PEꞌLA 02

Dxus yuwe kweꞌsxtxis esperanza ũsune

TAKH

Naa kiwete nasa seena thẽysa vxaan ũsta, txajĩi seena nxusna ũsta. Açyu, ¿idxa seena thẽysa jiꞌphga? Meeçxa, ¿ãçaꞌga txãa wee paꞌka? Meeçxa, ¿nasa nweꞌsx uu een paꞌka? Yapaapẽynega: ¿Maꞌwẽnwa ewumak naa nxusni? Txãa paapẽynisaꞌs Dxus eça pasuk txajĩi kũj yahkxnu.

1. ¿Kĩh esperanza kik ũsu Dxus yuwe?

Dxus yuwe naꞌjĩk kĩh yũuçxa naa kiwete txãw seena thẽysa ũstewaꞌj. Dxus yuwe weꞌwnisa idxaꞌs “esperanza vxiteꞌ eꞌsyu zxiçxkwesas” pesuna (lẽey Jeremías 29:11, 12). Txãa weꞌwnisa ãçxh naa eente wala puꞌçxhna ũsa, txãa thẽysaꞌs nxus skhẽwyã vxiteꞌ ewçxa yahkxwaꞌjaꞌs. Txaꞌwẽy kweꞌsxtxis wala kaapiyaꞌjak ĩtxi fxiꞌzewaꞌjaꞌs uyuuwatewaꞌj.

2. ¿Eꞌsyu kĩh yũuyã ũstewaꞌj maajĩkik Dxus eça?

Dxus eça naꞌjĩk eꞌsyu “uuwaꞌjmée yuuna. Ũꞌnewaꞌj enwa paꞌjmeena, nxus weꞌwewaꞌjwa paꞌjmeena, akasawa paꞌjmeena” (lẽey Apocalipsis 21:4). Naꞌw seena thẽysaꞌs nxus uꞌjn ũsta ãçxh txãa pxthaa yuuni, ewmeesa, wee, wẽje. Txãa peena yuhwa vxaameeyã. Dxus eça naꞌjĩk txãazkweesay ew wẽt wẽt zxiçxkwe fxiꞌzen ũsyunaꞌw bakaçxtewaꞌj naa kiwes paraíso yũunite.

3. ¿Idxaꞌs kĩh puꞌçxhikx Dxus yuwete konfiaya?

Naa kiwete nasa wala ũythasun ũsta ewmeesa pçuukhan, nawa maꞌw yũuwatewaꞌj jiimeeta. Dxus yuwe weꞌwni sxaakweesamee; txãjx weꞌwnis konfiaya ãjanaꞌw “een isatx Dxus librute” wejxkwe jiyuçxa (Hechos 17:11). Dxus eçaꞌs piyaçxa jiyunega ĩsxiijamak isamak weꞌwe.

WEJXKWEÇXA PIYAN UꞌJWEKA

Piyaka maii Dxus weꞌwnisaꞌs kxtey yũuna jĩk Dxus yuwe txãaꞌs. Lẽeyka txãa esperanza maꞌw puꞌçxhna ũski vxite nasatxis.

4. Dxus yuwe ũsu jĩk bakaçxtewaꞌj ĩtxi fxiꞌzewaꞌjaꞌs ew zxiçxkwesa

Meen lẽey Dxus yuwete txãa zxiçxkwesatxis yũun jĩk Dxus txãatx. ¿Idxa maa wejxkwe zxiçxkwesaꞌsga ũythãasu saꞌ, kĩh yũuçxa?

Naa versiculotxis meen lẽeywe, txajuꞌ naa paapẽynisatxis paswe:

¿Idxa maa sũhuꞌga? ¿Naa versículo nuyçxhãçxhamak kweꞌsxtxis? ¿Naa versículos idx nweꞌsxtxis vxiteꞌ idx namikutxis puꞌçxhitxki?

¿Naa kiwe ewute ĩtxi fxiꞌzen ũswẽjega?

MAA YUHWA...	JXUKASAY...
Maa yuhwa pxthaa yuumeeyã, thẽꞌjwaꞌjmeeyã, uuwaꞌjmeeyã (Isaías 25:8).	Naa kiwete jxukasay uyuuyã nweꞌsxweꞌsxtxis kiꞌkin ĩtxi yũun kaahte (Juan 5:28, 29).
Maa yuhwa ãçaꞌ wala puuple ũsmee yũuyã (Isaías 33:24; 35:5, 6).	Jxukasay piçtakxweꞌsx naꞌwẽy çxhãçxhasa yũun kaahanaꞌw, peena yuhwa ãçaꞌmeete (Job 33:25).
Maa yuhwa kaapxthaaꞌjan ũsmee yũuyã ewmeesa yakh (Isaías 32:16, 17).	Jxukasay ũꞌ pejxmeeyã, yat ewsa vxiteꞌ mjĩi ewsa jxpaꞌkayã (Salmo 72:16; Isaías 65:21, 22).
Puii walasamee yũuyã açaꞌ maa yuhwa pxthaa yuumeeyã (Salmo 46:9).	Jxukasay paz jiꞌphyunaꞌw vxiteꞌ ũukhmee fxiꞌzeyã (Salmo 37:11).
Maa yuhwa nxusnisa jiꞌphuneta txãaꞌs peena yuhwa yahkxmeeyã (Isaías 65:17).	Dxus naꞌw ew vxitya ũsa txãa yakhaꞌ jxukasay ew fxiꞌzenaꞌw (Salmo 37:29).

5. Dxus yuwe nasa fxiꞌzenis yuꞌphtheꞌjn ũsa

Txãw seena thẽysa paꞌj ũste naa kiwete, maiiyu nxusna ũsta saꞌ, maiiyu meh seena ũusxaçxan ũsta. Maiiyu kiweꞌs phewuꞌjunaꞌw sũhçxayu seena mjĩitx. Meen theg Dxus weꞌwnisa maꞌw puꞌçxhna ũsa nasatxis. Txãa VIDEUꞌS thegwe, txajuꞌ naa paapẽynisaꞌs paswe.

VIDEU: Ũꞌkwe nyaafxteya phewuꞌjweth naa kiwete injusticias (4:07)

Txãa videote Rafika, ¿kĩh yũuçxa kik ũusxaçxan ũsu jiyuga?
Naa kiwete injusticiatx Rafika yuꞌptheꞌjya ãjameene nawa, ¿txãaꞌs Dxus yuwe maꞌw kik puꞌçxh?

Dxus yuweꞌs lẽeyte puꞌçxhik ũusxaçxamee fxiꞌzeya yahkxwaꞌjmee thẽysa paꞌjte. Proverbios 17:22 vxiteꞌ Romanos 12:12te lẽeywe, txajuꞌ naa paapẽynisatxis paswe: