Mazkwe nasaweꞌsxyuꞌ fxiy fxiy yahkxneꞌta walxidaꞌs. Vxiteyuꞌ namikuweꞌsx yakh tuudxiineꞌta, nawa vxiteyuꞌ tuudxyaꞌ waꞌluneꞌta saꞌ tuudxsaayuꞌ tũuçmeneꞌta, vxiteyuꞌ tuudxçxa tũuꞌpkaçxneꞌta tuudxii. ¿Dxus eçyuꞌ maajĩka txãa walxida tuudxnisaꞌs?

1. Walxida tuudxte: ¿ewmanx?, ¿ewmeemanx?

Dxus yuweyuꞌ naꞌjĩꞌk walxida tuudxnisa ewmeesana jĩçmeene, wejx yuhwa Dxus yuweyuꞌ naꞌjĩnku weꞌwe vinoyuꞌ ũusnane kaaweçxaꞌja piçthẽꞌjaꞌs, txãꞌwyuꞌ wejx yuhwa Dxus peesnisana (Salmo 104:14, 15). Nyaafxtey Dxusna selpiisa: piçthẽꞌj, uꞌyweꞌsx. Txãaweꞌsxwa tuudxineꞌta walxida (1 Timoteo 5:23).

2. Walxida tuudx wẽete, ¿Dxus eçaꞌ kĩh kik yuꞌkxpeheꞌ?

Jeuwayuꞌ tũunisaꞌsçxa ahçeçne, txaꞌwẽy wala tuudxsaatxwa ahçene (Gálatas 5:21). Dxus eçaꞌ naꞌjĩꞌk: “Vino wala tuudxsa yakh ũsnuwe” (Proverbios 23:20). Idxçxa meeçxaꞌ vxite yakh walxida tuudx wẽeçxa wala ũus yahkxwaꞌj jiꞌphneꞌga. Wala tuudxte adx kwekwe, ¿suwuumatx meeçxaꞌ ew yahkxyaꞌ ãjameen? Açyu wala jxpaꞌyakxna ũs kaahaꞌk walxida tuudx wẽeçxa. Walxida tuudxniꞌs nvxihtyaꞌ ãjameeçxa leꞌçxkweçxa yuhwa tuudxmeeneꞌga.

3. Vxite walxida tuudxte, ¿kweꞌsxyuꞌ maꞌw respetaĩyaꞌ ãjakxthaꞌw txãa txhitxhnisa?

Idxaꞌ ew txhitxhwaꞌj jiꞌphuneꞌga: walxidaꞌs tuudxmath meeçxaꞌ tuudxmeemath, nawa leꞌçxkweçxawa tuudxyaꞌ txhitxhte, vxiteweꞌsxyuꞌ txãjx txhitxhnisaꞌs wala respetaĩwaꞌj jiꞌphyã (Romanos 14:10). Kĩhwa tuudx jĩwameena nuyweꞌwwaꞌj jiꞌphmeeneꞌta txãjx txhitxhnisa paꞌka (lẽeywe Romanos 14:21). Cristianosweꞌsxyuꞌ naꞌwneꞌta yaatxi: “Peekx fxiꞌzewaꞌjçxáꞌs yahkxmée, vxitetxwa peeygãawaꞌjaꞌ ew kfxiꞌzeꞌjxaꞌ” (lẽeywe 1 Korintios 10:23, 24).

 WEJXKWEÇXA PIYAN UꞌJWEKA

4. Txhitxhyaꞌ ãjaneꞌga tuudxmath meeçxaꞌ tuudxmeemath

¿Jesusyuꞌ maa sũhuꞌ kik walxida tuudxnisaꞌs? Wejxkwe jiyu wẽeçxa naa textoꞌs lẽeywe Juan 2:1-11, txajuꞌ naa paapẽynisatxis paswe:

• ¿Jesús walxidaꞌs maꞌw kik theguꞌ, tũusaaweꞌsx txaꞌwẽy maꞌw kik theguꞌ?

• Jesús walxidaꞌs nuyweꞌwmeene, nawa cristiano walxida tuudxwaꞌjaꞌs txhitxhte kweꞌsxyuꞌ, ¿kĩh yahkxwaꞌj jiꞌphkxthaꞌw?

Cristiano walxida tuudxyaꞌ ewuuna nawa wala jxpaꞌyakx tuudxwaꞌj jiꞌphna. Lẽeywe Proverbios 22:3te kĩhçxa jxpaꞌyakx yũuwaꞌj jiꞌphkxthaꞌw:

• Idxaꞌ carro manejãyyaꞌwaçxawa.

• Uꞌy tuyasa.

• Yuꞌçeꞌjsa walxida tuudx kaahmeete.

• Tuudxiiwaꞌjaꞌs nvxihtwaꞌj thẽeyuute.

• Jxkaahsaweꞌsxyuꞌ idx uꞌpxhnite walxida tuudxyaꞌ kaahmeete.

• Txãayuꞌ walxidaꞌs tuudxiçmeeyãꞌjne, txãa yakh ũssa.

¿Idxaꞌ walxidaꞌs yuswaꞌj jiꞌphmag ptaamuni yatte meeçxaꞌ pkhakhen ũsçxa? Ew txhitxh wẽeçxa naa video theguka. Txãa VIDEUꞌS thegwe.

Lẽeywe Romanos 13:13 vxiteꞌ 1 Korintios 10:31, 32. Naa versiculotxiꞌs lẽeyçxa, txajuꞌ naa paapẽynisatxis paswe:

• ¿Jeuwa wãt yahkxꞌkhan idxyuꞌ kĩh yũuwaꞌj jiꞌphguigk?

 5. Txhitxh maz walxida tuudxyaꞌwaga

Theg maz tuudxyaꞌwaçxawaꞌj, nawa myahkx Jeuwayuꞌ wala tuudxniꞌsyuꞌ ahçene, ¿kĩh yũuçxa? Lẽeywe Oseas 4:11, 18, txajuꞌ naa paapẽynisatxis paswe:

• ¿Teeçx nasa wala tuudxte kĩh yũukx?

¿Kĩh puꞌçxhiꞌk wala tuudxwaꞌjmee? Wala jxpaꞌyakx yũuwaꞌj jiꞌphneꞌga. Lẽeywe Proverbios 11:2, txajuꞌ naa paapẽynisatxis paswe:

• Tuudx wẽeçxa wala mpaꞌyahkxwaꞌj jiꞌphneꞌga maz tuudxyaꞌwaꞌçxawa, ¿kĩh yũupaꞌka?

6. ¿Kĩh puꞌçxhiꞌk wala tuudxwaꞌjmee?

 ¿AYTE PAꞌJ KĨHKXTHAꞌW PIYA?

Walxidayuꞌ Dxus peesnisana, nawa wala tuudxte ewmeena thaakwe tuudxçxa tũuneꞌta. Txãꞌw yũute pkaalna jĩꞌk.

¿Kĩh pasuguigk?

• Walxida tuudxnisaꞌs, ¿Dxus eçaꞌs maajĩka?

• ¿Kĩh yũukx jxthaakwe tuudxte?

• Walxidaꞌs tuudxyaꞌ waꞌluth jĩn weꞌwte, ¿maꞌw respetaĩkxthaꞌw?