Dxus eçaꞌ Dxus Gobiernoꞌs weꞌweꞌk. Dxus Gobiernote Jeuwayuꞌ naꞌwne jxthãasu naa kiwete jxuka paraisu yũuna, nyaafxte txãꞌwne yaatxi, txaꞌwẽy yũun kaahana. ¿Dxus Gobiernoyuꞌ kĩhkx? ¿Maꞌwte yũuçxa jiyukxthaꞌw txãa Gobierno jxkaahn yãꞌj ũste? ¿Ãcxh pkaçx txãa Gobierno kĩhka yũu? ¿Nmehteyuꞌ txãa Gobiernoyuꞌ kĩh yũukx? Naa peꞌlate pahz paapẽynisatxiꞌs pasunaꞌw.

1. ¿Dxus Gobiernoyuꞌ kĩhkx? ¿Reyyuꞌ kimki?

Dxus Gobiernoyuꞌ Jeuwane vxit. Reyyuꞌ Jesucristona, txãayuꞌ cielujuy jxkaahana (Mateo 4:17; Juan 18:36). Dxus yuweyuꞌ naꞌjĩꞌk Jesuste: “txajx jxkaahniꞌ bagaçxte yuhwa pçumeena jĩk” (Lukas 1:32, 33). Txãa jxkaahsayuꞌ naa kiwete jxuka uta jxkaahana nasatxiꞌs.

2. ¿Jesús yakhyuꞌ kimweꞌsx jxkaahn ũsutxki?

Jesusyuꞌ txãaçxa jxkaahn ũsmeenaꞌ: “Maa nasa maꞌwẽsa, yuwe maꞌwẽ weꞌwesa, mteeweꞌsxwa jxuka Dxus luuçx yuuyaꞌ ãjãkahn [...] Açaꞌ naa kiwete jxkaajxaꞌ ãjãꞌnjaꞌw jĩꞌtx” (Apocalipsis 5:9, 10). ¿Maz nasa Jesús yakh jxkaahatxki? Jesús naa kiwete ũsçxa mazkwe nasa kitx cristiano yũu, nawa ciento cuarenta y cuatromilçxa (144.000) Jesús yakh cielun uꞌjweyã jxkaahn ũsyã. (lẽeywe Apocalipsis 14:1-4). Vxite nasayuꞌ naa kiwete neeyũutxna (Salmo 37:29).

3. ¿Dxus Gobierno kĩh yũuçxa wala ewki vxite gobiernoweꞌsxte?

Naa kiwete gobiernoweꞌsxyuꞌ ewneꞌta yũu wẽje, nawa ãjaçmeeneꞌta. Vxiteweꞌsxyuꞌ uꞌkaneꞌta jxkaahjxaꞌ, nawa ew yũuyã wẽdxiçmeeneꞌta. Dxus Gobiernoteyuꞌ Jesús jxkaahwasana, nawa Jesusyuꞌ bakaçxtewa jxkaahn ũsuna. Kim yuhwa kusaꞌjmeenaꞌ txãa gobiernoꞌs. Dxus yuwe naꞌjĩꞌk: Naa Gobiernoyuꞌ bakaçx yuhwa pçuumeena (Daniel 2:44). Jesús naa kiwete jxkaahte, txãaçxan rey yũuna. Jesusyuꞌ wẽdxine, peeykãhane, txãayuꞌ ewsana. Kaapiyaꞌjyaꞌ nasatxiꞌs wẽdxyaꞌ, peeykãhana txaꞌwẽy jxukaysatxi ew yũukahn (lẽeywe Isaías 11:9).

7. Dxus jxkaahnisayuꞌ meh wala ewna, naa kiwete gobiernoweꞌsxte

Gobiernoyuꞌ jxkaahnisate kutxiꞌjiꞌk, vxite nasatxiꞌs nweꞌw wẽeçxa. Dxus Gobiernoyuꞌ txaꞌwẽyçxa jxkaahnisaꞌs jiꞌphna. Açyu, txãa Gobiernote ũs wẽeçxa jxkaahnisaꞌs nwẽeseꞌjwaꞌj jiꞌphuneꞌta. Lẽeywe 1 Korintios 6:9-11, txajuꞌ naa paapẽynisatxis paswe:

• Dxus jxkaahniꞌs nwẽeseꞌjçxa, ¿naa kiwete maꞌw fxiꞌzekxthaꞌw? a

• Dxus jxkaahniꞌs nwẽeseꞌjte, ¿ewmanx?, ¿ewmeemanx?, ¿kĩh yũuçxaga txãꞌw pasu?

• ¿Dxus jxkaahniꞌs nasa nwẽeseꞌjmeeçxa yuꞌptheꞌjyaꞌ ãjamatx? (versículo 11 thegwe).

 ¿AYTE PAꞌJ KĨHKXTHAꞌW PIYA?

Txãa Gobiernoyuꞌ cielute ũsna, açyu cielujũ naa kiwete jxkaajxaꞌ ãjana.

¿Kĩh pasuguigk?

• ¿Dxus Gobiernoteyuꞌ kimweꞌsx puꞌçxhitxki jxkaajxaꞌ?

• Dxus Gobiernoyuꞌ meh ewna nasa gobiernoweꞌsxte, ¿kĩh yũuçxa?

• ¿Jeuwa kĩh kik jxthãasu txãjx Gobiernote uꞌp wẽeçxa?