Tito 3:1-15
3 Yakhthẽꞌjweꞌsxtxi kiꞌ mkaayakiꞌj maawa jxkaahsaweꞌsxtxi nwẽeseꞌjna, khuẽsweꞌsxtxiwa jxuka nwẽeseꞌjna kĩhwa ew yũuwaꞌj yuꞌsaꞌ jxuka kxtey yuukahn.
2 Kim yuhtxwa açeweꞌwewaꞌj jiꞌphmeetaꞌ, puii jxpakwena fxiꞌzewaꞌjsameetaꞌ wejxwa ũusuh jxuka ewçxáa yaakxwaꞌjaꞌs jiꞌphuwaꞌjsataꞌ nasa jxukaysatx peeygãhna.
3 Nyafxiiaꞌ kweꞌsxwa Dxusaꞌs jiimeeçxaꞌ nwẽeseꞌjsamée jxpubana naa kiwete ewmeesaçxáꞌs paꞌpçxuna puutx ewmeeçxáa yajkxna puutx yahçenaçxáa fxiꞌzesathaꞌw yuꞌ, seenaꞌ kazxsa.
4 Nawa kweꞌsxtxi nweꞌwesa Dxus peeygãani nasa jxukaysa jĩi vxyaaçxaꞌ, kweꞌsxtxi nweꞌwek.
5 Nawa kweꞌsx kakweju ew yũuna fxiꞌzepaꞌga txãꞌwẽ yũumeꞌ, naasáa peeygãhçxa yuuçxáak txãꞌwẽ nweꞌwe kweꞌsx ũuste pkaltxi yaatena. Txãa paꞌgak Dxus Espirituꞌ kweꞌsxtxi yuꞌpthehçxa kĩh pkal yuhwa jiꞌphmée kaafxiꞌzeꞌjeꞌ.
6 Nawa txãꞌwẽ nweꞌwesa Jesukristopaꞌga yuuçxáak Dxusaꞌ txajx Espirituꞌs jxuka ũs kweꞌsxtxi,
7 kxah Dxus dxiꞌpte yuuwemeesa yuuna paꞌjçxa pçumée ĩtxi fxiꞌzewaꞌjaꞌs jxpaꞌgakahnku txãꞌwẽ peeygãhçxa nweꞌwe.
8 Naꞌwẽ ptaꞌsxthu txãꞌ isa yujaꞌ, txãa paꞌga idxaꞌ txãatxiꞌ kaayakiꞌjna nes myuu, kxah Dxusaꞌs ũuste jxpaꞌgasaꞌ ewçxáa yũuna fxiꞌzetxna. Txãꞌwẽ ew yũuna fxiꞌzenisaꞌ wala seelpisaꞌ jxukaysatx.
9 Nawa puutx weꞌweni seelpimeesatxiꞌs mpaꞌyajkx, txãniiteyweꞌsx kimçxah neꞌta yuꞌ saꞌ kĩhçxah neꞌta yuusáa yuꞌ txãaçxáatx jiyu wẽena fxiꞌzenitx, vxiteꞌ Moises leysu weꞌweçxa puutx puii wẽenitx, vxiteꞌ puii jxpakwena fxiꞌzenitx. Txãꞌwẽsaꞌ kĩhte yuhwa seelpimeesataꞌ.
10 Iꞌkweꞌsx pkhaakheniteweꞌsx maaíiaꞌ isameesaçxáꞌs kaapiyaꞌjna kaypubaꞌjwaꞌjsa kasejewáana açaꞌ txãꞌsaꞌ paꞌyaçxa myuꞌkxpeh eꞌz uspkaçx. Nawa eꞌz us weꞌwetewa nwẽeseꞌjmeeteꞌ, pkhaakhenijũ kutxiꞌjçxa peena yuꞌ kaapaꞌjaꞌjnu.
11 Txãꞌwẽmeꞌ nasa txãꞌwẽ yũusaꞌ bagaçxtewa pkalte yuuçxáa fxiꞌzewaꞌjsaçxa txãꞌwẽ yuuna.
Titoꞌs weꞌweni kĩh yũuwaꞌjaꞌswa
12 Artemas meeçxaꞌ Tíkiko txãaweꞌsxtxi iidx tasxna adx kajaçpkaçxhaꞌ, idxaꞌ dud yuweeneꞌga Nikopoliste adx yakh puutx uyyaꞌ, nus en skhẽwpkaçx kxtee ũsuꞌnja sũjuꞌth.
13 Iidx ãjani yuꞌsaꞌ kĩhtewa jxuka mpuꞌçx yuwee puꞌçxsa Zenas vxiteꞌ Apolos txãaweꞌsx dxiꞌthe peejiniꞌs, kxah kĩhwa peejimée dxiꞌthe uꞌjwetxna.
14 Açaꞌ iidx txãꞌwẽ yũuniꞌs uyçxaꞌ, kweꞌsx yakhthẽꞌjweꞌsxwa selpiiyaꞌ piyaatxna ew yũuna peejinisu puꞌçxyaꞌ.
Pablo yuwe weçxaa kaahni
15 Adx yakh ũssa jxukaysa yuwe weçxaa kajaꞌtx. Açaꞌ idxwa yuwe meen weçxa kweꞌsx namikuweꞌsx Dxus yakh jxpubamée fxiꞌzesatx. Dxusaꞌ iꞌkweꞌsx jxukaysatx puꞌçxhina.
