Santiago 5:1-20
5 Ãçxhaꞌ wala jiꞌphsaweꞌsx mwẽeseꞌjwe: Iꞌkweꞌsx jiꞌphuni pçuute seenaꞌ yuh nxussa paꞌjana txãꞌsna yajkxçxa weyna mpebeewe.
2 Iꞌkweꞌsx jiꞌphunisaꞌ kĩh yuhwa seelpimeꞌ jxuka waꞌwaniꞌ, açaꞌ iꞌkweꞌsx ropa ewsawa txãꞌwẽy jxuka wes ũꞌniꞌ.
3 Iꞌkweꞌsx vxyuu beh vxyuu çxihmewa jxuka iz ũꞌniꞌ, açaꞌ txãa vxyu iz ũꞌnisaíiçxáa iꞌkweꞌsxtxiꞌ seenaꞌ wala ewmée nxus kiwete akhwaꞌjsaꞌ. Txãa vxyuꞌ iꞌkweꞌsxtxi ivxiituyaꞌwaꞌ ipx naꞌwẽ. Naa nmeh ensuꞌ iꞌkweꞌsx jiꞌphuniꞌs iiméh wala jxaaw iꞌkwe.
4 Iꞌkweꞌsx uuthasxte mjĩisa yuul pẽyniꞌs Dxus cielute jxkaahna ũssaꞌ wẽseꞌkh, açaꞌ iꞌkweꞌsx piuntxi yuulunisa txãꞌwẽ iꞌkweꞌsxtxi ewmeete nvxiht-yaꞌwaꞌ.
5 Iꞌkweꞌsxaꞌ naa kiwete jiꞌphunisa yakh wala wẽt weçxana fxiꞌzeꞌiꞌkwe tajkx naꞌwẽ niisxna txãa paꞌga ikhwaꞌj en paꞌjyaꞌwaꞌ.
6 Nasa ewmeesataꞌ jĩçxa iꞌkweꞌsxaꞌ ewteçxah ikheꞌiꞌkwe yuuwemeesatewa, açaꞌ txãaweꞌsxaꞌ kxulteçxáa uuwaꞌjaꞌs jiꞌphuꞌtx.
Thẽysa paꞌthewa nxusmée fxiꞌzeni, txãꞌwẽy ãçaꞌsa paꞌgatewa Dxus yakh puutx weꞌwena
7 Txãꞌwẽ pkxuuçtewa, yakhthẽꞌjweꞌsx nxusmée çxhãçxha miiyajkxwe, kweꞌsxtxi jxpeꞌjsa Jesukristo naa kiwete kĩhpkaçx. Maꞌwẽga mjĩisawa uhçxaꞌ kuçxwaꞌjmée ũythasuꞌ, nus en skhẽwteꞌ, ũꞌaꞌs wala pkhakheꞌnja sũhna.
8 Iꞌkweꞌsxwa txãꞌwẽy kuçx yajkxmée çxhãçxha yajkxna mũythaswe. Txãꞌwẽmeꞌ, kweꞌsxtxi jxpeꞌjsa Jesukristo kĩiwaꞌjaꞌ utxaaçaꞌ.
9 Yakhthẽꞌjweꞌsx, puutx ũusçxaweꞌwena fxiꞌzenuwe, Dxusaꞌ iꞌkweꞌsxtxi ewmeete nvxiitkahmen. Txãꞌwẽmeꞌ, yuwee kuꞌleꞌsa khuẽs paꞌjwaꞌj en utxa yãꞌj ũsaꞌ. Txãꞌ Dxusaꞌ.
10 Txãniitey Dxus yuweꞌs ptaꞌsxsaweꞌsxwa maꞌwẽta pxthaa yuuna fxiꞌzeçxawa Dxusçxáana yajkxna fxiꞌzeꞌ, txãꞌwẽy thẽysa nxuswaꞌj vxyaatewa, Dxusçxáana yajkxna mfxiꞌzewe yakhthẽꞌjweꞌsx.
11 Txãꞌwẽ pxthaa nxuste fxiꞌzesatxiꞌ Dxus yakh wẽt fxiꞌzesataꞌ jĩꞌthaꞌw. Job pxthaa nxuste wantãyna fxiꞌzeteꞌ, nmehteꞌ Dxusaꞌ wala peeygãhçxa puꞌçxniꞌs iiwẽseꞌjiꞌkwe iꞌkweꞌsxaꞌ. Dxusaꞌ peeygãasaꞌ, txãasa puꞌçxyaꞌ ũsaꞌ.
12 Adx yakhthẽꞌjweꞌsx, wala mpaꞌyajkxwe. Isasaꞌs jiiçxaꞌ jiith jĩwaꞌjçxáꞌ, saꞌ jiimeeçxaꞌ jiimeeth jĩwaꞌjçxáꞌ. Txãꞌwẽ Dxus uyte jiimeeth jĩwaꞌjmeꞌ, saꞌ cielu kiwe txãꞌwẽsatxwa kxsusna ptaꞌsxwaꞌjmeꞌ, Dxusaꞌ ewmeete nvxiitkahmen.
13 Iꞌkweꞌsx pweꞌsx maawa nxuste fxiꞌzena ũsçxaꞌ, Dxusçxáana neeweꞌwena meswe. Maawa wẽt fxiꞌzena ũsçxaꞌ, Dxusaꞌs weçxana memna meswe.
14 Maawa akate uuyaꞌ ũsçxaꞌ, ancianoweꞌsxtxi mpaꞌyawe, açaꞌ txãaweꞌsxaꞌ Dxus kusete neeweꞌweçxa aceite kiꞌputxna.
15 Txãꞌwẽ Dxusaꞌ puꞌçxhina sũhçxa oraĩteꞌ, ãçaꞌsa pkalaꞌ peltunãyni yuute, ãçaꞌsaꞌ ewte neeyũuna, txajũꞌ Dxusaꞌ nuykatxhina.
16 Dxus dxiꞌpte ãhmée yũuniꞌs puutx yaꞌmpeetaꞌsxwe, açaꞌ Dxusaꞌs yakhthẽꞌjweꞌsx neeweꞌweteꞌ, ãçaꞌsaꞌ katxhineꞌkwe. Dxusna nwẽeseꞌjsa txãꞌwẽ ũusuh jxuka Dxusna yajkxçxa neeweꞌweniꞌ, kĩhtewa jxuka puꞌçxwaꞌjsaꞌ.
17 Maꞌwẽga Dxus yuwe ptaꞌsxsa Eliaswa kweꞌsx naꞌwẽysaçxáaçxawa, nus paꞌkhamen Dxusna ũusuh jxuka yajkxçxa neeweꞌwe, açaꞌ nus paꞌjmeꞌ tekh anxu y medio ãhpkaçx.
18 Txajũꞌ kiꞌkin Dxusna neeweꞌwek nus kĩikahn, açaꞌ naa kiwete kiꞌ nus paꞌtheꞌ, uuthasx çxhãçxhatx.
19 5:19-20 Adx yakhthẽꞌjweꞌsx mjiyuwe: Iꞌkweꞌsx maawa Dxus dxiꞌpte jxpubateꞌ, jxpubasameꞌ txãa jxpubasaꞌs ewmée dxiꞌju kaasxweduꞌjuna. Saꞌ txãꞌwẽ yũuçxaꞌ jxpubasá ũus jxukate vxituwaꞌj yãꞌj ũstewa, nweꞌwesa yuuna, saꞌ maazkuẽe pkaltxiwa kaapeltunaĩꞌjsa yuuna.
20 —
