PEꞌLA 57
¿Kĩh yũukx pkaal kazxsate wetete?
Kweꞌsxyuꞌ Jeuwaꞌs wala wẽdxithaꞌw, txãa paꞌka knxusuꞌj wẽjeçmeethaꞌw. Nawa maa eenteyuꞌ ãhmeesa paꞌka ewmeethaꞌw yũu (1 Korintios 6:9, 10). Pkaal kazxsate weteçxa kũj yahkxnu, Jeuwayuꞌ idxaꞌs peeykãhçxa peltunaĩna, txaꞌwẽy puꞌçxhina ewmeesaꞌs nvxihtkahn.
1. ¿Kĩh yũuwaꞌj jiꞌphkxthaꞌw Jeuwa peltunãykahn?
Teeçx nasa pkaalte weteçxa, wala nxuswaꞌj jiꞌphune Jeuwaꞌs peeykãhn ũs paꞌka. Nawa Jeuwayuꞌ wala kvxiisxãꞌjane nyaafxtey maꞌwne txãjx çxhabaꞌs kvxiisxãꞌj, ãçxhwa txaꞌwẽy. “Iꞌkweꞌsx pkaaltxiꞌs behsa naꞌwẽ yũun kaahte nawa ewmeesaꞌs nvxihtteyuꞌ çxihme naꞌwẽ yũuna”, Jeuwayuꞌ txãꞌwku ptaꞌsxiꞌ (Isaías 1:18). Ewmeesaꞌs jxukate ũus yahkxçxa nvxihtte Jeuwayuꞌ peltunaĩna. ¿Txãa weꞌwnisate maꞌw yũuçxa kxtey yuun kahakxthaꞌw? Pkaal paꞌka wala nxuswaꞌj jiꞌphuneꞌtkhaꞌw, nawa txaꞌwẽy ewmeesaꞌs nvxihtçxa, Jeuwaꞌs peltun pẽhyna. Txãꞌw yũuçxa Jeuwa yakh ew selpiina fxiꞌzeyaꞌ ewuunaꞌw (lẽeywe Isaías 55:6, 7).
2. ¿Pkaalte wetete Jeuwayuꞌ kweꞌsxtxiꞌs maꞌw kikh puꞌçxhi thẽꞌjsaweꞌsx yakh?
Pkaalte wetete Jeuwayuꞌ naꞌwne yuꞌkxpehe: Thẽꞌjsa congregacionteweꞌsxtxiꞌs mpaꞌyawe (lẽeywe Santiago 5:14, 15). Txãaweꞌsxyuꞌ espíritu santoju txhitxhniꞌsayã. Txãaweꞌsxaꞌ Jeuwan peeykãhaneꞌta saꞌ txaꞌwẽy idxnawa peeykãhaneꞌta. Txãa thẽꞌjsaweꞌsxyuꞌ wala jiisayã, kiꞌkin Jeuwa yakh namiku yuuyã puꞌçxhiyã (Gálatas 6:1).
¿Pkaalte wetete thẽꞌjsaweꞌsxyuꞌ maꞌw kitx puꞌçxhi? Thẽꞌjsaweꞌsxyuꞌ puꞌçxhineꞌta Dxus eçte lẽeyna kaajiyuꞌjuneꞌta idx ãhmee yũuniꞌs, txaꞌwẽy kvxiisxãꞌjn yuꞌkxpehn pkaalte peena wetekahmeen. Thẽꞌjsa idx yakh weꞌwçxayuꞌ idxaꞌs kaajiyuꞌjneꞌta kĩh yũuwaꞌj jiꞌphtewa. Txaꞌwẽy pkaalte weteçxa pkaalaꞌs nvxihtyaꞌ walteyuꞌ thẽꞌjsaweꞌsxyuꞌ congregacionu kutxiꞌjiyã, txãꞌw yũuçxayuꞌ congregacionaꞌs nweꞌwyaꞌ ãjayã.
WEJXKWEÇXA PIYAN UꞌJWEKA
Ew jiyuteyuꞌ Jeuwayuꞌ maꞌw kikh puꞌçxh wẽje pkaalte wetete.
3. Pkaalaꞌs kbeesaaĩꞌteyuꞌ puꞌçxhina
Pkaalte wetete Jeuwayuꞌ wala nxusuꞌjne, txãa paꞌka pkaaltxiꞌs kbeesaaĩꞌwaꞌj jiꞌphnetkhaꞌw Jeuwan. Lẽeywe Salmo 32:1-5, txajuꞌ naa paapẽynisatxis paswe:
-
Pkaalaꞌs suthteꞌ wala ewmeesana, ¿kĩh yũuçxa?
Jeuwan pkaalaꞌs kbeesaaĩꞌçxayuꞌ, txaꞌwẽy thẽꞌjsaweꞌsxtxiwa kbeesaawaꞌj jiꞌhneꞌtkhaꞌw, txãꞌw yũuçxa wãt yaatxinaꞌw. Txãa VIDEUꞌS thegwe, txajuꞌ naa paapẽynisatxis paswe.
-
¿Thẽꞌjsaweꞌsxyuꞌ Canonaꞌs maꞌw kitx puꞌçxh Jeuwate sxawẽdkahn?
Pkaalte weteçxa jxuka ptaꞌsxwaꞌj jiꞌphneꞌtkhaꞌw thẽꞌjsaweꞌsxtxiꞌs, txãꞌw yũute wala jxthuhthesana, açyu thẽꞌjsaweꞌsxyuꞌ puꞌçxhna ũstxna. Lẽeywe Santiago 5:16, txajuꞌ naa paapẽynisatxis paswe:
-
¿Thẽꞌjsaweꞌsxtxiꞌs pkaalaꞌ kbeesaaĩꞌte ewmanx?, ¿kĩh yũuçxa?
Thẽꞌjsaweꞌsx yakh weꞌweneꞌga pkaalaꞌs kbeesaaĩyaꞌ, kĩhçxa Jeuwa puꞌçxhniꞌs jxpaꞌkaneꞌga
4. Pkaalteçxaa yũun fxiꞌzetewa Jeuwayuꞌ wala peeykãhçxa puꞌçxhina arrepentĩina ewmeesaꞌs nvxihtkahn
Teeçx yakhthẽꞌj pkaalte weteçxa yuꞌptheꞌjyaꞌ waꞌlte, congregacionu kutxiꞌjneꞌta, txaꞌwẽy txãa yakhwa pkhakheçmeethaꞌw nawa peeykãawaꞌj jiꞌphneꞌtkaꞌw. Lẽeywe 1 Korintios 5:6, 11, txajuꞌ naa paapẽynisatxis paswe:
-
Pan vxit wẽeçxa leçxkweçxa levadura abte txãa masate jxuka peethẽhene. Yakhthẽꞌj pkaalte weteçxa yuꞌptheꞌjyaꞌ waꞌlte, ¿congregacionaꞌs jxuka suwuuyaꞌ ãjamaꞌk?, ¿kĩh yũuçxa?
Pkaalte wetesatxiꞌs Jeuwa wala peeykãꞌjane açaꞌ thẽꞌjsaweꞌsxwa txaꞌwey peeykãhn puꞌçxhwaꞌj jiꞌphyã pkaalte wetesatxiꞌs sxawẽdkahn. Yakhthẽꞌjaꞌs congregacionu kutxiꞌjte ewmee yũupaꞌka nxusna uꞌjuçxa, nawa txãa disciplina wala puꞌçxhine congregacionte sxawedwaꞌj (Salmo 141:5).
• ¿Jeuwayuꞌ maꞌw yũucxa kik juunaꞌme pkaalte wetesatxiꞌs peeykãhçxa wala puꞌçxh wẽje txãjx tasxte sxawedkahn?
5. Arrepentĩite Jeuwa peltunaĩna
Jesús weꞌwnisaꞌ kweꞌsxtxiꞌs puꞌçxhiꞌk jiyuwaꞌj Jeuwa maꞌwka yahkx nasa arrepentĩina ũste. Lẽeywe Lukas 15:1-7, txajuꞌ naa paapẽynisatxis paswe:
-
¿Txãꞌw weꞌwnisa Jeuwate kweꞌsxtxiꞌs kĩhka kaapiyajaꞌ?
Lẽeywe Ezequiel 33:11, txajuꞌ naa paapẽynisatxis paswe:
-
Pkaalte kiꞌ wete wẽemeeçxa, ¿kĩh yũuwaꞌj jiꞌphkxthaꞌw?
Jeuwayuꞌ piisxaa thegsa naꞌwẽsana: txãa paꞌka wala kũj yaatxine txãjx piisxaaweꞌsxtxiꞌs.
MAII NASAWEꞌSXA NAꞌJĨTX: “Thẽꞌjsaweꞌsx yakh weꞌwyaꞌ ũukhuth, ãhmee yũuniꞌs weꞌwte kutxiꞌjiyã sũhçxa”.
-
¿Maꞌw puꞌçxhiguigk txãꞌw yahkxsatxiꞌs?
¿AYTE PAꞌJ KĨHKXTHAꞌW PIYA?
Pkaalte weteçxa kiꞌ arrepentĩite Jeuwayuꞌ peltunaĩna.
¿Kĩh pasuguigk?
-
¿Maꞌw wala ewki pkaalaꞌs Jeuwan kbeesaaĩꞌte?
-
¿Kĩh yũuwaꞌj jiꞌphkxthaꞌw Jeuwa kweꞌsxtxiꞌs peltunãykahn?
-
Pkaal kazxsate weteçxa, ¿kĩh yũuçxa thẽꞌjsatx pakwewaꞌj jiꞌphkxthaꞌw puꞌçxhkahn?
WEJXKWE PIYAYA ÃJANEGA
¿Isaías 1:18 teeçx yakhthẽꞌjaꞌs maꞌw kikh puꞌçxh? Meen theg naa videuꞌs.
¿Nasa pkaalte wetete thẽꞌjsaweꞌsxaꞌ maꞌw puꞌçxhitxki?
“¿Pkaalte wetete maꞌw yũuçxa peeykãawaꞌj jiꞌphkxthaꞌw?” (Ptaꞌsxnĩ, agosto, 2024te)
Thegwe ¿Yakhthẽꞌjaꞌs congregacionu kutxiꞌjte maꞌw peeykãhn puꞌçxhwaꞌj jiꞌphkxthaꞌw?
“¿Maꞌw puꞌçxhikxthaꞌw congregacionu kutxiꞌjnxisatxiꞌs?” (Ptaꞌsxnĩ, agosto, 2024te)
Teeçx yakhthẽꞌjaꞌ Jeuwa tasxte sxawẽdne. Naa experienciaꞌs meen lẽeywe.
“Dxus yuwe txãjx fxiꞌzeniꞌs yuꞌptheꞌjne” (Ptaꞌsxnĩ, 1 abril, 2012te)
