Jesusyuꞌ congregacionte pkhakhenisate dxikthesana, naa kiwete jxkaajxaꞌ puꞌçxhkahn (Efxesios 5:23). “Ew mjĩin nes yũusa” Jesusyuꞌ txhitxhne, Dxus çxhabaꞌs nweꞌw wẽeçxa (lẽeywe Mateo 24:45). Txãa mjĩisayuꞌ Jesusna nwẽeseꞌjçxa, ãçxhwa txãaweꞌsxyuꞌ puꞌçxhna ũsyã, Dxus txhitxhnisatxiꞌs. Ew mjĩin nes yũusa, ¿kimki? Kweꞌsxtxiꞌsyuꞌ, ¿maꞌw puꞌçxhna ũstxki?

1. Ew mjĩin nes yũusa, ¿kimtxki?

Bagaçxtewa Jeuwayuꞌ piçthẽꞌjweꞌsx txhitxhne, txãjx çxhabaꞌs jxkaahwaꞌj (Malaquías 2:7; Hebreos 1:1). Jesús uuteyuꞌ apostolesweꞌsx, vxiteꞌ thẽꞌjsa Jerusalenteweꞌsx congregacionaꞌs thegna ũsu (Hechos 15:2). Nyaafxtey maꞌwneyuꞌ, ãçxhwa txaꞌwẽyçxa yũun ũstxna. Maii thẽꞌjsaweꞌsxyuꞌ, kũhmee thẽꞌjsaweꞌsx jxkaahsayã, açyu txãaweꞌsxyuꞌ ew mjĩin nesçxa yũusatxna (Mateo 24:45a). Txãaweꞌsxyuꞌ Dxusna selpiisaweꞌsxtxiꞌs wala puꞌçxhineꞌta iipeꞌjeneꞌta kĩjkĩhmeewa jxuka sãꞌjĩn ũsyã espiritualmente. Dxus yuweꞌs ptaꞌsxwaꞌj txaꞌwẽyneꞌta pheuꞌj. Txãa piçthẽꞌjtxiꞌsyuꞌ Jeuwayuꞌ txhitxhne espíritu santo yakh. Txãaweꞌsxyuꞌ Jesús yakh cielute jxkaajxaꞌjwasayã. Txãaweꞌsxyuꞌ uujxãꞌjçxa cielu uꞌjwetxna, txãa eenaꞌs ũythasna ũsyã.

2. Ew mjĩin nes yũun ũssa, ¿kĩh espiritualmente sãꞌjĩn ũstxki?

Ew mjĩin nes yũu ũssatxiꞌs Jesusyuꞌ jxkaahne txãaweꞌsxyuꞌ alimento espiritualaꞌs sãꞌjĩn ũswaꞌj jiꞌphuneꞌta, Dxusna selpiisatxiꞌs (Mateo 24: 45b). Ũꞌnisaꞌs ũꞌçxa çxhãçxhaꞌk yaꞌfxiꞌze, txaꞌwẽy alimento espiritualaꞌ Dxus yuwete kutxiꞌjnisana. Txãꞌs piyaçxa çxhãçxhaꞌk, ũꞌnisa kweꞌsxtxiꞌs maꞌwne puꞌçxhi, txãꞌwey (1 Timoteo 4:6). Txãa alimentosyuꞌ jxpaꞌkathaꞌw pkhakheçxa, txaꞌwẽy pkhahkheni walasate, revistate vxiteꞌ videu. Txãayuꞌ alimento Dxus eçteꞌ kutxiꞌjnisana. Txãa alimento kweꞌsxtxiꞌs wejxkwe kçxhãçxhaꞌjana saꞌ Jeuwa jxthãasniꞌs piyayaꞌ ewuunaꞌw. Kĩhçxa txaꞌwẽy Jeuwa yakh ew namiku yũuyaꞌ ãjaꞌjnaꞌw.

 WEJXKWEÇXA PIYAN UꞌJWEKA

3. Jeuwa çxhabyuꞌ pheuꞌjni ũsna

Jesusyuꞌ jxkaahne nyaafxtey cristianoweꞌsxtxiꞌs, ãçxhwa kũhmee thẽꞌjsaweꞌsxtxiꞌs Jesusyuꞌ puꞌçxhna ũssa. Açyuꞌ txãaweꞌsxyuꞌ Dxusna selpiisatxiꞌs puꞌçxhna ũsyã txaꞌwẽy. Txãa VIDEUꞌS thegwe.

Lẽeywe 1 Korintios 14:33, 40, txajuꞌ naa paapẽynisatxis paswe:

• ¿Jeuwayuꞌ kĩh kikh wẽdxi?, ¿kĩh yũuçxa?

4. Ew mjĩin nes yũusa ãçxhwa ptaꞌsxwaꞌjaꞌs pheuꞌjn ũstxna

Cristiano primer sigloteweꞌsxyuꞌ Dxus yuweꞌs ptaꞌsxwaꞌjyuꞌ meh wala jxthuhthesa yũune. Lẽeywe Hechos 8:14, 25, txajuꞌ naa paapẽynisatxis paswe:

• Siglo primerote, ¿kimweꞌsx kitx ptaꞌsxwaꞌjaꞌs pheuꞌju?

• Apostolesweꞌsx jxkaahniꞌs Pedro vxiteꞌ Juan, ¿txãaweꞌsxyuꞌ kĩhtaꞌ yũu?

Dxus yuweꞌs ptaꞌsxwaꞌj kũhmee thẽꞌjsaweꞌsxyuꞌ pheuꞌjn ũstxna. Txãa yũunisa txãaweꞌsx yakhyuꞌ meh wala jxthuhthesayã. Txãa VIDEUꞌS thegwe.

 Jesusyuꞌ kaajiyuꞌjne ptaꞌsxnisa wala jxthuhthesana. Lẽeywe Markos 13:10, txajuꞌ naa paapẽynisatxis paswe:

• Kũhmee thẽꞌjsaweꞌsx jxkaahsa jĩi, ¿kĩh yũuçxa txãa wala ewki Dxus yuweꞌs ptaꞌsxwaꞌj?

• Ew mjĩin nes yũusa ptaꞌsxwaꞌjaꞌs naa kiwete uta pheuꞌjneꞌta. Txãꞌw yũute, ¿kweꞌsxtxiꞌs maꞌw kik puꞌçxhi?

5. Ew mjĩin nes yũusa kweꞌsxtxiꞌs jxkaahn ũstxna

Kũhmee thẽꞌjsaweꞌsx jxkaahsaweꞌsxaꞌ cristianosweꞌsx naa kiwete uta nuypeꞌjn uꞌjwene, kĩhçxa txaꞌwẽy kaapiyaꞌjaneꞌta. Nawa, ¿txãaweꞌsxyuꞌ ãçxhwa maꞌw jxkaahn ũstxki? Theguka, kũhmee thẽꞌjsaweꞌsx jxkaahsa siglo primerote, ¿kĩhta yũu? Lẽeywe Hechos 15:1, 2, txajuꞌ naa paapẽynisatxis paswe:

• Nyaafxte cristianoweꞌsxaꞌ ew puutx weꞌwyaꞌ ãjameeçxa, ¿kĩhtaꞌ thẽysa jiꞌphu?

• ¿Pablo vxiteꞌ Bernabeyuꞌ kimnata puꞌçxhwa pakwe?

Lẽeywe Hechos 15:12-18, 23-29, txajuꞌ naa paapẽynisatxis paswe:

• Kũhmee thẽꞌjsaweꞌsx jxkaahsa, ¿kĩh yũuwaka jiꞌphuꞌ Dxus puꞌçxhniꞌs jxpaꞌka wẽeçxa? (Thegwe versículos 12, 15 vxiteꞌ 28).

Lẽeywe Hechos 15:30, 31; 16:4, 5, txajuꞌ naa paapẽynisatxis paswe:

• Cristiano primer sigloteweꞌsxaꞌ kũhmee thẽꞌjsaweꞌsx jxkaahsa fxiꞌjniꞌs, ¿maꞌwta jxpaꞌka?

• Jeuwa txãaweꞌsxtxiꞌs wala bendesĩyne, ¿maꞌw yũuçxa jiikxthaꞌw?

Lẽeywe 2 Timoteo 3:16 vxiteꞌ Santiago 1:5, txajuꞌ naa paapẽynisatxis paswe:

• Naa eensuwa kũhmee thẽꞌjsaweꞌsx jxkaahsa ũssa, ¿txãaweꞌsxyuꞌ txhitxhmey kĩh yũuwataꞌ jiꞌphu?

 ¿AYTE PAꞌJ KĨHKXTHAꞌW PIYA?

Jesucristoyuꞌ txhitxhne thẽꞌjsa nes mjĩin ũssatxiꞌs. Txãaweꞌsxyuꞌ kuhmee thẽꞌjsaweꞌsxyãꞌ txãaweꞌsxyuꞌ kaapiyaꞌjn ũstxna vxiteꞌ cristianotxiwa naa kiwete uta.

¿Kĩh pasuguigk?

• ¿Ew mjĩin nes yũusa kim kikh txhitxh?

• ¿Kũhmee thẽꞌjsaweꞌsx jxkaahsa maꞌwta iipeꞌje?

• ¿Idxyuꞌ kreĩga “ew mjĩin nes yũusa” kũhmee thẽꞌjsaweꞌsx jxkaahsa yũutxmanx?