Romanos 8:1-39
8 Txãꞌwẽ Kristo Jesus nweꞌwepaꞌga, kweꞌsx kakwe ewmée yũuyaꞌ yaakxniꞌs nwẽeseꞌjmée naasáa Dxus Espirituçxáꞌs nwẽeseꞌjna fxiꞌzesaweꞌsx yakhaꞌ ãçxhaꞌ kĩh kastigo yuhwa meeaꞌ.
2 Txãa paꞌgatey Dxus Espiritu ĩtxi kaafxiꞌzeꞌjwaꞌjsaꞌ nweꞌwek txãꞌwẽ pkalteçxáa fxiꞌzenijũ, saꞌ uuwaꞌtheçxáa yãꞌj ũstewa txãajũwa nweꞌwek, Kristo Jesus yakh fxiꞌzepaꞌga.
3 Moises leyaꞌ kweꞌsx kakwe ewmée yũunijũ txuhdeyaꞌ ãjameeyãꞌtheꞌ, Dxusaꞌ txajx Nçxiꞌkaꞌs kaakh nasaa kakweꞌs ũsçxa. Açaꞌ txãa kakwe yakh kluuste uuçxak pejka nweꞌwe, pkalaꞌ peena yuꞌ ewmée yũuna kaafxiꞌzeꞌkhamen.
4 Txãꞌwẽ kluuste uuçxak kweꞌsxtxi nweꞌwe, kweꞌsx kakwe ewmée yũuyaꞌ yaakxniꞌs weh yuhwa nwẽeseꞌjmée Dxus Espirituçxáꞌs nwẽeseꞌtheꞌ, Dxus leyaꞌ kĩhtewa jxuka ew yũuna fxiꞌzewaꞌjaꞌsçxáak jxkaajaꞌ txãꞌsna pejka kxtey yuuyaꞌ ãjakahn.
5 Txãa paꞌgatx ewmée yũuna fxiꞌzenijũ nweꞌwenisaꞌ Dxus yakh fxiꞌzewaꞌjçxáꞌs yajkxna fxiꞌzeꞌ, naapkaçxhaꞌ ewmée ũus yaakxniꞌs yuꞌpthehnimeesaꞌ ewmée yũuwaꞌjaꞌsçxáatx paꞌpçxuna fxiꞌzeꞌ.
6 Açaꞌ ewmée yũuwaꞌjaꞌsçxáa paꞌpçxuteꞌ, Dxus kastigote uuwaꞌjçxáak kasejeꞌ. Nawa Dxus Espirituꞌs nwẽeseꞌtheꞌ, ũuste wẽt fxiꞌzewaꞌkh kasejeꞌ.
7 Txãꞌwẽ ewmée yũuwaꞌjaꞌsçxáa paꞌpçxusaꞌ, Dxusaꞌs açesataꞌ. Txãꞌwẽçxaíitx Dxusaꞌs nwẽeseꞌjeꞌçmée, saꞌ leyaꞌswa kxtey yuuyaꞌ ãjaꞌçmeetaꞌ.
8 Txãꞌwẽ ewmée yũuyaꞌ yaakxniꞌs yuꞌpthehnimeesaꞌ Dxus yakh iiwehdxi fxiꞌzeꞌçmeetaꞌ.
9 Nawa iꞌkweꞌsxaꞌ Dxus Espirituꞌs ũuste jiꞌphçxaꞌ, ewmée yũuyaꞌ yaakxniꞌs nwẽeseꞌjeꞌçmeeiꞌkwe, naasáa Dxus Espirituçxáꞌs iꞌkwe nwẽeseꞌjeꞌ. Açaꞌ Dxus Espirituꞌs ũuste jiꞌphmeesaꞌ Kristo jĩimeetaꞌ.
10 Nawa Kristoꞌ iꞌkweꞌsx ũuste fxiꞌzena ũsteꞌ, makwe kakwe yuꞌ pkalpaꞌga uuwaꞌjsatewa Dxusaꞌ iꞌkweꞌsxtxiꞌ kiꞌ ĩtxi vxituna, txãa paꞌgatey Dxusaꞌ iꞌkweꞌsxtxi yuuwemeesak vxit naa paꞌga.
11 Txãꞌwẽ Kristo Jesus uuniijũwa kiꞌ ĩtxi vxit-sa Dxus Espirituꞌ iꞌkweꞌsx ũuste fxiꞌzena ũsçxaꞌ, iꞌkweꞌsx uutewa kiꞌ ĩtxi vxituna petx kakwe yãꞌjçxa.
12 Txãa paꞌga Dxus Espirituçxáꞌs nwẽeseꞌjna fxiꞌzewaꞌjsathaꞌw, ewmée yũu wẽenisaꞌs nwẽeseꞌjwaꞌj jiꞌphmeethaꞌw.
13 Txãꞌwẽ ewmée yũu wẽenisaꞌs nwẽeseꞌjna fxiꞌzeçxaꞌ, bagaçxte yuhwa Dxus yakh fxiꞌzewaꞌjmeete uꞌjweneꞌkwe. Nawa Dxus Espiritu puꞌçxte ewmée yũu wẽenisaꞌs nwẽeseꞌjmée jxukate nvxihtçxaꞌ, bagaçxte yuhwa pçumée ĩtxi fxiꞌzewaꞌthe uꞌjweneꞌkwe.
14 Açaꞌ maawa jxukaysa Dxus Espiritu jxpeꞌjnisaꞌ Dxus luuçxtaꞌ.
15 Ew mjiyuwe: Iꞌkweꞌsxtxi jxpeꞌjsa Dxus Espirituꞌ nyafxíi ley maꞌwẽga seenaꞌ jxkaajaꞌ txãꞌwẽ seenaꞌ juunaꞌ jxkaahwaꞌjsameꞌ, wejxwa Dxus luuçx yuukahn puꞌçxsaçxáꞌ ũukhmée weçxana fxiꞌzekahn. Txãasaíik kweꞌsx ũuste naꞌwẽçxáa kaaũusutheꞌjeꞌ Dxusaꞌ kweꞌsx Tatana sũhwaꞌjaꞌs.
16 Txãasak Dxus Espirituꞌ kweꞌsx ũuste khẽeçxa kweꞌsxtxi kaaũusutheꞌjeꞌ Dxus luuçxthaꞌw sũhwaꞌjaꞌs.
17 Txãꞌwẽ Dxus luuçx yãꞌjaꞌ, Dxus jĩꞌs jxuka jxpaꞌgawaꞌjsathaꞌw. Dxusaꞌ txajx jĩi yuꞌsaꞌ jxuka Kristoꞌs ũsuna txãꞌsna kweꞌsxwa jxpaꞌgaꞌnjaꞌw Kristo yakh jaꞌdaçxah. Nawa Kristo yakh pxthaa yuuwaꞌjaꞌs jiꞌphuçxa yuuçxáa cielute txãꞌwẽ jxpaꞌgaꞌnjaꞌw Kristo yakh jaꞌdaçxah.
18 Cielute txãꞌwẽ seenaꞌ wẽt wẽt-saꞌs jxpaꞌgawaꞌjsathaꞌw, txãasa naa kiwete pxthaa yuunisaꞌs leꞌçxkuẽçxáa yuhwa yaakxwaꞌj jiꞌphmeeneꞌtkaꞌw sũjuꞌth.
19 Txãa paꞌgaíiçxáatx Dxus pheuꞌjçxa nvxiitnisa kĩjkĩhwa jxuka txakwe wala ũythasuꞌ, ãçxhíi yuꞌ txakwe wala nxusna ũsçxawa, Dxus luuçx jxukaysatx jxukate nweꞌwewaꞌj en seenaꞌ zhiçxkwe yũuwaꞌjaꞌs.
20 Txãꞌwẽ Dxus pheuꞌjçxa nvxiitnisa kĩjkĩhwa jxuka nxusna ũskahníi jxukatx ewmeeteçxaçxáa nvxiitni neeyũu. Txãasatx Dxus nweꞌwewaꞌj enaꞌs txakwe wala ũythasuꞌ, Dxus pheuꞌjçxa nvxiitnisaꞌ peekxçxáa txãꞌwẽ ewmeete neeyũumeetaꞌ, Dxusaꞌ maꞌwẽ nweꞌwewaꞌjaꞌswa jiiçxaneꞌ ewmeete weteyãꞌtheꞌ, txagaçxhíi yuꞌ nweꞌwemée kxtee nvxiht. Txãa paꞌgatx txakwe wala nxusuꞌ.
21 Açaꞌ Dxus nweꞌwewaꞌj en ãhteꞌ, txajũ yuuçxáꞌ kĩjkĩhwa jxuka ãçxh naꞌwẽ ewmeete ũstaꞌ txãajũ nweꞌweni yuutxna Dxus luuçx yakh jaꞌdaçxah.
22 Jiithaꞌw ãçxhíi yuꞌ kĩhwa jxuka wala yuh seenaꞌ pxthaa yuuna uꞌy nasate yaakasá naꞌwẽ pebeena ũstaꞌ.
23 Nawa Dxus pheuꞌjçxa nvxiitnisaçxáamée txãꞌwẽ pxthaa yuuna ũstaꞌ. Kweꞌsxaꞌ Dxus ũsni yuꞌsaꞌ jxuka jxpaꞌgawaꞌjsaçxa nyafxte ũsni txajx Espirituꞌs jxpaꞌgayãꞌthaꞌw. Nawa kweꞌsxwa jaꞌda pxthaa yuuna ũsthaꞌw, kweꞌsx kakwe kiꞌ ĩtxi yuuwaꞌj en ãhte Dxus luuçx jxukaysatx jxukate nweꞌwewaꞌj enaꞌs ũythasna.
24 Txãꞌwẽ kweꞌsx kakwe kiꞌ ĩtxi yuuwaꞌjsate íiçxáak Dxusaꞌ nweꞌwe, açaꞌ ĩtxi yuuwaꞌjaꞌs jiiçxathaꞌw ũythasuꞌ, txãꞌwẽ yuuwaꞌj en paꞌjyujuna sũhna.
25 Txãꞌwẽ ĩtxi yuuwaꞌjaꞌs jiimeewaçaꞌ, ¿kĩjxaꞌçxáa ũythasukxthaꞌw? Nawa txãꞌwẽ yuuwaꞌj en ãhmeyaꞌ, nawa eꞌsuçxáawa ãayujuna sũhnathaꞌw ũythasuꞌ.
26 Txãa paꞌgaíiçxáak Dxus Espiritu kweꞌsx ũuste khẽeçxa puꞌçxna kçxhãaçxhaꞌjaꞌ. Kweꞌsxaꞌ Dxus yakh maꞌwẽ puutx weꞌwewaꞌjaꞌswa jiimeeçxa sxiiguçtewa, Dxus Espirituꞌ kweꞌsx paꞌgate Dxus dxiꞌpte wala paꞌpçxuꞌk iiméh wala nxus yajkxna.
27 Açaꞌ Dxusaꞌ ũus yaakxniꞌs jiisaꞌ, txãasak Dxusaꞌ jiyu txajx Espiritu yaakxniꞌs, Dxus Espirituꞌ naasáa Dxus kxtey yuuwaꞌjaꞌsçxáak jxthãasuꞌ kweꞌsx jxukaysa paꞌgate.
Kĩh yuhwa txuhdemeetxna Dxus yakh fxiꞌzesatx
28 Kweꞌsxaꞌ nxuswaꞌj enaꞌs yaakxwaꞌj jiꞌphmeethaꞌw, txãa paꞌgatey en maꞌwẽsawa paꞌjçxawa, txãa yuꞌ jxuka selpiwaꞌjsaçxaçxáataꞌ Dxusna yaakxsaweꞌsx yuutxiꞌs txãꞌsaꞌ ew jiithaꞌw. Saꞌ txãaweꞌsxtxiꞌ kĩh yuuyaꞌ neꞌ Dxusaꞌ txhitxh txãa yuꞌsaꞌ kxtey yuuna.
29 Txãasaíik maaçxah neꞌta txajx tasxte paꞌjwaꞌjsa yuꞌ txãa yuutxiꞌ jxuka jiyuçxa nyafxíi entey txhitxh txajx Nçxiꞌk naꞌwẽy yuukahn, açaꞌ txajx Nçxiꞌk yuꞌsaꞌ nyakh nthẽꞌjsa yuuwaꞌjsak vxitçxa nvxiht.
30 Saꞌ txajx txhitxhnisatxiꞌs txajx tasxte nuypaꞌkh, saꞌ txajx tasxte paꞌjsatxiꞌs yuuwemeesak vxit, saꞌ yuuwemée vxitnisatxiꞌs txajx Nçxiꞌk yakh ih ũswaꞌjsak vxit.
31 Dxusaꞌ kweꞌsxtxiꞌs txãꞌwẽ seenaꞌ ew yũuteꞌ, ¿kim kweꞌsxtxiꞌ ewmeete nvxiht-yaꞌ ãjakx?
32 Dxusaꞌ txajx Nçxiꞌkaꞌs yuhwa ũçxhiꞌdxmée kweꞌsx jxukaysa paꞌgate kluuste uuçxa nweꞌwekahn ũsku. Txajx Nçxiꞌkaꞌs yuh ũsuççxaꞌ, kweꞌsx kĩjkwe peejini yuꞌsaꞌ wejx thaakwe thẽymée ũsuna.
33 Dxus txhitxhçxa yuuwemée vxitnisatxiꞌ, ¿kim ewmeesataꞌ jĩyaꞌ ãjakx?
34 Kristoꞌ kweꞌsxtxi nweꞌweyaꞌ uuçxa kiꞌ ĩtxi yuuçxa ãçxhaꞌ Dxus paçu juꞌgte ũsaꞌ kweꞌsx juꞌgu weꞌwe puꞌçxna, açaꞌ ¿kim kweꞌsxtxi ewmeete nvxiht-yaꞌ ãjakx?
35 Naꞌwẽꞌ açaꞌ Kristo peeygãanisatxiꞌs ¿kĩhçxáꞌ txajũ txuhdeyaꞌ ãjamaꞌk? Meeçxaꞌ nxuswaꞌj en, yaaçewaꞌj en, pkxuuwaꞌj en, wẽje en, sũpxçxáa nvxiitwaꞌj en, ũukhũukhte yuuçxáa fxiꞌzewaꞌj en, ikhte uuwaꞌj en kĩhwa thẽysa paꞌjana.
36 Txajíik Dxus librutewa txãꞌwẽ yũuwaꞌjaꞌs weꞌweçxaꞌ naꞌjĩꞌ:
Dxus yakh fxiꞌzepaꞌga ikhte uuwaꞌjsaçxáathaꞌw,
Piisxakuẽꞌs ikhyaꞌ jxũna uꞌjnisa naꞌwẽ kĩh entewa jĩꞌk.
37 Makwe txãꞌwẽ seenaꞌ yuuwaꞌj en paꞌthewa, txãatxiꞌ jxuka knaywaꞌjsathaꞌw, kweꞌsxtxi peeygãasa Kristo puꞌçxpaꞌga.
38 Txãa paꞌga Dxus peeygãanijũꞌ kĩh yuhwa txuhdeyaꞌ ãjawaꞌjsameꞌs ew jiith: uu en maꞌk yuu, meeçxaꞌ naa kiwega ĩtxi fxiꞌzewaꞌj maꞌk yuu, Dxus angelesweꞌsx maꞌtx yuu, eçxthẽꞌj angelesweꞌsx maꞌtx yuu, meeçxaꞌ eçxthẽꞌj yuu maꞌk yuu, meeçxaꞌ ãçxh naa ensu nakwe seenaꞌ yuuçtaꞌ txãa maꞌtx yuu, meeçxaꞌ vxite en seenaꞌsa yuhna txãa maꞌtx yuu,
39 meeçxaꞌ infxiernojuweꞌsx seenaꞌsa maꞌtx yuu, nawa Dxus peeygãanijũꞌ kĩh yuhwa txuhdeyaꞌ ãjameena, txãa paꞌgatey kweꞌsxtxi jxpeꞌjsa Kristo Jesus nweꞌwenisa yãꞌthaꞌw naa paꞌga.
