PEꞌLA 8
Dxusa pxthaayũunisaꞌs kaaskhẽwnçxa ũsna ¿kĩh yũuçxa?
1. Ewmeesa ¿maꞌw kik takh?
Dxusa een nvxitnis ptaꞌsxik, nasa jxkaahnisaꞌs kĩhwa ãjaꞌjnimeeyã pxthaayũunisaꞌs puꞌçxhya
Naa kiwete ewmeesa takhne eçxthẽꞌjyuꞌ uꞌy yaꞌskhwẽꞌyne ĩsxii. Angel ewsa neeyũu nawa isaꞌsate neeyũumeene (Juan 8:44). Eçxthẽꞌjyuꞌ txãsçxane wẽdx thaasu nawa Dxusaꞌsyuꞌ wẽdx thaasuçmeene. Eçxthẽꞌj ĩsxiine txãa uꞌyas txãayuꞌ Evaneyuꞌ, Dxusaꞌs nwẽseꞌjkhameen. Adan Eva jũꞌguneeyũu Dxusaꞌs nwẽseꞌjyamee. Nawa Adan wala ewmee txihtxh paꞌka pxthaayũun ũsthaꞌw, txaꞌwẽy uuwaꞌja een paꞌjane. Thegwe Dxus eçte Romanos 5:19 vxiteꞌ 2 Corintios 11:3.
Naꞌjĩne Evasyuꞌ Dxusaꞌs nwẽseꞌjmeenekwe. Eçxthẽꞌjyuꞌ wẽdxmeene txãa Dxus jxkaahnũste. Maii nasaweꞌsx eçxthẽꞌjaꞌsçxaa nwẽseꞌjsa ũsyã, txãjx jũꞌgu yũuçxa ahçen ũsyã. Kĩhwa Dxusaꞌsyuꞌ nwẽseꞌjmee ũsyã, txãjxçxa eçxthẽꞌjyũꞌ naa kiwete jxkaah ũsna. Thegwe Dxus eçte Juan 14:30 vxiteꞌ 1 Juan 5:19.
2. Dxus vxitnisa ¿ewmeesa jiꞌphyumanx?
Jxuka Dxus vxitnisa ewsaçxana. Jeuwa vxitne nasa ewsaꞌs, angeles txaꞌwẽy Dxusaꞌs nwẽseꞌjkhan (Deuteronomio 32:4, 5). Dxusa peesne kweꞌsxjĩi txihtxhwaꞌjaꞌs maa ewsatewa, maa ewmeesaꞌtewa. Ewsaꞌs txihtxhthaꞌw wala wẽdxçxa Dxusaꞌs. Thegwe Dxus eçte Santiago 1:13-15 vxiteꞌ 1 Juan 5:3.
3. Dxusa kaaskhẽwnçxa ũsna pxthayũunisaꞌs ãçxh pkaaçx ¿kĩh yũuçxa?
Jeuwa ãçxhyuꞌ kaaskẽwnçxa ũsna txãjx jũꞌgu ũsmeetewa, txãjx jxkaahnisaꞌs nwẽseꞌjmee ũstewa, nawa een ãjaꞌçyana nasa nwẽseꞌjsameetx pebawaꞌj ¿kĩh yũuçxa? Dxusa ptaꞌsxna ũsna maa jxkaahsayũuwa puꞌçxhya ãjaꞌmeeyã nasaweꞌsxaꞌs, nawa Dxusçxa puꞌçxhya ãjaꞌna (Eclesiastés 7:29; 8:9). Naa 6000 años eensu nasaweꞌsx jxkaahsa kĩhwa pebaya ãjaꞌmee ũsta wee vxiteꞌ puii walatx. Thegwe Dxus eçte Romanos 9:17.
Kweꞌsx Dxus jxkaahwaꞌja juꞌguyũuteçxa jxuka puꞌçxhina (Isaías 48:17, 18). Jeuwa dud jxunpaꞌjana pebawaꞌjaꞌs nasaweꞌsx jxkaahnisaꞌs. Dxus jxkaahwaꞌjaꞌs wẽdxsaçxa ĩtxi fxiꞌzeya ãjaꞌjnaꞌw naa kiwete (Isaías 11:9). Thegwe Dxus eçte Revelación (Apocalipsis) 11:15.
4. Kweꞌsxa Dxus mũythasnisaꞌs wala duddu jiꞌphnetkhaꞌw ¿maꞌw?
Eçxthẽꞌja naꞌjĩk kĩmyũuwa selpiiçmeeneta Dxusaꞌs wẽdxçxawa, nawa idxa txãa vxitna fxiꞌzenisayakh ptaꞌsxya ãjaꞌnega txãa ĩsxiinisaꞌs, saꞌ Dxus jxkaahwaꞌjaꞌsçxathaꞌw puꞌçxya wẽdxi. Thegwe Dxus eçte 2 Pedro 3:9 vxiteꞌ Revelación 12:10.
5. ¿Maꞌw yũuçxa Dxus juꞌgu yũute kxthaꞌw?
Kweꞌsx ĩtxi fxiꞌzewẽeçxa Dxus jxkaahnisaꞌs ũusyahknijuy txhitxhya ãjaꞌjnaꞌw
Nyaafxite Dxus isasaꞌs piyan kxtey yũun, Dxus eçte jxkaahnisaꞌs vxitnaꞌ txãwçxa jiꞌphunaꞌw txãjx wẽdxinisaꞌs (Juan 4:23). Kweꞌsxa ãjaꞌjnaꞌw ahçeya eçxthẽꞌj jxkaahnisaꞌs, kĩhwa puꞌçxhmee puiiwaꞌjaꞌs txaꞌwẽy nasa jxkaahnisaꞌs. Thegwe Dxus eçte Juan 17:14.
Eçxthẽꞌjꞌ iimeh çxhãçxhasa jiꞌphna txãjx jxuka nasatxis ewmeekaahyũujuꞌne, eçxthẽꞌjyũu wẽdxiçmeene Dxusaꞌs wãtwãt selpiite, maii uynisaweꞌsx vxiteꞌ nweꞌsxweꞌsx kweꞌsx ew vxitnisaꞌs ĩꞌnçxaneta npewsxihka (1 Pedro 4:3, 4). Nawa kweꞌsxa Dxusaꞌsthaꞌw selpiiwaꞌjaꞌs txhitxh. Ãçxhwa nasa ũsyã Dxusaꞌs nwẽseꞌjsa, saꞌ wẽdxna txãjx jxkaahnis txãa nasaweꞌsx wãtwãt fxiꞌzekan. ¿Wẽdxmaꞌkwe txãa weꞌsxyakh pkhakheya? Jxukasay ptaꞌsxya ãjaꞌjnaꞌw eçxthẽꞌja seena ĩsxiin ũsna, eçxthẽꞌjyuꞌ naꞌjĩne kimyuhwa thẽysa jiꞌphun ũsçxa Dxusaꞌs selpiimeeyã. Thegwe Dxus eçte 1 Corintios 6:9, 10 vxiteꞌ 15:33.
Dxusa wala wẽdxna ũsna jxuka nasatxis txãa jĩk ptaꞌsxi ewmeesaꞌs, vxiteꞌ pxthaayũunisaꞌs jxuka pebana, nawa jxukasay Dxusaꞌs nwẽseꞌjçxaa bakaçxtewa ĩtxi fxiꞌzenaꞌw naa kiwete. Thegwe Dxus eçte Juan 3:16.
