwẽ pkaltewa ptaꞌsxsaçxáꞌ. Ley paꞌgameewaçaꞌ, adxaꞌ jiyuwaꞌjmée neꞌtka yuꞌ kĩh txãꞌwẽ pkaltewa. Ley ptaꞌsxçxaꞌ: Vxite jĩitx kusaꞌj wẽena ewmée yũuwaꞌjaꞌs yajkxna fxiꞌzewaꞌjmeꞌ jĩmeewaçaꞌ, adxaꞌ jiyuwaꞌjmée neꞌtka yuꞌ txãꞌwẽ yaakxnisaꞌ pkaltewa.
8 Ley ptaꞌsxçxaꞌ: Txãꞌwẽ yaakxniꞌ ewmeꞌ jĩnijũk adx ũuste jweeíiçxáa ewmée yũu wẽenisaçxáa ũusuthe. Ley txãꞌjĩmeewaçaꞌ, pkalna sũhwaꞌj kasehwaꞌjmeeneꞌ yuꞌ.
9 Adxaꞌ nyafxiiaꞌ ley ptaꞌsxniꞌs jiyumey yuꞌ, yuuwemeesath sũjuꞌçxáath. Nawa ley ptaꞌsxniꞌs jiyunijũk jweeíiçxáa ewmée yũu wẽe yuu. Txãa paꞌgath isa yuuwesa neꞌtka sũhwaꞌjaꞌs jiꞌphu.
10 Txajuth isa ew jiyu, leyaꞌ nweꞌwepkaçxte, ewmée yũuwaꞌjaꞌs kçxhãaçxhaꞌjsaçxáak yuu adx yakhaꞌ.
11 Txãa paꞌgatey pkalaꞌ leypaꞌgaíiçxáak jweeíiçxáa çxhãçxhaçxa adxaꞌs Dxus kastigote uuwaꞌj vxit.
12 Txãꞌwẽçxawa, leyaꞌ ewmeesameꞌ, txãa paꞌgatey leyaꞌ kĩhtewa jxuka ew yũuna fxiꞌzewaꞌjaꞌsçxáak jxkaajaꞌ.
13 Txãꞌwẽ leyaꞌ ewsaçxaꞌ, ¿maꞌwẽkiꞌk adxaꞌs Dxus kastigote uuwaꞌj vxit? sũjuꞌth. Nawa ley txãꞌwẽ uuwaꞌj vxitmeꞌ. Ewmée yũu wẽenisak Dxus kastigote uuwaꞌj vxit. Isa ew jiyute yuꞌ, ley jxkaahni ewsaꞌs nwẽeseꞌjmée ewmée yũu wẽenisaçxáꞌs nwẽeseꞌphaꞌgak txãꞌwẽ pkal yuꞌ. Açaꞌ txãa paꞌgak nwẽeseꞌjnimeesaꞌ pkalna sũhna jiyunijũꞌ yuuwesa uuwaꞌj yaꞌyuꞌ.
14 Jiithaꞌw leyaꞌ Dxus yakh fxiꞌzewaꞌjaꞌs yuh ptaꞌsxiꞌk. Nawa Dxus yakh fxiꞌzemée ewmée yũuwaꞌjaꞌsçxáath yajkxna fxiꞌzeꞌ, naa paꞌga yuuwesaꞌ adxthu.
15 Adxaꞌ jiyuꞌçmeeth maꞌwẽçxa neꞌtka adxna selpiwaꞌjsa yuꞌsaꞌ kxtey yuumeeçxaꞌ, adxna ewmée vxitwaꞌjsa yuꞌsaꞌ kxtey yuꞌ.
16 Ley ptaꞌsxçxaꞌ ewmeꞌ jĩꞌk açaꞌ ewmeesatewa jiiçxath txãa ewmeesaꞌs íiçxáa kxtey yuꞌ, txãa paꞌgath leyaꞌ yuuwemeesana sũjuꞌ.
17 Peekxçxáa txãꞌwẽ yaꞌyuꞌçmeeneꞌ. Adx ũuste ewmeesa ũsna txãaneꞌ txãꞌwẽ ewmée yũuwaꞌjaꞌsçxáa kaaũusutheꞌjeꞌ.
18 Txãa paꞌgath adx ũusteꞌ kĩh yuhwa ewsa yuꞌ meena sũjuꞌ. Txajíiçxáa neꞌtka ewsaꞌs nwẽeseꞌj wẽeçxawa, kxtey yuuyaꞌ ãjaꞌçmée.
19 Naasáa selpiwaꞌjmeesaçxáꞌs kxtey yuuçxaꞌ, selpiwaꞌjsa yuꞌsaꞌ kxtey yuꞌçmeeth.
20 Naꞌjĩꞌth naꞌ: Adxna ewmée vxitwaꞌjsa yuꞌsaꞌ kxtey yuuçxaꞌ, peekxçxáa txãꞌwẽ yaꞌyuꞌçmeeneꞌ, adx ũuste ewmée kaaũusutheꞌjsa ũsna txãaneꞌ ewmeesaçxáꞌs kxtey yuuwaꞌjaꞌs kaaũusutheꞌjeꞌ açneꞌ txãꞌwẽ yaꞌyuꞌ.
21 Txajíiçxáak ewsaçxáꞌs kxtey yuꞌnja sũhtewa, ewmée yũuwaꞌjçxáa kasejeꞌ.
22 Adx yuꞌ, Dxus leyaꞌs kxtey yuꞌnja sũhtewa,
23 adx ũuste ewmeesa ũsna txãak ew yũuwaꞌjaꞌs kaaũusutheꞌjeꞌçmée. Txãasak adxaꞌs ewmeete yuuçxáa jxpeꞌjeꞌ.
24 Adxaꞌ seenaꞌ yuh ãhmeesath. Açaꞌ adxaꞌs ¿kim nweꞌwekx naa kakwe naꞌwẽ uuwaꞌthe yuuçxáa peꞌjna uꞌjweçaꞌ txãajũ?
25 Txãꞌwẽtewa Jesukristoꞌ pejka nweꞌwek txãajũ, txãa paꞌgath Dxusaꞌs wala weçxáꞌ. Txãꞌwẽmeꞌ, nyafxíi yuꞌ Dxusaꞌs selpiꞌnja sũhçxawa, adx ũuste ewmée yũuyaꞌ yaakxniçxáꞌsthu selpiꞌ.
