Santiago 2:1-26
2 Adx yakhthẽꞌjweꞌsx iꞌkweꞌsxaꞌ Jesukristo txakwe ewsana ũuste jxpaꞌgayãꞌjçxaꞌ, nasa maatxwa puutx jaꞌdaçxah txãa naꞌwẽçxaçxáa ew yũuwaꞌj jiꞌphiꞌkwe.
2 Meeçxawa naꞌwẽ wáa yuuneꞌkwe: Iꞌkweꞌsx pkhaakheni yatte teeçx piçthẽꞌj ropa wala ewsa athçxa, vxyuu bee sultxhikha paatçxa uꞌkana, naapkaçxhaꞌ vxitewa paꞌjana kĩhwa jiꞌphmée ropa ĩisxkwesa athçxa.
3 Açaꞌ txãa ropa ewsa ĩijxũusaꞌs ew jxpaꞌgaçxa kaçxni ewsate kaçx kajaneꞌkwe. Nawa kĩhwa jiꞌphmée pxthaakuẽesaꞌs yuꞌ: Ayte myuju meeçxaꞌ kxtee kiwete mkaaçx jĩneꞌkwe.
4 Txãꞌwẽ yũuçxaꞌ, puutx jaꞌdaçxah txãa naꞌwẽçxaçxáa ew yũusamée, vxite yuꞌsaꞌ açeyaakxsaçxa txãꞌwẽ yuuneꞌkwe.
5 Adx yakhthẽꞌjweꞌsx ew mwẽeseꞌjwe: Naa kiwete makwe kĩhwa jiꞌphmée pxthaakuẽesaçxawa txãaweꞌsxaꞌ Dxusaꞌs yuꞌ maꞌwẽçxáa yuhwa peçxkanamée ũuste yajkxna fxiꞌzeçxa Dxus jxkaahna ũsniteweꞌsxaꞌs Dxusíi ũsyaꞌ neeyũuk Dxusna yaakxsatxiꞌ txãꞌsna jxpaꞌgawaꞌjsataꞌ.
6 Txãꞌwẽtewa, iꞌkweꞌsx yuꞌ txãa jiꞌphmée pxthaakuẽesatxiꞌ weeçxçxa jiꞌphsaçxáatx iꞌkwe ew weꞌweꞌ. Nawa jiꞌphsaíiçxáa iꞌkweꞌsxtxi pkxuuçxa ¿khuẽs tasxsu kuutxaꞌjsamée wáatxna?
7 Txãaweꞌsxíiçxáa Kristo yaseꞌs ¿açeweꞌwesamée wáatxna?
8 Dxus ley maatewa thaakwesa weꞌweçxaꞌ: Vxite nasatxwa peeygãawaꞌjaꞌ idx maꞌwẽga yaꞌpeeygãjaꞌ txãꞌwẽyçxáa jĩꞌk. Açaꞌ txãꞌsaꞌ kxtey nwẽeseꞌjna fxiꞌzeçxaꞌ, ewsaçxah txãꞌwẽ yuuneꞌkwe.
9 Nawa maatxwa jxuka txãa naꞌwẽçxaçxáa ew yũumeeçxaꞌ, pkalte weteeneꞌkwe, saꞌ Dxus jxkaahni leyaꞌs yuuwesa yuuneꞌkwe, leyaꞌs jxuka nwẽeseꞌphaꞌgamée.
10 Maawa Dxus jxkaahni leyaꞌs ew yuh nwẽeseꞌjçxawa teeçx ahte leꞌçxkuẽçxáawa jxpubaana açaꞌ txãa paꞌgaçxáa Dxus jxkaahni ley makwetewa jxukak yuuwesa yuꞌ.
11 Miiyajkxwe wakx Dxus leyaꞌ naꞌwẽk weꞌweꞌ: Ptamsayãꞌjaꞌ vxitesa yakh pkal yuuwaꞌjmeꞌ jĩꞌk. Saꞌ nasanawa ikhwaꞌjmeꞌ jĩnak jxkaajaꞌ. Txãꞌwẽ yãꞌtheꞌ, nasa yuꞌs ikhmeeçxawa, vxitesa yakh yuꞌ pkal yuuwáana açaꞌ txãa paꞌgaçxáa Dxus jxkaahni ley makwetewa jxuka nwẽeseꞌjsamée yuuna.
12 Txãa paꞌga iꞌkweꞌsxaꞌ weꞌwewaꞌj maꞌk yuu, meeçxaꞌ ũus yaakxni yakhçxáa maꞌk yuu, nawa wala jxpaꞌyakxmeeteꞌ, iꞌkweꞌsxtxi nweꞌwesa leyaꞌ kastigaĩna.
13 Vxitetx peeygãhmée fxiꞌzesatxiꞌ txãꞌwẽy Dxuswa txãaweꞌsxtxiꞌ peeygãhmée kastigaĩna. Nawa vxitetx peeygãhna fxiꞌzesatxiꞌ Dxuswa peeygãhçxa kastigaĩmeena.
Dxusaꞌs yaakxsath jĩsaꞌ ãate kaavxyaꞌjaꞌjwaꞌjaꞌ
14 Adx yakhthẽꞌjweꞌsx miiyajkxwe: Maawa Dxus yakh fxiꞌzesath jĩçxawa ew yũuna fxiꞌzeni yakh kaavxyaꞌjaꞌjmeeteꞌ, txãꞌwẽ yuwejuçxáa weꞌweniçxáa ¿seelpimanx?
15 Naꞌwẽ ũus yaakiga: Maa yakhthẽꞌjwa ropa jiꞌphmée txãꞌwẽy ũꞌwaꞌjwa peejxsa ũsuna,
16 açaꞌ txãꞌwẽsaꞌs iꞌkweꞌsxaꞌ uyçxaꞌ: Pxthaaga yuuna fxiꞌzeꞌ. Nawa ãçxhaꞌ wẽemée kumamée ew mfxiꞌze jĩçxawa, txajx kakwete peejiniꞌs kĩhçxáawa kaatuꞌjmeeçxa yuwejuçxáa txãꞌjĩniꞌ ¿kĩhçxáꞌ selpiimaꞌk?
17 Txãꞌwẽ Dxus yakh fxiꞌzesath jĩsaꞌ ãate kaavxyaꞌjaꞌjwaꞌjaꞌ. Txãꞌwẽmeꞌ, yuwejuçxáa txãꞌjĩnisaꞌ kxul yujaꞌ.
18 Nawa naꞌjĩwáatxna: Idxaꞌ Dxus yakh fxiꞌzesaçxaꞌ, ¿maꞌwẽ kaajiyuꞌjukiꞌg Dxus yakh yuh fxiꞌzesan sũjkahn? Açaꞌ kĩhwa yũumeeçxawa mkaajiyuꞌj aan ãjaneꞌga. Açaꞌ adxaꞌ ew yũuna puꞌçxnisa yakhçxáa Dxus yakh fxiꞌzeniꞌs ãate kaavxyaꞌjaꞌjyaꞌ ãjaꞌnja jĩtxna.
19 Idxaꞌ teeçx Dxusçxáa cielute ũstewa txãꞌsaꞌ ew jiineꞌga ũuste. Txãꞌwẽ yũuniꞌ ew yujaꞌ. Nawa eçxthẽꞌjwa Dxus ũste ew jiitaꞌ idx naꞌwẽy. Txãꞌwẽçxaíitx ũukhna yayaꞌ.
20 ¿Maꞌwẽtega jiyuꞌçmée? Yuwejuçxáa Dxus yakh fxiꞌzesath jĩniꞌ kxul yuh yuuna, Dxus yakh fxiꞌzeniꞌs ãate kaavxyaꞌjaꞌjmeete yuꞌ.
21 Kweꞌsx yaçgathẽꞌj Abrahanaꞌ Dxusna yaakxniꞌs ãate kaavxyaꞌjaꞌjna txajx nçxiꞌk Isaakhaꞌs altalte ikhyaꞌwak yuꞌ. Txãꞌwẽ Dxusna yaakxniꞌs ãate kaavxyaꞌjaꞌphaꞌga, Abrahanaꞌs Dxusaꞌ yuuwemeesak vxit.
22 Ãçxhaꞌ ¿jiyugáꞌ? Abrahanaꞌ ãate kaavxyaꞌjaꞌkh Dxusna yaakxniꞌs saꞌ yuwejuçxáa Dxusna yaakiꞌth jĩmée, Dxusaꞌs ũusuh jxuka yajkxçxa ãate kaavxyaꞌjaꞌkh.
23 Abrahanaꞌ Dxusaꞌs ũusuh jxuka yajkxçxa kxtey yuupaꞌga, Dxus librute naꞌwẽk fxiꞌjni neeyũu: Abrahanaꞌ Dxus dxiꞌpte ewtek neeyũu jĩna. Saꞌ txãꞌwẽy Abrahanaꞌ Dxus namikuꞌ jĩnik neeyũu.
24 Ãçxhaꞌ jiyuiꞌkwe, yuwejuçxáa Dxusaꞌs yaakiꞌth jĩmée, Dxusna yaakiççxaꞌ ãate kaavxyaꞌjaꞌjwaꞌjaꞌ.
25 Uꞌy kazx yuusáa Rahabwa Dxusna yaakxniꞌs ãate kaavxyaꞌjaꞌkh naꞌwẽ yũuna: Txajx yatte piçthẽꞌj peetheguꞌna paꞌjsatx jxpaꞌgaçxaꞌ, txãa piçthẽꞌjtx nweꞌweçxa vxitee dxiꞌjsuk kaah txãa uꞌyaꞌ. Açaꞌ txãꞌwẽ ew yũupaꞌga txãꞌsaꞌ Dxus dxiꞌpte ewtek neeyũu.
26 Kweꞌsx kakwewa maꞌwẽga ũus jiꞌphmeeçxaꞌ uuníi yuꞌ, txãꞌwẽy Dxusna yaakiꞌth jĩnisaꞌ seelpimeesaꞌ, ew yũuna puꞌçxnisa yakh ãate kaavxyaꞌjaꞌjmeete yuꞌ.
