Yakhthẽꞌjweꞌsx yakh pkhakheçxayuꞌ, rey David naꞌwẽythaꞌw yaatxi. Dxus eç naꞌwku weꞌwe: “Wala ewna yakhthẽꞌjweꞌsx yakh jaꞌda fxiꞌzen ũste” (Salmo 133:1). Jxukasay mjĩiwaꞌj jiꞌphnetkhaꞌw jaꞌda ũs wẽeçxa, nawa jaꞌda ũsteyuꞌ thẽyki ãhmeekwesa paꞌka.

1. Dxus çxhabte, ¿kĩhga ewsa theguꞌ?

Idxaꞌ vxiteꞌ congregacionsu uꞌjçxawa, vxite congregacionteyuꞌ idx weꞌwniꞌsmeeneꞌta weꞌwe. Nawa idxyuꞌ jiyumeetewa, idxaꞌs txaꞌwẽyçxaneꞌta weçxan jxpaꞌka, ¿kĩh yũuçxa? Txãaweꞌsxyuꞌ kweꞌsx revistaꞌsiiçxa jiꞌphta, txajĩi txaꞌwẽyçxaneꞌta piya. Yakhthẽꞌjweꞌsxtxiꞌs peeykãhaneꞌta mtee uꞌpçxawa, “jxukaysa jaꞌda Jeuwa yaaseꞌsçxaneꞌta ksuusuꞌj” (Sofonías 3:9; nota).

2. Congregación yakh jaꞌda fxiꞌze wẽeçxa, ¿idxyuꞌ kĩh yũuwaꞌj jiꞌphguigk?

“Iꞌkweꞌsx ũustxi yaate iꞌkwe ũusuh jxuka yajkxçxa yakhthẽꞌjweꞌsxtxi peeygãjxaꞌ. Txãꞌwẽ yãꞌjçxaꞌ, puutx teeçxsa naꞌwẽçxah yaꞌmpeeygãhwe ũusuh jxuka yajkxna.” (1 Pedro 1:22). Naa yuꞌkxpehniꞌs, ¿maꞌw kxtey yuuyaꞌ ãjaguigk? Vxite ewmee yũuniꞌsçxaa thegwaꞌj jiꞌphmeeneꞌga, saꞌ txaꞌwẽy ewsa yũuçxaa thegçxayuꞌ. Idx ew thegteçxa, txãaweꞌsx yakhçxa utxaawaꞌj jiꞌphmeeneꞌga. Jxukaysa majuweꞌsxtewa jaꞌda ũsçxa, txãaweꞌsx maꞌwneꞌta fxiꞌze idxyuꞌ txãꞌswa jxuka ew jiyuneꞌga. Yakhthẽꞌjweꞌsxtxiꞌs ũuste ewmee yahkxwaꞌj jiꞌphmeenetkhaꞌw, jiimeeçxa yũu (lẽeywe 1 Pedro 2:17). a

3. Yakhthẽꞌjweꞌsx yakh thẽysa jiꞌphun ũsçxa, ¿kĩh yũuwaꞌj jiꞌphguigk?

Isateyuꞌ jxukay jaꞌda ũsthaꞌw, nawa kweꞌsxaꞌ ãhmeekwesathaꞌw. Txãa paꞌka yaꞌpkxuuthaꞌw. Dxus eçyuꞌ naꞌjĩꞌk: “Makwe ewmée nuyweꞌwetewa puutx yaꞌpeltunãyna mfxiꞌzewe”. Jeuwa “maꞌwẽga iꞌkweꞌsxtxi peltunãy txãꞌwẽy myũuwe iꞌkweꞌsx pweꞌsx” (lẽeywe Kolosenses 3:13). Kweꞌsxyuꞌ ãhmee yũun wala pkaalte wetethaꞌw, nawa Jeuwayuꞌ peltunaĩne. Kweꞌsxtxiwa Jeuwa txaꞌwẽyne, yakhthẽꞌjweꞌsxtxiꞌs peltunãy jxthãasuꞌ. Idx yakhthẽꞌjaꞌs pkxuu weꞌwni yakhçxa, peltun pẽhywaꞌj jiꞌphneꞌga idx yakhthẽꞌjaꞌs (lẽeywe Mateo 5:23, 24). b

 WEJXKWEÇXA PIYAN UꞌJWEKA

4. Vxite nasatxiꞌs ewmeesa yãꞌj sũhn yahkxwaꞌj jiꞌphmeeneꞌtkhaꞌw

Yakhthẽꞌjweꞌsxtxiꞌs wala peeykãh wẽjethaꞌw, nawa wala thẽyna, kweꞌsx fxiy paꞌka, ¿kĩh puꞌçxhiꞌk peeykãhwaꞌj? Lẽeywe Hechos 10:34, 35, txajuꞌ naa paapẽynisatxis paswe:

• Jeuwayuꞌ majuweꞌsxtewa jxuka jxpaꞌkane, txãꞌs selpiikahn. Txãꞌwte jiyuçxayuꞌ, ¿vxitetxiꞌs maꞌw thegwaꞌj jiꞌphkxthaꞌw makwe fxiytewa?

• ¿Idx upxnite nasaweꞌsxaꞌ kĩhta yahçe?, ¿txaꞌwẽy yahçen fxiꞌzewaꞌj jiꞌphmathaꞌw?

Lẽeywe 2 Korintios 6:11-13, txajuꞌ naa paapẽynisatxis paswe:

• Yakhthẽꞌjweꞌsxtxiꞌs wejxkwe peeykãhn weçxa wẽeçxa, ¿kĩh yũuwaꞌj jiꞌphkxthaꞌw?

5. Paz jiꞌphuꞌ wẽeçxa wala yaꞌpeltunãywaꞌjna

Jeuwayuꞌ wala ewsana, txãa paꞌka kweꞌsxyuꞌ kĩhwa peltunãywaꞌj jiꞌphmeenetkhaꞌw Jeuwaꞌs. Nawa txãayuꞌ kweꞌsxtxiꞌ wala peltunãyna ũsna. Lẽeywe Salmo 86:5, txajuꞌ naa paapẽynisatxis paswe:

• ¿Naa versiculoyuꞌ maꞌwka weꞌwe?, ¿Jeuwayuꞌ maꞌw kikh peltunãy?

• Jeuwa peltunãyte idxyuꞌ weçxaga, ¿kĩh yũuçxa?

• ¿Kĩh yũuçxa wala thẽyki vxiteweꞌsx yakh fxiꞌzen ũste?

Yakhthẽꞌjweꞌsx yakh jaꞌda fxiꞌze wẽeçxa, ¿Jeuwa naꞌwẽy kĩh yũuyã ãjakxthaꞌw? Lẽeywe Proverbios 19:11, txajuꞌ naa paapẽynisatxis paswe:

• ¿Idxaꞌs kaanxusuꞌjte kĩh yũuwaꞌj jiꞌphguigk?, idxaꞌs kuçx fxiy yuute, ¿kĩh yũuyã ãjaguigk?

Kiꞌkinyuꞌ kweꞌsxthaꞌw kaanxusuꞌju. Txãꞌw yũuçxa, ¿kĩh yũuwaꞌj jiꞌphkxthaꞌw? Txãa VIDEUꞌS thegwe, txajuꞌ naa paapẽynisatxis paswe.

• Npesx videuteweꞌsxaꞌ, ¿maꞌwka paz jiꞌphuyaꞌ ewuu?

 ¿AYTE PAꞌJ KĨHKXTHAꞌW PIYA?

Peeykãhniꞌs kaavxaꞌjaneꞌga yakhthẽꞌjweꞌsx peltunãyte, txãꞌw yũute congregaciona çxhãçxha ũsuna.

¿Kĩh pasuguigk?

• ¿Maꞌw yũuçxa ahçeniꞌs nvxihtwaꞌj jiꞌphguigk?

• Yakhthẽꞌj yakh thẽysa jiꞌphuçxa, ¿kĩh yũuwaꞌj jiꞌphkxthaꞌw?

• ¿Idxaꞌ peltunãyyaꞌ wẽdximag Jeuwa maꞌwne peltunãy txaꞌwẽy?, ¿kĩh yũuçxa?