Tito 1:1-16
1 Adxaꞌ Dxusna selpisáa Pablo yaaseth, Jesukristo jxkaahnisa. Txãasa Jesukristo tasxte nuypaꞌjwaꞌjsath Dxus txhitxnisa ũstxna txãaweꞌsxtxi, kxah txãaweꞌsxwa Dxus yuwe isasaꞌs jiyutxna,
2 bagaçxte yuhwa pçumée ĩtxi fxiꞌzewaꞌjaꞌs jiꞌphuyaꞌ sũhna. Txãa pçumée ĩtxi fxiꞌzewaꞌjaꞌs Dxusaꞌ peesyaꞌ neeyũuk Dxus ĩsxiisamée naa kiwe meetey.
3 Txãasak txãa pçumée ĩtxi fxiꞌzewaꞌjaꞌs en ãhteꞌ, kaajiyuꞌj kweꞌsxtxi nweꞌwesa Dxusaꞌ adxna ptaꞌsxwaꞌjsa nvxihtçxa.
4 Naa kartaꞌs fxiꞌjaçthu Tito adx nçxiꞌk naꞌwẽsag naa paꞌga. Txãasa eꞌzsay txãa naꞌwẽçxaçxáa Dxusaꞌs jiisathaꞌw. Dxus kweꞌsx Tata vxiteꞌ kweꞌsxtxi nweꞌwesa Jesukristo txãaweꞌsx peeygãhçxa puꞌçxteꞌ, idxaꞌ ewçxáa wẽt fxiꞌzeneꞌga.
Kreta kiwete Tito mjĩini
5 Mar pxãhte Kreta kiwete idxaꞌs nvxihtthu adx maꞌwẽ neeweꞌweniꞌs kxtey yuukahn. Txãa paꞌgag idxaꞌ kxtee yuwe puutx weꞌwena jxãꞌjnimée neeyũuk txãatx pheuꞌjna jxãꞌjçxa çxhab iisa dxuus yatte jxkaahwaꞌjsa ancianoweꞌsx pakweçxa kiꞌpna yuuwaꞌjsa neeyũu.
6 Anciano neeyũuwaꞌjsaꞌ wala ew fxiꞌzesa yuutxna jxpubate yuꞌkxpehni yuuyaꞌmée. Saꞌ peekx nyuu yakhçxáa fxiꞌzesa yuuwaꞌjaꞌ. Açaꞌ txãaweꞌsx luuçxaꞌ Dxusaꞌs nwẽeseꞌjsa yuuwaꞌjaꞌ, txãꞌwẽ Dxusaꞌs nwẽeseꞌjmée ewmeetx yũuna fxiꞌzeꞌ jĩni yuuyaꞌmée.
7 Dxuus yatte jxkaahwaꞌjaꞌs jxpaꞌgasaꞌ Dxus mjĩiaꞌs thegwaꞌjsataꞌ, txãa paꞌga wala ew fxiꞌzewaꞌj jiꞌphtaꞌ. Vxitetx ũusçxa weꞌwena juunaꞌ thegna fxiꞌzewaꞌjmeꞌ. Tũuna, puii jxpakwena, vxyuuçxáꞌs yajkxçxa mjĩiwaꞌjmeꞌ.
8 Txãꞌwẽ yũumée, ew yũuwaꞌjçxáꞌs yajkxna fxiꞌzewaꞌjaꞌ, paꞌjsatx yat pkiꞌjna, ew ũus yajkxçxa weꞌwesa, Dxus dxiꞌpte ew fxiꞌzesa, Dxus yuuçxáꞌs selpisáa, maꞌwẽ fxiꞌzewaꞌjaꞌswa peekíi wala jxpaꞌyakxwaꞌjaꞌ.
9 Dxus yuwe isasa ptaꞌsxni yuuk txãate yuuçxáa txutemée fxiꞌzewaꞌjaꞌ, vxite jxpubasatx ewsaꞌs kaapiyaꞌjna kçxhãaçxhaꞌjyaꞌ, saꞌ Dxus yuwe isasaꞌs açeweꞌwesatxwa ew kaajiyuꞌjyaꞌ.
10 Txãꞌwẽmeꞌ, Dxusaꞌs açesa seenaꞌ wala ũstaꞌ, selpimeesaçxáꞌs weꞌwena nasatx kaypubaꞌjna. Nawa judiuweꞌsx wejx thaakwe txãꞌwẽ yũuna ũstaꞌ.
11 Txãaweꞌsx ĩsxiini yuweꞌs jxukate kweꞌweꞌjmée yuumeeteꞌ, yat iisa jxuka kaypubaꞌjna ũstaꞌ ewmeesaçxáꞌs kaapiyaꞌjna vxyuu knaywaꞌjçxáꞌs yajkxçxa.
12 Txajíik teeçx wala jxtuhthesa kxteeweꞌsx txajx nweꞌsxíiçxáatx naꞌjĩna weꞌwe: Kretaweꞌsxaꞌ wala ĩisxihtaꞌ, weesweesataꞌ, watxkuẽ nũꞌsaçxáataꞌ jĩnak fxiꞌj.
13 Txãꞌ isa yuh weꞌwek. Txãa paꞌga txãaweꞌsxtxiꞌ juunaꞌ mweꞌwe, kxah Dxus yakh jxpubamée jweeíiçxáa çxhãçxhana uꞌjçxa,
14 judiuweꞌsx ĩsxiina kwentuꞌjniꞌs nwẽeseꞌjmeetxna, saꞌ Dxus tasxuh txuteeçxa fxiꞌzesa jxkaahnitxwa nwẽeseꞌjmeetxna.
15 Maawa ũuste ewsaꞌs jiꞌphsaꞌ, ew yaakxwaꞌj yuuçxáꞌsku jiꞌphuꞌ. Nawa maawa ũuste ewsaꞌs jiꞌphmeesaꞌ, ewmeesa yuuçxáꞌsku yajkxna fxiꞌzeꞌ, txãa paꞌgatey txãaweꞌsx ũus yuu jxuka ewmeena naa paꞌga.
16 Dxusaꞌs jiithaꞌw jĩꞌtx, nawa Dxusaꞌs jiisa naꞌwẽ yuꞌ fxiꞌzeꞌçmeetaꞌ, naasáa seenaꞌ kazxsaçxáataꞌ, Dxusna ahçena kĩhwa ewsa yuꞌsaꞌ kaavxyaꞌjaꞌjyaꞌ ãjasameetaꞌ.
