PEꞌLA 09

Dxus tasxte mutxaa puutx weꞌwnisa yakh

TAKH

¿Idxa Dxus puꞌçxhniꞌs peejxmag? Paapẽynisa jxthuthesa jiꞌphumag, nawa ¿pasya jiimenega? ¿Nxusna fxiꞌzeniꞌs kvxiisxãꞌjnisaꞌs peejxmag? ¿Jeuwa yakh wejxkwe utxaa wẽjega? Kĩh peejxna ũsçxawa Dxus yakh puutx weꞌwya ãjanaꞌw, nawa ¿Dxus yakh maꞌw yũuçxa puutx weꞌweguigk? ¿Dxus yakh puutx weꞌwte jxuka wẽseꞌjemaꞌk? ¿Idx Dxus yakh puutx weꞌwnisa maꞌw jiyuya ãjaguigk wẽseꞌjn ũstewaꞌj?

1. ¿Kimna puutx weꞌwwaꞌj jiꞌphkxthaꞌw? ¿Kĩh weꞌwe jiꞌphkxthaꞌw?

Jesús kaapiyaꞌk Jeuwasçxa puutx weꞌwwaꞌj jiꞌphnetkhaꞌw. Jesúsyu naꞌwne Dxus yakh puutx weꞌw: “Txãa paꞌga iꞌkweꞌsxaꞌ naꞌwẽçxáa Dxus yakh puutx weꞌwena naꞌjĩneꞌkwe: Kweꞌsx Tata cielute ũssa” (Mateo 6:9). Dxus yakh puutx weꞌwçxa wejxkwe namiku yũun kaahanaꞌw.

Dxus yakh puutx weꞌwçxa kĩjkĩhnawa jxuka peyĩya ãjanaꞌw. Nawa, Dxus wẽdxniçxas pẽhywaꞌj jiꞌphnetkhaꞌw. Dxus yuwe naꞌjĩk: “Açaꞌ txãꞌwẽ yaakxsatxiꞌ Dxusaꞌ pasuꞌk txajx jxthãasniçxáꞌs” (1 Juan 5:14). Jesús kaapiyaꞌjk maꞌw Dxus yakh puutx weꞌwya ãjakhan (Mateo 6:9-13). Kweꞌsxaꞌ Dxus yakh jxuka puutx weꞌwçxa, Dxusaꞌs weçxaya ãjanaꞌw, kĩhçxa vxiteweꞌsx jĩinwa pẽhywaꞌj jiꞌphnetkhaꞌw.

2. ¿Maꞌw Dxus yakh puutx weꞌwya ãjakxthaꞌw?

Dxus yuwe piꞌkik: “Idx ũusaꞌs phadeya Dxus dxipte” (Salmo 62:8). Dxus yakh puutx weꞌwçxa kweꞌsx ũus yahkxnisçxa ptaꞌsxwaꞌj jiꞌphnetkhaꞌw. Dxus yakh puutx weꞌwçxa susmathaꞌw weꞌwe, meeçxa susmeemathaꞌw weꞌw. Nawa Dxusyu wẽseꞌjena txãa puutx weꞌwnis. Maꞌw ũsçxawaꞌ Dxus yakh puutx weꞌweya ãjanaꞌw respeto kaavxaꞌjn. Kweꞌsxa Dxusaꞌs maa eentewaꞌj puutx weꞌwenaꞌw mtee ũsçxawaꞌj txaꞌwẽy.

3. ¿Kweꞌsx puutx weꞌwnisyu Dxusa maꞌw kik pasu?

Jeuwayu Dxus eçte maꞌwwaꞌj pasune kweꞌsx paapẽynisatxis. Dxus yuweꞌs lẽeyte jiimeetewa puꞌçxhina jiisa naꞌw yũukhan (Salmo 19:7; lẽeywe Santiago 1:5). Thẽysa jiꞌphte Jeuwayu ewsaçxana kaayaakiꞌjina. Txaꞌwẽy txãjx selpiisatxis iijxũuna kweꞌsxtxis puꞌçxhkhan.

WEJXKWEÇXA PIYAN UꞌJWEKA

Dxus yakh puutx weꞌwte, ¿maꞌw nweꞌwte kik Dxusa wẽdxi? ¿Kĩh yũuwaꞌj jiꞌphkxthaꞌw Dxus yakh puutx weꞌw wẽeçxa?

4. ¿Kĩh yũuwaꞌj jiꞌphkxthaꞌw Dxus yakh puutx weꞌw wẽeçxa?

¿Maꞌw yũute kweꞌsx weꞌwnis pasukx? Txãa VIDEUꞌS thegwe.

VIDEU: ¿Dxusaꞌ txãa yakh puutx weꞌwna ũssatxis jxukay wẽseꞌjemaꞌk? Peꞌla leꞌçxkwesa (2:42)

Jeuwayu txãsçxane weꞌwya yaꞌjxthãasu lẽeywe Salmo 65:2 txajuꞌ naa paapẽynĩsatxis paswe:

Idxa Dxus yakh puutx weꞌwçxa, ¿maa sũhuꞌga Dxusa pasyuꞌjuna?, ¿maꞌwtega txãꞌw yaatxi?

Dxus kweꞌsx puutx weꞌwnisaꞌs wẽseꞌjkhan, kweꞌsxyu txãjx weꞌwniꞌs kxtey yũuwaꞌj jiꞌphnetkhaꞌw. Lẽeywe Miqueas 3:4 vxiteꞌ1 Pedro 3:12 txajuꞌ naa paapẽynisatxis paswe:

¿Dxus kweꞌsx puutx weꞌwnis wẽseꞌjkhan kĩh yũuwaꞌj jiꞌphkxthaꞌw?

Jeꞌz ejercitosweꞌsxa Dxusaꞌs phẽyneta puiiwaꞌjaꞌs knaywa, ¿txãa puutx weꞌwnisa Dxusyu wẽseꞌjmaꞌk?

5. Kweꞌsx ũus yahkxnijuy Dxus yakh puutx weꞌwwaꞌjna

Maa nasaweꞌsx wala lxisaneꞌta txãꞌwyu, Dxusa wala wẽseꞌjne sũhuꞌneꞌta nawa, ¿txãw yũumanx? Lẽeywe Mateo 6:7 txajuꞌ naa paapẽynĩsatxis paswe:

¿Dxus yakh puutx weꞌwçxa txãaꞌs iiçxa weꞌwwa jiꞌphmag?

¿Eenisa zxiçxkwe yahkxçxa Dxusaꞌs weçxamathaꞌw? Een iisa txãꞌw yũuçxayu kiꞌsu iisa jxpubamee, Dxusa yakh puutx weꞌweneꞌga.

Ney txãjx nçxiꞌkaꞌs jxthãasune txãjx ũus yahkxnisaꞌs ptaꞌsxkhan, Jeuwayu txaꞌwẽyne jxthãasu. Kweꞌsx ũus yahkxnijuy ptaꞌsxya ãjanaꞌw

6. Dxus yakh puutx weꞌwnisayu Dxus peesnisana

¿Maꞌw yũuçxa yaꞌçxhãçxhakx, Dxus yakh puutx weꞌwte thẽysa paꞌjte? Txãa VIDEUꞌS thegwe.

VIDEU: Puutx weꞌwnisayu puçxhina yaçka uꞌjya (1:32)

Dxus yuwe naꞌjĩk: Dxus yakh puutx weꞌwçxa, ew fxiꞌzeya ãjaneꞌkwe. Lẽeywe Fxilipenses 4:6, 7 txajuꞌ naa paapẽynisatxis paswe

Dxus yakh puutx weꞌwte kweꞌsx thẽysas phewuꞌjmeena. Nawa, ¿maꞌw puꞌçxhik?
¿Kĩhga Dxus yakh puutx weꞌw wẽje?

¿Jiiga?

¿Amén jiinisayu kĩh kik weꞌwe? Txãꞌwaj jiinisana “así sea”. Txaanteyu Dxus yakh puutx weꞌwnisaꞌs kaba wẽeçxa amén jiinisaneyu (1 Crónicas 16:36).

7. Dxus yakh puutx weꞌwya een kutxiꞌj

Maa eenteyu thẽysa uꞌpçxa Dxus yakh puutx weꞌwya peeçxkananetkhaꞌw, ¿Jesús maꞌw kik yaatxi Dxus yakh puutx weꞌwnisas? Lẽeywe Mateo 14:23 vxiteꞌ Marcos 1:35 txajuꞌ naa paapẽynisatxis paswe:

¿Jesús Dxus yakh puutx weꞌw wẽeçxayu kĩh kik yũu?
¿Idxa maꞌw yũuçxa een kutxiꞌjiguigk Dxus yakh puutx weꞌwwaꞌj?

MAII NASAWEꞌSXA NAꞌJĨTX: “Dxus yakh puutx weꞌwnisas selpiimeena” jiineꞌta.

¿Idxyu maajiiguigk?

¿AYTE PAꞌJ KĨHKXTHAꞌW PIYA?

Kweꞌsx ũus yahkxnijuy Dxus yakh puutx weꞌwte, Jeuwa yakh wejxkwe utxaaya ãjanaꞌw. Txaꞌwẽy wẽt fxiꞌzewaꞌjaꞌs vxiteꞌ çxhãçxhawaꞌjaꞌs ũsuna Jeuwa jxthãasnis kxtey yuukhan.