Santiago 1:1-27
1 Israel nasa doce jiꞌjsa naa kiwete msuuwa jxuka ũssatx weçxana fxiꞌjaçthu Jesukristo vxiteꞌ Dxusna selpisáa Santiago yaasesa.
Dxus yakh sxiigmée fxiꞌzewaꞌjaꞌs Dxus íiçxáak kaajiyuꞌjuꞌ
2 Adx yakhthẽꞌjweꞌsx, nxusmée meswe weçxweçxa yajkxna maꞌwẽsawa thẽysa vxyaatewa.
3 Mjiyuwe: Dxusaꞌs jweeíiçxáa çxhãçxha yajkxyaꞌ piyakahníiçxáak txãꞌwẽ thẽysaꞌ vxyaꞌ.
4 Açaꞌ thẽysa vxyaatewa ũukhnuwe, txãa thẽysaꞌ iꞌkweꞌsx kĩhte yuhwa sxiigmée jxuka Dxus yakh çxhãçxha fxiꞌzewaꞌjaꞌs kaapiyaꞌjsaꞌ.
5 Maawa Dxus yakh fxiꞌzewaꞌjaꞌs sxiiguuççxaꞌ, Dxusaꞌsíiçxáa mpẽjxwe, açaꞌ txãꞌ waꞌlmée maatxwa jxuka kaajiyuꞌjuna iꞌkweꞌsx pẽynite thaakwe.
6 Nawa kuh jwed yajkxmée ũsyujuna sũhna yuuçxáa mpẽjxwe. Txãꞌwẽmeꞌ, kuh jwed yaakxsaꞌ tee jwedteçxáa ũsmée ĩkh walaꞌs wejxaa kẽeseꞌjni naꞌwẽ yuutxna.
7 Açaꞌ txãꞌwẽ tee jwedçxáa yaakxsameꞌ Dxusaꞌ ũsuna sũhwaꞌj jiꞌphmeꞌ.
8 Maawa Dxusaꞌ pasmée wáanakx sũhna eꞌz jwed yajkxna pẽysaꞌ bagaçxte yuhwa Dxus yakhçxáa fxiꞌzeyaꞌ yuꞌ ãjameena.
9 Maa yakhthẽꞌjwa kĩhwa jiꞌphmeesaçxawa weçxweçxa yajkxna fxiꞌzewaꞌj jiꞌphaꞌ, Dxusaꞌ puꞌçxhina sũhna.
10 Açaꞌ txãꞌwẽy jiꞌphsawa txajx jiꞌphuni pçuwaꞌj en paꞌthewa, wẽtwẽt yaakxwaꞌj jiꞌphaꞌ, txãa paꞌgatey naa kiwete jiꞌphsaꞌ kitewa maꞌwẽga txaçxmeyna udxiꞌ txãꞌwẽysaçxáꞌ.
11 Sek açxaateꞌ, jxũth tasxaꞌ udxiꞌk, naapkaçxhaꞌ kitewa ubuꞌk, açaꞌ zhiçxkwesaꞌ kxtee pçuꞌk. Txãꞌwẽy naa kiwete jiꞌphsawa txajx jiꞌphuni yakh pçuwaꞌjsaçxáꞌ.
Ewmée yũuyaꞌ yaakxnisaꞌs Dxusaꞌ ũsuꞌçmeꞌ
12 Ewmeete kweeteꞌjwaꞌjsa vxyaatewa, txãꞌsaꞌ nwẽeseꞌjsameꞌ wala yuh wẽtwẽt yaakxwaꞌj jiꞌphaꞌ. Txãa paꞌgatey txãꞌwẽ yũusaꞌ bagaçxte yuhwa pçumée ĩtxi fxiꞌzewaꞌjaꞌs Dxus ũsyaꞌ neeyũuk txãꞌsaꞌ jxpaꞌgawaꞌjsaꞌ Dxusna nwẽeseꞌphaꞌga.
13 Maawa ewmeete weteçxaꞌ, Dxus neꞌ txãꞌwẽte wetewaꞌjaꞌs vxit sũhwaꞌjmeꞌ. Dxusaꞌ ewmeete wetewaꞌjaꞌs bagaçxte yuhwa ũsmeena. Txãꞌ ewmée yũusameꞌ.
14 Wejxwa peekx ũus ewmée yaakxniꞌs nwẽeseꞌphaꞌgaçxáatx ewmeete wetena paꞌjaꞌ.
15 Naꞌwẽ ewmée ũus yaakxnik pkalte kweeteꞌjeꞌ, açaꞌ txãa pkalku jweeíiçxáa walaana uꞌjçxa nmehteꞌ uuwaꞌjçxáa vxitna paꞌjaꞌ.
16 Yakhthẽꞌjweꞌsx mjiyuwe:
17 Naꞌwẽ Dxusaꞌ cielute eenaꞌ kweethsatx jxuka vxitku saꞌ txãꞌ ãçxpkaçx leꞌçxkweçxáa yuhwa yuꞌpthehmée ũsaꞌ, açaꞌ txajx tasxuçxaçxáa yuusataꞌ kĩhwa ewsa yuꞌ jxuka.
18 Txãak kweꞌsxtxi peeygãhçxa txajx yuwe isasaꞌs ptaꞌsxçxa ewte fxiꞌzewaꞌjaꞌs ũs, kweꞌsx nyafxte txãa yakh utxasáa yuukahn.
Dxus yuwe maꞌwẽ jxkaatheꞌ kxtey yuusaaçxáa Dxus yakh fxiꞌzesaꞌ
19 Txãa paꞌga adx yakhthẽꞌjweꞌsx kĩhwa ptaꞌsxni ewsa yuꞌsaꞌ bagaçxtewa waꞌlmée jxpaꞌgayaꞌçxáa meswe. Nawa weꞌwewaꞌj yuꞌsaꞌ ũus yajkxçxa jxpaꞌyajkx mweꞌwewe, saꞌ ũusçxawaꞌj yuꞌsaꞌ wejx wala mpaꞌyajkxwe.
20 Txãꞌwẽmeꞌ, ũusçxanisaꞌ Dxus dxiꞌpte ewmeesaꞌ, açaꞌ Dxusaꞌ txãꞌwẽsaꞌs jxpaꞌgaꞌçmeꞌ.
21 Txãa paꞌga kĩhwa ewmeesa nakwe wala pehnayaꞌ dudaꞌ txãa yuꞌsaꞌ jxuka nvxihtçxa, Dxus yuwe ewsa ptaꞌsxni yuuk txãꞌsçxáana waꞌlmée ũuste myuꞌakhwe. Dxus ptaꞌsxniꞌ iꞌkweꞌsx ũusaꞌs nweꞌweyaꞌ ãjawaꞌjsaꞌ.
22 Nawa Dxus yuwe maꞌwẽ jxkaatheꞌ txãꞌsaꞌ kxtey myuuwe. Wẽseꞌjsaçxáa yuꞌ yuunuwe. Iꞌkweꞌsxaꞌ jxpubanuwe. Ĩꞌneeçxáa wẽseꞌjnisaꞌ kxulsaꞌ.
23 Maawa txãꞌwẽ Dxus ptaꞌsxniꞌs kxtey yuumée ĩꞌneeçxáa wẽseꞌjsaꞌ, peekx dxiꞌpaꞌs speejute thegçxa
24 khũçxte uyçxawa txãa dudtey khukhmée uꞌjyãꞌjçxaꞌ maꞌwẽ peçxkanakx txãꞌwẽysaꞌ.
25 Nawa wẽseꞌjçxa peçxkanamée, Dxus ley ewte nvxiit-sa jxkaahniꞌs kxtey nwẽeseꞌjsaꞌ, jxpubamée wẽt fxiꞌzena Dxus jxkaahniꞌs nwẽeseꞌjna.
26 Maawa Dxus dxiꞌpte ewsath sũhçxawa maꞌwẽwa weꞌweniꞌs jxpaꞌyakxmeeçxaꞌ, peekíiçxáa jxpubasáa yuuna. Açaꞌ Dxus dxiꞌpte ew fxiꞌzesath sũhniꞌ kxul yuh yuuna.
27 Dxus dxiꞌpte kĩhte yuhwa jxpubamée ew fxiꞌzesaꞌ naꞌwẽ yũuwaꞌjaꞌ: Nmiꞌ jiꞌphmée puuplesatx puꞌçxna nxuste fxiꞌzesatx kvxiisxaꞌjna luuçx wakçxahtxwa txãꞌwẽy yũuwaꞌjaꞌ, saꞌ naa kiwete ewmeesa peekx ũuste khẽeweꞌsxte wala jxpaꞌyakxwaꞌjaꞌ.
