PEꞌLA 55
Congregacionte puꞌçxhna
Naa kiwete mazkwẽe nasaweꞌsxaꞌ Jeuwaꞌs wala weçxan ũstxna, saꞌ cristianoweꞌsx Dxus yuweꞌs piyan ũstxna. Txaꞌwẽy wẽdxineꞌta piyayaꞌ. Ew theguneꞌta zxiçxkwe piyan ũsçxa, ¿idx congregacionte maꞌwga yaatxi?
1. ¿Congregacionaꞌs maꞌw puꞌçxhyaꞌ ãjaguigk?
Congregacionte jxukaysa puꞌçxhyaꞌ ãjaꞌjnaꞌw. Idx congregacionte yakhthẽꞌjweꞌsx thẽꞌjsa ũsyã meeçxa ãçaꞌsa, ¿txãaweꞌsxtxiꞌs maꞌw puꞌçxhiguigk?, ¿pkhakhewaˈj peejxte peꞌjn uꞌjxaꞌ ewuumag?, ¿yatte pheuꞌjwaꞌj peejxtewa puꞌçxhyaꞌ ewuumag?, ¿ũꞌwaꞌj peejxtewa wejx puꞌçxhyaꞌ ewuumag? (lẽeywe Santiago 1:27). Txaꞌwẽy pkhakheni yattaꞌs padna çehk ũskahn, ¿puꞌçxhyaꞌ ewuunaꞌw? Vxite pheuꞌjwaꞌj pejxtewa kim yuhwa çxhãçxha jxkaahçmeeneꞌ kweꞌsxii peekxçxathaꞌw puꞌçxhyaꞌ wẽdxi, Dxusna peeykãhçxa yakhthẽꞌjweꞌsxtxiꞌs txaꞌwẽy (Salmo 110:3).
Yaꞌbautisãy yãꞌjçxayuꞌ congregacionsu wejxkwe puꞌçxhwaꞌj jiꞌphnetkhaꞌw. Yakhthẽꞌjweꞌsx Dxus eçte weꞌwnisaꞌs jxuka kxtey yuuçxa siervo ministerial yũuyã vxiteꞌ thẽꞌjsaweꞌsx yũuyã. Piçthẽꞌj uꞌyweꞌsx precursor yũuwaꞌj jiꞌphnetkhaꞌw wejxkwe Dxus yuweꞌs ptaꞌsxyaꞌ, kweꞌsxaꞌ ew puꞌçxhyaꞌ ãjamthaꞌw txãaweꞌsxtxiꞌs. Txaꞌwẽy Dxusna weçxan pkhakhewaˈj yat ktxaajn kxteewa puꞌçxhna. Yakhthẽꞌjweꞌsx yakh Dxus yuweꞌs ptaꞌsxyaꞌ jxuꞌj uꞌjweçtewa puꞌçxhna kiꞌ vxite çxhabna Dxus yuweꞌs ptaꞌsxyaꞌ uꞌjweçtewa kxteewa puꞌçxhna.
2. ¿Congregacionaꞌs maꞌw puꞌçxhyaꞌ ãjakxthaꞌw vxukwe kiꞌpna meeçxaꞌ vxite kĩh jiꞌphçxawa txaꞌwẽy?
Dxus eçaꞌ naꞌjĩꞌk: “Jeuwa Dxusaꞌs ũsuꞌka kĩjkĩh jiꞌphçxawa” (Proverbios 3:9). Kĩh jiꞌphçxawa Dxus çxhabaꞌs peesnisayuꞌ wala yaꞌweçxaꞌk. Congregacionte vxukwe peesnisayuꞌ Dxus yuweꞌs ptaꞌsxwaꞌjaꞌs selpiisana (lẽeywe 2 Korintios 9:7). Txaꞌwẽy naa kiwete utaa Dxus yuweꞌs ptaꞌsxwaꞌjaꞌs vxite peejxsatx puꞌçxhwaꞌj selpiina (lẽeywe 1 Korintios 16:2). Maiiyuꞌ vxukweˈs eenisa jxaawneꞌta saꞌ txaꞌwẽy pkhakheyaꞌ uꞌjçxayuꞌ jxũuna uꞌj cajonte akheneꞌta. Vxiteyuꞌ puꞌçxh wẽeçxa, donate.pr418.com uꞌkaneꞌta, Jeuwayuꞌ kweꞌsx jiꞌphuniꞌs pees thãasune.
WEJXKWEÇXA PIYAN UꞌJWEKA
Theguka: maꞌw yũuçxa puꞌçxhyaꞌ ãjakxthaꞌw congregacionaꞌs.
3. Idx jiꞌphuniꞌs iijxũyaꞌ ãjaneꞌga
Vxiudayuꞌ vxu wala jiꞌphmeeneꞌ yũu, nawa txãjx jiꞌphunis peesne, Jesusyuꞌ wala weçxane txãa vxiudaꞌs. Ãçxhwa Dxusna selpiisa vxukwe peeste Jeuwayuꞌ wala weçxane Jesuswa txaꞌwẽy. Lẽeywe Lukas 21:1-4, txajuꞌ naa paapẽynisatxis paswe:
-
¿Jeuwayuꞌ meh wala vxu peeswa peejxmanx?
-
¿Jeuwa vxite Jesús maꞌwta yaatxi waꞌlmee peeste?
Jiyu wẽeçxa vxuꞌs maꞌw iijxũun ũstewa. Txãa VIDEUꞌS thegwe, txajuꞌ naa paapẽynisatxis paswe:
-
¿Vxu peeste congregacionaꞌs maꞌw puꞌçxhiꞌkx?
4. Vxitesu txaꞌwẽy puꞌçxhineꞌga
Txaanteyyuꞌ israelitaweꞌsxaꞌ wala weçxan puꞌçxhineꞌta, Jeuwa temploꞌs pheuꞌjxaꞌ. Lẽeywe 2 Crónicas 34:9-11, txajuꞌ naa paapẽynisatxis paswe:
-
Israelitaweꞌsxyuꞌ Jeuwa temploꞌs thegna ũsyaꞌ, ¿kĩh yũuwataꞌ jiꞌphuꞌ?
Israelitaweꞌsxtxiꞌs ejemploꞌs thegçxa, Jeuwa kaajiyuꞌjsaweꞌsxyuꞌ ãçxhwa txaꞌwẽyçxaa yũun ũstxna. Txãa VIDEUꞌS thegwe, txajuꞌ naa paapẽynisatxis paswe:
-
Jeuwa yattaꞌs çehk jiꞌphte wala jxthuhthesana, ¿kĩh yũuçxa?
-
¿Kĩhte puꞌçxhyaꞌ ewuuguigk?
5. Ãçxhwa yakhthẽꞌjweꞌsx congregacionte wala çxhãçxha mjĩiwaꞌj jiꞌphtxna
Dxus eçyuꞌ naꞌjĩꞌk: piçthẽꞌjweꞌsxtxiꞌs wejxkwe çxhãçxha piyan ũs kaahaꞌk, kĩhçxa txaꞌwẽy congregacionte puꞌçxhyaꞌ. Teeçx yakhthẽꞌj, ¿maꞌw kikh yũu? Txãꞌs jiyu wẽeçxa videuꞌs theguka. Txãa VIDEUꞌS thegwe, txajuꞌ naa paapẽynisatxis paswe:
-
Ryan congregacionaꞌs wejxkwe puꞌçxh wẽeçxa, ¿kĩh yũuwaꞌjka jiꞌphuꞌ?
Congregacionte puꞌçxhyaꞌ ũs wẽeçxa vxiteꞌ thẽꞌjsa yũu wẽete, Dxus weꞌwniꞌs yũutaaçxa kxtey yuuneꞌkwe. Lẽeywe 1 Timoteo 3:1-13, txajuꞌ naa paapẽynisatxis paswe:
-
Congregacionte puꞌçxhwaꞌjsa vxiteꞌ thẽꞌjsa yũuwaꞌjsa, ¿piçthẽꞌjweꞌsxyuꞌ kĩh yũuwaꞌj jiꞌphtxki?
-
¿Yatteweꞌsxyuꞌ kĩh yũuwaꞌj jiꞌphtxki? (Thegwe versículos 4, 11)
-
Yakhthẽꞌjweꞌsx wala çxhãçxha mjĩiçxa txãa Dxus jxkaahniꞌs jxuka kxtey yuuçxa, ¿maꞌw wejxkwe ew puꞌçxhyaꞌ ãjatxki congregacionaꞌs?
MAII NASAWEꞌSXAꞌ NAꞌWNEꞌTA PAAPẼYĨ: “Jeuwa kaajiyuꞌjsaweꞌsxyuꞌ vxuyuꞌs, ¿kĩhte kitx uyuu?”
-
¿Idxyuꞌ maꞌw pasuguigk?
¿AYTE PAꞌJ KĨHKXTHAꞌW PIYA?
Een kutxiꞌjn, vxu yakh puꞌçxhna vxiteꞌ kĩh jiꞌphçxawa txãꞌs iijxũun txaꞌwẽy çxhãçxha selpiiteꞌ Jeuwayuꞌ wala weçx weçxa yaatxine.
¿Kĩh pasuguigk?
-
¿Maꞌw yũuçxa een kutxiꞌjçxa çxhãçxha selpiiyã ãjakxthaꞌw congregacionte?
-
¿Vxukwe jiꞌphçxa congregacionaꞌs maꞌw puꞌçxhyaꞌ ãjakxthaꞌw?
-
¿Congregacionaꞌs maꞌwga puꞌçxh wẽje?
WEJXKWE PIYAYA ÃJANEGA
Piyaꞌ Dxusyuꞌ diezmos ũythasuçmeeneꞌ.
Dxus yuwe piçthẽꞌjweꞌsx yaꞌbautisãysatxiꞌs wala mjĩiwaꞌj ũsne. Nawa Dxus yuwe maajĩka uꞌy congregacionteweꞌsxtxiꞌs. Txaꞌwẽy uꞌy txãa mjĩiwaꞌjaꞌs jiꞌphçxa, ¿kĩh yũuwaꞌj jiꞌphki?
¿Dxusna selpisaatxiꞌsyuꞌ kim kikh jxkaaha? (Ptaꞌsxnĩ, febrero, 2021te)
Yakhthẽꞌj Congoteweꞌsxaꞌ wala çxhãçxha mjĩiwaꞌj jiꞌphuneꞌta yakhthẽꞌjweꞌsxtxiꞌs publicaciones dukhwaꞌj.
Congo çxhabteyuꞌ publicación biblicatx maꞌw yũuçxa kitx dukhe (4:25)
Jeuwa kaajiyuꞌjsaweꞌsxyuꞌ vxu pkhakheçmeeneꞌta saꞌ txaꞌwẽy pẽhyçmeneꞌta.
