Santiago 4:1-17
4 Iꞌkweꞌsx pweꞌsx puii jxpakwena fxiꞌzeniꞌ ¿majũga kasejeꞌ? Iꞌkweꞌsx ũusujk kasejeꞌ, ewmée yũuwaꞌjaꞌs yaakxpaꞌga.
2 Vxitee jiꞌphunitx iiyamu wẽeçxawa ãjameeçxaꞌ, ikhyaꞌçxáa iꞌkwe yaakiꞌ. Vxite nasa kĩhçxáawa jiꞌphteꞌ, txãꞌsna kusaꞌjyaꞌ ãjameeçxaꞌ, puiiyaꞌçxáa iꞌkwe paꞌpçxuꞌ. Iꞌkweꞌsx peejiniꞌs Dxusna pẽjxmeeçxa iꞌkwe uyyaꞌ ãjaꞌçmée.
3 Pẽjxçxawa, jxpaꞌgayaꞌ yuꞌ ãjaꞌçmée iꞌkwe, txãꞌwẽ ewmeete kseelpiꞌjyaꞌçxáa pẽypaꞌga.
4 Dxus yakh weh yuhwa ewmée fxiꞌzesa mwẽeseꞌjwe: Naa kiweteweꞌsxaꞌs selpiina fxiꞌzesaꞌ Dxus yakh puiinisate jiimeewáꞌkwe. Maawa naa kiweteweꞌsx yakhçxáa wẽt fxiꞌzeyaꞌ yaakxsaꞌ Dxus yakh puiisak yuꞌ.
5 Txãꞌwẽtewa, kweꞌsx ũuste nvxiitnisa Dxus Espirituꞌ wala kçxhãaçxhaꞌjna ũsaꞌ jĩꞌk Dxus librute fxiꞌjnisaꞌ txãꞌ ĩsxiinisameꞌ.
6 Naapkaçxhaꞌ Dxusaꞌ jweeíiçxáak kweꞌsxtxi peeygãhçxa puꞌçxhiꞌ kĩhtewa. Txajíik Dxus libruꞌ naꞌwẽ ptaꞌsxiꞌ: Dxusaꞌ puꞌçxhiꞌçmeꞌ iiwejçx yaakxsatxiꞌ, nawa iiwejçx yajkxmée fxiꞌzesatxiꞌ wala peeygãhna puꞌçxhina jĩꞌk.
7 Txãa paꞌga Dxusçxáana nwẽeseꞌjçxa eçxthẽꞌjaꞌs nwẽeseꞌjmée çxhãçxha miiyajkxwe, açaꞌ eçxthẽꞌjaꞌ iꞌkweꞌsx tasxu ãjameeçxa txuteena uꞌjwena.
8 Dxus tasxte mutxaawe, açaꞌ txãawa iꞌkweꞌsx yakh utxaana. Pkalsaweꞌsx, ewmée yũuni kusetx miiyaatewe. Txãꞌwẽy Dxusaꞌsçxáa yajkxmée eꞌz jwed yaakxsa iꞌkweꞌsx ũusaꞌs miiyaatewe.
9 Saꞌ txãꞌwẽ ãhmeeneꞌtkaꞌw yũu sũhna miiyajkxwe, saꞌ sxijkana fxiꞌzepaꞌga ãçxhaꞌ ũꞌnewaꞌjaꞌs miiyajkxwe, saꞌ weçxana fxiꞌzepaꞌga ãçxhaꞌ nxuswaꞌjaꞌs miiyajkxwe.
10 Ãçxhaꞌ Dxus dxiꞌpte seenaꞌ yuh ãhmeekwesa myuuwe, açaꞌ txãꞌwẽ yũusaꞌs walasa vxituna Dxusaꞌ.
Yakhthẽꞌjweꞌsxtxi ewmée nuyweꞌweni
11 Yakhthẽꞌjweꞌsx, iꞌkweꞌsx pweꞌsx puutx ewmée yaꞌnuyweꞌwenuwe. Maawa yakhthẽꞌjaꞌs ewmée nuyweꞌwesaꞌ Dxus jxkaahni ley peeygãawaꞌjaꞌs weꞌweꞌk txãꞌsna weeçxsa yuuna. Açaꞌ Dxus jxkaahni leyaꞌs weeçxsaꞌ txãa leyaꞌs nwẽeseꞌjepkaçxte leyaꞌs jxkaahsa naꞌwẽsa yuuna.
12 Txãa paꞌgatey leyaꞌs nvxiit-saꞌ teeçx yuuçxáa ũsaꞌ. Txãaíiçxáa ewmeete nvxiitwaꞌjsaꞌ saꞌ txãaíiçxáa kiꞌ nweꞌweyaꞌwa ãjawaꞌjsaꞌ. Txãꞌwẽteꞌ, ¿idxçxáa jwee kimçxaga txãꞌwẽ yakhthẽꞌjweꞌsxtxiꞌ ewmée nuyweꞌweꞌ?
Kuskuskhẽꞌ kĩh yuuyaꞌwatewa jiimeek yaꞌfxiꞌzeꞌ
13 Ãçxhaꞌ iꞌkweꞌsx naꞌwẽ weꞌweꞌiꞌkwe txãꞌs mjiyuwe: Iꞌkweꞌsx weꞌweçxaꞌ: Ãçxh uꞌjmeeçxaꞌ kuskusaꞌ uꞌjweꞌnjaꞌw çxhab walan. Kxtee paꞌjçxa teeçx anxu mjĩiçxa vxyu wala knayna ũsuꞌnjaꞌw jĩꞌiꞌkwe.
14 Nawa kuskus fxiꞌzewaꞌjaꞌs jiimée iꞌkwe. Kweꞌsx ĩtxi fxiꞌzeniꞌ naꞌwẽsaçxáꞌ: Yuꞌ ahwa maꞌwẽga tudteçxáa vxyaaçxaꞌ ẽekhẽe pçuꞌ, txãꞌwẽysaçxáꞌ ĩtxi fxiꞌzenisaꞌ.
15 Txãa paꞌga naꞌwẽçxáa yaakxwaꞌjaꞌ: ĩtxi fxiꞌzewaꞌj Dxus peesuwáana açaꞌ maꞌwẽçxáawa mjĩꞌnjaꞌw jĩwaꞌjaꞌ.
16 Nawa txãꞌwẽ yajkxmée ũuste iiwejçxçxáa iꞌkwe yajkxçxa weꞌweꞌ. Txãꞌwẽ yajkxçxa weꞌwenisawa ewmeesaíiçxáꞌ.
17 Maawa ew yũuwaꞌjaꞌs jiiçxa ew yũumeeçxaꞌ, Dxus dxiꞌpte yuuwesa yuuna.
