PEꞌLA 14

¿Dxusyuꞌ kĩh jxpeejxki kweꞌsx weçxaniꞌs jxpaꞌkawaꞌj?

TAKH

Vxite peꞌlate piyathaꞌw: Dxusyuꞌ jxuka religiontxiꞌs jxpaꞌkaçmeeneꞌ. Nawa Dxusaꞌs weçxayaꞌ ãjanaꞌw, txãa ew yahkxkhan. Açyu, ¿Dxusyuꞌ maa religiontxi kik jxpaꞌka? (Santiago 1:27; nota). Theguka: Dxus eçaꞌ maꞌwka kaapiyaꞌja.

1. Dxusaꞌs weçxawaꞌjyuꞌ mteeka ptaꞌsxiꞌ

Dxusaꞌs selpiiwaꞌjyuꞌ Dxus eçte ũsna. Jesús Dxusaꞌs naꞌjĩne: “Iidx kaapiyaꞌjniꞌ kaypubaꞌjwaꞌjsameꞌ” (Juan 17:17). Maii religionweꞌsxyuꞌ Dxus weꞌwniꞌs yaatxiçmeeneꞌta. Txãaweꞌsx yahkxniꞌsçxa kaapiyaꞌjaneꞌta, Jeuwa jxkaahniꞌs nwẽseꞌjmeeneꞌta vxiteꞌ wẽdxiꞌçmeeneꞌta (lẽeywe Markos 7:9). Nawa, txãjx jxkaahniꞌs kxtey yuute Jeuwayuꞌ wala weçxane.

2. ¿Dxusaꞌs maꞌw weçxawaꞌj jiꞌphkxthaꞌw?

Jeuwa vxitsana, txãaçxane weçxa jxthãasu (Apocalipsis 4:11). Kweꞌsxyuꞌ Dxusaꞌsçxa weçxawaꞌj jiꞌphnetkhaꞌw. Kĩh vxite yuhwa iijxũumee Dxusaꞌs weçxawaꞌj (lẽeywe Isaías 42:8).

Dxusna weçxawaꞌjyuꞌ kweꞌsx ĩtxi fxiꞌzeniꞌs çehk yũuwaꞌj jiꞌphnetkhaꞌw (Romanos 12:1). Dxus yuweꞌs wẽseꞌjsayuꞌ ptaamsawa ewneꞌta yũun fxiꞌze. Dxus yuwe maꞌwne jxkaaha txaꞌwẽy kazx yũuwaꞌj jiꞌphuçmeeneꞌta vxiteꞌ tũusmeeneꞌta. Dxus jxkaahniçxaꞌsneꞌta kxtey yuun fxiꞌze. a

3. ¿Dxusaꞌs nwẽseꞌjsaꞌ yakh, kĩh yũuçxa Dxusaꞌs weçxawaꞌj jiꞌphkxthaꞌw?

Kiꞌsu iisa pkhakheçxa memna Dxusaꞌs weçxanaꞌw (Salmo 111:1, 2). Dxusyuꞌ pkhakhe jxthãasuꞌk, txãꞌwne wẽdxi (lẽeywe Salmo 104:33). Pkhakheteyuꞌ puꞌçxhina wãt fxiꞌzeyaꞌ bakaçxtewa, txaꞌwẽy uyuunaꞌw nuyçxhãçxhaꞌjwaꞌjaꞌs.

WEJXKWEÇXA PIYAN UꞌJWEKA

Theguka, Dxusyuꞌ kĩh yũuçxa kik imágenes weçxa jxthãasuçmee, ayte uyuunaꞌw maii yuꞌkxpehnisaꞌs Dxus weçxawaꞌj.

4. Imagen iijxũute ewmeena Dxus weçxawaꞌj

Dxusaꞌ imágenes wẽdxiꞌçmee, ¿maꞌw yũuçxa jiyukxthaꞌw? Txãa VIDEUꞌS thegwe, txajuꞌ naa paapẽynisatxis paswe.

VIDEU: ¿Dxusaꞌ maa suhũꞌ kik dxus ĩtximeesatxis selpiiwaꞌjaꞌs? (3:26)

Txaanteyweꞌsxaꞌ ídolo iijxũute, ¿Dxusaꞌ kĩhka yũu?

Maii nasaweꞌsxaꞌ imágenes iijxũuçxa Dxus yakh utxaaneꞌta suhũneꞌta. Nawa, ¿isayumanx? Lẽeywe Éxodo 20:4-6 vxiteꞌ Salmo 106:35, 36, txajuꞌ naa paapẽynisatxis paswe:

¿Nasaweꞌsx kĩh imágenes iijxũun ũstxki?
Jeuwayuꞌ imageneste, ¿kĩh kik yaatxi?
Imágenes iijxũute, ¿idxaꞌ maꞌwga yaatxi?

5. Dxusnaçxa selpiina ũsçxa ĩsxiinisaꞌs peenayuꞌ kreĩmeenaꞌw

Theguka Jeuwayuꞌ maꞌw kik weçxa jxthãasu kweꞌsxtxiꞌs puꞌçxhina ĩsxiinisaꞌs kreĩyaꞌmee Txãa VIDEUꞌS thegwe.

VIDEU: Isasaꞌs jiyuçxa wala wãt weçx weçxa fxiꞌzeth (5:16)

Lẽeywe Salmo 91:14, txajuꞌ naa paapẽynisatxis paswe:

Jeuwaꞌsçxa peeykãhn vxiteꞌ selpiin ũste, ¿txãayuꞌ kweꞌsx paꞌkate kĩh yũukx?

6. Dxusaꞌs weçxathaꞌw pkhakhen ũsçxa

Pkhakheçxa paapẽynisaꞌs pasçxa Jeuwaꞌsthaꞌw weçxa, vxiteꞌ nuyçxhãçxhaꞌjthaꞌw kweꞌsx yakhthẽꞌjweꞌsx yakh. Lẽeywe Salmo 22:22, txajuꞌ naa paapẽynisatxis paswe: