Uu een paꞌjte wala nxuswa een jiꞌphuthaꞌw, txãa jĩi Dxus yuwe naꞌjĩꞌk uunisaꞌs enemigona jĩꞌk (1 Korintios 15:26). Peꞌla 27te idxyuꞌ piyag, txãa enemigoꞌs Dxusyuꞌ pebayawana. ¿Nasa uuniyãsayuꞌ kĩh yũukx? Naa peꞌlate wejxkwe ew jiyuneꞌga, txãa Dxus weꞌwni wala zxiçxkwesa uꞌpna. Jeuwayuꞌ nasa wala kũjsatx ĩtxi fxiꞌzewaꞌjaꞌs kaasxwẽduꞌjuna saꞌ naa kiwete weçxan fxiꞌzeyaꞌ ewuutxna bakaçxtewa. Txãa weꞌwnisa, ¿isayuꞌmanx? ¿Cielute meeçxaꞌ naa kiwete ĩtxi yũumatx?

1. ¿Jeuwayuꞌ kĩh yũuꞌk uusaweꞌsxtxiꞌs?

Jeuwa uusatxiꞌs kaasxwẽduꞌj wẽjene ĩtxi fxiꞌzekhan. Teeçx piçthẽꞌj Job yaasesayuꞌ fe wala jiꞌphsane yũu, adx pedani ũste Jeuwayuꞌ peçxkanameena adxaꞌs paꞌyate adxyu pasuꞌjn jĩne (lẽeywe Job 14:13-15).

2. ¿Maꞌw jiyukxthaꞌw uusaweꞌsx kiꞌ ĩtxi yuun kaahjxawatewa?

Jesusyuꞌ naa kiwete ũste Jeuwayuꞌ puꞌçxhne uusaweꞌsx ĩtxi yuukhan, txaꞌwẽy teeçx luuçx 12 anxuꞌs jiꞌphsawa ĩtxi fxiꞌzeniꞌswa kaasxwẽduꞌjk vxiteꞌ viuda nçxiꞌkna txaꞌwẽy (Markos 5:41, 42; Lukas 7:12-15). Jesús namiku uune Lazaroyuꞌ pahz een yakh pedani ũsuꞌ, nawa Jesusyuꞌ Dxus yakh puutx weꞌwçxa naꞌjĩne: “Lasaro, txãajũ mkaaseh jĩçpkaçxhaꞌ”, uusa ĩtxi yuuçxa kaseꞌjek, açyu Jesús ĩtxi vxitne Lazaroꞌs (Juan 11:43, 44). ¿Kiꞌ ĩtxi yuute txãjx nweꞌsxweꞌsx wala weçxa yũumatx?

3. ¿Nweꞌsx uute kiꞌ ĩtxi yuumatx?

Dxus yuwe naꞌjĩꞌk: “Uusaaweꞌsxaꞌ kiꞌ ĩtxi yuutxna” (Hechos 24:15) Jesusyuꞌ nasatxiꞌs kaaĩtxi yuute cielute ũsuçmeeneꞌta (Juan 3:13). Naa kiwete ĩtxi yuuçxa, txãꞌw yũuçxaneꞌta wala weçxan ũsuꞌ. Açyu txeçxhmee peejxna Jesús txaꞌwẽy yũuwaꞌj. Txãꞌw yũuna uusaweꞌsxtxiꞌs ĩtxi yuun kaahayã, txãa eensu maꞌwne ĩtxi yuu kaah, txaꞌwẽyçxa naa kiwete jxuka paraisu yũute. Dxus uusaweꞌsxtxiꞌs jxuka yahkxte vxiteꞌ peçxkanisawa jxuka ĩtxi yuutxna. Jesús naꞌjĩne: “Uusaaweꞌsxaꞌ pedaniijũ ĩtxi yuuçxa kasejetxna” (Juan 5:28, 29).

 WEJXKWEÇXA PIYAN UꞌJWEKA

4. Jesús nasaweꞌsxtxiꞌs kaa ĩtxi yuuyaꞌ ãjane

Wejxkwe mjiyu, Jesús kĩh kik yũu txãjx namiku Lazaro paꞌka. Lẽeywe Juan 11:14, 38-44, txajuꞌ naa paapẽynisatxis paswe:

• ¿Maꞌwte jiitkhaꞌw Lazaro uuni ũste? (Thegwe versículo 39).

• Lazaroꞌs cielute ũsteyuꞌ, ¿Jesusyuꞌ kĩhjyaꞌ kik naa kiwete kiꞌkin iijxũun kĩijaç lazaroꞌs?

Txãa VIDEUꞌS thegwe

5. Wala kuh ĩtxi yuutxna

Lẽeywe Salmo 37:29 txajuꞌ naa paapẽynisatxis paswe:

• ¿Nasa kiꞌ ĩtxi yuuçxa mtee uꞌputxki?

Jeuwan selpiina ũsçxa txãaweꞌsxçxaa ĩtxi fxiꞌzemeetxna, jxukaysa mazkwe nasatxwa Jesús kaaĩtxi yuuwaꞌjna. Lẽeywe Hechos 24:15 txajuꞌ naa paapẽynisatxis paswe:

• ¿Uusa ĩtxi yuute kimnaga theg wẽje?

• ¿Phelicity neyweꞌsxa ĩtxi fxiꞌzeniꞌs maꞌw kik kvxiisxãꞌja?

 ¿AYTE PAꞌJ KĨHKXTHAꞌW PIYA?

Dxus yuwe naꞌjĩꞌk nasa meh seena kũj ĩtxi yuutxna jĩꞌk. Jeuwayuꞌ Jesusaꞌs çxhãçxhasaꞌs ũsune uusatxiꞌs kiꞌ ĩtxi yuukhan.

¿Kĩh pasuguigk?

• Jeuwa vxiteꞌ Jesús uusatxiꞌs kiꞌ ĩtxi fxiꞌzewaꞌjaꞌs peesyaꞌ wẽdxineꞌta, ¿maꞌw jiyukxthaꞌw?

• ¿Nasa kiꞌ ĩtxi yuuçxa mtee uꞌputxki cielute meeçxaꞌ naa kiwete? ¿Kĩh yũuçxaga txãꞌw paasu?

• ¿Nasa yaꞌpeeykãanisa kiꞌ ĩtxi yuuyaꞌ ãjamatx?