Santiago 3:1-18
3 Adx yakhthẽꞌjweꞌsx, maawa jxuka kaapiyaꞌjsaçxaꞌ jiisathaꞌw sũhçxa nuyweꞌwenuwe. Kaapiyaꞌjsaçxawa jxpaꞌyajkx mfxiꞌzewe. Txãꞌwẽmeꞌ, kaapiyaꞌjsaíiçxáa thaakwe yuuwesa yuꞌnjaꞌw.
2 Maa yuhwa jiisa yuꞌ meethaꞌw. Txãasa íithaꞌw kĩhtewa jxuka jxpubaꞌ. Nawa maawa txajx weꞌweniꞌs jxpaꞌyakxyaꞌ ãjana txãꞌ ewsaçxah txãꞌwẽ yuuna. Saꞌ txãꞌwẽ yũuçxaꞌ, txajx kakweꞌswa jxuka neeweyaꞌ ãjana.
3 Nwẽeseꞌkhanthaꞌw jiba yuwete fxrenu paatheꞌ, açaꞌ txãꞌwẽ yũuçxaꞌ jiba kakweꞌs ewsu kaajxaꞌ ãjaꞌthaꞌw.
4 Mjiyuwe, barko txakwe seenaꞌ walasaꞌs wejxa wala fxiisu jxũna uꞌjuçtewa, barkoꞌs kaahsaꞌ timon leꞌçxkwesajuçxáa tuphyna kuꞌlek kajaꞌ. Açaꞌ barko txakwe seenaꞌ walasaçxawa nwẽeseꞌjeꞌk maꞌwẽ kaathewa.
5 Txãꞌwẽy kweꞌsx kakwete thune wala leꞌçxkuẽesa jiꞌpthaꞌw, nawa seenaꞌ yuh walasa naꞌwẽ weꞌweyaꞌ çxhãçxhaꞌ. Txãꞌwẽy ipx makwe leꞌçxkuẽesaçxawa, yuꞌkh makwe seenaꞌ walatewa jxuka kabuna.
6 Kweꞌsx thunewa ipx naꞌwẽysaçxáꞌ, kweꞌsx kakweꞌs jxuka suwçxa naa kiwetewa jxuka ãawaꞌjsaꞌs kweꞌsx kakwete kiꞌpni jiꞌpthaꞌw. Bagaçxte yuhwa ũçxhamée infxiernote ipx naꞌwẽsaꞌ.
7 Yuꞌkh niimal vxiteꞌ ẽega fxuusa vxiteꞌ yuꞌgaweꞌsx eçx maꞌwẽ seenaꞌ juunaꞌsatxwa nasaꞌ kaastxajaꞌjyaꞌ ãjaꞌtx.
8 Nawa thune yuꞌsaꞌ kim yuhwa kaastxajaꞌjyaꞌ ãjaꞌçmeetaꞌ. Txãꞌ weneno ikhsaꞌ, txãa paꞌga kaastxajaꞌjyaꞌ yaꞌãjaꞌçmeꞌ.
9 Txãa thuneju Dxus kweꞌsx Tatanawa weçxana tuutheꞌjeꞌthaꞌw, saꞌ txãa thunejujxçxáa nasatxwa wẽesxuna ewmée açeweꞌweꞌthaꞌw Dxus takiꞌjçxa nvxiitnisatx.
10 Adx yakhthẽꞌjweꞌsx, txãꞌwẽ yuꞌ txãa yuwejujxçxáa Dxusna tuutheꞌjna kiꞌ açeweꞌwena yuuwaꞌjmeꞌ.
11 Teeçx yuꞌĩçteçxáa yuꞌ sxũusa kasehna kiꞌ yuꞌ yaasawa ¿kasehmaꞌk?
12 Adx yakhthẽꞌjweꞌsx, miiyajkxwe: Sxlala tasxaꞌ ¿uhçe yũnyaꞌ ãjamaꞌk? Açaꞌ uçe tasxaꞌ ¿sxlala yũnyaꞌ ãjamaꞌk? Txãꞌwẽy teeçx yuꞌĩçteçxáa yuꞌ eꞌz jwed kasejxaꞌ ãjaꞌçmeꞌ.
Naꞌwẽ yuunisaçxáa kĩhtewa wala jiisa yuunisaꞌ
13 Iꞌkweꞌsx ksxavxyte kĩhtewa wala jiisa ũsçxaꞌ, kĩhtewa puiimée zhiçxkwe fxiꞌzewaꞌjaꞌs mkaavxyaꞌjaꞌjwe. Txãꞌwẽ wala jiisaꞌ kĩhtewa juunaꞌ iiwejçx yajkxna fxiꞌzewaꞌjmeꞌ.
14 Nawa iꞌkweꞌsx ũuste ewmée yajkxçxa puiꞌnja sũhna yaakxsaꞌ txãꞌwẽ wala jiith sũhna iiwejçx yaakxwaꞌj jiꞌphmeꞌ. Txãꞌwẽ yaakxsaꞌ kĩhte yuhwa jiimeesa ĩsxiisa yuuna.
15 Txãꞌwẽ ewmée yũuwaꞌjçxáa ũusuthenisaꞌ Dxus kaaũusutheꞌjnimeꞌ. Naa kiweteweꞌsx peekx iꞌkweꞌsx ũus yaakxnisaçxáꞌ eçxthẽꞌj kaaũusutheꞌjnisa.
16 Mteewa iiwejçx yaakxwaꞌj kasehnijũꞌ puiiwaꞌjçxáak vxyaꞌ. Açaꞌ txajũyãꞌj yuꞌ jxuka suweena ewmeesaçxaçxáak kasejeꞌ.
17 Nawa Dxus kaaũusutheꞌjniꞌs jiꞌphsaꞌ kĩhtewa pkal yuumée fxiꞌzena, ewçxáa yũuna, puiimée nasatx peeygãhna, ĩsxiimée isa weꞌwena.
18 Açaꞌ puiimée ewçxáa yũuna fxiꞌzewaꞌjaꞌs paꞌpçxusaꞌ ew wẽt fxiꞌzewaꞌjaꞌs uyuuna.
