Jesus fxiꞌysaneyũu nasaweꞌsx naꞌw sameeneyũu, ẽewalatene ũssayuꞌ naa kiwete upxhmeeyũu kakwe vxasameene jiꞌphu (Juan 8:23). Dxusaꞌ nyaafxtey txãas khwẽꞌyne vxit, açyuꞌ Jesus jxuka neyas vxit puꞌcxhne. Dxus eça naꞌjĩk txãa “Dxus Nçxiꞌk teeçxçxáasatewa” (Juan 1:14, 18). Dxus eça ptaꞌsxik Jesus txaꞌwẽy yaseneyũꞌ “isasaçxáꞌs ptaꞌsxna”, txãayũꞌ ney paꞌkate weꞌwne. Thegwe Dxus eçte Proverbios 8:22, 23 vxiteꞌ Hebreos 1:2.

Dxusa jxkaahne txãjx zxikaꞌs naa kiwete. Txãasane piçthẽꞌj dxipnimeesa knaꞌsa Maria tutxhte nvxit naa kiwete upxhkan. Açyu Jesus jiꞌphuçmeene naa kiwete ney (Lucas 1:30-35). Jesus teekh jwẽꞌdne ptaꞌsxya kĩh: 1) Dxus isasaꞌs kaapiyaꞌjne, 2) kaapiyaꞌjak maꞌw selpiiwatewa wala thẽysa jiꞌphun ũsçxawa, Dxus yuwes maꞌw kaapiyaꞌjwatewa, 3) kweꞌsx paꞌkate “yadukneꞌ” txãjx çehk ĩtxi fxiꞌzenisaꞌs. Thegwe Dxus eçte Mateo 20:28.

Idxaꞌs nasa ewmeesa suthte saꞌ vxu ul pẽjxte kĩh txweteematx ¿idx nweꞌsxa vxu dukmatx idxpaꞌkate? Ũ, vxu dukhena idx nweꞌsxa idxaꞌs txweteekahn. Nasa kmajĩꞌjwa txweyte maꞌw ptxuuçtewa txwetemeeyã selpiiꞌjnçxanesyũunega, idx naamu jiyuçxa vxu dukhte txãwçxaa txweteena nasas. Adan jxuka txweyne pkhaalaꞌs vxitçxa nasatxis. Dxusa pkhaal jiꞌphmeene vxit Adan bakaçxtewa ĩtxi fxiꞌzekan, txaꞌwẽyçxane  nasa weꞌsxjĩiwa ũus yahkxni jiꞌphu açamee saꞌ thẽꞌjnkaaçxawa uuwajmeeneta yũu, nawa Adan Dxusaꞌs nwẽseꞌjmee paꞌka uune (Génesis 2:16, 17; 5:5). Txajĩiçxaa Dxus eça naꞌjĩk uu waja naa kiwete “ukane” Adan paꞌka. Saꞌ nasaweꞌsx pkhaalte jxuka txweyne uu wajaꞌs txaꞌwẽy, txajuꞌ kweꞌsxaꞌ peejxnetkhaꞌw txãjx yadukhnis. Thegwe Dxus eçte Romanos 5:12 vxiteꞌ 6:23.

Açyuꞌ ¿kim dukhwasakx pkhaal vxiteꞌ uuwajaꞌs vxitna kahte? Kweꞌsxa uuçxa dukhenetkhaꞌw pkhaal vxitnisaꞌs. Nasa ãhmeekwesanetkhaꞌw naayũu bakaçxyuhwa vxiteꞌ paꞌkateyuꞌ yadukhya ãjaꞌmeenaꞌw. Thegwe Dxus eçte Romanos 3:23.

Kweꞌsx ãhmeekwesa naꞌw meeneyũu. Txãa kĩhwa pkhaal jiꞌphmeeneyũu ewmeesaꞌs vxitmeene, Jesus kweꞌsx pkhaal vxitni paꞌkatene uu. Txãa paꞌkatey Dxusa kweꞌsxtxis wala wẽdxçxane, txãjx zxikas naa kiwete kaah. Txãjx neyaꞌs wẽdxçxane nwẽseꞌj txãjx ĩtxi fxiꞌzewajaꞌs dukhne. Thegwe Dxus eçte Juan 3:16 vxiteꞌ Romanos 5:18, 19.

Video thegwe ¿Kĩh yũuçxakik Jesús uu?

Jesus naa kiwete ũsiyuꞌ wala yuꞌçene ãçaꞌsaweꞌsxtxis vxiteꞌ uusaweꞌsxtxis kaũseꞌjne, vxiteꞌ nasa pxthaayũusayakhwa puꞌçxhne, eꞌsu maꞌw yũuwatewa nasa nwẽseꞌjsaꞌs ptaꞌsxna ũsna (Mateo 15:30, 31; Juan 5:28). Uuniyãjuyuꞌ Dxusa eenaꞌs kiꞌkin kaasxwẽduꞌjne, Jesusaꞌs kakwe vxaasamee ũsne (1 Pedro 3:18). Txajuꞌ Jesus mũythasna ũsune ney dukhan naa kiwes jxkaahwaꞌjaꞌs (Hebreos 10:12, 13). Ãçxha Jesus ẽewalajuy jxkaahn ũsna, txãs nwẽseꞌjsa yũu Dxus yuwes tuutheꞌjni ewsaꞌs ptaꞌsxna ũsta naa kiwete jxuka. Thegwe Dxus eçte Mateo 24:14 vxiteꞌ Lucas 1:32, 33.

Ewmeesaꞌs vxiteꞌ pxthayũunisaꞌs jxuka pebana çxhãçxha jiꞌphsana naayũu. Jesus çxhãçxhawajaꞌs ũuste jiꞌphçxayũu, nwẽseꞌjçxa Jxuka nasaweꞌsx txaꞌwẽy naa kiwe zxiçxkwete ĩtxi fxiꞌzeyã. Thegwe Dxus eçteꞌ 2 Tesalonicenses 1:6-8.