Dxus eç ptaꞌsxne Cristo uuniyãju txãajuy, kaseꞌjneta isa weꞌwsamee Dxus yuwes kaajxpuban (Hechos 20:29, 30). Kxteey yũuneta: isamee ptaꞌsxsa kaꞌdneta Jesus kaapiyaꞌjnisaꞌs ĩsxiin kaapiyaꞌjneta, txaꞌwẽy vxitna kaahneta. Jesus kaapiyaꞌjnisaꞌs naꞌwẽy, nawa txãa yu isasameeneyũu (2 Timoteo 4:3, 4). Kweꞌsxa jiithaꞌw Dxus eçaꞌs kaapiyasa isasaꞌsnetkhaꞌw ptaꞌsxi ¿kĩh yũuçxa?

Een ãhne Jeuwa isasaꞌs ptaꞌsxwa. Dxus naꞌjĩne nmeh eenyũuste, isasaꞌs jiyuni walaana (Daniel 12:4). 1870 añote, nasa kũjmeekwesa pakweneta isasaꞌs, txajuꞌ yũu txaawẽꞌsx uyneta. Txãa pkhakheni Dxus yatsu selpiisaꞌs isasaꞌsmeeneta kaapiyan ũsuꞌ. Açyu txaawẽꞌsxa takhneta Dxus eçaꞌs piyaya, Jesus maꞌwne kaapiyan ũsuꞌ, saꞌ Jeuwa wala puꞌçxhne Dxus eçaꞌs jiyuya.

Piçthẽꞌjwẽꞌsx wala jxpaꞌyahkx Dxus eçaꞌs piyaneta. Txaawẽꞌsx Dxus eç piyasa wala jxpaꞌyahkx, peꞌl peꞌla piyan uꞌjweneta Dxus eçaꞌs. Ãçxhwa kweꞌsxa txaꞌwẽy thaꞌwyũu. Açyu versículos thẽysa uyçxa vxite versículos yakhneta kaajaꞌda ew jiyuya, khĩiçxa kxtee uynisaꞌs fxiꞌjneta. Txajĩiçxa Dxus eça kxteey weꞌwene, saꞌ wala jxthuhthesana, kĩhwa piçthẽꞌjwẽꞌsx kaapiyaꞌjnisamee. Txaawẽꞌsx isasaꞌs uyneta Dxus maꞌw yasetewa, Dxus jxkaawaꞌjaꞌs, Dxus maꞌwyũukx piçthẽꞌjaꞌs vxiteꞌ naa kiwes, uusa maꞌw ũstxkx, txãa kaauseꞌjena. Txaawẽꞌsx jiyuçxa isamee pkhakheni Dxus yatsu selpiiniju kaseꞌjneta (Juan 8:31, 32).

1879 añote, txaawẽꞌsxa wala jiyuneta Dxus yuwes, jxuka nasawẽꞌsxjĩi ptaꞌsxwatewa. Txãa añotey takhneta txãa eçaꞌs vxitna, ãçxh pkaçx dukhna ũsthaꞌw. Txãa yũu naꞌw yase La Atalaya. Anunciando el Reino de Jehová. Ãçxh Dxus yuwes ptaꞌsxithaꞌw 240 çxhab walasuꞌ, saꞌ 750 fxiy yuwetxis. Isasa wala jxuꞌjtewa paꞌjn ũsna.

• Cristo uuniyãju Dxus eç isasa ¿kĩhkik yũu?

• Kweꞌsxa uythaꞌw Dxus eç isasaꞌs ¿maꞌw?