Romanos 9:1-33
9 Adx jiꞌj judiuweꞌsxtxi iiméh wala peeygãhna bagaçxtewa adx ũuste nxusna yuuçxáath fxiꞌzeꞌ.
2 Iꞌkweꞌsx paꞌgate adxaꞌ Kristo yakh ũswaꞌjaꞌs ivxiituteꞌ, iꞌkweꞌsx jxukaysa ewte neeyũuneꞌjwaçaꞌ, adxaꞌ peeygãaweete kxtey yuꞌnja sũjuꞌth.
3 Adxaꞌ iꞌkweꞌsxtxi txãꞌwẽth wala peeygãjaꞌ jĩçxaꞌ ĩsxiiçxa txãꞌjĩçmeeth, txãa paꞌgatey Kristo yakh fxiꞌzesaçxaꞌ Dxus Espiritu kaaũusutheꞌjniçxáꞌsthu weꞌweꞌ.
4 Adx jiꞌjweꞌsxaꞌ Dxus txhitxhnisataꞌ, naa paꞌga Dxus luuçxtaꞌ. Txãapaꞌgak Dxusaꞌ txãaweꞌsx ksxavxyte piꞌkxna ũsuꞌ eenaꞌ kweethna. Saꞌ maꞌwẽçxah puꞌçxwaꞌjaꞌswa puutx weꞌwek. Leynawa ũsku. Dxuus yatte maꞌwẽ yũuwaꞌjaꞌswa ptaꞌsxku. Saꞌ kiweꞌs jxuka yamuwaꞌjaꞌswa puutx weꞌwek.
5 Txãaweꞌsxaꞌ nyafxte Dxus txhitxhnisa Abrahan jiꞌthaꞌ, açaꞌ txãaweꞌsx jiꞌthek Kristo upxhna ũsuꞌ nasaa kakwe yakh. Txãa Kristoꞌ Dxusíiçxáak yuꞌ, bagaçxtewa tuutheꞌjni yuuwaꞌjsa.
6 Israelweꞌsxtxi Dxusaꞌ nweꞌweyaꞌ puutx weꞌwek txãꞌsaꞌ kxtey yuumée yuꞌ yuumeꞌ. Israel jiꞌj judiuweꞌsxaꞌ maaíi yuꞌ Dxus luuçx yuꞌçmeetaꞌ, txãa paꞌgaçxáak maaíi yuutxiꞌ kxtey yuumée.
7 Txãꞌwẽy Abrahan jiꞌjwa jxukay yuꞌ Dxus txhitxhnisa yuꞌçmeetaꞌ, txajíik Dxusíiwa naꞌjĩna ãate ptaꞌsx: Iidx nçxiꞌk Isaakte upxsaçxáa iidx jiꞌj adx txhitxhnisa yuutxna jĩꞌk.
8 Açaꞌ Abrahan jiꞌthaꞌw naa paꞌga Dxus txhitxhnisathaꞌw sũhwaꞌjaꞌs jiꞌphmeetaꞌ jxukay yuꞌ, naasáa Dxus puutx weꞌwenite upxsaçxáa Abrahan jiꞌthaꞌ.
9 Txãa paꞌgatey Dxusaꞌ naꞌjĩnak Abrahan yakh puutx weꞌwe: En ãhteꞌ, sxaweduꞌnja, açaꞌ Saraꞌ teeçx nçxiꞌk jiꞌphuna jĩk.
10 Txãꞌwẽ Isaak upxwaꞌjaꞌsçxáa weꞌwemée, Rebeka nçxiꞌk eꞌzsa upxwaꞌjaꞌswa weꞌwek. Txãaweꞌsx neyaꞌ Isaakku yuꞌ, kweꞌsx yaçgaweꞌsx.
11 Saꞌ txãa eꞌz nçxiꞌksa upxyuumeyna, Dxusaꞌ txhitxhku txãaweꞌsx maꞌwẽ yũuna fxiꞌzeniꞌs uymeyçxawa.
12 Txãasak Dxusaꞌ naꞌwẽ weꞌwe Rebekaꞌs: Nyakh yaçteweꞌsxaꞌ eꞌsteweꞌsxaꞌs selpisáa yuuna jĩnak weꞌwe. Ew jiyute yuꞌ, Dxusaꞌ ew yũusaçxáatx txhitxhwaꞌjsa yuꞌçmeꞌ, maatxwa txajx wedxni yuutxiꞌ txhitxhwaꞌjsaçxáak yuꞌ txãꞌwẽ yũuwaꞌjaꞌs kaajiyuꞌjnak makwe judiu jiꞌthewa pxakh eꞌzíi yuutxiꞌ txhitxhmée, teeçxsaçxáana txhitxh.
13 Açaꞌ Dxus librutewa txãꞌwẽyçxáa weꞌwena fxiꞌjni ũsaꞌ: Jakobaꞌs peeygãhth, nawa Esauaꞌs peeygãhmeeth jĩꞌk.
14 Dxusaꞌ ¿ewmeesaçxa maꞌk txãꞌwẽ maꞌwẽsatxwa txhitxhiꞌ? Ewmeesa yuꞌçmeꞌ.
15 Txãꞌwẽmeeçxaíik Moisesaꞌs naꞌjĩna weꞌwe: Adxaꞌ maꞌwẽsanawa peeygãjaçxáꞌnja, saꞌ txãꞌwẽy maꞌwẽsanawa puꞌçxhiçxáꞌnja jĩꞌk.
16 Txãꞌwẽ kweꞌsx kĩhçxáawa paꞌpçxuçxa Dxus peeygãaniꞌs yaꞌjypaꞌgaꞌçmeꞌ. Kweꞌsx kakweju kĩhwa paꞌpçxumeetewa Dxusaꞌ peeygãjaçxáak maatxwa.
17 Dxusaꞌ maꞌwẽsanawa peeygãjaçxáana, saꞌ txãꞌwẽy waꞌlwaꞌjsa yuꞌsaꞌ maꞌwẽsanawa kxtee nvxiituçxáana.
18 Txãasaíi Egipto kiwete jxkaahsaꞌs Dxus librute ptaꞌsxiꞌk naꞌjĩna: Idxaꞌs jxkaahwaꞌjsath vxit, adx kĩjxaꞌwa jxuka ãjaniꞌs iidxpaꞌga nasa jiyukahn, saꞌ adxaꞌs kimtewa naa kiwete jxuka jiyukahnthu idxaꞌs txãꞌwẽ yũu jĩꞌk.
19 Txãꞌjĩteꞌ, naꞌwẽ yaakineꞌga: Dxusíi neꞌ maꞌwẽ yũuwaꞌjaꞌswa vxituꞌ, açaꞌ kweꞌsxaꞌ yuuwemée neꞌtkaꞌw sũjuneꞌga.
20 Nawa ũus miiyajkx: Kweꞌsx maꞌwẽ yuuwaꞌjsatewa Dxusaꞌ jiiçxaneꞌ txãꞌwẽ yũꞌ, açaꞌ idxaꞌ txãꞌwẽ yaakxwaꞌj jiꞌphmeeg. Kiwe mitxhaꞌ ¿Kĩjxaꞌga adxaꞌs txãꞌwẽ umuꞌ? jĩsaate jiimeethaꞌw.
21 Mitxh umsaꞌ maꞌwẽ mitxhaꞌs umweçxtewa txajx wedxni yuꞌsaꞌ vxituçxáana, txãa kiweꞌs íiçxáa ewte selpiwaꞌjsa, vxiteꞌ ewmeete selpiwaꞌjsa.
22 Dxuswa nasatxiꞌ txãꞌwẽyku vxit. Saꞌ maaíitxiꞌs waꞌlpaꞌga kastigo seenaꞌsate ũswaꞌjsa vxitçxawa, peeygãhçxa makwe txaçxwa ũythasku dud yuꞌ kastigaĩmée.
23 Saꞌ vxite waꞌlsameetxiꞌs ẽe walate seenaꞌ zhiçxkwesaꞌs jxpaꞌgawaꞌjsak vxit, txãꞌsna jxpaꞌgawaꞌjsatxiꞌ nyafxíi enteyku txhitxh. Açaꞌ kxteeweꞌsxaꞌ kweꞌsxthaꞌw txajx peeygãanisa.
24 Dxusaꞌ maatxwa txhitxhwaꞌjsaçxáꞌ, txãasaíik maaíitxiꞌ judiu jiꞌjtxwa txhitxh, saꞌ judiu jiꞌjmée vxite nasatxwa txhitxhku.
25 Txãꞌwẽ maatxwa txhitxhwaꞌjaꞌs Oseas librute naꞌjĩnak weꞌweꞌ:
Adx txhitxhnimeesatewa, adx nasa vxituꞌnja.
Saꞌ adx peeygãanisameetewa, adx peeygãanisa vxituꞌnja jĩꞌk.
26 Saꞌ nyafxíi weꞌweçxaꞌ: Adx luuçxmée iꞌkwe jĩçxawa, txãa eꞌsuꞌ: Dxus ĩtxisa luuçx yuuneꞌkwe jĩna weꞌwena jĩꞌk.
27 Nawa Israelweꞌsxtxi weꞌweçxaꞌ naꞌjĩꞌk Isaiasaꞌ: Israelweꞌsx jiꞌjaꞌ kwet muse naꞌwẽ seenaꞌ kuhsaçxawa, kuhméeçxáa ewte neeyũutxna.
28 Ewsaꞌ kuhméeçxáa yuukahníi waꞌlsatxiꞌs dud ivxiituna Dxusaꞌ jĩꞌk.
29 Txãꞌwẽ yũuwaꞌjaꞌs weꞌweçxak Isaiasaꞌ naꞌjĩꞌ:
Dxus kĩhtewa jxuka ãjasa judiu jiꞌjtx mazkuẽ nvxihtmeewaçaꞌ,
Sodoma vxiteꞌ Gomoçxa çxhab naꞌwẽ jxukate vxituwaꞌjsa neꞌtkaꞌw yuꞌ jĩꞌk.
Yuuwemeesa yuuyaꞌ Kristoçxáꞌs jxpaꞌgani
30 Ãçxhaꞌ naꞌwẽ yũuniꞌs miiyajkxwe: Judiu jiꞌjmée vxite nasaꞌ yuuwemeesa yuuwaꞌjaꞌs pakwesameeçxawa, Kristoꞌs ũuste waꞌlmée jxpaꞌgasa yuupaꞌgaçxáa yuuwemeesatx yuuna paꞌj.
31 Naapkaçxhaꞌ Israelweꞌsxaꞌ yuuwemeesa yuuna paꞌjyaꞌ sũhçxa leyaꞌsçxáatx kxtey yuuyaꞌ yajkx. Nawa leyaꞌsçxáa yajkxçxaꞌ, yuuwemeesa yuuyaꞌ ãjameetaꞌ.
32 ¿Kĩh yuuçxata ãjamée? Yuuwemeesa yuuyaꞌ Kristoꞌs ũusuh jxuka yajkxçxa jxpaꞌgameetaꞌ naa paꞌgatx ãjamée. Kristoꞌs ũusuh jxuka yaakipkaçxte, leyaꞌsçxáatx yajkxna ũsuꞌ, txãasatx wala jxpuba.
33 Txãꞌwẽ jxpubawaꞌjaꞌs Dxus librute naꞌwẽ ptaꞌsxna fxiꞌjniꞌ:
Adxaꞌ Jerusalen çxhabte kwet kiꞌpuçthu, maaíitxiꞌ kaypubaꞌjçxa pẽtxwaꞌjsa.
Nawa maawa txãꞌsaꞌ jxpubasamée yuꞌ, nxuste neeyũumeetxna jĩꞌk.
