PEꞌLA 50

¿Maꞌw yũuçxa yatteweꞌsx yakh weçxan fxiꞌzeyaꞌ ãjakxthaꞌw? (Peꞌla 2)

TAKH

Nçxiꞌkweꞌsxtxiꞌsyuꞌ Jeuwane pees, saꞌ Jeuwayuꞌ neyweꞌsxtxiꞌsyuꞌ luuçxtxiꞌs ewne iipeꞌj thãasu txãa pesnisaꞌs. Txãasane ew yuꞌkxpehe, txaꞌwẽy nçxiꞌkweꞌsxtxwa yuꞌkxpehene neyweꞌsxtxiꞌs ew nwẽeseꞌjkan. Neyweꞌsx, nçxiꞌkweꞌsx Dxus weꞌweniꞌs wẽseꞌjçxayuꞌ wala wẽt fxiꞌzeyaꞌ ãjayã.

1. ¿Jeuwayuꞌ kĩh kikh yuꞌkxpehe neyweꞌsxtxiꞌs?

Jeuwa naꞌwne jxthãasu, neyweꞌsxyuꞌ een kutxiꞌjwaꞌj jiꞌphneꞌta txãjx luuçxtxiꞌs ew iipeꞌjkahn wẽdxna vxiteꞌ Dxus weꞌwniꞌs kaapiyaꞌjwaꞌj jiꞌphneꞌta (Proverbios 1:8). Dxus eçaꞌ naꞌwku yuꞌkxpehe: “Neyweꞌsxwa iꞌkweꞌsx luuçxtxi zhiçxkwe ewçxáa miipeꞌjwe” (lẽeywe Efxesios 6:4). Jeuwaꞌs jiyuwaꞌjçxaꞌs kaapiyaꞌjna, neyweꞌsxaꞌ Dxus weꞌweniꞌs nwẽeseꞌjwaꞌj jiphuneꞌta. Txãjx luuçxtxiꞌs ew kaapiyaꞌjyaꞌ, Jeuwa txãꞌwne jxthãasu. Jeuwayuꞌ wẽdxiçmeeneꞌ neyweꞌsx vxite kusete nvxihtteꞌ txãaweꞌsx nçxiꞌktxiꞌs.

2. Jeuwayuꞌ nçxiꞌkweꞌsxtxiꞌs, ¿kĩh kik yuꞌkxpehe?

Jeuwayuꞌ nçxiꞌkweꞌsxtxiꞌs pẽhyne: “iꞌkweꞌsx neyweꞌsxtxi kĩhtewa jxuka mwẽeseꞌjwe” (lẽeywe Kolosenses 3:20). Luuçxweꞌsx neyweꞌsxtxiꞌs nwẽeseꞌjte txaꞌwẽy respetaĩite, neyweꞌsxyuꞌ wala weçxaneꞌta, Jeuwa txaꞌwẽy wala weçxane (Proverbios 23:22-25). Jesusyuꞌ ejemploꞌk yũu naa kiwete ũsi. Txãayuꞌ ãhtesane yũu, nawa neyweꞌsxtxiꞌs respetaĩna nwẽeseꞌjeꞌk, neyweꞌsx ãhmeekwesatewa (Lukas 2:51, 52).

3. Jeuwa yakh utxaa wẽeçxa, ¿yatteweꞌsxaꞌ kĩh yũuwaꞌj jiꞌphtxki?

Idx nçxiꞌkweꞌstxiꞌyuꞌ Jeuwaneꞌga wẽdx jxthãasu, idxyuꞌ maꞌwneꞌga Jeuwaꞌs wẽdxi txaꞌwẽy. Nawa, ¿idxyuꞌ kĩh yũuwaꞌj jiꞌphguigk? Dxus eçaꞌ maꞌwne jxkaaha txaꞌwẽy kxtey yuuneꞌga. Nçxiꞌkaꞌs ew kaapiyaꞌjwaꞌj jiꞌphuneꞌga Jeuwate: yatte uꞌpçxa maꞌk yuu, kĩh weꞌwena ũsçxa maꞌk yuu, vxiteꞌ dxiꞌjte uꞌjn ũsçxa maꞌk yuu (Deuteronomio 6:7). Kaapiyaꞌj wẽeçxa, txãꞌsiiçxaa kaapiyaꞌjwaꞌj jiꞌphneꞌga. Idxaꞌ neyçxayuꞌ luuçxaꞌs txaꞌwẽyçxa wala kaayakiꞌjwaꞌj jiꞌphneꞌga piyakaan. Txãa paꞌka Dxus eçyuꞌ naꞌwku kaapiyaꞌja: luuçxtxiꞌs Dxuste maa eentewa kaapiyaꞌjn ũswaꞌjna. Dxus yuweꞌs piyawaꞌj jxukaysa een kutxiꞌjwaꞌj jiꞌphneꞌkwe.

WEJXKWEÇXA PIYAN UꞌJWEKA

Dxus eç yuꞌkxpehnisaꞌs thegyaꞌ ãjaꞌjnaꞌw: yatteweꞌsx yakh jaꞌda weçxan fxiꞌze wẽeçxa.

4. Nçxiꞌkweꞌsxtxiꞌs peeykãhn kaapiyaꞌjaneꞌga

Nçxiꞌkweꞌsxtxiꞌs kaapiyaꞌjwaꞌj wala thẽyna. Nawa, ¿Dxus eçaꞌ maꞌw kikh puꞌçxhi? Lẽeywe Santiago 1:19, 20, txajuꞌ naa paapẽynisatxis paswe:

¿Neyweꞌsx luuçxtxiꞌs maꞌw weꞌwewaꞌj jiꞌphtxki peeykãhn?
¿Kĩh yũuçxa luuçxaꞌs peçxuhkwewaꞌj jiꞌphmeeguigk ũusaçxaan ũsçxa? a

5. Nçxiꞌkweꞌsxtxiꞌs nweꞌwn

Nçxiꞌkweꞌsxtxiꞌs weꞌwteyuꞌ meh wala jxthuhthesana, teeçx teeçxsa naꞌwẽçxaa weꞌwwaꞌj jiꞌphneꞌga sexote. Naa wala thaame naꞌw susune, nawa weꞌwwaꞌj jiꞌphneꞌga. Txãa VIDEUꞌS thegwe, txajuꞌ naa paapẽynisatxis paswe.

VIDEU: Luuçxtxiꞌs nweꞌwe nasa ewmeesa nuwekahmeen (2:58)

Maii neyweꞌsxtxiyuꞌ wala thẽy yũune nçxiꞌkweꞌsx yakh weꞌwyaꞌ sexote, ¿kĩh yũuçxa?
¿Kĩh kik puꞌçxh maii neyweꞌsx nçxiꞌkweꞌsxtxiꞌs sexote weꞌwyaꞌ?

Nyaafxtey weꞌwnisayuꞌ naa kiwete eçxthẽꞌj jxkaahnisate wala ewmeesa yũun ũsna. Lẽeywe 2 Timoteo 3:1, 13, txajuꞌ naa paapẽynisatxis paswe:

Txãa versículo 13te weꞌwnisayuꞌ nasa ewmeesayuꞌ luuçxtxiꞌs wala kazx yũuneꞌta, açyu neyweꞌsxtxiꞌs: ¿Maꞌw yũuçxa nçxiꞌkweꞌsxtxiꞌs kaapiyaꞌjaguigk sexote? ¿Maꞌw yũuçxa nweꞌweguigk luuçxtxiꞌs kazx yuukahmeen?

¿Jiiga?

Jeuwa kaajiyuꞌjsaweꞌsxyuꞌ kĩjkĩhnawa jxuka kutxiꞌjn ũstxna neyweꞌsxtxiꞌs puꞌçxhwaꞌj, txãa videu vxiteꞌ eçkweyuꞌ puꞌçxhiyã luuçxtxiꞌs kaapiyaꞌjwaꞌj sexote. Naa publicaciones iijxũuyaꞌ ãjaneꞌga:

Iꞌkweꞌsx nçxiꞌkweꞌsxtxiꞌs nweꞌwe (videu)
Naa libru wejxkwe kaapiyaꞌjana Aprendamos del Gran Maestro capítulo 10 vxiteꞌ 32
“¿Maꞌw sexote weꞌweguigk nçxiꞌkaꞌs?” (¡Despertad!, núm. 5 2016te)

6. Idx neyweꞌsxtxiꞌs wala respetaĩi

Luuçxweꞌsx, piçtakxweꞌsx vxiteꞌ knaꞌsaweꞌsx respeto kaavxaꞌj wẽeçxa, txãjx neyweꞌsxtxiꞌs ew weꞌwwaꞌj jiꞌphuneꞌta. Txãa VIDEUꞌS thegwe, txajuꞌ naa paapẽynisatxis paswe.

VIDEU: Tataweꞌsx yakh ew puutx weꞌweneꞌga (2:19)

Piçtakxweꞌsx, ¿kĩh yũuçxa txãjx neyweꞌsx yakh respeto yakh weꞌwewaꞌj jiꞌphtxki?
¿Maꞌw yũuwaꞌj jiꞌphtxki txãa yuꞌkxpehniꞌs kxtey yuuwaꞌj?

Lẽeywe Proverbios 1:8, txajuꞌ naa paapẽynisatxis paswe:

Piçtakxweꞌsx, neyweꞌsx kaahte, ¿kĩh yũuwaꞌj jiꞌphtxki?

7. Yatteweꞌsx jaꞌda Dxusaꞌs selpiiwe

Jeuwa kaajiyuꞌjsaweꞌsxyuꞌ, kisu iisa adoración en familia vxitneꞌta. Txãaweꞌsxyuꞌ pkhakheçxa, ¿kĩhta yũu? Txãa VIDEUꞌS thegwe, txajuꞌ naa paapẽynisatxis paswe:

VIDEU: Thẽysa jiꞌphçxawa adoración en familias vxitwaꞌj jiꞌphneꞌtkaꞌw vxitumee (8:04)

¿Peçxkanakameen adoración en familia kĩh yũuwaꞌj jiꞌphtxki?
¿Neyweꞌsxyuꞌ kĩh yũuwaꞌj jiꞌphtxki, yatteweꞌsx jaꞌda Dxusna weçxan ũs wẽeçxa? Naa peꞌlate takhna piisanite thegwe.
¿Thẽysa jiꞌphumaꞌg yatteweꞌsx yakh kiꞌsu iisa Dxus yuweꞌs piyawaꞌj? ¿Kĩh thẽysa jiꞌphun ũsga?

Txãanteyaꞌ Jeuwa naꞌwne jxthãasu israelitasweꞌsxyuꞌ txãjx nçxiꞌkweꞌsxtxiꞌs Dxus eçte weꞌwewaꞌj jiꞌphuneꞌta peçxkanakahmeen. Lẽeywe Deuteronomio 6:6, 7, txajuꞌ naa paapẽynisatxis paswe:

¿Naa yuꞌkxpehnisaꞌs kxtey yuuyaꞌ ãjamaꞌk?

Adoración en familia vxit wẽeçxa, ayte uyuuneꞌga naa yuꞌkxpehnisaꞌs:

Pkhakheni yatsu uꞌjmey jiyuwaꞌj jiꞌphneꞌga, kĩh weꞌwyaꞌwaçxawa.
Dxus eçte weꞌwnisa lẽeywe, açyu piyaçxawa yatteweꞌsx yakh weꞌwyaꞌ ãjaneꞌga.
Spahtxineꞌga luuçx jĩi uꞌpna jw.org te.
Piçtakx, knasaweꞌsx jĩi uꞌpna jw.org te, txãꞌs spahtxineꞌga txãaweꞌsx jĩi.
Dxus eçte weꞌwnisa nyaafxtey maꞌwneꞌta yũu, ãçxhwa txaꞌwẽyçxa yũuyã ãjaneꞌga yatteweꞌsx yakh jaꞌda.
Videu thegyaꞌ ãjaneꞌga jw.org te.

MAII NASAWEꞌSXA NAꞌJĨTX: “Luuçxweꞌsxyuꞌ Dxus yuweꞌs jiyuyaꞌ ãjaçmeeneꞌta”.

Txãa weꞌwnisa, ¿isamanx?

¿AYTE PAꞌJ KĨHKXTHAꞌW PIYA?

Jeuwa naꞌwne jxthãasu, neyweꞌsx txãjx nçxiꞌkweꞌsxtxiꞌs wala peeykãawaꞌj jiꞌphneꞌta, txaꞌwẽy nçxiꞌkweꞌsxyuꞌ txãjx neyweꞌsxtxiꞌs wala respetaĩwaꞌj jiꞌphneꞌta. Açyu yatteweꞌsx jaꞌda Dxusaꞌs selpiina, weçx weçxane ũs jxthãasu.