Tito 2:1-15
2 Nawa idxaꞌ Dxus yuwe maꞌwẽ jxkaatheꞌ, txãꞌwẽyçxáa kaapiyaꞌjna mes.
2 Txãꞌwẽmeꞌ piçthẽꞌj thẽꞌjsaweꞌsxaꞌ kĩhtewa jxuka jxpaꞌyakx fxiꞌzewaꞌjaꞌs piyawaꞌj jiꞌphtaꞌ, kĩhsuwa kxtey yuuna, ũus yajkxçxa jxpaꞌyakx weꞌwena, Dxus yuuçxáꞌs ũusuh jxuka yajkxna, peeygãawaꞌjaꞌs peçxkanamée, makwe thẽysa paꞌthewa txãatxiꞌ nxusmée fxiꞌzena txãꞌwẽ piyawaꞌj jiꞌphtaꞌ.
3 Txãꞌwẽy uꞌy thẽꞌjsaweꞌsxwa peekíi wala jxpaꞌyakx zhiçxkwe fxiꞌzewaꞌj jiꞌphtaꞌ. Isameesaçxáꞌs wẽseꞌjçxa nuyweꞌwena fxiꞌzemée, tũunawa fxiꞌzewaꞌjsameetaꞌ, ewsaçxáꞌs kaapiyaꞌjna fxiꞌzewaꞌjsataꞌ.
4 Kxah knaꞌsa uꞌse iimiꞌsawa txãaweꞌsx nmiꞌtx peeygãhna fxiꞌzeyaꞌ piyaatxna, txãꞌwẽy peekx luuçxtxi peeygãhna,
5 peekíi wala jxpaꞌyakx kĩhtewa jxuka ewçxáa fxiꞌzena, txãꞌwẽy yattewa jxpaꞌyakx fxiꞌzena peekx nmiꞌtx nwẽeseꞌjna, kxah kim yuhwa Dxus yuweꞌs açeweꞌwemeetxna.
6 Txãꞌwẽy piçtakxweꞌsxtxiwa myuꞌkxpeh ew zhiçxkwe fxiꞌzekahn.
7 Saꞌ kĩhtewa jxuka idxaꞌ ew mfxiꞌze, kxah txãaweꞌsxwa iidx fxiꞌzeniꞌs uyçxaꞌ, txãꞌwẽy yũukahn. Kaapiyaꞌjniꞌswa leꞌçxkwe yuhwa fxiymée jxuka isasa yuuçxáꞌs mpeetaꞌsx.
8 Ew yuuçxáa yuꞌkxpehna mfxiꞌze, kxah kim yuhwa iꞌkweꞌsxtxi açesa ewmée nuyweꞌwewaꞌjaꞌs uymeeçxaꞌ, thaameetxna.
9 Selpisaatxwa myuꞌkxpeh, txãaweꞌsx patron jxkaahnitx kĩhtewa jxuka nwẽeseꞌjna waꞌlna ũusçxa pasmée ewçxáa yuukahn,
10 kĩh yuhnawa pesweemée ew yuuçxáa fxiꞌzekahn, kxah txãaweꞌsx ew fxiꞌzeniꞌs uyçxaꞌ, nweꞌwesa Dxus yuweꞌ wala zhiçxkwesa yuꞌga jĩnaçxáa weꞌwetxna.
11 Dxusaꞌ txajx peeygãaniꞌs kaavxyaꞌjaꞌkh txãꞌ maatxwa jxuka ewte nvxiitwaꞌjsaꞌ.
12 Dxus peeygãaniꞌ ewmeesaꞌs nvxihtna naa kiwete pkalte fxiꞌzewaꞌjçxáꞌs yaakxniꞌswa nvxihtçxa, peekíi wala jxpaꞌyakx fxiꞌzena Dxus yakh txutemée txãꞌs yuuçxáa selpiina fxiꞌzewaꞌjaꞌsku jxkaajaꞌ.
13 Txãꞌwẽy Dxus peeygãaniꞌ kweꞌsxtxi nweꞌwesa Dxus Jesukristo jxtuhthesa kĩjxaꞌ neeyũuk txãa en ãhpkaçx weçxana ũythasna ũswaꞌjaꞌsku jxkaajaꞌ.
14 Txãa Jesukristoꞌ kĩh ewmeejũwa kweꞌsxtxi nweꞌweçxa jxuka pkaltxi yaateçxa jxukate txãa jĩi vxit-yaꞌ kweꞌsx paꞌgate uuk. Ewsa yuuçxáꞌs jxuka kxtey yuu jxthãasçxak txãꞌwẽ yũu.
15 Txãꞌwẽ yũuwaꞌjaꞌs kaapiyaꞌjwaꞌj jiꞌphgu, kĩh yũuwaꞌjaꞌswa ũukhmée kçxhãaçxhaꞌjna, ewmée yũukahmén yuꞌkxpehna. Idxaꞌs kim yuhwa ahçena weeçxwaꞌj jiꞌphmeetaꞌ.
